सेयर बजारया कारोबारय् थौं मंगलबाः न तसकं कुहावंगु दु।

सोमबाः ४४ अंक  स्वया अप्पो सेयर बजार परिसूचक कुहावंगु खःसा थौं नेप्से मंगलबाः ३४ अंक स्वया अप्पो कुहावंगु दु ।

नेप्से २४०० विन्दु स्वया कुहावये धुकुगु दु। थौं नेप्से ३४.७९ अंकं कुहावंया २३८५.०१ विन्दुइ थ्यंगु दु। नेप्से १.४४ प्रतिशतय् कुहावंगु खः।

२३७ गु कम्पनीया ३७ लाख ८३ हजार कित्ता सेयर १ अर्ब ५२ करोड रुपैयाँ बराबरया खरिद–बिक्री जुगु दु धका नेपाल स्टक एक्सचेन्ज न धाउगु दु।

थौं १३ कम्पनीया सेयर भाः थहावंगु खःसा १७७ कम्पनीया सेयर भाः कुहावंगु दु।

बेलायतय् न बिस्केट जात्रा हंगु दु।

ख्वपय् जक हनिइगु यानाच्वंगु जात्रा बेलायतय् सांकेतिक रूपं हंगु दु।

बेलायतया साउथ इस्ट लण्डनया एसियन कम्युनिटी हलय् परम्परागत पोशाकय् नेवाः समुदायपिन्स रथ साला उगु जात्रा हंगु खः।

राष्ट्रपति विद्यादेवी भण्डारीं वैशाख ३० गते जुइगु स्थानीय तह निर्वाचनया लागि सेना परिचालन यायेगु स्वीकृति बिउगु दु।

राष्ट्रिय सुरक्षा परिषदया चैत १७ गतेया सिफारिस व मन्त्रिपरिषद चैत २४ या निर्णय कथं सेना परिचालनया लागि राष्ट्रपतिं स्वीकृति बियागु धका राष्ट्रपति कार्यालय न विज्ञप्तिपाखे जानकारी बिउगु दु।

प्रधानमन्त्री शेरबहादुर देउवां येँया खाली जग्गा भूमाफियापिनिगु कब्जाय् दु धका धाउगु दु।

मंगलबाः शहरी विकास मन्त्रालयं ग्वसाः ग्वंगु राष्ट्रिय शहरी नीति, शहरी विकास ऐन व युटिलिटी करिडोर ऐन तर्जुमा सम्बन्धी परामर्श गोष्ठीइ प्रधानमन्त्री देउवां अथे धयादीगु खः।

प्रधानमन्त्री देउवां येँ च्वंगु खाली थाय् भूमाफियापिन्स थःगु नामय् ज्या जुयाच्वंगुलि सचेत जुइमाःगु दु धका धयादीगु खः। थुकियाउगु नियन्त्रण याये मफुत धासा भविष्यय् येँ च्वंगु खाली थाय् मदइ धका धाउगु खः।

प्रधानमन्त्री देउवां आः निर्वाचन आयोगं जारी याउगु निर्वाचन आचारसंहितायात ध्यान तया ज्या यायेगु न प्रतिवद्धता प्वकादिगु दु।

बलेफी हाइड्रोपावर कम्पनीया धितोपत्र प्राथमिक सार्वजनिक निष्कासन (आईपीओ) बाँडफाँड जुगु दु।

मंगलबाः सुथय् कम्पनीया सेयर निकासन नाप बिक्री प्रबन्धक ग्लोबल आईएमई क्यापिटलं आईपीओ बाँडफाँड याउँगु खः।

कम्पनी आईपीओया माग स्वया अप्पो आवेदन वःगुलि धितोपत्र निष्कासन व बाँडफाँड नियमावली कथं गोलाप्रथापाखे बाँडफाँड याउगुलि १ लाख ६६ हजार ३४५ म्हेसित १० कित्ता ल्याखं सेयर बिउगु दु।

उकि मध्ये स्वम्हेसित छगु छगु कित्ताया ल्याखं वितरण याउगु खः। वंगु चैत १६ गतेनिसे कम्पनीं १८ करोड २७ लाख ९७ हजार रुपैयाँ बराबरया १८ लाख २७ हजार ९७० कित्ता सेयर निष्कासन याउगु खः।

उकि मध्ये ४ प्रतिशत अर्थात् ७३ हजार ११९ कित्ता सेयर कर्मचारीपिनिगु लागि व ५ प्रतिशत अर्थात् १ लाख ९१ हजार ३९८ कित्ता सेयर सामूहिक लगानी कोष्यात छुटे याना बाँकी १६ लाख ६३ हजार ४५३ कित्ता सेयर सर्वसाधारया लागि आवेदन खुल्ला याउगु खः।