निर्वाचित राष्ट्रपति डोनाल्ड ट्रम्पं सीमा सुरक्षा सम्बन्धी राष्ट्रिय संकटकाल घोषणा यायेगु व अमेरिकी सेनायात छ्यलाः दस्तावेजविहीन आप्रवासीतय्त सामूहिक रुपं देश निकाला यायेगु घोषणा याःगु दु।

राष्ट्रपति जो बिडेनया प्रशासनय् अवैध आप्रवासीया ल्याः अप्वयेधुंकाः ट्रम्पं लखौं दस्तावेज मदुपिं आप्रवासीतय्त देश निकाला यायेगु व मेक्सिकोलिसेया सीमायात नियमन यायेगु धाःगु खः। ट्रम्पं थःगु सामाजिक संजाल प्लेटफर्म ट्रुथ सोशलय् छम्ह रुढिवादी कार्यकर्तां नकतिनि च्वःगु छगू पोष्टयात रिपोष्ट याःगु दु।

वय्कलं उकी च्वयादीगु दु, “न्हूम्ह निर्वाचित राष्ट्रपति राष्ट्रिय आपतकाल घोषणा यायेत तयार दु व सामूहिक निर्वासन ज्याझ्वःयात न्ह्यःने यंकेगु निंतिं तयार दु।” नोभेम्बर ५ तारिखय् डेमोक्र्याटिक उपराष्ट्रपति कमला ह्यारिसयात बुकाः ट्रम्प हाकनं अमेरिकी राष्ट्रपति पदय् निर्वाचित जूगु खः।

वय्कलं आप्रवासन व भन्सार प्रवर्तनया पूर्व कार्यवाहक प्रमुख टम होमनयात थःगु “सीमा जार” धकाः नां बियादीगु खःसा आप्रवासन सम्बन्धी कट्टरपंथी दुजःतय्गु मन्त्रिपरिषद घोषणा यानादीगु खः। वंगु जुलाईइ जूगु रिपब्लिकन नेशनल कन्भेन्सनय् ब्वति कयाः वय्कलं समर्थकतय्त धयादी, “जिं लखौं अवैध आप्रवासीतय्त सन्देश बी चाहेजू कि बिडेनं हःपिंत लित छ्वयेगु जुइ।” अधिकारीतय् कथं अमेरिकाय् थ्यंमथ्यं १ करोड १० लाख मनूत गैरकानूनी रुपं च्वनाच्वंगु दु।

ट्रम्पया देश निकाला योजनां थ्यंमथ्यं निगू करोड परिवारयात प्रत्यक्ष रुपं लिच्वः लाकीगु अनुमान याःगु दु। ट्रम्पं थःगु आप्रवासन सम्बन्धी कारवाहीया विस्तृत जानकारी ब्यूगु मदुनि । तर चुनावी अभियानया झ्वलय् वय्कलं देश निकालायात याकनं यायेत ‘एलियन एनिमिज एक्ट १७९८’ लागू यायेगु धकाः बारम्बार धयादीगु खः।

युक्रेनया राष्ट्रपति भोलोदिमिर जेलेन्स्कीं अमेरिकाया डोनाल्ड ट्रम्पं जिम्मेवारी कःघायेवं रूस–युक्रेन हताः याकन हे क्वचाइ धका धयादीगु दु।

युक्रेनया सरकारी रेडियोनाप खँल्हानदीसे जेलेन्स्कीं आः ह्वाइट हाउस नेतृत्व याःगु टिमं नीतिया ल्वापू क्वचाइ धका धयादीगु दु।

युक्रेनं रूसय् जुयाच्वंगु ल्वापू क्वचायेकेगु ट्रम्पया प्रतिबद्धता तक दु धका जेलेन्स्कीं धाःगु दु। ट्रम्पं जनवरीनिसे अमेरिकाया राष्ट्रपतिया कार्यभार सम्हाले यानादी।

अमेरिकाया राष्ट्रपति जो बाइडेनं अमेरिकां उपलब्ध याःगु ताःहाकःगु दूरीया क्षेप्यास्त्र रुसं प्रहार याःगु युक्रेनयात अनुमति बिउगु तधःगु हताः जुइगु ग्याचिकू अप्पोया वःगु खः।

