वरिष्ठ पत्रकार नाप साहित्यकार, नेवाः न्ह्यलुवाः मल्ल के सुन्दरयात गोविन्द वियोगी सम्मान देछाइगु जूगु दु।

सम्पादक समाजं मल्ल के सुन्दरयात सम्मान यायेगु खँ क्वःछ्यूगु खः। मल्ल के सुन्दर नाप थुगु सम्मान वरिष्ठ पत्रकार पुरुषोत्तम दाहाल व कृष्णा ताम्राकारयात नं लःल्हाइगु निर्णय जूगु दु।

अथे हे गोविन्द पत्रकारिता सिरपाः हिमालय टेलिभिजनया राजेन्द्र बानियाँ व विशेष पत्रकारिता सिरपाः राससया बिष्णुप्रसाद नेपालयात लःल्हाइगु जूगु दु।

समाजं थुगुसीया सिरपाः लःल्हायेगु ज्याझ्वः शिवपुरीइ दयेकूगु गोविन्द वियोगी पत्रकारिता अध्ययन केन्द्रय् यायेत्यंगु दु।

येँ महानगरपालिकाया मेयर विद्यासुन्दर शाक्यं पार्टी न जिम्मेवारी बिउसा हाकनं स्थानीय तह निर्वाचनय् उम्मेदवारी बिइ धका धयादीगु दु।

वइगु स्थानीय तह निर्वाचनय् न येँ नेकपा एमाले विजयी जुइगु दाबी न यानादीगु दु। येँ महानगरपालिका–२१ गोफल त्वालय् श्रीधर नारायणया फल्चा व पार्कया शिलान्यास यायेगु झ्वलय् अथे धयादीगु खः।

मेयर शाक्यं पार्टी न सुयात उम्मेदवार दयकल निर्वाचन त्याइगु कथं तयारी अवस्थाय् दु धका धयादीगु दु। ‘वइगु निर्वाचनया लागि आः हे उम्मेदवारी बिइ धका धाये मखु। जि छम्ह पार्टीया कार्यकर्ता खः ।

पार्टी न मागु कथं छु जिम्मेवारी बिल, व पार्टी न निर्णय याइगु खँ खः । मेगु महानगरवासीको चाहना छु खः? व थुइका पार्टी न जिम्मा बिया ज्या याइगु खः, मखुसा पार्टी न सुयात जिम्मा बिल येँ महानगरपालिकाय् जिपि हे त्याइगु तयारी अवस्थाय् दु’ धका मेयर शाक्यं धयादीगु दु।

मेयर शाक्यं महानगरपालिका ऐतिहासिक, सांस्कृतिक सम्पदायात संरक्षण, संवर्द्धन व पर्यटननाप स्वायेगु ज्या महानगरं यानाच्वनागु धका धयादीगु खः।

यलया सुनाकोठीइ च्वंगु बालकुमारी द्यः वंगु माघ ८ गते तःगु लुगु दु।

प्रमुख जिल्ला अधिकारी घनश्याम उपाध्यायं खुमलटारया क्लासिक टावर लिउने छगु देगलय् थौं सुथय् उगु द्यः लुगु जानकारी बिउगु दु।

‘प्रहरी प्रशासनं अत्यन्त दबावमूलक अनुसन्धान, प्राथमिकता व स्थानीयपिनिगु कुतलं उगु द्यः लुगु खः,’ धका वयकलं धाउगु खः।

यलया प्रहरी प्रमुख यज्ञविनोद पोखरेलया कथं सशस्त्र प्रहरीया क्याम्प न्ह्यने करूणा द्यःया थाय् लुगु खः। उगु द्यः प्रहरीं जावलाखेलय् हये धुकुगु दु।

छु ई आः सुनाकोठी छ्वयेगु तयारी जुयाच्वंगु दु

लुँया भाः तोलां थौं न्यासः थहावंगु दु।

लुँ तोलां न्यासः थहावना ९३ हजार ९ सय रुपैयाँ थ्यंगु दु धका नेपाल सुनचाँदी व्यवसायी महासङ्घ धाउगु दु।

अथेहे थौं वहः धासा स्थिर जुया म्हिगः थे तोलाया १२ सय ८० रुपैयाँ कारोबार जुगु दु धका महासङ्घं धाउगु दु।

नेकपा माओवादी केन्द्रया अध्यक्ष पुष्पकमल दाहाल ‘प्रचण्ड’ व नेपाली कांग्रेसया नेता डा. शेखर कोइराला दथुइ भेटवार्ता जुगु दु।

नेता कोइराला भेटवार्ताया लागि थौं सुथय् प्रचण्ड निवास खुमलटार वना नापलाउगु खः। एमसीसी, स्थानीय चुनाव लगायतया विषय छलफल जुगु खः।

प्रचण्डं चुनावय् गठबन्धन यायेगु प्रस्ताव तःगु खः तर कोइरालां थः चुनावी गठबन्धनया पक्षय् मदु धका धाउगु खः। ‘गठबन्धन यायेगु खःसा सरकारय् याये, तर चुनावय् जि छु न हालतय् गठबन्धन यायेमखु,’ धका कोइरालां धाउगु खः।