हनुमानध्वाका–स्वयम्भू सम्पदामार्ग निर्माणया थौं छगु ज्याझ्वः दथुइ शिलान्यास जूगु दु। मरु गणेद्यः नाप निसे सम्पदामार्गया शिलान्यास संस्कृति, पर्यटन नाप नागरिक उड्डयन मन्त्री जीवनराम श्रेष्ठं यानादीगु खः।

हनुमानध्वाका व स्वयम्भू निगुलि हे विश्वसम्पदा सूचीइ सूचीकृत जूयाच्वंगु दु। थुगु निगु हृ थाय् यात स्वायेगु कथं २ किलोमिटर सतक निर्माण नाप उगु सतक  नाप स्वाना च्वंगु सतः व मौलिक छेँ न निर्माण व पुनर्निर्माण यायेगु योजना दु ।

मन्त्री श्रेष्ठं कार्यकालय् थःगु न्हापागु ज्या हे सम्पदामार्ग यायेगु धका धयादीगु खः। हनुमानध्वाका–स्वयम्भू सम्पदामार्ग निर्माणसम्बन्धी न्हापागु ज्या थौनिसे न्ह्याःगु खः।

न्ह्याकल नेपाल संवत् न्हूदँ राष्ट्रिय समारोह समिति ११४२ या ग्वसालय् नेपाल संवतया छ्यलाबुला व थुगु संवतया महत्वयात कयाः स्यनेकने ज्याझ्वः जुगु दु ।

थौं  नेपाः ब्याकेटय् समारोह समितिं दँय्दसं पिकयाच्वंगु तिथिपौ पिथनाया दुजः लिसें अङ्क विज्ञान ज्योतिष देवनारायण महर्जनं थथे स्यनेकने यानादिगु खः ।

वयकलं नेपाल संवतया महत्व व थ्व संवत गुगु कथं छयलाच्वंगु दु धइगु खँ ध्वाथुकादिगु खः। ज्याझ्वलय् समारोह समितिया सल्लाकार समितिया संयोजक तीर्थराम डंगोलया सभापतित्वय् जुगु खःसा तिथि पौं उप समितिया दुजः बिष्णु चित्रकारं नं नेपाल संवतया महत्व व छय्लाबुलायात कयाः बिचाः प्वंकादिगु ।

नेपाःया राष्ट्रिय संवत नेपाल संवत थ्व दँय् नं तःजिक हनेत न्हूदँ समारोह समिति निस्वंनिगु जुगु दु।

नेपाल संवत राष्ट्रिय न्हूगु दँ समारोह समिति ११४२ पाखें कौलाथ्व पारु आशिन १० गते येँया नेपाः ब्याकेटय् ११४३ समारोह समिति निस्वने त्यंगु खः।

समारोह समितिया कथं समितिया कार्यबिधि कथं दँय् दँस कौलाथ्व पारुया न्हिं वइगु दँया न्हूदँ न्यायेकेगु नितिं थीथी खलः पुचः व सरोकारवाला पुचःत संस्थागत प्रतिनिधित्व मूनाः समारोह समितिया दुजः समिति निस्वंनेगु व वया लिपा दुजः समिति, थीथी उप समितित निस्वंना ११४३ न्हूगु दँया नितिं न्हूम्ह नायः ल्ययेगु व न्हूम्ह नायःया नेतृत्वय् ज्यासना पुचः निस्वना न्हूदँ न्यायेकेगु यानाच्वंगु खः ।

११४२ न्हूदँ समारोह समितिया नायः कथं आः नीरञ्नरत्न शाक्य जुयाच्वनादिगु दु ।

प्रेस काउन्सिलं पत्रकारिताख्यलय् थीथी कथं योगदानयाःपिन्त थीथी सिरपा लःल्हाःगु देछागु दु।

सम्माननीय राष्ट्रपति विद्या भण्डारीं शितल निवासय् जूगु छगू ज्याझ्वःया दथुइ थथे सिरपा लःल्हाना दीगु खः। थ्वहे झ्वलय् विधागत पत्रकारिता सिरपा थीथी संचार ख्यलय् आबद्ध विजयरत्न तुलाधरयात नं लःल्हागु खः ।

