येँया चोभारय् निर्माण सम्पन्न जुइ धुकुगु सुख्खा बन्दरगाह मंगलबाःनिसे सञ्चालनय् वइगु जुगु दु।

मंगलबाः प्रधानमन्त्री शेरबहादुर देउवां बन्दरगाहया उलेज्या जुइ नेपाल इन्टरमोडल यातायत विकास समिति न धाउगु दु।

येँया सुख्खा बन्दरगाह सञ्चालनय् वये धुका समुन्द्री बन्दरगाह जुया व्यवसायीपिनिगु सामान तःपिकं येँ हे जाँच पास कायेफइगु जुगु दु।

आः उकियाना आयात व निर्यात लागत समेत कम जुइ धका व्यवसायीपिन्स धाय.उगु दु। समितिया कार्यकारी निर्देशकया कथं बन्दरगाहया उलेज्या मंगलबाः न्हिनय् २ बजेया लागि तय जुइ धुकुगु दु।

वीरगञ्जं माल वस्तु क्वबिया हया डिजिटल लकिङ याना येँ वया कन्टेनरयात बन्दरगाहय् प्रधानमन्त्रीं दुकाया बन्दरगाह सञ्चालन जुगु घोषणा याना ज्याझ्वः जुइ धका समितिं धाउगु दु।

राष्ट्रपति विद्यादेवी भण्डारीं येँ देय्या ऐतिहासिक सम्पदा मरु सतः (काष्ठमण्डप) या लोकार्पण यानादीगु दु।

थौं सोमवाः मरुइ जूगु छगू समारोहया दथुइ राष्ट्रपति भण्डारीं मरु सतः सर्वसाधारणया लागिं नं खुल्ला जूगु संकेत स्वरुप थुकिया उलेज्या यानादीगु खः । राष्ट्रपति विद्यादेवी भण्डारीं मरु सतःया मू लुखाय् तयातःगु सिजःपौ अनावरण यासें मरु सतःया लोकर्पण यानादीगु खः। लोकार्पणया लागिं काष्ठमण्डप पुनर्निर्माण समितिया अध्यक्ष नाप सांसद राजेश शाक्यं येँ मनपाया मेयर विद्यासुन्दर शाक्ययात मरु सतःया ताःचा लःल्हानादीगु खः।

वयां लिपा मेयर शाक्यं उगु ताःचा राष्ट्रपति भण्डारीयात लःल्हानादिलसा राष्ट्रपतिपाखें वहे ताःचापाखें लुखा चायेकाः सांकेतिक रुपं मरु सतः सकस्यां लागिं खुल्ला जूगु घोषणा यानादी खः । वयां लिपा राष्ट्रपति भण्डारीं मरु सतः येँ महानगरपालिकायात हस्तान्तरण याःगु संकेत स्वरुप उगु माःताःचा मेयर विद्यासुन्दर शाक्ययात लःल्हानादीगु खः । मरु सतः लोकार्पण ज्याझ्वः याये न्ह्यः जूगु समारोहयात सम्बोधन यासें

राष्ट्रपति भण्डारीं मरु सतः धस्वाःगु धइगु सम्पूर्ण राष्ट्रया लागिं हे लसताया खँ खः धयादिल । वय्कलं धयादिल, ‘थःगु हे स्रोत, साधन व सीप छ्यलाः मरु सतः दयेकूगु कारणं झीगु सम्पदा निर्माण व पुनर्निर्माण यायेत झी थः हे सक्षम खः धइगु खँ प्रमाणित जूगु दु ।’

वि.सं. २०७२ सालया तःभुखाय् लिपा नेपाःमित धइपिं न्ह्यागु हे दुःख व विपतया इलय् नं छधी छप्पँ जुयाः थःपिंत वःगु विपत समाधान यानाः न्ह्याः वनेफु धइगु खँ प्रमाणित जूगु दु धासें राष्ट्रपति भण्डारीं धयादिल, ‘उकिया दसि खः काष्ठमण्डपया पुनर्निर्माण ।’ मरु सतः पुनर्निर्माण सम्पन्न जूगु खँय् वय्कलं येँ महानगरपालिका, पुनर्निर्माण समिति व सकल महानगरवासीयात नं बधाई बियादिल।

अथे हे ज्याझ्वलय् सम्बोधन यासें येँ महानगरपालिकाया मेयर विद्यासुन्दर शाक्यं नेपाःया सम्पदा निर्माण यायेगु लागिं सुं नं विदेशीयाके ध्यबा काये माःगु आवश्यकता मदु, सम्पदा निर्माण यायेगु क्षमता व दक्षता झीके अझ नं दनि धइगु खँ मरु सतःया पुनर्निर्माणपाखें पुष्टि जूगु दु धयादिल ।

