नेप्से परिसूचक थौं आइतवाः १ सय स्वया अप्पो अङ्कं घटे जुगु दु।

नेप्से थौं १ सय १ दशमलव २४ अङ्कं घटे जुया २ हजार ७ सय दशमलव ३२ अङ्कं कुहावःगु दु। थौं दक्को समूहया शेयर घटे जुगु सा बीमा समूह, विकास बैंक, उत्पादन समूह, माइक्रोफाइनान्स, फाइनान्स व जलविद्युत् समूहया शेयर तधःगु अङ्कं घटे जुगु दु।

थौं २ सय २७ कम्पनीया १ करोड १६ लाख कित्ता शेयर ५ अर्ब ९७ करोड रुपैयाँया कारोबार जुगु खः। दकलय् अप्पो तामाकोशीया ३२ करोड रुपैयाँया शेयर किनबेच जुगु खः।

थौं माथिल्लो तामाकोशी व नारायणी विकास बैंकया शेयर दकलय् अप्पो ८ प्रतिशत स्वया अप्पोे घटे जुगु दु। समग्र बजाः घटे जूसा न्यागु कम्पनीया शेयर सामान्य थहावंगु दु।

वंगु २४ घण्टाया दुने देयन्यक ५२१ म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं ६ हजार ३७ म्हेसिगु पंीसीआर परीक्षण याउलि ४२१ म्ह व ४ हजार ७८ म्हेसित एन्टिजेन परीक्षण याउगुलि ९४ म्ह याना ५२१ म्हेसित संक्रमण पुष्टि जुगु दु।

मन्त्रालयया कथं वंगु २४ घण्टाया संक्रमण दर करिब ७ प्रतिशत दुगु खः। अथेहे २४ घण्टाय् कोरोना संक्रमणया कारण झीम्हेसिगु ज्यान वंगु दु। थौं ३ हजार ९३५ म्ह संक्रमणमुक्त जुगु दु।

स्वास्थ्य मन्त्रालयया कथं येँ ९७, यलय् ४४, मोरङय् ४०, कास्कीइ ३६, झापाय् २३, सुनसरीइ १३ व रुपन्देहीइ १२ म्हेसित कोरोना संक्रमण पुष्टि जुगु दु।

प्रेस चौतारी नेपालया थौं च्वंगु सचिवालय बैठकं प्रेस चौतारी नेपालया गुक्वःगु राष्ट्रिय महाधिवेशन थ्व हे वइगु फागुन २७ व २८ गते पोखराय् यायेगु निर्णय याउगु दु।

थ्व स्वया न्ह्यः वंगु माघ २२ गतेया लागि तोके याउगु महाधिवेशन कोरोना महामारीया कारण लिछाउगु दु।

चौतारीया अध्यक्ष गणेश बस्नेतया अध्यक्षताय् थौं च्वंगु बैठकं प्रदेश अधिवेशन थ्व हे फागुन २१ गते यायेगु निर्णय जुगु खः।

सभामुख अग्निप्रसाद सापकोटां सर्वदलीय बैठक सःतुगु दु।

सभामुख सापकोटाया सचिवालय कथं सोमबाः न्हिनसिया २ बजे बैठक सःतुगु दु धका धाउगु दु।

प्रधानन्यायाधीश चोलेन्द्रशमशेर जबराविरुद्ध संसदय् महाअभियोग प्रस्ताव दर्ता जुगुलि राजनीतिक घटनाक्रमबारे छलफलया लागि सभामुख सापकोटां बैठक सःतुगु खः धका धाउगु दु।

सोमबाः निर्धारित प्रतिनिधिसभा बैठक धासा फागुन ४ गते तकया निति स्थगित याउगु दु।

नेकपा माओवादी केन्द्रया अध्यक्ष पुष्पकमल दाहाल ‘प्रचण्ड’ व एकीकृत समाजवादीया अध्यक्ष माधवकुमार नेपाल अमेरिकी सहयोग परियोजना मिलेनियम च्यालेन्ज कम्प्याक्ट (एमसीसी) संसदया टेबल यायेत सहमत जुगु दु।

स्रोतया कथं सभामुख अग्निप्रसाद सापकोटा न सहमत जुगुलि सम्भवतः बुधबाः ४ फागुनया बैठकय् एमसीसी टेबल यायेत्यंगु खः। सोमबाः तय जुगु प्रतिनिधि सभाया बैठक निन्हु सारे याना फागुन ४ गते सःतुगु दु।

प्रधानमन्त्री शेरबहादुर देउवां एमसीसी संसदय् टेबल यायेत निरन्तर कुतः याना वयाच्वंगु खः। तर सत्तारुढ माओवादी व एकीकृत समाजवादी सहमत मजुगु खः।

सभामुख सापकोटा न राष्ट्रिय वा सत्तारुढ गठबन्धनया सहमति मजुकं एमसीसी टेबल मयायेगु अडान कयावयाच्वंगु खः। तर अमेरिकां एमसीसी सम्झौता प्रतिनिधिसभापाखे अनुमोदनया लागि २८ फेब्रुअरी अर्थात १६ फागुन तक ई बिउगु खः।