चितवनया भरतपुर महानगरपालिकाया मेयरय् उम्मेदवार जूम्ह जगन्नाथ पौडेलं थःगु उम्मेदवारीइ सत्ता गठबन्धनया नेतापिन्स क्वह्यःगु टिप्पणी याउगु दु धका धाउगु दु।

थः मेयरय् दनागुलि पूर्वप्रधानमन्त्रीपिन्स देश बर्बाद जुइगु टिप्पणी याउगुलि थःत ग्लानी जुगु दु धका धयादीगु दु। थौं शनिबाः भरतपुरय् समर्थकपिन्त सम्बोधन यायेगु झ्वलय् उम्मेदवार पौडेलं धाउगु दु, ‘‘प्रजातन्त्र वःगु दु, सू मनखं चुनाव ल्वाये धाय्वं आकाश कुतु वइला? सू न मनूखं चुनाव ल्वाइ, त्याइ बुइ।

थ्व ला मतदातापिनिगु निर्णय जुइ। प्रधानमन्त्री जुइ धुकुपिन्स थज्यागु टिप्पणी याउगुलि जितः आत्मग्लानी जुगु दु।” वयलक धाउगु दु गठबन्धननाप थःगु छु न सम्बन्ध मदुगु, ‘मेयर दनिवं देशय् बर्बाद हे जुइ। गठबन्धन त्वाःधइगु। आकाश कुतुव वइगु कथं खँ जुगु। थ्व अजु चाइपुगु जुगु दु।’

सत्तारुढ दलया चुनावी गठबन्धनं थौं मधेश प्रदेश जनकपुरय् जुइगु आमसभाय् कांग्रेस नेता विमलेन्द्र निधिं बहिष्कार याइगु जुगु दु।

गठबन्धनं याइगु सभाय् केन्द्रीय वक्ता कथं थःगु नां मतयेत नेता निधि धाउगु दु। धनुषा निधिया थःगु गृह जिल्ला खः।

जनकपुरय् जुइगु ज्याझ्वः त्वःता नेता निधि धरानया चुनावी  सभाय् ब्बति वनेत्यःगु खः। पार्टीया केन्द्रीय वक्ता कथं प्रधानमन्त्री शेरबहादुर देउवा, नेता रामचन्द्र पौडेल, सहमहामन्त्रीपि भिष्मराज आङदेम्बे व महेन्द्र यादवपिनिगु नां दु।

लुँ तोलां थौं खुसः कुहावंगु दु। म्हिगः बिहीबाः तोलां १४ सय रुपैयाँ थहावःगु खः।

थौं लुँ तोलां ९८ हजार रुपैयाँ तोके याउगु दु धका नेपाल सुनचाँदी व्यवसायी महासंघं धाउगु दु।

अथेहे वहः तोलां न नीन्यातका कुहावंगु दु। वहः तोलां नीन्यातका कुहावया १२ सय ८० रुपैयाँ तोके याउगु दु धका महासंघं धाउगु दु।

मोरङया बेलबारीइ मेयर उम्मेदवारया गाडीइ मिँतया बिउगु दु।

बेलबारी नगरपालिकाउ् राप्रपापाखे मेयरया उम्मेदवार जूम्ह खेमप्रसाद गौतमया बा १२ च ९३८४ नम्बरया कारय् मिँ तयाबिउगु खः।

प्रहरीया कथं बेलबारी–२ छेँ पार्किङ यानातःगु अवस्थाय् थौं शुक्रबाः सुथय् २ बजेति मिँ तया बिउगु खः। स्थानीय तह निर्वाचनया लागि मेयरय् उम्मेदवारी बियातम्ह गौतमं पार्टीया ध्वाँय् व मेयर नाप उपमेयर उम्मेदवार निम्हसियागु न फोटा दुगु ब्यानर तयातःगु उगु कार प्रयोग याना वयाच्वंगु खः।

देयन्यक ७५३ पालिकाय् चुनावया लागि मेयर व अध्यक्षय् ६ हजार २९३ नगरपालिकाय् मेयरया लागि २२९ म्ह व ४६० गाउँपालिकाया अध्यक्षय् १५५ मिसापि उम्मेदवार जुगु निर्वाचन आयोगया तथ्याङ्कय् दु।

मेयरय् मिजंपि ३ हजार ९ म्ह दु सा अध्यक्षय् २ हजार ९ सय ३७ म्ह दु। नगरय् मेयर उम्मेदवारी बिउपि मिसापि जम्मा ७ प्रतिशत व गाउँपालिका अध्यक्षय् ५ प्रतिशत दु सा उपमेयरय् भचा अप्पो दु।

उपमेयर व उपाध्यक्ष याना ४ हजार १ सय २७ उम्मेदवार मिसापि ३ हजार ७७ म्ह दु । देयन्यक ६ हजार ७ सय ४३ वडाय् अध्यक्षया लागि ३२ हजार ४ सय ९७ म्ह उम्मेदवारपि दु।

उकि मध्ये मिसापि ९ सय ४७ अर्थात ३ प्रतिशत जक दु। हरेक वडाय् निम्ह खुला सदस्यपि दु। उकिइ ५३ हजार १ सय ७३ म्ह उम्मेदवार दु। मिसा २ हजार ४ सय ७ व मिजंपि ५० हजार ७ सय ६६ पि दु। हरेक वडाय् छम्ह मिसा व छम्ह दलित मिसा सदस्य अनिवार्य याउगु दु।

मिसा सदस्य २५ हजार ५ सय ९६ म्ह व दलित मिसा सदस्य २३ हजार २ सय ८४ म्ह दु धका निर्वाचन आयोगया तथ्याङ्कय् दु।