येँ महानगरपालिकाय् थःपिं निर्वाचित जुयाः वयेधुंकाः सम्पदा निर्माण व पुनर्निर्माणया ख्यलय् यक्व हे ज्या जूगु दु धासें वय्कलं न्हापा सम्पदा पुनर्निर्माण यायेगु लागिं उखेंथुखें ब्वाँय् जुइ माःथाय् थौंकन्हय् थःपिं हे जनताया छेँय् छेँय् वनाः गुथिछेँ, क्वाःपाःछेँ, द्यःछेँ, देगः, सतः, फल्चा दयेकेमाःसा जिमिसं दयेका बी धकाः धाः जुयाच्वनागु खँ कनादिल ।

अथे हे मरु सतः दुने तयातःगु गोरखनाथ व प्यम्ह गणेद्यःया मूर्ति न्हूगु तल धइगु बारे अदालतलिसे महानगरपालिकाया छुंहे विवाद मदुगु व अदालतं छु निर्णय यात वहे स्वीकार याये धकाः थःपिंसं धायेधुंकूगुलिं आः विषयय् अप्वः विवाद पिकया च्वनेमाःगु आवश्यकता मदुगु खँ नं मेयर शाक्यं स्पष्ट यानादिल । लसकुस न्वचु बीगु झ्वलय् काष्ठमण्डप पुनर्निर्माण समितिया नायः लिसें सांसद राजेश शाक्यं मरु सतः दयेकेगु लागिं येँ महानगरपालिकां सम्पूर्ण आर्थिक भार व्यहोरे याःगु जानकारी यासें समाजया आपालं विज्ञ, व्यक्ति एवं निकायया ग्वाहालि दयाः मरु सतः दयेकेत ताःलाःगु खः धयादिल ।

वय्कलं धयादिल, ‘केपी ओली प्रधानमन्त्री जुयादीगु इलय् तःभुखाचं क्षति जूगु मरु सतः, धरहरा व लानिपुखू तुरुन्त हे पुनर्निर्माण यायेमाः धकाः नीति दयेकूगु खः । जिमिसं काष्ठमण्डप दयेकाः उगु नीतियात नं सार्थक यानागु दु ।’ ज्याझ्वलय् सम्बोधन यासें पुरातत्व विभागया महानिर्देशक दामोदर गौतमं मरु सतः दुगु लागाय् इशापूर्व १०५० पाखे हे जंगल दुगु व अन कृषिया ज्या जुइधुंकूगु दुसा ईशापूर्व १० पाखे मानव वस्ती खने दयेधुंकूगु खँ कनादिल । लिसें वय्कलं मरु सतः विश्व सम्पदाय् लाःगु ‘क’ वर्गया सम्पदा खः धासें थ्व सतः सन् ६३५ निसें ६७० तकया दुने निर्माण जूगु प्रमाण लुया वःगु खँ नं कनादिल ।

अथे हे पुनर्निर्माण समितिया दुजः अरुणा नकर्मीं मरु सतः स्रोत, साधन व सीपया ल्याखं नं पूर्ण रुपं नेपाली सम्पदा खः धयादिल । समितिया सल्लाहकार प्रा.डा. प्रेमनाथ मास्कें नब्बे सालया भुखाचय् मरु सतः दुना मवं तर ०७२ सालया भुखाचय् पाःताः जुइक दुना वन, थ्व दुना वंगुया कारण थुकियात इलय् ब्यलय् मर्मत सम्भार मयाःगुलिं हे खः धासें आः झीसं इलय् ब्यलय् मर्मत यायेगु ज्यायात नं प्राथमिकता बीमाः धयादिल । उगु ज्याझ्वलय् मरु सतः पुनर्निर्माण यायेगु ज्याय्  ग्वाहालि याःपिं थीथी व्यक्तिपिंत हनापौ द्यछासें सम्मान यायेगु ज्या नं जूगु खः ।

 प्रधानमन्त्री शेरबहादुर देउवा स्वन्हुया भारत भ्रमण क्वचाय्का स्वदेश लिहावंगु दु।

आइतबाः प्रम देउवां बनारसय् ललिताघाट, पशुपतिनाथ देगः नाप वृद्धाश्रमया शिलान्यास यानादीगु खः। बनारसपाखे नयाँदिल्ली जुया येँ लिहावंगु खः।

भारतया औपचारिक भ्रमणय् प्रधानमन्त्री देउवां जनकपुर–जयनगर रेल सेवा व सोलु कोरिडोर मंकाः कथं भर्चुअल माध्यमं उलेज्या यानादीगु खः।

देउवाया उगु भ्रमणय् नेपाः व  भारत दथुइ प्यंगु विषय सम्झौता तक जुगु खः।

सरकारं खुगु कम्पनीयात कालोसूचीइ तःगु दु। सार्वजनिक खरिद अनुगमन कार्यालय न छगु सूचं पिकया निर्माण नाप आपूर्तिय् आबद्ध छगु कम्पनीयात स्वदँया लागिु व मेगु न्यागु कम्पनीयात दच्छिया लागि कालोसूचीइ तःगु दु।

