गाजाय् वंगु अक्टोबर ७ य् आक्रमण याये धुका लडाक तय्स बन्धक दय्कातःम्ह छम्ह इजरायली बन्धकया सीम्ह लुगु दु धका इजरायली सेनां शुक्रवाः पुष्टि याःगु दु।

फरेन्सिक जाँच लिपा इजरायली सेनां हम्जा अल जायदना ‘हमासया कैदय् स्यागू ’ जानकारी वयकःया परिवारयात बिहीवाः धाःगु खः। सेनां वयकःया अबू युसुफया सीम्ह बुधवाः बरामद याना इजरायल हयागु घोषणा याःगु खः।

प्यालेस्टिनी लडाकू तयेस गाजाया सीमा नापं किबुट्ज होलिटपाखे काय् व अबूयात सन् २०२३ अक्टोबर ७ य् कब्जा काःगु खः। उमि नाप अपहरणय् लापि हम्जाया केँह व किजायात नोभेम्बर २०२३ य् छवाःया युद्धविरामया झ्वलय् रिहा याःगु खः।

हम्जा अल–जायदनाया भविष्यबारे बुधवाः अपुष्ट रिपोर्ट सार्वजनिक याःगु खः, तर शुक्रवाः सेनां वयकःया सीम्ह अवशेष म्हसिकागु खः धका पुष्टि याःगु खः।

चीनया एमपक्स स्ट्रेनय् न्याम्हेसित सङ्क्रमित जूगु दु। एमपक्स प्रकोपयात प्रभावकारी कथं नियन्त्रण यायेगु कुतः यानाच्वंसा न्याम्हेसित सङ्क्रमित जूगु दु धका चिनियाँ अधिकारीतयेस धाःगु दु।

चिनियाँ स्वास्थ्य अधिकारी तय्स एमपक्स स्ट्रेन क्लेड १ बी या समूहगत प्रकोप लुगु दु धका समाचार संस्था एएफपी न धाःगु दु। कङ्गापाखे वःपि मनू तय्त सङ्क्रमण पुष्टि जूगु खः।

चीनं हलिमयय् दकलय् ताःहकगु ’एक्सप्रेसवे’ (द्रुतमार्ग) सुरुङ निर्माण याःगु खः। चीनं शिनजियाङ्गय् प्यदँ बिइका दकलय ताःहाकगु एक्सप्रेसवे सुरुङ निर्माण याःगु दु।

तियानशान शेङ्गली सुरुङ २२ किलोमिटर १३ मिटर ताःहकगु चिनियाँ समाचार संस्था सिन्ह्वां धाःगु दु। थ्व सुरुङ तियानशान पर्वत जूया यात्रा यायेगुलि म्हो ई काइ धका धाःगु दु।

शिनजियाङ्ग चीनया स्वायत्त क्षेत्र खः। एक्सप्रेसवे सुरुङ सञ्चालनय् वलकि उत्तरी व दक्षिणी शिनजियाङ्गया दथुइ स्वापू सुधार जुइगु अनुमान याःगु दु। शिनजियाङ्गया दक्षिण–पश्चिम सीमा भारतनाप स्वागु थाय् खः। तियानशान सुरुङ निर्माणया ज्या सन् २०२० या अप्रिलय् न्ह्यागु खः। सुरुङ निर्माण यायेगु झ्वलय् स्वद्धः मिटर स्वया च्वय् जटिल भौगोलिक अवस्था लगायत यक्को थाकुकं ज्या यायेमाःगु खः।

थ्व सुरुङ निर्माण यायेत टीबीएम मेशिन छ्यंगु खः। चीनया सतकय् सुरुङ निर्माण यायेत न्हापागु पटक टनेल बोरिङ मेशिन (टीबीएम) छ्यंगु खः। थ्व मेशिन प्रयोग छ्यगुलि सुरुङ निर्माण यायेत झीदँ बिइ थासय् प्यदँ पूरा याउगु खः। निर्माण यायेगु निति स्वद्धः स्वया अप्पो ज्यामीपिन्त ज्या याकूगु खः।

एक्सप्रेसवे सुरुङया कारण तियानशान पर्वतया दथुइ यात्रा यायेगु ई स्व घौ या थासय् आः २० मिनेटय् वयेगु वने फइ धका सिन्ह्वां धाःगु दु। थुगु सुरुङ वइगु दँय् निसे सञ्चालनय् वइगु जुगु दु।

थाइल्यान्ड राजधानी बैंककय् खुगु ६ तल्लाया होटलय् मिँ च्याना स्वम्ह विदेशी पर्यटक सीउगु दु सा न्ह्यम्ह घाःपाः जुगु दु।

सीपि अमेरिका, ब्राजिल व युक्रेनया नागरिकपि खः। उकि मध्ये छम्ह मिसा निम्ह मिजंपि खः। घाःपाः जूया अस्पतालय् उपचार यायेगु झ्वलय् उपि सीउगु खः।

घाःपाः जूपि न्याम्ह विदेशी व निम्ह थाइ नागरिकपि खः धका बैंकक महानगर प्रशासनं धाःगु दु।

अमेरिकी पूर्व राष्ट्रपति जिमी कार्टर मन्त। वयकः अमेरिकाया जर्जियाय् १०० दँय् मदुगु खः। वयकःया काय् न कार्टर मदुगु धका पुष्टि यानादीगु खः।

१ अक्टुबर १९२४ य् जन्मय् जुयादीगु खः। वयकलं १९७७ निसे १९८१ तक अमेरिकाया राष्ट्रपति जुयादीगु खः। आर फोर्डयात बूका अमेरिकाया ३९ म्ह राष्ट्रपति जुयादीगु खः।

मध्यपूर्वय् शान्ति स्थापना यायेगु निति ऐतिहासिक क्याम्प डेभिड सम्झौता यायेगुलि मध्यस्थता यानादीगुलि सन् २००२ य् नोबेल शान्ति सिरपा कयादीगु खः।

वयकः अमेरिकाया इतिहासय् दलकय् अप्पो तक जीवित जुयादीम्ह राष्ट्रपति खः।