Display Style:
Column Style
भारतय् चलःखय् लाना २०म्ह सीत
दिल्लाथ्व दशमी ११४१,साउन ४ सोमवाः
मदिक्कया वाःया हुनिं वःगु चलःखय् लाना भारतय् म्होतिइ २०म्ह सीगु दु ।
मदिक्कया वाःया हुनिं भारतया मुम्बइ शहरय् चलःखं छेँ दुंबलय् म्होतिइ २०म्ह सीगु भारतीय सञ्चारमाध्यमतयेसं न्ह्यथंगु दु । घना बस्ती दूगु मुम्बई व जःखःया शहरय् मदिक्कया वाःया हुनिं म्होतिइ ११खा छेँ व पखाः दूंबलय् आपालं घाःपाः जूगु दु ।
थ्यंमथ्यं २० क्वःति जनसंख्या दूगु उगु क्षेत्रय् लःबाःया हुनिं आपालं लिच्वःलय् लाःगु सरकारी अधिकारीतयेसं न्ह्यथंगु दु । प्रधानमन्त्री नरेन्द्र मोदीं पीडित छेँजःयात पायेछि क्षतिपूर्ति बिइगु प्रतिवद्धता न्ह्यथनादीगु दु ।
वयेकलं घटनाय् उद्दार व राहतया नितिं कमी कमजोरी जुइके मबिइगु नं न्ह्यथनादीगु दु । मुम्बई व जःखःया क्षेत्रय् तच्वकं वाः वःगुलिं रेलवे सेवा व मेगु सार्वजनिक सवारी सेवा लिच्वःलय् लाःगु दु ।
२४ घौ दुने २ सः मिलिलिटर वाः वःगु मापन याःगु दु । भारतय् थ्वयान्ह्यः सन २००५ य् २४ घौ दुने ९सः व ४४गू मिलिलिटर वाः वःगु खः । भारतीय मौसमविद्तयेसं वाः अझं छुं दिं वइगु धका थप सतर्क जुइत इनाप याःगु दु ।
चीनय् कोराना भाइरसया न्हूगु भेरियन्ट मङ्किपक्स भाइरस खनेदत
दिल्लाथ्व दशमी ११४१,साउन ४ सोमवाः
कोराना भाइरस या महामारीया दथुइ चीनय् न्यंगु मङ्किपक्स भाइरसया हुनिं छम्ह सीगु दु ।
चीनया बेइजिङस्थित अस्पतालय् वासः याकाच्वंम्ह छम्ह पशु चिकिस्क मङ्किपक्सया हुनि मदूगु खः । छुं ई न्ह्यः सीम्ह माकःयात ल्हायेगु झ्वलय् वान्ता जुइगु व छ्यँ स्याइगु लक्षण खनेदयेधुंका मङ्किपक्स जूगु खः ।
चीनय् लिपांगु ई मङ्किपक्सया आपालं विरामी लुयावःगु दु । थ्वयान्ह्यः नाइजेरियाया भ्रमणं थौं कन्हय् टेक्सस लिहाँँवःम्ह अमेरिकी नागरिकय् मङ्किपक्स भाइरस खनेदयेधुंका अनुसन्धान न्ह्याकुगु खः ।
मङ्किपक्स जूम्ह मनूया म्हय् लाःया फोका अर्थात मुसाया लक्षण खनेदयेधुंका अनुसन्धान न्ह्याकुगु खः । कोराना संक्रमित जनावरया स्वापूतिइ वःम्ह मनूखये पुनिगु थ्व ल्वयेय् संक्रमितया सासं हे मेपिन्त पुनिगु लूगु दु ।
थ्वयान्ह्यः थुगु ल्वयेय् सन् १९७० खय् न्हापांखुसिइ कंगोय् लूगु खः । गुकिया हुनिं सच्छि सिवें आपा पीडित जूगु खः । सन् २०१८ य् नाइजेरियाया भ्रमणं लिहाँवःपिं ३म्ह बेलायती नागरिकयाके नं थुगु ल्वयेय् खनेदूगु खः ।
खुसिबाया स्याःचाः
दिल्लाथ्व नवमी ११४१,साउन ३ आईतवाः
जर्मनी, बेल्जियम, नेदरल्याण्ड्स, लग्जेम्बर्गनापया देशय् तसिक्कं वा वःगुलिसे खुसि बाः वयाः सछि व ७०म्हं पुलाःवंगु दु ।
आः न यक्वः हे मनूत बेपत्ता जुयाच्वंगु दनि । खुसि बाः वयाः सीपिनिगु ल्या अझं अप्वयेफइगु धागु दु । अथेखःसां खुसि बाः वयाः बेपत्ता जूपिन्त मालेज्या व उद्धार तच्वयेकूगु दु । खुसि बाः वयाः जर्मनी व बेल्जियमय् दकले उप्वः लिच्वः लाकूगु दु । लिपांगु ईलय् खुसिं चुइकाहःपिं मनूतय् सीम्ह थाय् थासय् लुयाःवःगु दु ।
थ्वहेदथुइ खुसि बाः वयाः प्रभावित जूगु थासय् स्थगलत भ्रमणय् झाःम्ह जर्मनीया शीर्ष राजनीतिज्ञयात कुंखिनेगु ज्या जूगु दु । वय्क प्रभावित जूगु थासय् झाःबलय् न्हिलाःच्वंगु भिडियो सार्वजनिक जूगु खः । मनूतय्त दुःख जुयाच्वंगु ईलय् प्रभावित थाय्या अनुगमनय् वंम्ह राजनीतिज्ञ न्हिलाःच्वंगु भिडियो सार्वजनिक जुइवं वय्कयात मनूतय्सं कुंखिंगु खः ।
