अफगानिस्तानय् थौ चान्ह्य भुखाय् ब्बया नीम्ह मनू सीउगु दु। पाकिस्तानया सीमा नापं अफगानिस्तानया पूर्वी क्षेत्रय् स्थानीय ई कथं चान्ह्यः ११ः४७ बजे ६.० तीव्रताया भुखाय् ब्बया ११५ म्ह स्वया अप्पो मनू घाःपाः जुगु दु धका बीबीसीं धाःगु दु।

८ किमि (५ माइल) क्वय् न वःगु उगु भुखाय् स्वकः तक पराकम्पन वःगु खः। एएफपीया कथं, छु सेकेन्ड तक भुखाय् ब्बया अफगानिस्तानया राजधानी काबुल (करिब २०० किमि तापाक्क) व पाकिस्तानया राजधानी इस्लामाबाद (करिब ४०० किमि तापाक्क) तक सकूगु खः।

प्रभावित प्रान्त दुर्गम जूगुलि यक्को मनूत सी फूगु धका  कठोर भूभाग अनुमान याःगु दु।

श्रीलंकाया पूर्व राष्ट्रपति रनिल विक्रमसिंघेयात ज्वंगु दु।सरकारी ध्यवा दुरुपयोग याःगु द्धपनय् विक्रमसिंघेयात ज्वंगु धका बीबीसी हिन्दीं धाःगु दु। विक्रमसिंघेयात राष्ट्रपति कार्यकालय् याःगु विदेश यात्रा नाप सम्बन्धित खः।

सन् २०२३ य् न्यूयोर्कय् जूगु संयुक्त राष्ट्र महासभाय् लिहा वयेगु झ्वलय् विक्रमसिंघेया कलायात तक निजी ज्याया निति लण्डनय् दिउगु ख। उगु झ्वलय् खर्च सरकारी कोषपाखे व्यहोरेय् याःगु द्धपः दु।

विक्रमसिंघेयात शुक्रवाः राजधानी कोलम्बोया मजिस्ट्रेट अदालतय् पेश याइ। थ्व स्वया न्ह्यः विक्रमसिंघेयात आपराधिक अनुसन्धान विभाग (सीआईडी) न बयान काये धकुगु दु। विक्रमसिंघे सन् २०२२ निसे २०२४ तक श्रीलंकाया राष्ट्रपति जुगु खः।

थाइल्याण्डया पूर्वप्रधानमन्त्री थाक्सिन सिनावात्रा विरुद्धया देशद्रोहया मुद्दा अदालतं खारेज याःगु दु । सिनावात्रां थ्यंमथ्यं १० दँ न्ह्यः दक्षिण कोरियाया छगू पत्रिकायात ब्यूगु अन्तर्वार्ताय् राजतन्त्रया अपमान याःगु द्वपं ब्यूगु बीबीसीं जानकारी ब्यूगु दु।

यदि दोषी ठहर जूसा १५ दँ तक जेल सजाय जुइफुगु खः।थाइल्याण्डया कडा देशद्रोह कानून कथं जुजु, लानी वा युवराजविरुद्ध अपमानजनक टिप्पणी यायेगु अपराधया रुपय् काःगु दु। तर लिपांगु दँय् थ्व कानूनया प्रयोग यानाः कार्यकर्ता व विपक्षी दलयात दमन यायेगु ज्या जुयाच्वंगु दु। अदालतं धाःसा थाक्सिनं प्रत्यक्ष नां मकाःगुलिं अपराध लुइके मफुगु धाःगु दु।थाक्सिनया म्ह्याय् व पदच्युत जूम्ह प्रधानमन्त्री फट्थोङथराम सिनावात्रा विरुद्धया मुद्दा क्वचायेत्यंगु इलय् थ्व फैसला जूगु खः।

अदालतया थ्व फैसलायात वया समर्थकतय् निंतिं सकारात्मक पलाःया रुपय् काःगु दुसा थाक्सिनयात धाःसा थप मुद्दा चले जुइफुगु समाचार वःगु दु।

