नेप्से थौं शून्य दशमलव ०८ अङ्क थहावना २ हजार ७ सय दशमलव ९८ विन्दुइ थ्यंगु दु।

थौं जीवन बीमा, होटल तथा पर्यटन, विकास बैंक, जलविद्युत्, फाइनान्स, मोइक्रोफाइनान्स व मेमेगु समूहया शेयर थहावंगु दु।

२ सय २७ कम्पनीया ७५ लाख ४९ हजार कित्ता शेयर ३ अर्ब ६८ करोड ४० लाखया किनबेच जुगु खः। दकलय् अप्पो नेशनल हाइड्रोपावरया ५४ करोड ९१ लाख बराबरया शेयर किनबेच जुगु खः।

थौं बुद्धभूमि नेपाल हाइड्रोपावरया शेयर ८ प्रतिशतं थहावगु दु। मैलुङ खोला जलविद्युत् कम्पनीया शेयर धासा ४ प्रतिशतं घटे जुगु दु ।

वंगु २४ घण्टाया दुने देयन्यक थप ७४७ कोरोना भाइरस (कोभिड–१९) या संक्रमण पुष्टि जुगु दु।

अथेहे थप च्याम्ह कोरोना सक्रमितपिनिगु ज्यान वंगु दु। स्वास्थ्य तथा जनसंख्या मन्त्रालयया कथं देयन्यक ८ हजार ६९६ म्हेसिगु नमुना परीक्षण याउगु दु।

६ हजार २७९ म्हेसिगु नमुना पीसीआर परीक्षण यनउगुलि ४८२ म्ह व २ हजार ४१७ म्हेसिगु एन्टीजेन परीक्षण याउगुलि २६५ म्ह याना ७४७ म्हैसित संक्रमण पुष्टि जुगु दु।

वंगु २४ घण्टाय् २ हजार ३१९ म्ह संक्रमणमुक्त जुगु दु।

अमेरिकी सहयोग नियोग मिलेनियम च्यालेन्ज कम्प्याक्ट (एमसीसी) विरुद्ध २२ म्ह दलीय गठबन्धनं विरोध प्रदर्शन याउगु दु।

एमसीसी सम्झौता खारेजीया माग यासे थीथी २२ गु दलया मंकाः गठबन्धनं थौं येँ माइतीघरनिसे न्हुगु बानेश्वरतक विरोध प्रदर्शन याउगु खः।

उमिसं एमसीसी सम्झौता खारेज याः, एमसीसी म्वाः, देश मिइ दइ मखु,नेपाल विदेशी स्वार्थया लागि परेड म्हितिइगु थाय् मखु लगायतया नारा थ्वयका प्रदर्शनय् कुहावंगु खः।

उगु प्रदर्शनय् नेकपा (मसाल), नेकपा (क्रान्तिकारी माओवादी), नेकपा (माले), राष्ट्रिय जनमोर्चा, नेपाल, देशभक्त जनगणतान्त्रिक मोर्चा, नेपाल कम्युनिस्ट पार्टी, नेकपा (माओवादी केन्द्र), राष्ट्रिय जागरण मञ्चलगायत सहभागी दुगु खः।

नेपाल संवत न्हूदँ राष्ट्रिय समारोह समिति ११४२ पाखें न्हापाम्ह न्हूदँ समारोह समितिया अध्यक्ष प्रा. सुवर्ण शाक्ययात हनीगु जूगु दु।

समारोह समितिया मुँज्यां प्रा. शाक्ययात हनेगु निर्णय याःगु खः। समारोह समितिं थुगु दँनिसें नेपाल संवत आन्दोनलय् योगदान बिउपं संस्था, व्यक्ति, खलः पुचःयात दँय् दसं हनेगु निर्णय याःगु खः।

प्रा. शाक्यं नेपाल संवतया आन्दोलन न्ह्याकेगु नितिं समारोह समितिया न्हापांम्ह नायः जुयाः ज्या यानादीगु व तःदँ न्ह्यःनिसें न्हूदँया लसताय् सफू पिथनेगु लिसें तुच्चा ज्याझ्वः यानाः वयाच्वंगु व न्हूदँया आन्दोलनयात थपू यायेगु नितिं वय्कलं निरन्तर रुपं यानावयाच्वंगु ज्यायात लुमंकूसें थथे हनेगु निर्णय याःगु खः ।

समितिं ब्यूगु जानकारी कथं वय्कःयात थ्वहे वइगु शुक्रवाः छगू ज्याझ्वःया दथुइ हनेज्या यायेत्यंगु खः।

थौं हिलंयंक भ्यालेन्टाइन्स डे अर्थात् प्रेम दिवस हनेज्या जुयाच्वंगु दु । ल्याम्ह ल्यासिकं थुकियात विशेष महत्वया नखः कथं हनेगु याःगु दु ।

नेपालय् नं लिपांगु छुं दँ निसें भ्यालेन्टाइ डेलय् विशेष चहःपहः खनेदइगु याःगु दु । थुगु दिं मतिना ह्यमिपिन्सं छम्हसिनं मेम्हसित थी थी द्वहलपा बिया मतिना क्यनिगु व थःपिन्त यःम्ह मनू न्ह्योने थःगु मतिना प्रस्ताव तयेगु याः ।

भ्यालेन्टाइन्स डे या औपचारिक शुरुवात सन् २६९खय् रोमनं जूगु नालेगु याः । थुगु दिवसलिसे छगू दुःखान्त मतिनाया बाखँ स्वागु दु । तत्कालीन रोमन सम्राट क्लाउडियस द्वितीयं थः सैनिकयात मनिता व इहिपाः यायेगुलिइ रोक तःगु खः ।

मतिना व इहिपाःलं सैनिक कमजोर जुइ व युद्धलिसे स्वागु गोप्य सूचं सार्वजनिक जुइ धइगु विचाःलं सम्राट क्लाउडियसं थुकिइ बन्देज तःगु खः । तर सम्राटया नियम मयेकुपिं मध्ये रोमनया पादरी सन्त भ्यालेन्टाइनं मतिनया पक्षय् सः थ्वयेकल ।

वयेकलं प्रतिबन्ध हाचांगाना आपालं सैनिकया सार्वजनिक रुपये इहिपाः याकल । सम्राटं वयेकयात ज्वना मृत्युदण्डया कसा न्यंका जेलय् तल । वयेकयात सन् २६९ या फेब्रअरी १४ य् मृत्युदण्ड बिउगु खः ।

सन्त भ्यालेन्टाइनं मतिनाया नितिं याःगु त्यागया लुमन्तिइ हलिंयंक दँय्दसं १४ फेब्रुअरीइ प्रेम दिवसया रुपय् भ्यालेन्टाइन डे हनेगु याःगु खः ।