वइगु चुनावय् चान्सलर एङ्गेला मर्केलया थाय् कायेगु ताःतयाः कन्जरभेटिभ उम्मेदवार जुयादीम्ह क्रिष्टियन डेमोक्र्याटिक युनियन अफ जर्मनीया नेता अर्मिन लास्चेतया भिडियो सार्वजनिक जूगु खः । राष्ट्रपति फ्रयाङक–वाल्टरं प्रभावित मनूतय्त विचाः हायेकाच्वंगु ईलय् सहकःमिलिसे अर्मिन न्हिलाःच्वंगु भिडियो सार्वजनिक जूगु खः ।
अर्मिनयात कुंखिनेवं ट्वीट यानाः थःगु व्यवहारप्रति क्षमा फ्वंगु दु । देय् ख्वयाःच्वंबलय् वय्क न्हिलाःच्वंगु भिडियो सार्वजनिक जूगु खः । जर्मन चान्सलर मर्केलं थौं खुसि बाः वयाः प्रभावित थासय् भ्रमण याइगु धयातःगु दु । युरोपियन नेतातय्सं जलवायु परिवर्तनया प्रभावया हुनिं तसिक्कं वा वयाः खुसि बाः वःगु प्रतिक्रिया ब्यूगु दु ।
अथेजुयाः थत्थें प्रभावकारी पलाः छिइत अपिल तकं याःगु दु । खुसि बाः वयाः सीपिं मध्ये १४३म्ह जर्मनीया नागरिकत खः । उकिइ मध्ये प्यम्ह अग्निनियन्त्रक न दु ।
हाकनं अप्वःयावल कोरोना संक्रमण
दिल्लाथ्व नवमी ११४१,साउन ३ आईतवाः
लिपांगु २४घौदुने हलिंन्यंकं ४गू लख ७८द्वम्ह मल्याक कोरोना भाइरसया न्हूपिं संक्रमित थप जूगु दु ।
थ्वलिसे हलिंन्यंकं कोरोना संक्रमितया ल्या १९गू कोती ७गू लख ४८द्वलं पुलाःवन । वंगु २४घौदुने थप जूपिं संक्रमितमध्ये दकले उप्वः बेलायतय् ५४द्व ६सः व ७४म्ह दु । बेलायतय् थ्व ईलय् ४१म्ह मनूत संक्रमितया हुनिं मन्त ।
अथेहे निगूगु देय्या कथं इन्डोनेसिया खः । अन २४घौदुने ५१द्व ९सः व ५२म्ह संक्रमित थप जूगु दु । थ्वहेदथुइ द्वछि व ९२म्ह मदुगु धलः दु । थ्व ईलय् भारतय् ४१द्व २सः व ८३म्ह संक्रमित थप जूगु दुसा ५सः व १७म्ह मन्त ।
अथेहे बेलायतया स्वास्थ्य मन्त्री साजिद जाविद कोरोना संक्रमित जुयादीगु दु । वंगु जुननिसें स्वास्थ्य मन्त्री जुयादीम्ह साजिदयात संक्रमण पुष्टि जूगु खः । खोपया निगुलिं डोज कायेधुंकूम्ह मन्त्री साजिदया शनिवाः चान्हय् पीसीआर रिपोर्ट पोजेटिभ वःगु खः ।
शुक्रवाः साजिदं प्रधानमन्त्री बोरिस जोन्सन नापलानादीगु खः । बेलायतय् लिपांगु ईलय् सक्रिय संक्रमितया ल्या अप्वःगु दु । लिपांगु निन्हुथुखय् मदिक्क ५०द्वम्ह न्हूपिं संक्रमित थप जूगु दु ।
तालिवान विद्रोहीया ७द्वम्ह कैदी त्वतेत माग
दिल्लाथ्व षष्ठी, श्रावण १, शुक्रबाः
तालिवानी विद्रोहीतय्सं अफगान सरकारया नियन्त्रणय् दुपिं ७द्वम्ह कैदीतय्त त्वःतेत माग याःगु दु ।
तालिवानीतय्सं स्वला तक युद्धविराम यानाः जूसां कारागारय् दुपिं थः कार्यकर्तातय्त त्वःतेत माग याःगु खः । तर सरकारी अधिकारीपिन्सं धाःसा तालिवानीतय्गु समस्या ज्यंकेत इमिसं माग तःगु प्रतिक्रिया ब्यूगु दु ।
तालिवानीतय्गु उगु प्रस्तावयात अफगान सरकारं आःत लिसः मब्यूनि । अमेरिकी सेना स्वदेश लित वनेगु झ्वः न्ह्यानाच्वंगुलिसे तालिवानी विद्रोहीतय्सं थःपिनिगु सशस्त्र ज्यापहः तच्वयेकूगु दु । विद्रोहीतय्सं आःतक प्यंगू जिल्लामध्ये स्वब्वय् छब्व थःपिनिगु नियन्त्रण दुगु दाबी यानावःगु दु ।
वंगु दँ वार्ता यायेगु झ्वलय् अफगान सरकारं न्याद्वम्ह मल्याक तालिवानी लडाकूतय्त त्वःतूगु खः । त्वःतूपिं मध्ये यक्व धइथें लडाकू हाकन सशस्त्र हिंसाय् दुथ्याःगु सरकारी अधिकारीतय्सं धयाच्वंगु दु ।
अफगान सेनां देय्न्यंकं तालिवानीतय्गु ज्यापहः नियन्त्रणय् कायेगु कुतः यानाच्वंगु दु । तर विद्रोहीतय्सं थःपिन्त तःधंगु सफलता चूलाःगु धागु दु ।
