यलय याक घोडाजात्रा सुरु जुगु दु। यलया ओल्खुटोलया अष्टमान महर्जन मंगलबजाःया मूलचुकः उगु याक घोडाजात्रा न्ह्याकूगु खः।

मूलचुकं सुरु जुया ओल्खु, नेउत, लोहलँ, भोल गणेश जुया बालकुमारीइ थ्यकूगु खः। बालकुमारीया सिवाचा द्यःया थाय् चाःहिला हाकन भोलध्वाकाय् लिहावनिइगु खः। थुगु याक घोडेजात्रा येँया तीनख्यः स्वया पुलागु मानेयाना तःगु दु।

थुगु जात्रा स्थानीयपिनिगु कथं मल्लकालनिसे न्ह्याना वयाच्वंगु महाभारतकालीन पात्रया प्रयोग याना थुगु जात्रा हनाच्वंगु खः।

यलया ओल्खु चिबहाः त्वाःया ज्यापु समुदाय न महाभारतया पात्र न्याम्ह पाण्डवया मूर्ति दुगु मंगलबजाःया भिंद्यःया थाय् छ्वयलाभु याना मेँ बलि बिइगु याइ।

गुठीया थकालीं विधिपूर्वक पूजा याना आजुपिन्स ल्यःम्हेसित गुठियारपि मध्ये छम्हेसित घोडा गयेका नापं भिंद्यःया थासं स्वांमा क्वखाय्का सिन्हं टिकिइगु याइ।

थुगु दँय् अष्टमान महर्जनया मौका वंगु खः।

शिक्षा व मानव स्रोत विकास केन्द्र न वइगु आर्थिक वर्ष २०७९÷०८० या लागि कार्यक्रम तर्जुमा यायेत विद्यालयया आधारभूत विवरण छ्वयेत स्थानीय तहयात निर्देशन बिउगु दु।

केन्द्र न छगु सूचं जारी यासे विवरण चैत्र २२ गते दुने अनलाइनपाखे अद्यावधिक यायेत व उगु फारामया प्रमाणित प्रति इमेल यायेत इनाप याउगु दु।

आर्थिक वर्ष २०७९÷०८० या बार्षिक कार्यक्रम नाप बजेट तयारीया ज्या लिपागु चरणय् थ्यंगु दु व एकीकृत शैक्षिक व्यवस्थापन सूचना प्रणाली (आईईएमआईएस) या प्रविष्ट विवरण बजेट बिनियोजन प्रयोजनया लागि सत्यापन यायेमाःगुलि अद्यावधिक यायेत इनाप याउगु दु।

वंगु २४ घण्टाया दुने देयन्यक थप २२ म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं २ हजार ५१६ म्हेसिगु पीसीआर परीक्षण याउगुलि १६ म्ह व १ हजार ३१९ म्हेसिगु एन्टीजेन परीक्षण याना खुम्हयाना २२ म्हेसित संक्रमण पुष्टि जुगु दु।

वंगु २४ घण्टाय् ७५ म्ह कोरोनामुक्त जुगु दु।

प्रधानमन्त्री शेरबहादुर देउवाया स्वन्हुया औपचारिक भ्रमणया लागि भारतया नयाँदिल्ली प्रस्थान याउगु दु।

प्यम्ह मन्त्रीनाप नेपाली प्रतिनिधिमण्डलया नेतृत्व यासे प्रधानमन्त्री देउवा दिल्ली प्रस्थान याउगु खः।

प्रधानमन्त्रीयात विदाई यायेत सभामुख अग्नि सापकोटा, गृहमन्त्री बालकृष्ण खाँण लगायत विमानस्थल वःगु।

लुँ तोला थौं च्यासः थहावंगु दु । लुँ तोलां च्यासः थहावना ९९ हजार ७ सय रुपैयाँ थ्यंगु दु धका नेपाल सुनचाँदी व्यवसायी महासंघ धाउगु दु।

अथेहे वहः तोला न झीतका थहावंगु दु। वहः तोलां झीतका थहावना १३ सय ५० रुपैयाँ न कारोबार जुगु दु धका महासंघ धाउगु दु।