Display Style:
Column Style
अमेरिका व युरोपियन युनियनया इरानयात कुंख्यना
बछलागा त्रयोदशी ११४१,असार २३ बुधवाः
अमेरिका व युरोपियन युनियन, ईयूं इरानं युरेनियम धातु उत्पादन यायेगु निर्णययात कुंख्यंगु दु ।
अन्तर्राष्ट्रिय आणविक उर्जा एजेन्सी, आईएईएं इरानं युरेनियम उत्पादनया ज्याझ्वःयात २०गू प्रतिशतं अप्वयेकेगु योजना न्ह्यब्वःगु दाबी याःगु दु । इरानं युएन आईएईएयात २०गू प्रतिशत शुद्ध युरेनियम धातु उत्पादनया योजना न्ह्यब्वःगु खः ।
थ्व सुचंलिसे हलिंया शक्तिशाली राष्ट्र उकियात विरोध यानाः विपक्षय् दंगु दु । इरानया युरेनियम उत्पादनया घोषणालिसे भियनाय् जुइगु धयातःगु युरेनियमसम्बन्धि मंका कार्ययोजनाया वार्ता न त प्रभावित जूगु दु ।
अमेरिकी विदेश विभागया प्रवक्ता नेड प्राइसं परमाणु हतियार उत्पादनय् प्रतिबन्ध तयातःगु खःसां उकिया विरुद्ध पलाः छ्यूगु धासें इरानयात विरोध याःगु खः ।
थःपिं वंगु ईलय्या सहमति पालना यायेत इमान्दार जुयागु खःसां इरानं उकियात बेवास्ता यानाः न्ह्यज्याःगु धासें युरेनियम उत्पादनया ज्याझ्वः दिकेत धागु दु ।
बलिउडया लोकह्वाम्ह अभिनेता दिलीप कुमार मन्त
लहानान्युज | बछलागा त्रयोदशी ११४१,असार २३ बुधवाः
बलिउडया लोकह्वाम्ह अभिनेता दिलीप कुमार मन्त। थौं बुधवाः सुथय् ९८ दँय् मदुगु खः।
दिलीप कुमार थौं सुथय् ७ः३० बजे मुम्बईया खार हिन्दुजा अस्पतालय् मदुगु धका अस्पतालया डाक्टर पार्कर धागु खः। ११ डिसेम्बर १९२२ य् तत्कालीन ब्रिटिश इण्डियाया पेशावर (हाल पाकिस्तान) य् बुम्ह दिलीप कुमारया वास्तविक नां मोहम्मद युसुफ खान खः।
करिब २२ दँय् फिल्मय् ज्या सुरु यागु खः। दिलिप कुमारं शहीद, मेला, नदिया के पार, बाबुल, फुटपाथ, देवदास, नयाँ दौर, मुगल–ए–आजम, गंगा–जमुना, राम और श्याम, कर्मा लगायत तसकं लोकंह्वागु खःसा दलय् लिपागु फिल्म किला खः उगु फिल्म जुन १९९८ य् सार्वजनिक जुगु खः।
नाइजेरियाय् हाकनं ब्वंमि मस्त अपहरण
बछलागा द्धादशी ११४१, असार २२ मंगलवाः
अफ्रिकी देय् नाइजेरियाय् बन्दुकधारीया पुचःलं सच्छि व ४०म्ह ब्वंमिया अपहरण याःगु दु ।
अज्ञात बन्दुकधारीया पुचःलं उत्तर पश्चिम नाइजेरियाया बेथेल बाब्तिस ब्वनेकुया ब्वंमित अपहरण याःगु खः । बन्दुकधारीं जारिया क्षेत्रया छगू क्षयरोग तथा कुष्ठरोग उपचार केन्द्रपाखे निम्ह नर्सलिसें म्होतिइ ८ म्ह स्वास्थ्यकर्मी व कर्मचारीया नं अपहरण याःगु दु ।
ब्वनेकुथिइ मोटरसाइकलय् दुहाँवःपिं उमिसं गोलीं कयेका ब्वमितये अपहरण यायेधुंका उपिं कुष्ठरोग केन्द्रय् दुहाँवना नर्स व स्वास्थ्यकमितये अपहरण याःगु खः । अपहरणय् लाःपिं २६म्ह शिक्षिकातयेत त्वःतूगु दु ।