रुसं पश्चिमी युक्रेनय् तःधंगु क्षेप्यास्त्र व ड्रोन आक्रमण याःगु दु। युक्रेनया अधिकारीपिन्सं थुगु वालय् रुसं पश्चिमी युक्रेनय् तःधंगु क्षेप्यास्त्र व ड्रोन आक्रमण याःगु थ्व निक्वःगुखुसि जूगु धाःगु दु।

रुसं लच्छिया दकलय् तःधंगु आक्रमण याःगु बीबीसीं अधिकारीपिन्त उद्धृत यासें जानकारी ब्यूगु दु। रुसं ५७४ ड्रोन व ४० क्षेप्यास्त्र प्रहार याःगु बुखँय् न्ह्यथनातःगु दु।रुसं युक्रेनया जापोरिजिया, द्निप्रोपेट्रोभस्क व लभिभयात लक्षित याःगु खः। आक्रमणय् लानाः छम्ह मनू सीगु दुसा १५ म्ह घाःपाः जूगु दु।

निकट भविष्यय् रुसी राष्ट्रपति भ्लादिमिर पुटिन व युक्रेनया राष्ट्रपति भोलोदिमिर जेलेन्स्की दथुइ जुइगु शान्ति वार्ताया विश्लेषण जुयाच्वंगु इलय् रुसं युक्रेनयात आक्रमणयात तच्वयेकूगु दु।अमेरिकाया राष्ट्रपति डोनाल्ड ट्रम्प व पुटिन दथुइ अलास्काय् युक्रेनय् युद्धविरामया बारे सहलह जूगु खः। भेट लिपा ट्रम्पं युक्रेनया राष्ट्रपति जेलेन्स्कीयात ह्वाइट हाउसय् ब्वनादीगु खः।

जेलेन्स्कीलिसेया भेटवार्ता लिपा ट्रम्पं त्रिपक्षीय वार्ताया सम्भावना न्ह्यःने हःगु खः। तर निगुलिं देय्या थःथःगु अडानया हुनिं थुकिं गति काये फयाच्वंगु मदुनि।जेलेन्स्कीया सम्भावित वार्ता युरोपया गनं तटस्थ जुइमाःगु इच्छा दु । जेलेन्स्कीं सम्भावित वार्ता स्वीट्जरल्याण्ड वा अस्ट्रियाय् जुइफुगु खँ धाःगु दु।

वय्कलं टर्कीया इस्तानबुलय् नं वार्ता जुइफुगु खँ धयादीगु दु।युक्रेनया विदेशमन्त्री आन्द्रे सिबिहां लिपांगु इलय् जूगु रुसी आक्रमणं युद्ध अन्त्य यायेत कूटनीतिक संवाद व सशक्त वायु प्रतिरक्षा प्रणाली गुलि महत्वपूर्ण व आवश्यक जूगु क्यंगु धाःगु दु।

इजरायलं गाजाय् याःगु आक्रमणय् लानाः म्हतीइ नं ८१ म्ह प्यालेस्टाइनी सीगु दु। इजरायली सेनां गाजाया दकले तःधंगु शहरी केन्द्र गाजा शहर कब्जा यायेत योजनाबद्ध आक्रमणया न्हापांगु चरण न्ह्याकूगु धाःगु दु।

अल जजीरां अन थ्यंमथ्यं १० लाख मनूतय्गु अवस्था गम्भीर जूगु जानकारी ब्यूगु दु।थौं जक स्वम्ह प्यालेस्टाइनी भोकमरीया कारणं सीगु दु। थ्व नापं भोकमरीं सीपिनिगु ल्याः ११२ म्ह मस्तलिसें २६९ म्ह थ्यंगु दु।

इजरायलया आक्रमणया झ्वलय् दक्षिणी गाजाय् विस्थापित प्यालेस्टाइनीत च्वनाच्वंगु टेन्ट क्याम्पय् जूगु हवाई आक्रमणय् लानाः स्वम्ह मनूत सीगु खः।