रुसं युक्रेनया राजधानी किभय् ताःहाकःगु दूरीया क्षेप्यास्त्रपाखें आक्रमण याःगु दु। युक्रेनं रुसय् आक्रमण याःगु निन्हु लिपा रुसं नं न्हापांखुसी युक्रेनय् इन्टरकन्टिनेन्टल ब्यालिस्टिक मिसाइल (आइसीबीएम) आक्रमण याःगु खः।

युक्रेनया वायुसेनां आइतवाः रुसं न्हापांखुसी द्वलंद्वः किलोमिटरया हतियारलिसें आक्रमण याःगु जानकारी ब्यूगु दु। बीबीसीया कथं रुसं याःगु उगु आक्रमणय् १६ व १७ दँया ल्याय्म्हलिसे १५ म्ह घाःपाः जूगु दु। इमित वासः यायेगु नितिं अस्पताल भर्ना याःगु दु।

तर इमिगु स्वास्थ्य अवस्थाया बारे जानकारी मवःनि कि आइसीबीएमं ५५०० किलोमिटर स्वयां अप्वः दूरीइ आक्रमण यायेफु। थुकियात विशेष यानाः आणविक हतियार प्रक्षेपण यायेत छ्यलीगु खँ अन्तर्राष्ट्रिय सञ्चारमाध्यमं च्वःगु दु। युक्रेनं बुधवाः अमेरिकी व बेलायती क्षेप्यास्त्र स्टर्म स्याडो क्रुजपाखें रुसय् आक्रमण याःगु खः।

रुस्क क्षेत्रय् कम्ती नं १२ गू मिसाइल प्रहार याःगु रुसी सैनिक अधिकारीं दाबी याःगु दु। वंगु महिनाय् रुसं थःगु भूमिइ नेटोया हतियार छ्यल धाःसा स्वंगूगु विश्वयुद्धया सुरुवात कथं कायेगु धाःगु खः।

अमेरिकी अन्तरिक्ष एजेन्सी नासाया वैज्ञानिक सुनिता विलियम्स अन्तरिक्षय् थ्यंमथ्यं वंगु न्ह्यला दयेधुंकूगु दु। विलमोर बुच नं भारतीय मूलया सुनितालिसे अन्तरिक्षय् फसे जुयाच्वंगु दु।

इपिं थौंकन्हय् अन्तर्राष्ट्रिय अन्तरिक्ष केन्द्र (आइएसएस)य् अन्तरिक्षय् च्वनाच्वंगु दु। इपिं ६ जुन कुन्हु आइएसएसय् थ्यगु खः। थ्यंमथ्यं न्ह्यय्ला न्ह्यः इपिं च्यान्हुया निति अन्तरिक्षय् वंगु खःसा यान गडबडी जुइधुंकाः अन हे अलपत्रय् लाःगु खः।

आः इपिं फेब्रुुअरी २०२५ स जक पृथ्वीइ लिहां वइ। इलोन मस्कया कम्पनी स्पेसएक्सं ‘स्पेसएक्स क्रु ड्र्यागन’ नांया यान अन्तरिक्षय् छ्वयाः धुकुु दु। नासां स्यंगु स्टारलाइनर दयेकेगु कुतः यागु खःसा उगु दयके मखुगु खः।

सुनिता व विलमोरलिसे जूगु खँल्हाबल्हाया भिडियो नासां सार्वजनिक याःगु दु। उगु भिडियोय् इमिसं थःगु स्वास्थ्यय् छुं नं कथंया नोक्सान मजूगु धका धाःगु दु।

पेंगुइनया मचात वं हे स्याःगु पुष्टि जुइवं अर्जेन्टिनाया छम्ह किसानयात अदालतं स्वदँ जेल सजायँ न्यंकूगु खः।

थीथी अन्तर्राष्ट्रिय सञ्चारमाध्यमया कथं दक्षिणी प्रान्त चुबुटया छम्ह किसानयात थःगु बाली नयेत वःपिं १०० स्वयां अप्वः म्यागेलानिक पेंगुइन स्याःगु अपराधय् स्वदँ जेल सजायँ जूगु दु। २०२१ स वं छम्ह झंगः स्याःगु जूसां नं थ्व विषयस ताःईतक बहस जूगुलिं नकतिनि हे निर्णय जूगु दु। वं दर्जनौं पेंगुइनया छेँ नं स्यंकाबिगु खः।

अभियोजकतय्सं प्यदँया सजायया निंतिं धाःगु खः। थ्व मुद्दायात कयाः गुनासो याःगु वातावरणीय पुचः ग्रीनपीसं किसानया दोषी ठहरयात “वातावरणीय न्यायया निंतिं महत्वपूर्ण पलाः” धकाः प्रशंसा याःगु दु । किसानतय्सं थःगु बाली बचे यायेगु मेगु छुं नं उपायं ज्या मयाःगुलिं पेंगुइन स्यायेगु विकल्प मदुगु दाबी याःगु दु। म्याजेलानिक पेंगुइनयात अन्तर्राष्ट्रिय प्रकृति संरक्षण संघं दकलय् म्हो चिउताःया प्रजातिया धलखय् तःगु दु।