उगु कम्पनीं कालोसूची दुगु इलय् सार्वजनिक निकाय न छु न खरिद कारबाहीलय् ब्बति कायेदइ मखु धका सूचं पिकाउगुलि उल्लेख दु। खुगु कम्पनी मध्ये छगु भारतीय कम्पनी टीबीईएयात स्वदँया लागिु व न्यागु नेपाली कम्पनीयात दच्छिया निति कालोसूचीइ तःगु खः।

नेपाली कम्पनी चिराग कन्स्ट्रक्म्सन गोरखा, कर्णाली बिल्डर्स धनुषा, फैजल एण्ड अफजल कन्स्ट्रक्सन रौतहट, कुरालदेव निर्माण सेवा रसुवा व तितुङ कन्स्ट्रक्सन काठमाण्डौ खः।

२०७२ सालया तःभुखाचं क्षतिग्रस्त जूगु येँया ऐतिहासिक मरु सतः पुनर्निर्माण लिपा छगु ज्याझ्वः दथुइ थौं राष्ट्रपति विद्यादेवी भण्डारीं थुकिया लोकार्पण यानादीगु ग्वसाः दु।

काष्ठमण्डप पुनर्निर्माण समितिं बिउगु जानकारी कथं थौं न्हिनसिया १ ताः इलय् राष्ट्रपति विद्यादेवी भण्डारीं थुकिया लोकार्पण यानादीगु ग्वसाः दु ।

येँ महानगरपालिकाया पहलय् गठन जूगु काष्ठमण्डप पुनर्निर्माण समितिपाखें मुक्कं स्वदँ व च्याला बिकाः थुकिया पुर्निर्माण सम्पन्न याःगु खः । पुनर्निर्माणया ज्या ताः ई न्ह्यः हे क्वचाःगु खःसां थीथी कारणं यानाः उलेज्या लिबानाच्वंगु खःसां राष्ट्रपतिपाखें ई प्राप्त जूगुलिं थौं हे थुकिया उलेज्या यायेत्यंगु खः ।

थौं उलेज्या जुइत्यंगु बारे म्हिगः पुनर्निर्माण समितिपाखें याःगु पत्रकार सम्मेलनय् न्ववासें समितिया नायः लिसें सांसद राजेश शाक्यं मरु सतः पुनर्निर्माण लिपा थुकिया उलेज्यायात ‘उद्घाटन’ मधासे ‘लोकार्पण’ खँग्वः छ्यलागु खँ कनादिल । मरु सतः सम्बन्धी किंवदन्तीकथं गबलय् तक चि व चिकंया भाः छगू हे जुइ मखु अबलय् तक मरु सतःया निर्माण पूर्ण जुइ मखु धइगु मान्यता दुगु जुयाः आः पुनर्निर्माण लिपा नं थ्व ज्या अझं अपूर्ण हे तिनि धइगु विश्वास कथं थुकियात उद्घाटन मयासे लोकार्पण यायेत्यनागु खँ वय्कलं कनादिल ।

अथे हे मरु सतःदुने पलिस्था याःगु गोरखनाथ व प्यम्ह गणेद्यःया मूर्ति पुलांगुया थासय् न्हूगु तल धकाः सर्वोच्च अदालतय् मुद्दा लानाच्वंगु बारे वय्कलं धयादिल, ‘थ्व मुद्दा काष्ठमण्डप बारे लाःगु मखु । थ्व मुद्दा मूर्तिया बारे जक खः । थुकियाबारे सर्वोच्च अदालतं भदौ ५ गते फैसला बीगु खँ दु ।

अबलय् सर्वोच्चपाखें छु फैसला वइ, वहे कथं ज्या याना वनेगु प्रतिवद्धता जिमिसं प्वंकागु दु ।’पुनर्निर्माण समितिया सचिव गौतम डंगोलं झीगु धार्मिक मान्यताय् स्यंगु मूर्ति पुजा याये मजिउ धइगु विश्वास दुगु जुयाः थीथी धार्मिक निकाय व विद्वानतय्गु रायकथं हे पुलांगु स्यंगु मूर्तिया थासय् न्हूगु तयागु जानकारी बियादिल ।

अथे खःसां पुरातात्विक मान्यताकथं पुलांगु मूर्तियात पुरातत्व विभागं हे सुरक्षित यानातःगु खँ नं वय्कलं कनादिल । थौं जुइगु लोकर्पण ज्याझ्वलय् राष्ट्रपति भण्डारीयात पुनर्निर्माण समितिपाखें मरु सतःया ताःचा लःल्हाइ । राष्ट्रपतिं रिबन चायेकाः दुने निरीक्षण यानादी । वयां लिपा ताःचा येँ महानगरपालिकाया मेयर विद्यासुन्दर शाक्ययात लःल्हानादी ।

थ्व धुंकाः मरु सतः येँ महानगरपालिकाया मातहत वइ । मरु सतःया पुनर्निर्माण येँ महानगरपालिकां उपलब्ध याःगु झिंछगूत्या करोड तकाया बजेटं हे निर्माण जूगु खः।