येँ महानगरपालिकाया मेयरय् स्वतन्त्र उम्मेदवार बालेन्द्र साह न ९० हजार २९२ मत ल्याखाय् धुकुलि ३३ हजार २६० मत काये धुकुगु दु।

केशव स्थापितं १७ हजार ६९२ व सिर्जना सिंहं १७ हजार ५७९ मत काउगु दु । आःतक वडा नम्बर १, २, ३, ४, ५, २८, २९, ३० व ३२ या नतिजा सार्वजनिक याये धुकुगु दु। 

महालक्ष्मी नगरपालिकाया मेयरय् नेकपा एमाले व उपमेयरय् नेपाली कांग्रेसया उम्मेदवार विजयी जुगु दु।

मेयरय् हरि गोविन्द श्रेष्ठ व उपमेयरय् लक्ष्मी महर्जन विजयी जुगु दु। मेयर उम्मेदवारय् हरि गोविन्द श्रेष्ठ ९ हजार ३५० मत हया निर्वाचित  जुगु खःसा वयकःया निकटतम प्रतिस्पर्धी माओवादी केन्द्रया शिवप्रसाद कट्टेलं ५ हजार ६५८ मत हःगु खः।

नेकपा एकीकृत समाजवादीया नकुल थापां ३ हजार ८९१ व राप्रपाया प्रविण खत्रीं २ हजार ५९३ मत हःगु खः।

अथेहे उपमेयरय् नेपाली कांग्रेसया उम्मेदवार लक्ष्मी महर्जन ९ हजार ५९१ मत हया विजयी जुगु खःसा नेकपा एमालेया उम्मेदवार विणा सुवेदी ८ हजार ६८३ व राप्रपाया उम्मेदवार रामदेवी महर्जनं २ हजार ६२४ मत हःगु खः।

काभ्रेया बनेपा नगरपालिकाया मेयरय् नेपाली कांग्रेसया शान्तिरत्न शाक्य निर्वाचित जुयादीगु दु।

वय्कलं १३७९३ मत हयादीगु खःसा निकटतम प्रतिस्पर्धी एमालेया रत्नकुश रंजितकारं ११८३५ हःगु खः।

अथेहे उपमेयरय् धासाः एमालेया विमला सापकोटा दाहाल निर्वाचित जुयादीगु खः । वय्कलं ११९९२ मत कयादीगु खःसा  निकटतम प्रतिस्पर्धी एकिकृत समाजवादी रगुबर चौ प्रधानं १०५१५ मत काउगु खः।

उपमेयरया लागि ५ म्हसियां दथुइ धेधेबल्ला जूगु खः। १४ वडा दुगलि न्ह्यगु वडाय् एमाले, खुगु ६ वडाय् नेपाली कांग्रेस व छगु वडाय् एकिकृत समाजवादी त्यागु दु।

नगरपालिकाया मेयरय् नेपाली कांग्रेसया घनश्याम गिरी निर्वाचित जुगु दु।

वयकः थ्व स्वया न्ह्यः न चन्द्रागिरी नगरपालिकाय् मेयर जुयादी धुकुगु खः। ३६ हजार ७०३ मत कुहावंगुलि गिरीं १५ हजार ४७५ मत हःगु खः।

वयकःया निकटम प्रतिस्पर्धी नेकपा एमालेया उत्तमबाबु राउतं १४ हजार ६१ मत हःगु खः। उपमेयरय् नेकपा एमालेया बसन्ती श्रेष्ठ निर्वाचित जुगु खः।

श्रेष्ठं १५ हजार ५६४ मत हःगु खःसा निकटम प्रतिस्पर्धी राष्ट्रिय जनमोर्चा पार्टीया रोसन दानीं ४ हजार ४५९ मत जक हःगु खः। चन्द्रागिरिइ उपमेयर सत्ता गठबन्धनपाखे राष्ट्रिय जनमोर्चायात बिउगु खः।

तर उपमेयरय् १० हजार ४२ मत उम्मेदवार हे मदुगु सिमां चिन्ह्य छाप दुगु वया बदर जुगु खः।

गोदावरी नगरपालिका प्रमुखय् नेपाली काँग्रेसया गजेन्द्र महर्जन विजयी जुगु दु।

महर्जनं १९ हजार १७० मत हया निर्वाचित जुयादीगु खः। वयकःया निकटतम प्रतिद्वन्द्वी नेकपा एमालेया गम्भीरबहादुर रानां १५ हजार २३२ मत हःगु खःसा राष्ट्रिय प्रजातन्त्र पार्टीया राजकुमार महर्जनं १ हजार ४८३ मत काउगु खः।

अथेहे उपप्रमुखय् काँग्रेसया हे मुना अधिकारी १८ हजार ५२६ मत हया विजयी जुगु खः। वयकःया निकटतम प्रतिद्धन्द्वी मत १४ हजार ३०५ हःगु खः।