गुकिया अर्थ थ्व ल्याः म्हो जुजुं वनाच्वंसां नं लोप जुइगु खतरा मदु।

युक्रेनं रुसया ब्रायन्स्क सीमा क्षेत्रय् च्वंगु सैन्य शिविरय् अमेरिकां बियातःगु ताहाकःगु दूरीया क्षेप्यास्त्र प्रहार याःगु दु धका रुसी सेनां धाःगु दु।

थ्व आक्रमण अमेरिकां थःगु हतियार छ्यलत ब्युगु अनुमति बिइवं न्हापां आक्रमण याःगु रुसया दाबी दु। रुसी सैन्य मन्त्रालयया कथं ब्रयान्स्क क्षेत्रय् युक्रेनं खुगु ब्यालेस्टिक मिसाइल प्रहार याःगु दु।

युक्रेनं न्हापानिसे अमेरिकायात रुसय् आक्रमण यायेत ताहाकःगु दूरीया क्षेप्यास्त्र प्रयोग यायेत माग याना वयाच्वंगु खः।

रुसया रक्षा मन्त्रालयं थःगु हवाई सुरक्षां न्यागः क्षेप्यास्त्र क्यकाःगु व खुक्वःगु धासा सैन्य क्षेत्रय् कुतु वना मिँ च्याःगु धका धाःगु दु।छु न मानवीय क्षति जुगु मदु धका धाःगु दु।

निर्वाचित राष्ट्रपति डोनाल्ड ट्रम्पं सीमा सुरक्षा सम्बन्धी राष्ट्रिय संकटकाल घोषणा यायेगु व अमेरिकी सेनायात छ्यलाः दस्तावेजविहीन आप्रवासीतय्त सामूहिक रुपं देश निकाला यायेगु घोषणा याःगु दु।

राष्ट्रपति जो बिडेनया प्रशासनय् अवैध आप्रवासीया ल्याः अप्वयेधुंकाः ट्रम्पं लखौं दस्तावेज मदुपिं आप्रवासीतय्त देश निकाला यायेगु व मेक्सिकोलिसेया सीमायात नियमन यायेगु धाःगु खः। ट्रम्पं थःगु सामाजिक संजाल प्लेटफर्म ट्रुथ सोशलय् छम्ह रुढिवादी कार्यकर्तां नकतिनि च्वःगु छगू पोष्टयात रिपोष्ट याःगु दु।

वय्कलं उकी च्वयादीगु दु, “न्हूम्ह निर्वाचित राष्ट्रपति राष्ट्रिय आपतकाल घोषणा यायेत तयार दु व सामूहिक निर्वासन ज्याझ्वःयात न्ह्यःने यंकेगु निंतिं तयार दु।” नोभेम्बर ५ तारिखय् डेमोक्र्याटिक उपराष्ट्रपति कमला ह्यारिसयात बुकाः ट्रम्प हाकनं अमेरिकी राष्ट्रपति पदय् निर्वाचित जूगु खः।

वय्कलं आप्रवासन व भन्सार प्रवर्तनया पूर्व कार्यवाहक प्रमुख टम होमनयात थःगु “सीमा जार” धकाः नां बियादीगु खःसा आप्रवासन सम्बन्धी कट्टरपंथी दुजःतय्गु मन्त्रिपरिषद घोषणा यानादीगु खः। वंगु जुलाईइ जूगु रिपब्लिकन नेशनल कन्भेन्सनय् ब्वति कयाः वय्कलं समर्थकतय्त धयादी, “जिं लखौं अवैध आप्रवासीतय्त सन्देश बी चाहेजू कि बिडेनं हःपिंत लित छ्वयेगु जुइ।” अधिकारीतय् कथं अमेरिकाय् थ्यंमथ्यं १ करोड १० लाख मनूत गैरकानूनी रुपं च्वनाच्वंगु दु।

ट्रम्पया देश निकाला योजनां थ्यंमथ्यं निगू करोड परिवारयात प्रत्यक्ष रुपं लिच्वः लाकीगु अनुमान याःगु दु। ट्रम्पं थःगु आप्रवासन सम्बन्धी कारवाहीया विस्तृत जानकारी ब्यूगु मदुनि । तर चुनावी अभियानया झ्वलय् वय्कलं देश निकालायात याकनं यायेत ‘एलियन एनिमिज एक्ट १७९८’ लागू यायेगु धकाः बारम्बार धयादीगु खः।