येँया टेकुइ च्वंगु कनक पेट्रोल पम्पय् ट्याङ्की वेल्डिङ यायेगु झ्वलय् ग्याँस विस्फोट जुया निम्ह घाइते जुगु दु।

येँया प्रहरी परिसरया एसपी दिनेशराज मैनालीया कथं इन्धन तयेगु झ्वलय् ट्याङ्कीया पूसा वेल्डिङ यायेगु झ्वलय् ग्यास बिस्फोट जुया  पर्सा जगन्नाथपुर– ३ या ३० दँ दुम्ह किशोरी साह व १८ दँ दुम्ह दिपककुमार साह घाःपाः जुगु खः।

किशोरीया निपा तुतिइ ल्हाः व ख्वाः च्याउगु दु सा दिपकया देपाउगु न्यताः च्याउगु दु धका प्रहरीं धाउगु दु। निम्हेसित उपचारया लागि राष्ट्रिय ट्रमा सेन्टर छ्वःगु दु धका प्रहरीं धाउगु दु।

नेपाल संवत न्हूदँ राष्ट्रिय समारोह समिति ११४२ या दुजःपिं स्थानीय तह निर्वाचनय् निर्वाचित जुयादीपिन्त भिंतुना देछायेगु ज्याझ्वः जुगु दु।

थौं छगु ज्याझ्वः दथुइ समारोह समितिया अध्यक्ष निरञ्जनरत्न शाक्यया सभापतित्वय् जूगु उगु ज्याझ्वलय् समारोह समितिया दुजःपि नवीन मानन्धर येँया १७ वडाया वडाध्यक्ष पदय् व येँँया १२ वडाय् वडा सदस्य पदय् त्याःम्ह नानीहेरा महर्जन, १८ वडाय् वडा सदस्यय् त्याःपि हिराशोभा महर्जन, १७ वडाय् सदस्यय् कमला डंगोलपिन्त भिंतुना देछाउगु खः।

ज्याझ्वलय् समारोह समितिया सल्लाहकार तीर्थराम डंगोल, प्रा.डा.चुन्दा बज्राचार्यं भिंतुना देछानादीगु खः ।

नेकपा एकीकृत समाजवादीया अध्यक्ष माधवकुमार नेपालं मन्त्री हेरफेर जुइगु नियमित प्रक्रिया खः धका धाउगु दु।

समाजवादीं थ्व स्वयापि दक्को मन्त्रीपिन्त लितः सःता न्हुपिनिगु नां सिफारिस याउगु दु।

न्हुपि मन्त्रीपि जीवनराम श्रेष्ठ संस्कृति, पर्यटन तथा नागरिक उड्डयन, मेटमणि चौधरी शहरी विकास, भवानी खापुङ स्वास्थ्य तथा जनसंख्या, शेरबहादुर कुँवर श्रम, रोजगार तथा सामाजिक सुरक्षा मन्त्रीया लागि नां सिफारिस याउगु दु।

अथेहे हीरा केसी स्वास्थ्य तथा जनसंख्या राज्यमन्त्रीइ सिफारिस याउगु दु।

लुँया भाः तोलां थौं खुसः कुहावंगु दु।

थौं लुँ तोलाया ९७ हजार ९ सय रुपैयाँ कायम जुगु दु धका नेपाल सुनचाँदी व्यवसायी महासङ्घं धाउगु दु।

अथेहे वहः तोला न झीन्यातका कुहावंगु दु। वहः तोला झीन्यातका कुहावया १ हजार २ सय ७५ रुपैयाँ न कारोबार जुगु दु धका महासङ्घं धाउगु दु।