यल महानगरपालिका २० वडा युवा समितिया ग्वसालय् छवाः तक न्ह्याउगु मन्तब्य कला व उद्घोषण प्रशिक्षण क्वचाःगु दु।

यलया ख्वाय् बहीइ लोटस रिसर्च सेन्टरय् जुगु प्रशिक्षण ज्याझ्वलय् नीम्हेसिगु सहभागिता दुगु खः। लोटस रिसर्च सेन्टरया हलय् जुगु समापन समारोहय् यल महानगरपालिका २० वडाध्यक्ष चन्द्रलाल महर्जन मूपाहाँ न दसिपौ लल्हानादीगु खः। वयकलं थःगु नुगः खँ तयेगु झ्वलय् वडां भौतिक विकास जक प्राथमिकताय् मतस्ये वडाय् च्वपिनिगु आर्थिक, सामाजिक नाप ब्यक्तित्व विकासयात न ध्यान बिइ धका धयादीगु खः।

थुग प्रशिक्षण ज्याझ्वलय् छवाःया दुने प्रशिक्षण मन्तब्य नाप उद्घोषण कलापाखे जुगु प्रगतिं थः तसक प्रभावित जुयागु दु धका धयादीगु खः।

नेपाली काँग्रेस २० वडा इकाई समिति सभापति नाप वडा सदस्य शैलेन्द्र शाक्यया सभाध्यक्षतय् जुगु उगु ज्याझ्वलय् वडा सदस्यपि गीता महर्जन, इकाई उपसभापति नाप प्रशिक्षण संयोजक रामगोपाल महर्जन, प्रशिक्षक सुरजवीर बज्राचार्यपिन्स थः थःगु खँ तयादीगु खःसा प्रशिक्षार्थीपिपाखे सानुलाल महर्जन, हिराकाजी शाक्य, मदन महर्जन, प्रमिला शाक्य, पुनिता श्रेष्ठ, रुपकृष्ण कर्माचार्य, राजेन्द्र महर्जन, दुर्गालक्ष्मी शाक्यपिन्स थःपिनिगु  अनुभव कनादीगु खः।

क्रोधकला शिरोमणि धका हस्तकला ख्यलय् नांजाम्ह प्राज्ञ कालु कमालेया डकुमेण्ट्री पितब्वज्या जुगु दु।

उगु ज्याझ्वलय् यलय् निर्वाचितजूपि जनप्रतिनिधिपिन्त न भिन्तुना देछागु खः। उगुु ज्याझ्वलय् बागमति प्रदेशया सांसद शोभा शाक्य व नेपाल ललित कला प्रज्ञा प्रतिष्ठानया कुलपति के के कर्माचार्यया विशेष उपस्थिति दूगु खः।

ज्याझ्वलय् क्रोधकला शिरोमणि कुमालें यलया मेयर चिरिबाबु महर्जनया नापं वडाध्यक्षपिन्त भिन्तुना देछाना दीगु खः। उगु ज्याझ्वलय् कालु कमालेया आधिकारीक वेबपेज सार्वजनिक याःगु खःसा डकुमेण्ट्री न पितब्वज्या याउगु खः।

कुमार यात्रुं च्वयादीगु उगु डकुमेण्ट्रीया अवधारणाव सम्पादन नवराज लामां यानादीगु खः।

सेयर बजाः थौं मंगलबाः ३७.४९ अंकं थहावःगु दु। थौं २३१ कम्पनीया ३७ लाख ६५ हजार ५१६ कित्ता सेयरपाखे १ अर्ब २५ करोड ३७ लाखया कारोवार जुगु दु।

दक्को उपसमूह या १८९ कम्पनीया सेयर भाः थहावःगु दु धका नेप्से न धाउगु दु। कारोबार जुगु मध्ये बागु दर्जन कम्पनीया सेयर भाः सर्किट लेभलं थहावंगु दु।

आँधीखोला व सीवाईसी लघुवित्तया सेयर ९.९९ प्रतिशतं थहावंगु खः। अथेहे सप्तकोशी विकास बैंकया सेयर ९.९८ प्रतिशतं थहावंगु दु। नबिल बैंक ब्यालेन्स फण्ड २ व तेह्रथप पावर कम्पनीया सेयर भाः कुहावंगु दु।

नेपाल टेलिकम, नबिल बैंक, अरुण भ्याली हाइड्रोपावर व नेपाल लाइफ इन्स्योरेन्स कम्पनी थौं यक्को कारोबार जुगु खः थौं यक्को कारोबार जुगु कम्पनीइ थौं यक्को कारोबार जुगु कम्पनीइ थौं यक्को कारोबार जुगु कम्पनीइ खः।

उगु कम्पनीया सेयर ११ करोड ७२ लाख, ४ करोड ३२ लाख, ३ करोड ४४ लाख व ३ करोड २५ लाख बिक्री जुगु खः।

येँ महानगरपालिकाया दक्को कार्यपालिकाया बैठक लाइभ यायेगु घोषणा याम्ह मेयर बालेन साह न आईतवाःया कार्यपालिकाया बैठक लाइभ मयागु दु।

थ्व स्वया न्ह्यःया निगु कार्यपालिकाया बैठक लाइभ जुगु खः। उगु कार्यपालिका वैठकय् नीति तथा कार्यक्रमय् छलफल यायेगु झ्वलय् लाइभ मयाउगुलि ७ नम्बर वडाध्यक्ष विमल कुमार होडां विरोध याउगु खः।

होडां ‘वंगु निगु चाहिँ लाइभ यायेगु, थौं छाय् लाइभ मयायेगु? छिगु इच्छा कथं लाइभ यायेगु खःला?’ धका न्ह्यसः तःगु खः। मेपि वडाध्यक्षपिन्स न होडाया समर्थन यायेवं बालेनं दक्को बैठक लाइभ याये मिले मजु धका लिसः बिउगु खः।

नीति तथा कार्यक्रमय् महानगर दुनेया कर दायरा, मेमेगु विषय जुगुलि लाइभ याये मज्युु धका लिसः बिउगु खः। वडाध्यक्षपिन्स थःगु इच्छा कथं जक लाइभ यायेगु धका विरोध याउगु खः।

‘मेयरं थःगु इच्छा कथं जक लाइभ यायेगु व मयायेगु जुइला? थःत अफ्ठयारो जुइगु विषय चाहिँ लाइभ मयागु धइगु खँय् जिमिगु विरोध खः’ धका वडाध्यक्षपिन्स धाउगु खः।मेगु ८ गते कार्यपालिका बैठक च्वनिइगु जुगु दु।