रुसं अमेरिकालिसे युक्रेनया विषय वार्ता यायेत वार्ता पुचः तयार यायेगु सुरु याःगु दु। क्रेमलिनया प्रवक्ता दिमित्री पेस्कोभं युक्रेनया विषयस अमेरिकालिसे वार्ता यायेत प्रतिनिधिमण्डल दयेकेगु कुतः जुयाच्वंगु धाःगु दु।

लिसें वय्कलं रुसी राष्ट्रपति भ्लादिमिर पुटिन व अमेरिकी राष्ट्रपति डोनाल्ड ट्रम्प दथुइ तत्काल भेटवार्ताया ग्वसाः ग्वयेमाःगु आवश्यकता दुगु नं धयादीगु दु। वय्कलं युक्रेनयात कयाः आःतक नं ठोस वार्ता मजूगु स्पष्ट यानादीगु बीबीसीं जानकारी ब्यूगु दु।

रुसं वार्ताय् आपालं विषयत ल्ह्वनेमाःगु खँ धाःगु दु। तर राष्ट्रपति पुटिनं छुं भचा धैर्यता माःगु धासें आः हे रुसयात युद्धविराम अन्त्यया निंतिं तयार जूगु धायेमफइगु खँ धयादीगु दु। रुस व युक्रेन दथुइ ब्वलना च्वंगु द्वन्द्व ज्यंकेत अमेरिकां मध्यस्थकर्ताया भूमिका म्हिताच्वंगु दु।

युद्धविराम सम्झौताया सम्भावनाया बारे पुटिनलिसे जूगु फोन खँल्हाबल्हा लिपा म्हिगः ट्रम्प व युक्रेनया राष्ट्रपति भोलोदिमिर जेलेन्स्की दथुइ नं फोन खँल्हाबल्हा जूगु खः।

गुप्यालेस्टिनी विद्रोही समूह हमासं इजरायलनाप गाजाय् जुगु युद्धविराम सम्झौता कथं बन्धकतय्त त्वःतिइगु जुगु दु। हमासं सम्झौता कार्यान्वयन यायेगुलि थःपि प्रतिबद्ध दुगुलि इलय् हे बन्धकतय्त तयार दु धका धाःगु दु।

इजरायलं कन्ह्यः शनिवाः तक हमासं बन्धक दयकातःपिन्त मत्वःतूसा युद्धविराम क्वचाइ धका चेतावनी बिइ धुका सम्झौता कथं ज्या जुइ धका बीबीसीं धाःथु दु। थ्व स्वया न्ह्यः इजरायलं सम्झौता उल्लङ्घन याःगु द्धपः ब्युसे हमासं बन्दी त्वत्ये फइमखु धका चेतावनी बियावया च्वंगु खः।

तर इजरायली प्रधानमन्त्री बेन्जामिन नेतान्याहू न हमासं बन्धक रिहा मयात धाःसा गाजाय् युद्धविराम भङ्ग जुइ व हाकने ल्वापू तःच्वइ धका चेतावनी ब्यूगु खः।

अमेरिकाया राष्ट्रपति डोनाल्ड ट्रम्पं प्यालेस्टाइनीतय्त च्वनेत मबिइगु निति अस्वीकार याइगु देसयात बीगु ग्वाहालि बन्द यायेगु ख्याच्वः बियादीगु दु। थ्वसिबें न्ह्यः ट्रम्पं प्यालेस्टाइनीपिन्त इजिप्ट व जोर्डनय् स्थायी रुपं बसोबास याके बीमाःगु धाःगु खः।

तर, ट्रम्पया सुझाव प्रति जोर्डन व उगु क्षेत्रया मेमेगु देसं आपत्ति प्वंकेधुंकाः ट्रम्पं प्यालेस्टाइनीतय् निंतिं थःगु प्रस्तावयात स्वीकार मयाइपिन्त अमेरिकां ग्वाहालि व ग्वाहालि यायेगु बन्द यायेगु धाःगु खः। राष्ट्रपति ट्रम्पं प्यालेस्टाइनीपिन्त सुरक्षित थासय् स्थानान्तरण यायेगु व अमेरिकाया नियन्त्रणय् दूगु गाजा पट्टी पुनःनिर्माण यायेगु प्रस्ताव तया वयाच्वंगु खः।अथेहे, जोर्डनया जुजु अब्दुल्लाह द्वितीय नं वाशिंगटन डिसी थ्यंकूगु दु।

