Display Style:
Column Style
भारत व चीनय् खुसिबाः व चलःया लिच्वः
दिल्लाथ्व प्रतिपदा ११४१, साउन १० आइतबाः
भारतया महाराष्ट्रय् मदिक्क वयाच्वंगु वा लिपाः खुसिबाः वया सच्छि व २५म्ह सीगु दु ।
मदिक्क वःगु वा लिपाया खुसिबालं महाराष्ट्रया सलसं गाँ डुंगु दु धाःसा द्वलंद्वः मनू विस्थापित तकं जूगु दु । बेपत्ता जूपिंया मालेज्याय् भारतीय सेनालिसें उद्दारकर्तापिं जानाच्वंगु दु । महाराष्ट्रया मौसम विभाग कथं थुगुसी दशकांै लिपाः तःधंगु वा वःगु खः ।
उखे चीनया हेनान प्रान्तय् तसकं वःगु वा धुंकाः वःगु खुसिबाः अले चलःया हुनिं ५६ सीगु दु । खुसिबाः धुंकाः ५ लख मनूत अस्थायी रूपं सुरक्षित थासय् ल्ह्ययागु चिनिया सरकारं न्ह्यथंगु दु । वंगु वालंनिसें तसकं वयाच्वंगु वाया हुनिं हेनान प्रान्त प्रभावित जूगु दु ।
वाया हुनिं प्रान्तीय राजधानी झेङझाओय् १२ क्वःति मनूत प्रभावित जूगु दु । झेङझाओया मौसम विभागं थुगु वाया स्तरयात द्वःछि दँ लिपा वःगु विपत्ति धकाः वर्णन याःगु दु ।
थ्व हे दथुइ, पिपुल्स लिबरेशन आर्मी केन्द्रीय थिएटर कमान्डं २५द्वः सैनिक, सशस्त्र प्रहरीयात हेनानपाखे छ्वmगु दु । उपिं सुरक्षा अधिकारीतय्त खुसिबालय् तक्यनाच्वंपिं मनूतय्त सुरक्षित रुपं उद्धारया लागिं छ्वःगु बुखँय् न्ह्यथनातःगु दु ।
अफगानिस्तानय् कफ्र्यु
दिल्लाथ्व प्रतिपदा ११४१, साउन १० आइतबाः
तालिवानी हमला नियन्त्रणया लागिं अफगानिस्तान सरकारं कफ्र्यु आदेश जारी याःगु दु ।
अमेरिकी सेना लिहां वनेधुंकाः अफगानस्तानय् सक्रिय जूगु तालीवानया ज्याखँ पनेत कफ्र्यु आदेश जारी याःगु खः । अफगानस्तानया ३४ प्रान्तमध्ये ३१ प्रान्तय् चान्हय् १०ताः इलंनिसें सुथय् ४ताः ईतक्क कफ्र्यु लागू याःगु खः ।
तालिबान पुचलं मुख्य सीमा नाका पुलीगु अप्वःथे जिल्लाय् कब्जा याःगु दु । हिंसा पनेत व तालिबानी आन्दोलनयात सीमित यायेत काबुललिसें देय्न्यंकया ३१ प्रान्तय् रात्रीकालीन कफ्र्यु लागू जूगु अफगानिस्तान सरकारं न्ह्यथंगु दु ।
तालीवानी बिद्रोहीं अफगानिस्ताया बागू ब्वय् कब्जा यायेधुंकाः अफगान सरकार तँसा मारय् लाःगु दु । थ्व हे दथुइ, अफगानिस्तानया कन्दहारय् जूगु झडपय् ३० स्वयां अप्वः सीगु दु ।
भारतय् वंगु २४ घण्टाय् ४८३ म्ह कोरोनां मन्त
लहानान्युज | दिल्लाथ्व पुन्हि ११४१,साउन ९ सनिवाः
भारतय् वंगु २४ घण्टाय् ४८३ म्ह कोरोना संक्रमितपि सीउगु दु।
अथेहे ३५ हजार ३४२ म्ह संक्रमित पुष्टि जुगु दु।
भारतय् आःतक ४ लाख १९ हजार ४७० म्ह कोरोना संक्रमणया कारण सी धुकुगु दु।
भारतय् ३ करोड १२ लाख ९३ हजार ६२ म्ह कोरोना संक्रमण जुइ धुकुगु दु।
