येँ महानगरपालिका वडा नं. २५ या अध्यक्षय् नेपाली कांग्रेसया उम्मेदवार राजेश डंगोल निर्वाचित जुगु दु।

डंगोलं ९१३ मत हःगु खःसा वयकःया निकटतम प्रतिस्पर्धी नेकपा एकीकृत समाजवादीया बाबुराजा महर्जनं ८०१ मत हःगु खः।

वडाया महिला सदस्यय् १ हजार ११७ मत हया रुपा प्रजापती, खुल्ला वडा सदस्यय् ९३५ मत हःया कृष्ण प्रजापती व ९३२ मत हयाः लिनोदवीर सिंह तुलाधर निर्वाचित जुगु खः।

यल महानगरपालिका वडा २१ या वडाध्यक्षय् माओवादी केन्द्रया रविन्द्र महर्जन निर्वाचित जुयादीगु दु।

वय्कलं ११९९ मत हया निर्वाचित जुगु खः। वय्कःया प्रतिस्पर्धी एमालेया ज्ञानभक्त डंगोलं ११८० मत हःगु खःसा नेपाली कांग्रेसया नेपाल डंगोलं ७५०, राप्रपाया पंचराम महर्जनं ३० मत हःगु खः।

यल महानगरपालिका वडा १६ या वडाध्यक्षय् नेपाली कांग्रेसया निर्मलरत्न शाक्य निर्वाचित जुयादीगु दु।

वय्कलं २३७३ मत हःया निर्वाचित जुगु खः। अथेहे वय्कःया प्रतिस्पर्धी एमालेया सुप्रभा शाक्यं १६३८ मत हःगु खःसा राप्रपाया विसन्तर शाक्यं ६३४, माओवादीया राजेन्द्र शाक्यं ४२१  मत हःगु खः।

यल महानगरपालिका वडा १७ या वडाध्यक्षय् एमालेया विनोद महर्जन निर्वाचित जुगु दु।

वय्कलं १०६९ मत हःगु खःसाः वय्कःया प्रतिस्पर्धी नेपाली कांग्रेसया तिर्थ महर्जनं ६०२ मत हःगु खः।अथेहे राप्रपाया केशव बहादुर श्रेष्ठं ३१७ मत हःगु खः।

नेपाल आयल निगमं इन्धनया भाः हाकन थकाउगु दु।

थौं आइतबाः चान्ह्यःनिसे लागू जुइगु कथं पेट्रोल, डिजेल व मचिकनय् लिटरं झीतका थकाउगु दु धका आयल निगमं धाउगु दु।

आः छगु लिटर पेट्रोलया १८० रुपैया थ्यःगु दु। अथेहे मचिकं व डिजेल लिटरं १६३ रुपैयाँ थ्यःगु दु। जा थुइगु एलपी ग्यासया भाः छगः सिलिण्डरं २०० रुपैयाँ थकाना आः १८०० रुपैयाँ थ्यकूगु दु।

अथेहे हवाई इन्धन (अन्तरिकपाखे) झीतका थकाया लिटरं १६६ रुपैयाँ थ्यकउगु दु धका आयल निगमं धाउगु दु।