अमेरिकाया थुगु निर्णयप्रति रुस तः चाःगु दु। अय्न रुसी राष्ट्रपति भ्लादिमिर पुटिन धाःसा छु धाःगु मदुनि धका बीबीसीं धाःगु दु। रुसं युक्रेनयात रुस दुने अमेरिकाया क्षेप्यास्त्र छ्यलेत अनुमति बिइगु बाइडेनं मिँइ ध्यय् तयेगु ज्या जुगु दु धका धयादीगु खः। यदि अमेरिकां बिउगु क्षेप्यास्त्र रुस दुने प्रहार यायेगु  धाःगु रुसं थुगु आक्रमणयात युक्रेनपाखे मखुसा अमेरिकापाखे हे थुइकेत क्रेमलिनपाखे जारी याःगु विज्ञप्तिइ धाःगु दु।

यदि रुसी मिसाइल थःगु भूमिइ प्रहार जुल धासा नाटो व अमेरिकानाप तःपिक रुसया हताः जुइफुगु अनुमान याःगु दु। थःगु निलाया जक कार्यकाल ल्यः दुगु इलय् बाइडेनं प्रशासनया अमेरिकां थ्व स्वया न्ह्यः युक्रेनयात बिउगु आर्मी ट्याक्टिकल मिसाइल सिस्टम छ्यलेत अनुमति बिउगु खः।

तापाक्क क्यके फइगु अस्त्र युक्रेनयात बिइत अमेरिकी सेना अनिच्छुक जूगु खः। बाइडनं उगु क्षेप्यास्त्र युक्रेनयात उपलब्ध याकूगु गोप्य निर्देशन बिउगु विवरण थ्व स्वया न्ह्यः न सार्वजनिक याःगु खः।

लेबनानया राजधानी बेरुतय् इजरायलं याःगु आक्रमणं हिजबुल्लाहया मिडिया प्रमुखनाप स्वम्हेसित स्यागू दु।

बेरुतस्थित सिरियाया बाथ पार्टीया कार्यालययात निशाना दयका इजरायलं याःगु हवाई हमलापाखे हिजबुल्लाहया मिडिया प्रमुख मोहम्मद अफिमनाप स्वम्ह स्यागु दु धका स्थानीय टिभी च्यानल अल जदिदं धाःगु दु।

कार्यालयय् आक्रमण याःगु खः। आक्रमण याये न्ह्यः इजरायलं पार्टी कार्यालय यायेत धाःगु खः।समाचार एजेन्सी सिन्हुवां बेरुतया टिभी च्यानल अल जदिदयात क्यसे च्वंगु बुखँया कथं आक्रमणपाखे पार्टी कार्यालय च्वनाच्वंगु भवनया अप्पो ब्बः नष्ट जूगु दु।

भग्नावशेष चिइकूसे पीडित तय्त उद्धार यायेगु आज्जु कथं एम्बुलेन्स तैनाथ याःगु खः।इजरायली सेनां सन् २०२४ य् सेप्टेम्बर २३ निसे हिजबुल्लाहविरुद्ध लक्षित यासे लेबनानय् हवाई आक्रमण याःगु खः।

श्रीलंकाया संसदीय निर्वाचनय् राष्ट्रपति अरणाकुमारा दिसानायके न एनपीपी गठबन्धनं बहुमत हइगु निश्चित जूगु दु।

बिहीवाः जूगु निर्वाचनया मतगणना जुयाच्वंगु इलय् आःतक २२५ सिटमध्ये १३७ थासय् गठबन्धनं त्याकूगु खः। बहुमतया निति ११३ सिट माः। गठबन्धनं व स्वया अप्पो सिट त्याके धुकुगु दु सा अझ न मेमे थाय् त्याइगु संम्भावना दु। संसदीय निर्वाचनया निति करिब १ करोड ७१ लाख मतदानय् चुनावमा ८ हजार ८ सय उम्मेदवारतय्स प्रतिस्पर्धा याःगु खः।

दिसानायकेया जेभीपी वा पिपुल्स लिबरेशन फ्रन्ट मेगु सरकार गठनया निति पेसाकर्मी तयेगु राष्ट्रिय जनसत्ता (एनपीपी) गठबन्धनया मुख्य घटक खः।