फ्रान्सय् ६२ दँ लिपा न्हापांखुसी अविश्वासया प्रस्तावपाखें सरकार पतन जूगु खः । स्वला न्ह्यः जक प्रधानमन्त्री जूम्ह मिशेल बर्नियर अविश्वासया प्रस्ताव बहुमतं पारित जुइ धुंकाः पदं मुक्त जूगु दु।

बीबीसीया कथं सन् १९६२ लिपा फ्रान्सय् अविश्वासया प्रस्तावपाखें सरकार पतन जूगु थ्व न्हापांखुसी खः। सोमवाः दक्षिणपन्थी व वामपन्थी दलया सांसदतय्सं प्रधानमन्त्री मिशेलविरुद्ध अविश्वासया प्रस्ताव दर्ता याःगु खः। थ्व प्रस्ताव बहुमतं पारित जूगु बीबीसीं जानकारी ब्यूगु दु। अविश्वास प्रस्ताव पारित यायेत माःगु २८८ मतया पक्षय् ३३१ मत कुतुंवःगु खः।

मिशेल स्वला न्ह्यः जक प्रधानमन्त्री जूगु खः। अविश्वासया प्रस्तावय् पराजित जुइ धुंकाः मिशेल बर्नियर फ्रान्सया इतिहासय् दकलय् म्हो ईया प्रधानमन्त्री जुयादीम्ह खः। वय्कः ९१ न्हु जक प्रधानमन्त्री जुयादीगु खः। फ्रान्सय् सामाजिक सुरक्षा बजेटया सवालय् सत्तापक्ष व विपक्ष दथुया तनाव अप्वःगु खः।

प्रधानमन्त्री बर्नीं संसदय् मतदान मयासे बजेट पारित यायेगु निर्णय यायेधुंकाः वामपन्थी व दक्षिणपन्थी दलया सांसदतय्सं अविश्वासया प्रस्ताव हःगु खः। थौं प्रधानमन्त्री बर्नियरं राष्ट्रपति म्याक्रोयात राजीनामा लःल्हाइगु जूगु दु। सरकार पतन जुइवं २०२५ या देय्या बजेटयात कयाः चिउताः प्वंकाच्वंगु दु।

रुसं शनिवाः सुथय् सुदूर पूर्वया भोस्टोचनी कस्मोड्रोमपाखें सोयुज–२.१ ए रकेट सफलतापूर्वक प्रक्षेपण याःगु दु।

उन्नत राडार प्रविधिं फुक्क मौसमी अवस्थाय् पृथ्वीयात २४ हे घण्टा अवलोकन यायेत सक्षम दु । रुसी अन्तरिक्ष एजेन्सी रोस्कोस्मोसं छगू विज्ञप्ति मार्फत निगूगु राडार भूउपग्रह कोन्डोर–एफकेए कक्षय् प्रवेश याःगु घोषणा याःगु दु।

कन्डोर–एफकेए छगू चिधंगु नागरिक राडार पृथ्वी अवलोकन भूउपग्रह ख, गुकियात नागरिक समकक्षया रुपय् डिजाइन यानातःगु दु। रुसय् च्वंगु रकेट डिजाइन ब्यूरों कन्डोर–एफकेए नीस्वंगु इलंनिसें निरन्तर प्रगति जूगु धाःगु दु।

न्हापांगु निगू भूउपग्रह २०१३ व २०१४ स प्रक्षेपण याःगु खः । कन्डोर–एफकेए १ २०२३ स कक्षय् दुहां वन । आः मेगु निगू भूउपग्रह निर्माणाधीन दु । स्वक्वःगु कन्डोर–एफकेए प्रक्षेपण २०२६ या निंतिं ग्वसाः ग्वयातःगु दु।

अमेरिकाय् नवनिर्वाचित राष्ट्रपति डोनाल्ड ट्रम्पया मन्त्रीमण्डलय् च्वपि यक्को दुजःपिन्त व ट्रम्पयो ह्वाइट हाउस सदस्यय् च्वपिन्त बम आक्रमणया ख्याच्वः वःगु दु।

धम्कीयाबारे थःपिन्त जानकारी वःगु धासे अमेरिकाया सङ्घीय अनुसन्धान ब्युरो एफबीआई न यक्को भ्रामक हल्ला यानाच्वंगु धका सचेत जुइमाः धका धाःगु दु।

घटनाबारे प्रहरीं अनुसन्धान यानाच्वंगु सुरक्षा व अनुसन्धानयात प्रभावित यायेत स्वंगु मखुगु विवरणनाप टेलिफोन वयाच्वंगु धका एफबीआई न धाःगु दु।

ट्रम्पं ल्यःपि आवास, कृषि व श्रम विभागया नेतृत्व व संयुक्त राष्ट्रया निति अमेरिकाया राजदूतय् छनोट जूपि विरुद्ध धम्की वयाच्वंगु दु धका बीबीसीं धाःगु दु।

युक्रेनं याःगु अमेरिकाया क्षेप्यास्त्र आक्रमणपाखे न्हापागु पटक थःगु वायु रक्षा प्रणाली बेसय् क्षति जुगु रुसं स्वीकार याःगु दु। थ्व नापं कुर्स्क क्षेत्रय् च्वंगु सैन्य आधारय् न क्षति जुगु दु।

अमेरिकाया प्याट्रियट डिफेन्स सिस्टम थे जाःगु क्षमता दुगु एस ४०० वायु रक्षा प्रणालीयात युक्रेनं लक्षित याःगु बीबीसीं धाःगु दु। छु दिं न्ह्यः जक अमेरिकां युक्रेनयात रुसविरुद्ध ताहाकःगु दूरीया मिसाइल छ्यलेत स्वीकृति ब्युगु खः।

१ हजार दिं स्वया अप्पो न्ह्यानाच्वंगु युद्धय् न्हापागु पटक उलि शक्तिशाली हतियार प्रयोग जुगु माने यानातःगु दु।थ्व हे नापं युक्रेनी वायु सेनां वंगु सोमवाः चान्ह्यः रुसं १ सय ८८ ड्रोनं आक्रमण यागुलि आधारभूत संरचनाय् क्षति जुगु खः।

वया लिपा युक्रेन व रुस दथुइ तनाव उत्कर्षय् थ्यःगु खः।

पाकिस्तानया खैबर पख्तुनख्वाह प्रान्तय् छगः यात्रुबाहक बसय् आक्रमण जुगुलि ४१ म्हेसिगु ज्यान वंगु दु।अथेहे १६ म्ह तसकं घाःपाः जुगु दु।

पख्तुनख्वाह प्रान्तया कुर्रम क्षेत्रय् विहीवाः बन्दुकधारी तय्स आक्रमण याःगु खः।उगु आक्रमणय् मिसा व मस्त सीउगु खः। आक्रमणयो जिम्मा सूना न काःगु मदु।

बुधवाः न खैबर पख्तुनख्वाह प्रान्तय् आक्रमण जूगुलि १२ म्ह सुरक्षाकर्मी तयेगु ज्यान वंगु खः।