वय्कलं ह्वाइट हाउसय् राष्ट्रपति डोनाल्ड ट्रम्पलिसे नापलायेगु ज्याझ्वः तयातःगु दु। बीबीसीया कथं ट्रम्पं प्यालेस्टाइनीतय्त स्थायी रुपं बसोबास यायेगु व्यवस्था यायेत जुजु अब्दुल्लाहयात अनुनय यायेगु तयारी यानाच्वंगु दु । वय्कलं अमेरिकाया प्रस्तावय् जोर्डनलिसेंया मेमेगु देसं नं सहमति प्वंकीगु खँय् थः विश्वस्त जूगु धयादीगु बीबीसीं जानकारी ब्यूगु दु।

अमेरिकाया निजी अन्तरिक्ष कम्पनी स्पेसएक्सं मंगलवाः २१ गू स्टारलिंक भूउपग्रह प्रक्षेपण याःगु दु। स्पेसएक्स छगू एयरोस्पेस उत्पादक व अन्तरिक्ष यातायात कम्पनी खः गुकियात सन् २००२ य् एलोन मस्कं पलिस्था याःगु खः।

थुकिया आज्जु अन्तरिक्ष यात्राया खर्च म्ह्वः यायेगु खः। स्पेसएक्सया कथं पूर्वी ई कथं सुथय् ५ः१५ ता इलय् फ्लोरिडाया केप क्यानाभेरल स्पेस फोर्स स्टेशनं फाल्कन ९ रकेटय् च्वनाः उगु भूउपग्रह प्रक्षेपण याःगु खः।

लिपा स्पेसएक्सं २१ गू स्टारलिंक भूउपग्रह परिचालन याःगु पुष्टि याःगु खः, गुकी १३ गू डाइरेक्ट टु कल क्षमता दुगु भूउपग्रह दुथ्याः। स्टारलिङ्क धइगु निजी अन्तरिक्ष उडान कम्पनी स्पेसएक्सं दुर्गम थासय् म्हो खर्चय् इन्टरनेट बीगु निंतिं विकास याःगु भूउपग्रह नेटवर्कया नां खः।

स्टारलिङ्क भूउपग्रहया आयु अथे हे न्यादँ ति जुइ।स्पेसएक्सया कथं स्टारलिंकं पूर्ण रुपं उपलब्ध मजूगु थासय् तीव्र गतिया ब्रोडब्याण्ड इन्टरनेटया सुविधा हयेगु जुइ।

अमेरिकां निर्वासित जूपिं १०० म्हसिबें अप्वः भारतीय आप्रवासी ज्वनाः अमेरिकी वायुसेनाया विमान बुधवाः भारत थ्यंकूगु स्थानीय सञ्चारमाध्यमं जानकारी ब्यूगु दु।

जनवरी २० तारिखय् ट्रम्पं पदभार ग्रहण याये धुंकाः द्वलंद्वः भ्वँ मदुपिं आप्रवासीतय्त गिरफ्तार याःगु दु। गुलिखे अपराधया द्वपं नं लानाच्वंगु दु। उत्तरी शहर अमृतसरय् एएफपीया छम्ह फोटोग्राफरं अमेरिकी सैनिक विमान अवतरण जूगु खंगु खःसा उकी १०४ म्ह भारतीय आप्रवासी दुगु खँ भारतीय संचार माध्यमं धाःगु दु।

ट्रम्पया आप्रवासन सुधारया कार्यकारी आदेशं १ करोड १० लाख भ्वँ मदुपिं आप्रवासीतय्त लिच्वः लाकीगु अनुमान याःगु दु। न्हू दिल्लीं न वाशिंगटनं देश निकालायात कयाः विशेष टिप्पणी याःगु मदु। तर भारतय् च्वंगु अमेरिकी दूतावासया प्रवक्तां वाशिंगटनं “थःगु सीमायात कडा रुपं लागू यानाच्वंगु, आप्रवासन कानून कडा यानाच्वंगु व अवैध आप्रवासीतय्त चीकाच्वंगु” धाःगु दु।

भारत हलिमयया प्यंगुगु दकलय् तःधंगु अर्थतन्त्र खः व दकलय् अप्व सकल घरेलु उत्पादन (जीडीपी) वृद्धिदर दु, अथे जुसां दँय् दसं लखौं नागरिकत विदेशय् बांलाःगु अवसर मालेगु निंतिं देय् त्वःताः वनी। थुकिया प्रवासी समुदाय विश्वन्यंकं न्यनाच्वंगु दु, तर अमेरिका अझ नं ल्ययेगु गन्तव्य खः ।

अमेरिकी आप्रवासन व भन्सार प्रवर्तन (आइसीई) या तथ्यांक कथं सन् २०१८ निसें २०२३ तक ५ हजार स्वयां अप्वः भारतीयतय्त देसं देश निकाला याःगु खः।