भारतया सञ्चारमाध्यमय् सरकारी छापा
दिल्लाथ्व चतुर्दशी ११४१,साउन ८ शुक्रवाः
कोरोना महामारीइ सरकारया ज्यापहःया तच्वकं कुँख्यनेधुंका भारतया निगू सञ्चारमाध्यमय् सरकारी अधिकारीतयेसं छापा तःगु दु ।
भारतीय सरकारी अधिकारीतयेसं भारत समाचार व दैनिक भास्करय् छापा तःगु बीबीसीं न्ह्यथंगु दु । सरकारी अधिकारीतयेसं धाःसा निगुलिं सञ्चार माध्यमं कर छली याःगुलिं अनुसन्धान प्रक्रिया न्ह्याकेज्या जूगु दावी याःगु दु ।
उपिं सञ्चारमाध्यमय् ज्या यानाच्वंपिं छुं कर्मचारीया छेँय् नं छापा तःगु धाःगु दु । सुरक्षाकर्मी अप्वः धैथें सञ्चारकर्मी व कर्मचारीया मोबाइल फोन नं अनुसन्धानया नितिं धका नियन्त्रणय् काःगु दु ।
तर थी थी दलया नेता, सांसद व अधिकारकःमितयेसं धाःसा सरकारं प्रेस स्वतन्त्रता विरोधी ज्यापहः याःगु द्वपं बिउगु दु । उमिसं सरकारं थःगु आलोचकयात क्वत्तय्लेत उपिं सञ्चारमाध्यमयात मखूगु द्वपं बिया छानविन न्ह्याकुगु दावी याःगु दु ।
तर भारतया सूचना तथा प्रशारणमन्त्री अनुराग ठाकुरं धाःसा उगु प्रकरणय् सरकारया संलग्नता मदूगु स्पष्ट यानादीगु दु । वयेकलं कर छलिया द्वपनय् सरकारी अधिकारीं छानविन याःगुलिं सत्यतथ्य सार्वजनिक जुइगु धयादील ।
वयेकलं उगु छानविन प्रकरणय् सरकारं छुं नं हस्तक्षेप मयाइगु नं धयादील । दैनिक भास्कर भारतय् हिन्दी संस्करणय् प्रकाशित जइगु दक्वःलय् तःधंगु अखबार मध्येया छगू खः ।
चीनय् वःगु खुसिबाःया हुनिं म्होतिइ २५ म्ह सीत
दिल्लाथ्व त्रयोदशी ११४१,साउन ७ बिहीवाः
चीनय् वःगु खुसिबाःया हुनिं म्होतिइ २५ म्ह सीगु दुसा ७म्ह तनाच्वंगु दु ।
मध्य चीनया हेनान प्रान्तय् मदिक्कया वाः वःगु लिसें खुसिबाः चलःया हुनिं भूमिगत रेलवे सेवा लिच्वःलय् लाःगु दु । उगु क्षेत्रय् जङ्गो नगरय् छगू रेलमार्गय् खुसिबाःया हुनिं यात्रुत अलपत्र जूगु खः ।
तच्वगु गतिइ वःगु खुसिबाःलं थी थी थासय् मनू व गाडीत चुइकुगु खः । १०गू कोति सिव्ें आपा जनसंख्या दूगु प्रान्तय् २गु लख सिवें आपा प्रभावितया उद्दार जूगु अन्तर्राष्ट्रिय समाचार संस्थातयेसं न्ह्यथंगु दु ।
खुसिबाःया हुनिं थी थी भौतिक संरचनाय् क्षति जूगु अनया सरकारी अधिकारीतयेसं न्ह्यथंगु दु । खुसिबाःया हुनिं आपालं सडकय् क्षति जूगु दुसा निजी लिसें सरकारी संरचनात पूर्ण रुपय् क्षतिग्रस्त जूगु बुखँय् न्ह्यथनातःगु दु ।
चीनया केन्द्रीय सरकार व हनान प्रान्त सरकारं प्रकोप उद्दारया नितिं जनशक्ति परिचालन जूगु समाचार संस्था सिन्ह्वां न्ह्यथंगु दु । जनमुक्त सेना, सशस्त्र प्रहरी लिसेंया सुरक्षा निकाययात प्रभावितपिनि उद्दारया नितिं परिचालन जूगु धाःगु दु ।
