अमेरिकी पूर्व राष्ट्रपति जिमी कार्टर मन्त। वयकः अमेरिकाया जर्जियाय् १०० दँय् मदुगु खः। वयकःया काय् न कार्टर मदुगु धका पुष्टि यानादीगु खः।

१ अक्टुबर १९२४ य् जन्मय् जुयादीगु खः। वयकलं १९७७ निसे १९८१ तक अमेरिकाया राष्ट्रपति जुयादीगु खः। आर फोर्डयात बूका अमेरिकाया ३९ म्ह राष्ट्रपति जुयादीगु खः।

मध्यपूर्वय् शान्ति स्थापना यायेगु निति ऐतिहासिक क्याम्प डेभिड सम्झौता यायेगुलि मध्यस्थता यानादीगुलि सन् २००२ य् नोबेल शान्ति सिरपा कयादीगु खः।

वयकः अमेरिकाया इतिहासय् दलकय् अप्पो तक जीवित जुयादीम्ह राष्ट्रपति खः।

दक्षिण कोरियाय् विमान दुर्घटना जुया म्होतिं नं २८ म्ह सीगु दु।

सच्छि व ७५ म्ह यात्री व खुम्ह चालक दल दुजः दूगु उगु जेजु एयरया बोइङ–७३७ विमान थौं सुथय् दिकेगु झ्वलय् दुर्घटना जूगु खः।

योन्हाप समाचार समितिया कथं थाइल्याण्डया राजधानी बैङ्ककं वःगु उगु विमान कोरियाया मुआन अन्तर्राष्ट्रिय विमानस्थलय् दिकेगु झ्वलय् धावनमार्गय् चुलुयाः पखालय् न्यांवंगु खः। दुर्घटनाया अनुसन्धान न्ह्याकेधूंगु अनया यातायात मन्त्रालय नं धाःगु दु।

नेपाली कांग्रेसया नेता प्रकाशमान सिंहं पार्टीया व्यवस्थापन हे कांग्रेसया निंतिं मू हाथ्या खः धका धयादीगु दु।

नेपाली कांग्रेसया सच्छिन्हुया विशेष अभियान अन्तर्गत कांग्रेस येँ महानगर समितिं क्षत्रपार्टीइ थौं ग्वसाः ग्वःगु महानगरस्तरीय भेलाय् संबोधन यानादिसें वय्कलं धयादिल, “आः कांग्रेसया निंतिं पार्टीयात व्यवस्थापन यायेफइ कि फइमखु धइगु हे मू न्ह्यसः खः, क्रियाशील दुजःतय्गु ल्याः अप्वः दु।

तर, क्रियाशील दुजः तय्त दुजः जुइगुया महत्व थुइके बिइमाःगु दु।” हरेक क्रियाशील दुजः तय्त पार्टीया ज्याखँय् स्वाका यंकेमाःगुलिइ नेता सिंहं बः बियादिल। देसय् प्रजातन्त्र व प्रजातान्त्रिक मूल्य मान्यता हयेत यक्व सङ्घर्ष याःगु व जनताया हानं–हानं भलसा त्याकूगु कांग्रेस पार्टीया क्रियाशील दुजः जुइगु सामान्य खँ मखूगु वय्कलं धयादिल।

पार्टी दुने समस्या दःसा नापं च्वनाः ज्यंकेगु कुतः यायेमाः वय्कलं धयादिल। येँय् च्वनीपिंसं फया वयाच्वंगु पीर व समस्यात ज्यंकेगुपाखे वनेत नेता सिंहं येँ महानगर समितियात इनाप यानादिल। सच्छिन्हुया विशेष अभियानं पार्टी सङ्गठन सुदृढीकरण यायेत ग्वाहालि जुइगु वय्कलं भलसा कयादिल।

येँ कांग्रेसया सच्छिन्हु विशेष अभियानया निंतिं नेता कृष्णप्रसाद सिटौला सनाजूयादीगु दु। (रासस)

अमेरिकाया लडाकू विमान लाल सागरय् दुर्घटना जूगु दु धका बीबीसीं धाःगु दु। अमेरिकां हुथी विद्रोहीपाखे सञ्चालित यमनया राजधानी सानाय् मिसाइल भण्डारण स्थल व कमाण्ड सुविधाय् शृङ्खलाबद्ध कथं हवाई आक्रमण जुगु लिपा थुगु घटना जुगु खः। अमेरिकाया सेना याःगु केन्द्रीय कमाण्डया कथं अमेरिकाया नौसेना याःगु लडाकू विमान एफ÷ए–१८ होर्नेटय्् दुगु निम्ह हे चालक दलया सदस्यपि सुरक्षित जुया पिहावःगु खबर दु।

अमेरिकाया लडाकू विमानय् लाल सागरय् हुथी विद्रोही पाखे यक्को हे ड्रोन व एन्टी–शिप क्रुज मिसाइल कूकुगु दु धका बीबीसीं धाःगु दु। हुथी विद्रोहीं इजरायलया चिक अभिभय् आक्रमण याये धुका अमेरिकां थज्यागु हमला याःगु खः।

हुथी इरान समर्थित विद्रोही समूह खः थुगु समुहपाखे यमनया उत्तर–पश्चिमय् थःगु नियन्त्रणय् कयातःगु खः।

भारतया मुम्बईलय् च्वंगु गेटवे अफ इण्डियापाखे एलिफेन्टा द्वीप वनाच्वंगु डुङ्गा दुर्घटना जुगुलि १३ म्हेसिगु ज्यान वंगु दु। यात्रु ज्वना वंगु डुङ्गायात भारतीय नौसेनाया छगः द्रुत गतिया डुङ्गां ठक्कर बिइवं दुर्घटना जुगु खः।

दुर्घटनाय् नौसेनाया स्वम्ह नाप १३ म्हेसिगु ज्यान वंगु दु धका भारतीय सञ्चार माध्यमं धाःगु दु। सीपिनिगु परिवारयात राज्य सरकारं न्यागु न्यागु लाख तका राहत बिइगु घोषणा याःगु दु धका मुख्यमन्त्री देवेन्द्र फडणविसं जानकारी ब्युगु दु।