नेपाली कांग्रेसया नेता प्रकाशमान सिंहं पार्टीया व्यवस्थापन हे कांग्रेसया निंतिं मू हाथ्या खः धका धयादीगु दु।

नेपाली कांग्रेसया सच्छिन्हुया विशेष अभियान अन्तर्गत कांग्रेस येँ महानगर समितिं क्षत्रपार्टीइ थौं ग्वसाः ग्वःगु महानगरस्तरीय भेलाय् संबोधन यानादिसें वय्कलं धयादिल, “आः कांग्रेसया निंतिं पार्टीयात व्यवस्थापन यायेफइ कि फइमखु धइगु हे मू न्ह्यसः खः, क्रियाशील दुजःतय्गु ल्याः अप्वः दु।

तर, क्रियाशील दुजः तय्त दुजः जुइगुया महत्व थुइके बिइमाःगु दु।” हरेक क्रियाशील दुजः तय्त पार्टीया ज्याखँय् स्वाका यंकेमाःगुलिइ नेता सिंहं बः बियादिल। देसय् प्रजातन्त्र व प्रजातान्त्रिक मूल्य मान्यता हयेत यक्व सङ्घर्ष याःगु व जनताया हानं–हानं भलसा त्याकूगु कांग्रेस पार्टीया क्रियाशील दुजः जुइगु सामान्य खँ मखूगु वय्कलं धयादिल।

पार्टी दुने समस्या दःसा नापं च्वनाः ज्यंकेगु कुतः यायेमाः वय्कलं धयादिल। येँय् च्वनीपिंसं फया वयाच्वंगु पीर व समस्यात ज्यंकेगुपाखे वनेत नेता सिंहं येँ महानगर समितियात इनाप यानादिल। सच्छिन्हुया विशेष अभियानं पार्टी सङ्गठन सुदृढीकरण यायेत ग्वाहालि जुइगु वय्कलं भलसा कयादिल।

येँ कांग्रेसया सच्छिन्हु विशेष अभियानया निंतिं नेता कृष्णप्रसाद सिटौला सनाजूयादीगु दु। (रासस)

अमेरिकाया लडाकू विमान लाल सागरय् दुर्घटना जूगु दु धका बीबीसीं धाःगु दु। अमेरिकां हुथी विद्रोहीपाखे सञ्चालित यमनया राजधानी सानाय् मिसाइल भण्डारण स्थल व कमाण्ड सुविधाय् शृङ्खलाबद्ध कथं हवाई आक्रमण जुगु लिपा थुगु घटना जुगु खः। अमेरिकाया सेना याःगु केन्द्रीय कमाण्डया कथं अमेरिकाया नौसेना याःगु लडाकू विमान एफ÷ए–१८ होर्नेटय्् दुगु निम्ह हे चालक दलया सदस्यपि सुरक्षित जुया पिहावःगु खबर दु।

अमेरिकाया लडाकू विमानय् लाल सागरय् हुथी विद्रोही पाखे यक्को हे ड्रोन व एन्टी–शिप क्रुज मिसाइल कूकुगु दु धका बीबीसीं धाःगु दु। हुथी विद्रोहीं इजरायलया चिक अभिभय् आक्रमण याये धुका अमेरिकां थज्यागु हमला याःगु खः।

हुथी इरान समर्थित विद्रोही समूह खः थुगु समुहपाखे यमनया उत्तर–पश्चिमय् थःगु नियन्त्रणय् कयातःगु खः।

भारतया मुम्बईलय् च्वंगु गेटवे अफ इण्डियापाखे एलिफेन्टा द्वीप वनाच्वंगु डुङ्गा दुर्घटना जुगुलि १३ म्हेसिगु ज्यान वंगु दु। यात्रु ज्वना वंगु डुङ्गायात भारतीय नौसेनाया छगः द्रुत गतिया डुङ्गां ठक्कर बिइवं दुर्घटना जुगु खः।

दुर्घटनाय् नौसेनाया स्वम्ह नाप १३ म्हेसिगु ज्यान वंगु दु धका भारतीय सञ्चार माध्यमं धाःगु दु। सीपिनिगु परिवारयात राज्य सरकारं न्यागु न्यागु लाख तका राहत बिइगु घोषणा याःगु दु धका मुख्यमन्त्री देवेन्द्र फडणविसं जानकारी ब्युगु दु।

