सहकालया द्यः कथं कयातम्ह जन्माद्यःया रथयात्रा थौंनिसे सुरु जुइगु दु।

चैत्र शुक्ल अष्टमीनिसे येँया जमले तीनधारा पाठशालानिसे रथयात्रा सुरु जुइगु खः।

रथयात्राया लागि थौं हे जनबहाःनिसे द्यःयात खटय् तया जात्रायासे जमलया तीनधारा पाठशालाय् यंका रथयात्रा सुरु याइ।

अनं द्यःया थौं असनय् तक यकिइ। थौं असनय् थ्यका बहनि राष्ट्रपति विद्यादेवी भण्डारीं द्यःया दर्शन यायेगु ज्याझ्वः दु।

निर्वाचन प्रचारप्रसारय् सीमित समूहया जक प्रतिनिधित्व जुइगु कथं निर्वाचन आयोगं  आचारसंहिता जारी याउगु दु।

आयोगं म्हिगः शुक्रबाः चान्ह्यनिसे लागु जुइगु कथं निर्णय यासे आचारसंहिताय् निर्वाचनया इलय् दल वा उम्मेदवारं जक थःगु आधिकारिक सामाजिक सञ्जालय् प्रचारप्रसार याये दइ धका धाउगु दु

आचारसंहिता लागु जुगु बारे जानकारी बिइत म्हिगः शुक्रबाः आयोगय् ग्वसाः ग्वंगु पत्रकार सम्मेलनमा प्रमुख निर्वाचन आयुक्त दिनेशकुमार थपलियां निर्वाचनय् प्रतिकूल असर जुइगु विचाः तयेगु व सामग्री प्रचारप्रसार यायेगु रोक लगे यानागु दु धका धाउगु दु। सामाजिक सञ्जालया दुरुपयोग रोके यायेत स्वयाउगु धासे वयकलं सदुपयोग याये इलय् आयोगं प्रोत्साहन हे यायेगु प्रतिक्रिया बिउगु दु।

‘सामाजिक सञ्जालयात प्रयोग याइगुलि निर्वाचन प्रचार प्रसारय् आयोगया छु आपत्ति मदु। आयोगं घोषणापत्र, नीति व मेमेगु धारणा सामाजिक सञ्जालपाखे प्रचारप्रसार याइगु खँय् प्रोत्साहन हे जुइ,’ पत्रकार सम्मेलनय् वयकलं धाउगु दु, ‘निर्वाचनयात प्रतिकूल असर जुइगु सामग्री व गतिविधि मजुइमाः धका जिमिगु च्यूता खः।’

नेपाल राष्ट्र बैंकया गभर्नर महाप्रसाद अधिकारीयात निलम्बन याउगु दु।

सरकारं अधिकारीयात पदमुक्त यायेगु प्रक्रिया न्ह्यने यंका जाँचबुझ समिति दयकेवं नेपाल राष्ट्र बैंक ऐन कथं वयकः स्वतः निलम्बन जुगु दु।

डेपुटी गभर्नर निलम ढुंगानायात आः कार्यबाहकया जिम्मेवारी बिउगु दु। समिति दयके न्ह्यः गृहमन्त्री बालकृष्ण खाँण, अर्थमन्त्री जनादर्न शर्मा, सञ्चारमन्त्री ज्ञानेन्द्रबहादुर कार्की, उर्जामन्त्री पम्फा भुसाल, स्वास्थ्यमन्त्री विरोध खतिवडा व संघीय मामिलामन्त्री राजेन्द्र श्रेष्ठयात जिम्मेवारी बिउगु दु।

’मिस नेवा २०११’ या विजेता सुनिता डंगोलं वइगु स्थानीय तहया निर्वाचनय् थम्हेसिया येँ महानगरपालिकाया मेयरय् उम्मेदवारी बिइगु जुगु दु।

तर स्वतन्त्र उम्मेदवार बिइगु कि दलपाखे बिइगु खः, उकिया निर्णय धाःसा जुगु मदुनि।  थीथी सामाजिक ज्याय् सक्रिय जुया वयाच्वम्ह सुनिता थः येँया विकासया लागि माःगु विकास मोडल तयार दु धका धाउगु दु।

उकिइ फोहोर व्यवस्थापन, ट्राफिक व्यवस्थापन, इन्जिनियरिङ, पूर्वाधार विकास, डिजिटल येँ, खोज विकास व युवा सशक्तीकरण नाप सांस्कृतिक सम्पदा दु धका धाउगु दु। वयकलं थःगु न्हापानिसे राजनीतिइ यायेगु इच्छा दु धका धयादीसे, ’थ्व यक्को बिचाःयाना हे घोषणा यानागु मखु।

थ्व ताः ईनिसे तयारी दुगु व आः ई वःगु थे न च्वंगु दु मेयरय् दनिइगु उकिइ धयागु खः।’ वयकलं नेतृत्व तहय् मिसापिनिगु सहभागिता कम जुगुलि न थःगु  उम्मेदवारीं मेमेपि पार्टीपिन्त न मिसापि नेतृत्वय् न्ह्यने हयेत दबाब जुइ धका धयादीगु खः। नाप, थः ल्याम्ह जुगुलि न न्हगु पुस्ताया नेतृत्वय् विश्वास याइ धका धयादीगु खः।

तर गुलिसिया लोकंह्वाकेगु निति जक याउगु धाउगुलि वयकल) धयादीगु दु, ’जितः लोकह्वाकेगु लागि राजनीतिक पलाः छिनगु मखु। उकिया लागि यक्को लँ दु। जि छगु हे जक कारणं थुगु पलाः छिनागु खः कि दीर्घकालीन राजनीतिइ वया समाजय् ह्यूपाः हये चाहे जू।’

वइगु वैशाख ३० गते जुइगु पालिका चुनावया लागि थौं शुक्रवाः चान्ह्यः १२ बज निसे निर्वाचन आचारसंहिता लागू जुइत्यंगु दु।

निर्वाचन आयोगया बैठकं चान्ह्यः १२ बजेनिसे आचारसंहिता लागू यायेगु निर्णय जुगु दु धका आयोगया प्रवक्ता शालिग्राम शर्मा पौडेल न जानकारी बिउगु दु।

आयोगय् याउगु पत्रकार सम्मेलनय् प्रवक्ता पौडेलं चुनावया ३४ दिं न्ह्यःनिसे आचारसंहिता लागू यायेगु निर्णय जुगु धका धाउगु दु। आचारसंहिता थ्व स्वया न्ह्यः हे नेपाल राजपत्रमा प्रकाशित जुइ धुकुगु दु।

आचारसंहिताय् छु याये दइ व छु याये दइ मखु धका उल्लेख याना तःगु दु। आचारसंहिताय् शैक्षिक संस्थाय् निर्वाचनसम्बन्धी भेला, प्रचार याये दइ मखुगु व्यवस्था दु।

अथेहे सार्वजनिक सम्पत्ति सु न उम्मेदवारया पक्ष वा विपक्षय् प्रयोग जुइमखु, चुनाव नाप सम्बन्धित सूचं स्यके मज्युगु आचारसंहिताय् उल्लेख दु।

राजनीतिक दल नाप उम्मेदवारया निर्वाचन चिं दुगु ज्याकेट, टी–सर्ट, टपुलि, लकेट लगायत छु न पुने मज्युगु व स्केच दयके मदुगु धका धाउगु दु।