नेकपा एमालेया अध्यक्ष केपी शर्मा ओलीं देशय् आर्थिक अवस्था श्रीलङ्का थे जुइत्यःगु दु धका टिप्पणी यानादीगु दु।

थौं आइतवाः नेपाल राष्ट्रिय शिक्षक सङ्गठनया १३ क्वःगु राष्ट्रिय महाधिवेशन उलेज्या यानादीसे सम्बोधन यायेगु झ्वलय् अध्यक्ष ओलीं देशय् अर्थतन्त्र श्रीलङ्का थे जुइत्यंगु दु धका धयादीगु खः।

वयकलं धयादीगु दु, छु ईलिपा कर्मचारीपिन्स तलब कायेमखन, व ज्येष्ठ नागरिकपिन्स भत्ता कायेमखन धका अजू चायेमालि मखु धका धयादीगु दु।

देशया अवस्था थथे जुगुलि गठबन्धन सरकार एमालेयात सरकारं हटे याना आनन्द कयाच्वंगु दु धका धयादीगु दु। अध्यक्ष ओलीं विद्यार्थीपिन्त जीवनोपयोगी शिक्षा बिइगु लागि शिक्षकपिन्त इनाप यानादीगु दु।

यलया हरसिद्धि प्याखं येँया पशुपतिइ न्ह्यानाच्वंगु दु।

हरसिद्धि (जलद्यः) प्याखं जयवागेश्वरी दबुलि शुक्रबाःनिसे सुरु जुगु खः।

सरकारं थौं सार्वजनिक बिदा बिउगु दु।

रामनवमीया लसताय् थौं सरकारं सार्वजनिक बिदा बिउगु खः।

चैत २४ गते च्वंगु मन्त्रिपरिषदया बैठकं दक्को सरकारी कार्यालय ्व सार्वजनिक निकायय् सार्वजनिक बिदा बिइगु निर्णय जुगु दु धका गृह मन्त्रालयं धाउगु दु।

स्वनिगलय् थौं हल्का वाः वइगु सम्भावना दु धका मौसमविदं धाउगु दु।

मौसमविदया कथं थौं वाग्मती, गण्डकी, मधेस प्रदेशया पूर्वी क्षेत्र व प्रदेश–१ या छु थासय् वाः वइगु अनुमान दु।

अथेहे बहनि हल्का वाः वयेगु नाप नँन्याइगु सम्भावना दु धका मौसमविदं धाउगु दु।

उपकार लघुवित्त वित्तीय संस्था लिमिटेडं आईपीओया बिक्री खुल्ला यागु दु।

कम्पनीइ प्रतिकित्ता १०० तका अङ्कित मूल्यय् २ करोड ३६ लाख २५ हजार बराबरया २ लाख ३६ हजार २५० कित्ता प्रारम्भिक सार्वजनिक निष्कासन (आईपीओ) या बिक्री खुल्ला याउगु खः।

कम्पनीं पिकाउगु साधारण शेयरय् जारी पुँजीया ० दशमलव ५ प्रतिशत अर्थात ३,२८१ कित्ता शेयर कर्मचारीयात व निष्कासित शेयरया ५ प्रतिशत अर्थात ११,८१३ कित्ता सामूहिक लगानी कोषयात सुरक्षित यानाः ल्यःदनिगु २,२१,१५६ कित्ता शेयरया लागि नागरिकं आवेदन बिइफइगु कम्पनीइ जारी याःगु आह्वान पतिइ न्ह्यथनातःगु दु।

नागरिकं वइगु चैत २९ गतेतक न्यूनतम १० कित्तानिसें अधिकतम १,००० कित्तातकया लागि आवेदन बिइफइसाः थ्व अवधितक मागकथं आवेदन मवसाः वइगु वैशाख ९ गतेतक निष्कासन खुला जुइगु कम्पनीइ धागु दु।