सच्छि व ८०म्ह ब्वंमि दूगु उगु ब्वनेकुथिइ सच्छि व ४०म्हसिया अपहरण जूगु खःसा २०म्ह स्वापूतिइ वःगु दु । ल्यं दूपिं २०म्हसिया मालेज्या जुयाच्वंगु धाःगु दु । घटनाया भाला आःतक्क सुनांनं काःगु मदुनि ।
नाइजेरियाय् वंगु डिसेम्बरनिसें आःतक्क द्वःछिम्ह ब्वंमित अपहरणय् लायेधुंकुगु दु ।
अफगान सेनायात कारवाही न्ह्याकातयेगु तालिवानीया घोषणा
बछलागा द्धादशी ११४१, असार २२ मंगलवाः
तालिवानी लडाकूतयेलिसेया ल्वापुलिपा आफगानिस्तानया द्वःछि सिवे आपा सेना जःलाःखला देय् ताजकिस्तान थ्यंगु दु ।
ताजकिस्तानया सीमा क्षेत्रय् सशस्त्र विद्रोहीलिसे जूगु ल्वापुलिपा उपिं सैनिक ताजकिस्तान थ्यंगु बीबीसीं न्ह्यथंगु दु । तालिवानीतयेसं थःगु देय्पाखेया सडक सञ्जाल विच्छेद यायेधुंका ज्यान ल्यंकेत उपिं सैनिक ताजकिस्तान थ्यंगु धाःगु दु ।
ताजकिस्तानया सीमा सुरक्षा गार्डं विज्ञप्ति जारी याना जःलाखला देय् राष्ट्र अफगानिस्तानया सैनिक सुरक्षाया नितिं थःगु देशय् वःगु न्ह्यथंगु दु । अफगानिस्तानया उत्तरी क्षेत्रय् सशस्त्र विद्रोही पुचःया सक्रियताया हुनिं हिंसात्मक ज्याखँ अप्वयावंगु दु ।
२० दँ तक्क अफगानिस्तानय् च्वंगुं अमेरिकी सेना लितयंकेगु प्रक्रिया न्ह्यागु नापं अफगानिस्तानय् विद्रोहीया ज्याखँ अप्वयावंगु खः । अमेरिकी सेना लिहाँवनेन्ह्यः अफगानिस्तानया सेनां राष्ट्रिय सुरक्षाया भाला कायेत अस्वीकार याःगु नापं तालिवानी लडाकूतये हिंसात्मक ज्यापहः तच्वगु खः ।
तालिवानी विद्रोहीलिसेया सम्झौताअन्र्तगत अमेरिकी व नाटो सम्बद्ध सेनायात उमिगु नियन्त्रणय् दूगु इलाकाय् छुं नं चरमपन्थी पुचःयात ज्या याके मबिइगु प्रतिवद्धताया बदलाय् थःगु सेना लितयंकेत अमेरिका तयार जूगु बुखँ सार्वजनिक जूगु खः ।
तर तालिवानी लडाकुं अफगान सेनालिसेया हताः न्ह्याकातयेधुंका अनया सुरक्षा थप हाथ्याःलं जाःगु दु ।
फिलिपिन्सय् सैन्य विमान दुर्घटना
बछलागाः एकादशी ११४१, असार २१ गते सोमबाः
दक्षिणी फिलिपिन्सय् सैन्य विमान दुर्घटना जूबलय् म्ह्वतिं ४५ सीगु दु ।
दुर्घटनाय् मेपिं तःम्ह हे घाःपाः जूगु दु । विमानय् ९० गयाच्वंगु दुगु बीबीसीं धाःगु दु । सुरक्षाकःमितय्सं विमानया भग्नावशेषं म्ह्वतिं ४५ म्हेसिया सीम्ह लिकाःगु दु ।
दुर्घटनाय् ४० म्हेसित जिवित हे उद्धार याःगु दुसा न्याम्ह अझं बेपत्ता हे तिनि । देय्या दक्षिण पश्चिमय् लाःगु सुलु प्रान्तया जोलो टापुइ अवतरण यायेगु झ्वलय् उगु विमानं धावनमार्ग ज्वनेमफुबलय् दुर्घटना जूगु अनया अधिकारीतय्सं धाःगु दु ।
मदुपिंमध्ये अप्वः धइथें सैनिक लाःगु दु । उगु विमानय् दुपिं सैनिकतय्त दक्षिणी फिलिपिन्सय् दुगु विद्रोही पुचः अबु सयाफविरुद्ध कारवाहीया लागिं छ्वःगु खः ।
