स्वनिगः दुने बागमती प्रदेशय् सार्वजनिक सवारी साधन व ट्याक्सीया भाः थकाइगु जुगु दु। बागमती प्रदेश सरकारं भाः समायोजन याउगु खः।

श्रम, रोजगार नाप यातायात व्यवस्था मन्त्रालयं शुक्रबाया निर्णय कथं भाः थकाउगु खः। आः न्हुगु भाः थ्व हे बैसाख १ गतेनिसे लागू जुइ धका मन्त्रालयं धाउगु दु। समायोजन लिपा सार्वजनिक सवारी साधन ५ निसे २० किलोमिटर तक भाः २ निसे ३ रुपैयाँ तक थकाइगु जुगु दु।

न्हुगु भाः कथं ५ किलोमिटर तक २० रुपैयाँ, १० किलोमिटरय् २५ रुपैयाँ, १५ किलोमिटरय् ३० रुपैयाँ, २० किलोमिटर तक ३३ व २० स्वया च्वय् ३८ रुपैयाँ क्वछिउगु दु। अथेहे, ट्याक्सीइ २०० मिटरया भाः १० रुपैयाँ जुगु दु। प्रतीक्षा शुल्क मिनेटं १.२० रुपैया तोके याउगु दु। अप्पोयाना ३० मिनेटतक जक पिइ।

लिपागु इलय् भाः समायोजन जइगु इलय् ५ प्रतिशतं प्रेटोलियम पदार्थया भाः थपघत जूसा उगु कथं हे भाः समायोजन याइ।

नेकपा एमालेया अध्यक्ष केपी ओलीं राष्ट्र बैंकया गभर्नर महाप्रसाद अधिकारीयात सरकारं निलम्बन याउगु गलत खः धका धाउगु दु।

अध्यक्ष ओलीं अर्थतन्त्र स्यकूम्ह मेम्ह मनू तर गभर्नरयात अर्थतन्त्र स्यकूगु धका द्धपः बिया लिकाउगु धइगु ‘वाः नइम्ह छुँ, चोट फयेमाः ब्याँचा’ धइगु उखान थे जुगु धका प्रतिक्रिया बिउगु दु।

शनिबाः थौं येँ ग्वसाः ग्वःगु पार्टीया ज्याझेवलय् सम्बोधन यासे अध्यक्ष ओलीं अर्थतन्त्र बुझे जुम्ह मनू जक बलिया बोका दयकूगु धका धाउगु खः।

‘म्हुतु जाय्क सँ दुम्ह छुँ न वाः नउगु, छपु हे सँ मदुम्ह ब्याय्चायात कारबाही जुल’ वयकल धाउगु दु, ‘वाः नम्ह छुँ चोट फयेमाःम्ह ब्याःचा थे जुगु दु।’

वयकलं धाउगु दु, गभर्नर अधिकारीयात निलम्बन याना सरकारं माओवादीं नियुक्त याना न्यायाधीशया नेतृत्वय् छानबीन समिति दयकूगु द्धपः न बिउगु दु।

अभिनेता भुवन केसीं लोकतन्त्र पार्टीपाखे थःगु येँ महानगरपालिकाया मेयर पदय् उम्मेदवार जुइगु असमर्थ दुगु धका धाउगु दु।

थःम्हेसित मेयर पदया उम्मेदवार दयकूगु धइगु उगु पार्टीया निर्णय धासा साहसिक पलाः धका केसी धाउगु दु।

थौं शनिबाः सामाजिक सञ्जाल फेसबुकया स्टाटस च्वयेगु झ्वलय् अभिनेता केसीं सू न कलाकारं महानगरया मेयर जूया जनताया सेवा यायेगु धइगु स्वाभाविक जुगु, तर कार्यव्यस्तता व प्राविधिक कारण थःम्हेसित उम्मेदवार जुइ मफुगु धका उल्लेख याउगु दु।

स्थानीय तहया निर्वाचनया न्ह्यः यक्को राजनीतिक दलनाप थःगु छलफल यायेगु झ्वलय् स्वागत नेपाल नेतृत्वय् उन्नत लोकतन्त्र पार्टी नाप न छलफल जुगु, तर ठोस निर्णय मजुगु धका केसीं धाउगु दु।

वयकलं थः छु न दलय् आः आबद्ध मदु धका न उल्लेख याउगु दु। केसीं उन्नत लोकतन्त्र पार्टीइ थःगु नैतिक समर्थन दु धका धाउगु दु।

सरकारं कन्ह्यः आइतबाः रामनवमी कुन्हु सार्वजनिक विदा बिइगु जुगु दु।

गृह मन्त्रालयं थौं शनिबाः छगु सूचं प्रकाशनयासे रामनवमीया लसताय् देयन्यक सरकारी कार्यालय, सार्वजनिक निकाय न सार्वजनिक विदा बिइगु निर्णय यायेगु उल्लेख याउगु दु।

नेपाल खड्गी सेवा समितिं थौं छगु ज्याझ्वः दथुइ नाय्, खड्गी, सिंह व शाही समुदायपि झीम्हेसित भिक्षु लुइगु ज्या जुगु दु।

समितिया ग्वसालय् थौं यँेया कंगः द्यः नाप चिबाख्यलय् भिक्षु लुइगुनिति प्रा.डा. नरेशमान बज्राचार्यया नेतृत्वय् जुगु खः। अथेहे समितिं नाय्, खड्गी, सिंह व शाही समुदायपिन्त धर्म गुरुजु प्रशिक्षण ज्याझ्वः न्ह्याका च्वंगु दु।

परम्परानिसे मनू जन्मे जूसानिसे सीइगु इलय् तक संस्कारयात सहज व सुचारु यायेगु कथं गुरुजु व दिक्षित प्राशिक्षण ज्याझ्वः न्ह्याकूगु खः। उगु प्रशिक्षणय् १२ म्हेसित अध्येषणा व केशाधिवाशन शिक्षा बिउगु खः।

प्रा.डा. बज्राचार्यया नेतृत्वय् मेमेपिन्स न प्रशिक्षार्थिपिन्त बौध ज्ञान, भिक्षु आचरण प्रदान याना बौध बिहारय् च्वनेगु कथं शिक्षा बिइत्यंगु खः।