प्रशान्त महासागरया टापु देश भानुआटुय् मंगलवाः सुथय् ७.३ म्याग्निच्युडया भुखाय् ब्बःगु दु। नेपाःया ई कथं थौ सुथय् ७ः३० बजे भुखाय् ब्बःगु खः।

भुखाय् याःगु केन्द्र राजधानी पोर्टभिलापाखे करिब ३० किलोमिटर पश्चिमय् लागु दु। अथेहे न्हिनय् १२ बजे हाकन ५.५ म्याग्निच्युडया परकम्प जुगु खः। भानुआटुइ नीदँ लिपा थथे शक्तिशाली भुखाय् ब्बःगु खः।

विद्रोहीतलिसे सामना याये मफयाः बिस्युं वंम्ह सिरियाया राष्ट्रपति बशर अल असद रुसया राजधानी मस्को थ्यंकूगु दु।

रुसी सरकारी समाचार एजेन्सीतय्सं बशर अल असद थःगु परिवारलिसें मस्को वःगु खँ धाःगु दु। मिडियाया कथं सिरियाया राष्ट्रपति असदयात रुसं शरण ब्यूगु दु । स्रोतयात उद्धृत यासें अल जजीरां रुसं असद व वया छेँजःपिन्त ‘मानवतावादी दृष्टिकोण’या आधारय् शरण ब्यूगु जानकारी ब्यूगु दु।

बीबीसीं असद मस्कोय् दु धइगु समाचार वयाच्वंगु दु, तर उकिया पुष्टि यायेमफुनिगु खँ धाःगु दु। विद्रोही समूह हयात तहरिर अल शामं देय्या मू सहर कब्जा यानाः आइतबाः राजधानी दुहां वयेवं असदं राजधानी त्वःताः वंगु खः।तर वय्कः छेँजःलिसें गन वन धइगु खँ धाःसा सार्वजनिक याःगु मदुनि।

गुलिखे मनूतय्सं असद च्वनावंगु विमान दुर्घटना जूगु हल्ला न्यंकूगु खः।बशर अल असद २४ दँ तक सिरियाय् सत्ताय् च्वनादीगु खः। असद परिवारया शासन ५० दँ तक न्ह्यात।सिरियाय् सन् २०११ य् राष्ट्रपति असद विरुद्ध शान्तिपूर्ण व लोकतन्त्रवादी विद्रोह गृहयुद्धय् हिल।

थ्व हःतालय् न्यागू लख स्वयां अप्वः मनूत सीधुंकूगु दु। १ करोड २० लाखसिबें अप्वः मनूत विस्थापित जूगु दु। उकी मध्ये थ्यंमथ्यं ५० लाख शरणार्थी जूगु दु।

अमेरिकाया क्यालिफोर्नियाय् ७ म्याग्निच्युडया शक्तिशाली भुखाय् ब्बःगु दु। अमेरिकया भौगर्भिक सर्वेया कथं भुखाय्या केन्द्र उत्तरी क्यालिफोर्नियाया फर्नडेलय् वःगु खः।

बीबीसीया कथं भुखाय् ब्बःगूलि उत्तरी क्यालिफोर्निया व दक्षिणी ओरेगनया तटय् ४.७ मिलियन सुनामी वइगु चेतावनी बिइगु दु।स्थानीय अधिकारीतय्स भुखाय् ब्बःसा आःतक मानवीय क्षति जूगु मदु धका धाःगु दु।

म्हिगः बहनी राष्ट्रपति युनं सैनिक शासन लागू यायेवं हलियक च्वपि स्तब्ध जूगु खः । तर छुं घौया दुने वं सैनिक शासन लागु याःगु सैनिक शासन लित कायेमाल। राष्ट्रपतिं घोषणा याःगु निघौ मदुनिबलय् दक्षिण कोरियाया सांसदत राष्ट्रिय सभा (संसद)य् दुहां वनाः निर्णय अवरुद्ध यायेत मतदान याःगु खः।