क्यानाडाया उपप्रधानमन्त्री व अर्थमन्त्री क्रिस्टिया फ्रिल्याण्डं प्रधानमन्त्री जस्टिन ट्रुडोलिसे ल्वापु जुइ धुंकाः राजीनामा ब्यूगु दु।

अमेरिकाया न्हूम्ह निर्वाचित राष्ट्रपति डोनाल्ड ट्रम्पं लगे यायेफुगु करया सवालय् निम्हेसिया दथुइ मतभेद जुगु खः। थ्व राजीनामायात प्रधानमन्त्री ट्रुडोया निंतिं अप्रत्याशित प्रहारया रुपय् काःगु बीबीसीं जानकारी ब्यूगु दु।

ट्रुडों क्यानाडाय् अल्पमतया सरकार चले यानाः वयाच्वंगु दु। क्यानाडाया सार्वजनिक सुरक्षामन्त्री डोमिनिक लेब्लान्कयात फ्रिल्याण्डया थासय् अर्थमन्त्री दयेकूगु दु। फ्रिल्याण्डं उपप्रधानमन्त्रीया पद त्वःते धुंकाः विपक्षी दलतय्सं ट्रुडोयात राजीनामा बीमाःगु माग याःगु खः।ट्रुडोया सहयोगी क्यानाडाया एनडीपी पार्टीया नेता जगमीत सिंहं नं प्रधानमन्त्रीया राजीनामा माग याःगु समाचारय् न्ह्यथनातःगु दु।

लिबरल पार्टीया नेता ट्रुडो कन्जरभेटिभ पार्टीया नेता पियरे पोलिभ्रे स्वयां २० प्रतिशत ल्यूने लाये धुंकूगु दु। सर्वेक्षण कथं ट्रुडो न्हापांखुसी प्रधानमन्त्री जूगु इलय् ६३ प्रतिशत समर्थक अन दुगु खःसा आः ट्रुडोया समर्थक २८ प्रतिशत जक दु।

यमनया हुथी विद्रोहीतय्सं इजरायलय् हाइपरसोनिक क्षेप्यास्त्र प्रहार याःगु दाबी याःगु दु । हुथी विद्रोहीतय्सं थःपिंसं राजधानी तेल अभिभया छगू सैन्य अड्डाय् हाइपरसोनिक मिसाइल प्रहार याःगु दाबी याःगु दु।

चिनियाँ समाचार एजेन्सी सिन्ह्वां हुथी विद्रोहीतय्सं गाजाय् जूगु इजरायली नरसंहारया विरोधय् व प्यालेस्टाइनया समर्थनय् हाइपरसोनिक मिसाइल प्रक्षेपण याःगु धाःगु खँयात उद्धृत यासें धाःगु दु। हुथी सैन्य प्रवक्ता यःया सारियां इजरायलय् हाइपरसोनिक क्षेप्यास्त्र प्रक्षेपण यायेगु थःपिनिगु योजना सफल जूगु व थःपिं लय्तागु दाबी याःगु दु।

हुथी पुचलं गाजाय् जूगु नरसंहार मदिकूतले इजरायलविरुद्ध थप सैन्य अभियान न्ह्याकेगु ख्याच्वः ब्यूगु दु। इजरायलया राजधानीइ हुथीतय्सं क्षेप्यास्त्र प्रक्षेपण याःगु इलय् चेतावनी बिइगु साइरन न्याःगु खः। अथेहे, अमेरिकी व बेलायती सैन्य गठबन्धनं लाल सागरया उत्तरपश्चिमय् लाःगु यमनया हज्जा प्रान्तया बहिश क्षेत्रय् हुथीतय्गु मोबाइल रकेट प्रक्षेपकय् क्षेप्यास्त्र आक्रमण याःगु दाबी याःगु दु। हुथीं संचालन यानाच्वंगु अल मसिराह टिभीं आक्रमणया पुष्टि याःगु दु।

उगु आक्रमणय् लानाः कम्ती नं न्याम्ह हुथी लडाकु सीगु दुसा न्ह्यय्म्ह घाःपाः जूगु दु। इजरायलं गाजाय् याःगु आक्रमणया विरोधय् हुथीतय्सं लाल सागरय् दर्जनौं मालवाहक जहाजय् आक्रमण यानाच्वंगु दु। हुथीं इजरायल व इजरायली गठबन्धनलिसे स्वाःगु जहाजय् आक्रमण यानाः अरबौं डलर बराबरया क्षति याःगु दु।