दक्षिणपूर्वी एसियाली देय्पिनिगु आः वइगु शिखर सम्मेलनय् जुइगु थाइल्यान्ड व कम्बोडिया दथुया शान्ति सम्झौताया औपचारिक ल्हाःचिं ज्याझ्वलय् अमेरिकाया राष्ट्रपति डोनाल्ड ट्रम्पया नं ब्वति दइगु ग्वसाः देय् मलेसियाया विदेशमन्त्री मोहम्मद हसनं मङ्गलबाः धयादीगु दु।

वंगु जुलाईलय् थाइल्यान्ड व कम्बोडिया दथुया तनाव थुगु दसकया हे दकसिबे घाटक सैन्य झडपय् हिलावंबले पीम्हसिबें अप्वः मनूत सीगु खःसा थ्यंमथ्यं ३ लाख मनूत विस्थापित जुयाः थःगु थाय् बाय् त्वःताः वनेमाःगु धाःगु दु।ल्वापू लिपा नं छम्हेस्यां मेम्हेसित थितुं थिक युद्धविराम हाचांगाःगु द्वपं बियाच्वंपिं निगूलिं देय्पिसं लिपांगु इलय् युद्धविरामय् सहमत जूगु खः।

डोनाल्ड ट्रम्प थाइल्यान्ड–कोलम्बिया शान्ति सम्झौता स्वयेत मन दयेकाच्वंगु मोहम्मद हुसेनं क्वालालम्पुरय् जूगु पत्रकार सम्मेलनय् धयादीगु खः। अक्टोबर २६–२८ तक मलेसियाया राजधानीइ जुइगु दक्षिणपूर्वी एसियाली देय्पिनिगु मंकाः सङ्गठन (आसियान)या शिखर सम्मेलनय् अमेरिकी राष्ट्रपति ट्रम्पया नं ब्वति दइगु अपेक्षा यानातःगु दु।

कम्बोडियाया प्रधानमन्त्र िहुन मानेटं द्वन्द्व अन्त्य यायेगु ‘न्हूगु कूटनीति’या जस बिसें अमेरिकी राष्ट्र ट्रम्पयात नोबेल शान्ति सिरपाःया निंतिं मनोनयन यानागु धयादीगु दु।थाइल्यान्डया प्रधानमन्त्री अनुतिन चार्नविराकुलं वंगु वाः थःत ट्रम्पपाखें छगू पौ वःगु व वय्कलं निगू जःला खःला देय् दथुया तनाव सुल जूगु स्वये मन दूगु धयादीगु खः।

इक्वेडरया राष्ट्रपति ड्यानियल नोबोआयात लक्षितयासे अप्पां क्ययेकूगु दु। राष्ट्रपति नोबोआ सवार गाडीयात झण्डै न्यासः मनूतय्सं अप्पां कय्कूगु खः।

राष्ट्रपति धाःसा सुरक्षित जुगु दु। इक्वेडरय् डिजेल अनुदान चिइकेगु अन तनाव जूगु खः।प्रदर्शनकारी व सुरक्षाकःमि दथुइ झडप जुगु खः। राष्ट्रपति नोबोआयात लक्षित यासे हत्या यायेगुु द्धपनय् न्याम्हेसित ज्वःगु दु।

सन् २०२३ अप्रिल महिनाय् सुडानया सशस्त्र सेना व अर्धसैनिक तीव्र समर्थन सेना दथुइ युद्ध ब्वलनेधुंकाः कम्ती नं ३२ म्ह पत्रकार सीगु सुडानया पत्रकार सिन्डिकेटं आइतबाः घोषणा याःगु दु।

सिन्डिकेटया प्रमुख अब्देल मोनेम अबु इद्रिसं धाःगु दु, “देशय् सशस्त्र द्वन्द्व सुरु जूगु इलंनिसें ३२ म्ह पत्रकार सीगु दुसा पत्रकारतय्त गिरफ्तारी, हिरासत व शारीरिक आक्रमण लिसेंया ५०० स्वयां अप्वः उल्लंघन जूगु दु।” अबु इद्रिसं अन्तर्राष्ट्रिय संगठनतय्त पत्रकारतय्त संरक्षणया निंतिं पलाः न्ह्याकेत व एल फशेरं उमित पितिनेगु निंतिं सुरक्षित करिडोर स्थापित यायेत इनाप याःगु दु।

वंगु महिनाय् संयुक्त राष्ट्र संघं सुडानया उत्तरी डार्फर राज्यया राजधानी एल फाशरयात ५०० न्हु स्वयां अप्वः ई आरएसएफं घेराबन्दीइ तये धुंकाः ‘दुःखया केन्द्रविन्दु’ धकाः वर्णन याःगु खः। इद्रिसं मिसा व मिजं निम्हं आपालं पत्रकारत शहरय् फसे जुयाच्वंगु, सर्वसाधारणया थें हे कष्टया सामना यानाच्वंगु व अवस्था स्यनाच्वंगुलिं थःगु ज्या न्ह्याके मफया च्वंगु टिप्पणी यानादीगु दु। शनिवाः एल फशेरया अल–दराजा अल–औला त्वालय् च्वंगु छेँयात लक्षित यानाः आरएसएफं ड्रोन आक्रमण यानाः सीम्ह पत्रकार अल नूर सुलेमानया निधनया निंतिं सिन्डिकेटं शोक व्यक्त याःगु खः।

एसएएफ व आरएसएफ दथुइ जुयाच्वंगु द्वन्द्वया कारणं सलंसः पत्रकारत मिसा व मिजंत द्वन्द्व क्षेत्रं बिस्युं वनाः सुरक्षा मालेत बाध्य जूगु दुसा आपालं मनूतय्सं थःगु ज्या यायेगु थाय् वा देय् तकं त्वःताः वंगु दु। सिन्डिकेटपाखें थ्व स्वयां न्ह्यःया तथ्यांक कथं थ्यंमथ्यं १५० म्ह पत्रकारत खार्तुमं मेमेगु क्षेत्रय् स्थानान्तरण जूगु दुसा थ्यंमथ्यं ७० म्ह पत्रकार जःला खःला देशय् बिस्युं वंगु दु। युद्धं द्वलंद्वः मनूतय्गु ज्यान वंगु दुसा आन्तरिक व सीमापार लखौं मनूत विस्थापित जूगु दु, गुकिं न्हापा हे गम्भीर मानवीय संकटयात अझ तच्वयेकूगु दु।