थः पःखाः गयाः संसद भवनय् दुहां वनागु व आन्दोलनकारीतय्सं थःत ग्वाहालि याःगु खँ छम्ह सांसदं धाःगु बीबीसीं जानकारी ब्यूगु दु। संसदय् उपस्थित फुक्क १९० म्ह सांसदतय्सं मार्शल लाया विरुद्ध मतदान याये धुंकाः राष्ट्रपति युनं थःगु निर्णय उल्टे यायेगु घोषणा याःगु खः। अले थौं राष्ट्रपति युन विरुद्ध संसदया दुजःतय्सं महाभियोगया प्रक्रिया न्ह्याकूगु खः।

उत्तर कोरियाया कम्युनिष्ट शक्तिपाखें दक्षिण कोरियायात सुरक्षित यायेत व राज्य विरोधी तत्वयात पराजित यायेत सैनिक शासन माःगु धका राष्ट्रपति यूंया दाबी खः। आः वइगु शुक्रवाः वा शनिवाः राष्ट्रपति विरुद्धया महाअभियोग प्रस्तावयात कयाः सांसदपिन्सं मतदान याइगु सम्भावना दूगु बीबीसीं जानकारी ब्यूगु दु।

यदि संसदया निगु तिहाइ बहुमतं महाअभियोग पारित यात धाःसा राष्ट्रपति युनयात संवैधानिक अदालतय् मुद्दा फयेमालीगु जूगु द । यदि अदालतं नं महाअभियोग पारित यात धाःसा ६० न्हुया दुने न्हूगु निर्वाचन जुइ। मेखे दक्षिण कोरियाया रक्षामन्त्री किम योङ ह्युनं मार्शल ला लागू यायेगु पूर्ण जिम्मेवारी कयाः राजीनामा बियादीगु दु।

बीबीसीया कथं वय्कलं विज्ञप्ति जारी यानाः नागरिकपिन्त भ्रम व दुःख न्यंकूगु धासें माफी फ्वनादीगु खः।

फ्रान्सय् ६२ दँ लिपा न्हापांखुसी अविश्वासया प्रस्तावपाखें सरकार पतन जूगु खः । स्वला न्ह्यः जक प्रधानमन्त्री जूम्ह मिशेल बर्नियर अविश्वासया प्रस्ताव बहुमतं पारित जुइ धुंकाः पदं मुक्त जूगु दु।

बीबीसीया कथं सन् १९६२ लिपा फ्रान्सय् अविश्वासया प्रस्तावपाखें सरकार पतन जूगु थ्व न्हापांखुसी खः। सोमवाः दक्षिणपन्थी व वामपन्थी दलया सांसदतय्सं प्रधानमन्त्री मिशेलविरुद्ध अविश्वासया प्रस्ताव दर्ता याःगु खः। थ्व प्रस्ताव बहुमतं पारित जूगु बीबीसीं जानकारी ब्यूगु दु। अविश्वास प्रस्ताव पारित यायेत माःगु २८८ मतया पक्षय् ३३१ मत कुतुंवःगु खः।

मिशेल स्वला न्ह्यः जक प्रधानमन्त्री जूगु खः। अविश्वासया प्रस्तावय् पराजित जुइ धुंकाः मिशेल बर्नियर फ्रान्सया इतिहासय् दकलय् म्हो ईया प्रधानमन्त्री जुयादीम्ह खः। वय्कः ९१ न्हु जक प्रधानमन्त्री जुयादीगु खः। फ्रान्सय् सामाजिक सुरक्षा बजेटया सवालय् सत्तापक्ष व विपक्ष दथुया तनाव अप्वःगु खः।

प्रधानमन्त्री बर्नीं संसदय् मतदान मयासे बजेट पारित यायेगु निर्णय यायेधुंकाः वामपन्थी व दक्षिणपन्थी दलया सांसदतय्सं अविश्वासया प्रस्ताव हःगु खः। थौं प्रधानमन्त्री बर्नियरं राष्ट्रपति म्याक्रोयात राजीनामा लःल्हाइगु जूगु दु। सरकार पतन जुइवं २०२५ या देय्या बजेटयात कयाः चिउताः प्वंकाच्वंगु दु।