अथेहे गोपालदास पत्रकारिता सिरपा पत्रकार हरिबहादुर थापा, प्रेस काउन्सिल सुरेन्द्रबहादुर बस्नेत पत्रकारिता सिरपा झापाया पत्रकार माधव विद्रोही, प्रेस काउन्सिल आचारसंहिता सिरपा अन्नपूर्ण दैनिक व वीरगंजया आवाज एफएमयात लःल्हागु खः। प्रेस काउन्सिल सशक्त लेखन सिरपा सुरेन्द्र काफ्ले, दिलबहादुर छन्त्याल, नवराज छत्कुली व बालकृष्ण अधिकारीयात बिःगु खः।

भाषागत पत्रकारिता सिरपा टेकराज थामी, क्रियाशील पत्रकारिता सिरपा दामोदरप्रसाद दवाडी, एकराज पाठक, मनोज जोशी, सुरेश धामी, विमल योगी (विनोद), श्यामनाथ कुँवर, भुपराज खड्का, पुस्कर बुढाथोकी, कृष्ण केसी व नकुल अर्यालयात बिःगु खः। अथेहे युवा पत्रकारिता सिरपा प्रदीप परियार, रविन्द्र काफ्ले, शम्भु दङ्गाल, हरिबोल आचार्य, जीवन लामा, टपेन्द्र कार्की, दशरथ घिमिरे, केशर रोका, मकर श्रेष्ठ, खगेन्द्र भण्डारी, डिबी बुढा, राजेन्द्र धामी, महेश केसी व हिमा चेम्जोङयात बिःगु खः।

साहित्यिक पत्रकारिता सिरपा मायामितु न्यौपाने, महिला सशक्तीकरण पत्रकारिता सिरपा सञ्चिता घिमिरे, सरिताश्री ज्ञवाली, रमा केसी व शारदा गैरे बिःगु खः। समावेशी पत्रकारिता सिरपा अजय गोर्खाली, प्रवीणकुमार शर्मा, हेमबहादुर (कमल) राना व सिराज खानयात बिःगु खः ।

प्रेस काउन्सिल विधागत पत्रकारिता सिरपा विजयरत्न तुलाधर, आनन्द श्रेष्ठ, व जीवन पराजुलीयात लःल्हागु दु । प्रेस काउन्सिल नेपालं थुगुसिया वर्ष कर्मचारी सिरपा वितरण सम्परीक्षण अधिकृत रहमतुल्ला मिया व मिडिया अनुगमनकर्ता लोकराज भट्टया लःल्हागु दु ।

नेवाः पत्रकार राष्ट्रिय दबू यल शाखाया थौं झीक्वःगु दँ मुँज्या व स्वक्वःगु तँमुज्या जूगु दु। छगु ज्याझ्वः दथुइ पत्रकार दबूया अध्यक्ष सुरजबीर बज्राचार्यं उलेज्या यानादीगु खः।

उगु ज्याझ्वलय् पाहाँ कथं नेपाल पत्रकार महासंघ यल शाखाया अध्यक्ष सागर नेपाल व श्रृजना बैद्य पाहाँ कथं झायादीगु खः।

पत्रकार दबू यल शाखाया अध्यक्षय् मन्जु बज्राचार्य सर्वसम्मत कथं निर्वाचित जूगु दु। अथेहे उपाध्यक्षय् लक्ष्मीकुमारी श्रेष्ठ व उपाध्यक्ष सुनिता बाटाजु निर्वाचित जूगु दु।

सचिवय् पूर्णिमा शाक्य, कोषाध्यक्ष कल्पना महर्जन, सह–सचिव कुसुम शाक्यपि निर्वाचित जूगु दु। सदस्यय् बाबुकाजी जल्मी व पवित्रकुमार महर्जन निर्वाचित जूगु खः।

अथेहे केन्द्रीय सभासदय् विसन्तर शाक्य, सागर महर्जन, विकास माली, अनुप शाक्य व सुवीन श्रेष्ठ निर्वाचित जुगु दु।

निर्वाचन कमिटीइया संयोजक नृपेन्द्रलाल श्रेष्ठ, दबू केन्द्रीय बरिष्ठ उपाध्यक्ष व सदस्यय् सह सचिव राजु नापित व केन्द्रीय सदस्य प्रजित शाक्यपि च्वनादीगु खः।