यमनया हुथी विद्रोहीतय्सं इजरायलय् हाइपरसोनिक क्षेप्यास्त्र प्रहार याःगु दाबी याःगु दु । हुथी विद्रोहीतय्सं थःपिंसं राजधानी तेल अभिभया छगू सैन्य अड्डाय् हाइपरसोनिक मिसाइल प्रहार याःगु दाबी याःगु दु।

चिनियाँ समाचार एजेन्सी सिन्ह्वां हुथी विद्रोहीतय्सं गाजाय् जूगु इजरायली नरसंहारया विरोधय् व प्यालेस्टाइनया समर्थनय् हाइपरसोनिक मिसाइल प्रक्षेपण याःगु धाःगु खँयात उद्धृत यासें धाःगु दु। हुथी सैन्य प्रवक्ता यःया सारियां इजरायलय् हाइपरसोनिक क्षेप्यास्त्र प्रक्षेपण यायेगु थःपिनिगु योजना सफल जूगु व थःपिं लय्तागु दाबी याःगु दु।

हुथी पुचलं गाजाय् जूगु नरसंहार मदिकूतले इजरायलविरुद्ध थप सैन्य अभियान न्ह्याकेगु ख्याच्वः ब्यूगु दु। इजरायलया राजधानीइ हुथीतय्सं क्षेप्यास्त्र प्रक्षेपण याःगु इलय् चेतावनी बिइगु साइरन न्याःगु खः। अथेहे, अमेरिकी व बेलायती सैन्य गठबन्धनं लाल सागरया उत्तरपश्चिमय् लाःगु यमनया हज्जा प्रान्तया बहिश क्षेत्रय् हुथीतय्गु मोबाइल रकेट प्रक्षेपकय् क्षेप्यास्त्र आक्रमण याःगु दाबी याःगु दु। हुथीं संचालन यानाच्वंगु अल मसिराह टिभीं आक्रमणया पुष्टि याःगु दु।

उगु आक्रमणय् लानाः कम्ती नं न्याम्ह हुथी लडाकु सीगु दुसा न्ह्यय्म्ह घाःपाः जूगु दु। इजरायलं गाजाय् याःगु आक्रमणया विरोधय् हुथीतय्सं लाल सागरय् दर्जनौं मालवाहक जहाजय् आक्रमण यानाच्वंगु दु। हुथीं इजरायल व इजरायली गठबन्धनलिसे स्वाःगु जहाजय् आक्रमण यानाः अरबौं डलर बराबरया क्षति याःगु दु।

प्रशान्त महासागरया टापु देश भानुआटुय् मंगलवाः सुथय् ७.३ म्याग्निच्युडया भुखाय् ब्बःगु दु। नेपाःया ई कथं थौ सुथय् ७ः३० बजे भुखाय् ब्बःगु खः।

भुखाय् याःगु केन्द्र राजधानी पोर्टभिलापाखे करिब ३० किलोमिटर पश्चिमय् लागु दु। अथेहे न्हिनय् १२ बजे हाकन ५.५ म्याग्निच्युडया परकम्प जुगु खः। भानुआटुइ नीदँ लिपा थथे शक्तिशाली भुखाय् ब्बःगु खः।

विद्रोहीतलिसे सामना याये मफयाः बिस्युं वंम्ह सिरियाया राष्ट्रपति बशर अल असद रुसया राजधानी मस्को थ्यंकूगु दु।

रुसी सरकारी समाचार एजेन्सीतय्सं बशर अल असद थःगु परिवारलिसें मस्को वःगु खँ धाःगु दु। मिडियाया कथं सिरियाया राष्ट्रपति असदयात रुसं शरण ब्यूगु दु । स्रोतयात उद्धृत यासें अल जजीरां रुसं असद व वया छेँजःपिन्त ‘मानवतावादी दृष्टिकोण’या आधारय् शरण ब्यूगु जानकारी ब्यूगु दु।

बीबीसीं असद मस्कोय् दु धइगु समाचार वयाच्वंगु दु, तर उकिया पुष्टि यायेमफुनिगु खँ धाःगु दु। विद्रोही समूह हयात तहरिर अल शामं देय्या मू सहर कब्जा यानाः आइतबाः राजधानी दुहां वयेवं असदं राजधानी त्वःताः वंगु खः।तर वय्कः छेँजःलिसें गन वन धइगु खँ धाःसा सार्वजनिक याःगु मदुनि।

गुलिखे मनूतय्सं असद च्वनावंगु विमान दुर्घटना जूगु हल्ला न्यंकूगु खः।बशर अल असद २४ दँ तक सिरियाय् सत्ताय् च्वनादीगु खः। असद परिवारया शासन ५० दँ तक न्ह्यात।सिरियाय् सन् २०११ य् राष्ट्रपति असद विरुद्ध शान्तिपूर्ण व लोकतन्त्रवादी विद्रोह गृहयुद्धय् हिल।

थ्व हःतालय् न्यागू लख स्वयां अप्वः मनूत सीधुंकूगु दु। १ करोड २० लाखसिबें अप्वः मनूत विस्थापित जूगु दु। उकी मध्ये थ्यंमथ्यं ५० लाख शरणार्थी जूगु दु।

अमेरिकाया क्यालिफोर्नियाय् ७ म्याग्निच्युडया शक्तिशाली भुखाय् ब्बःगु दु। अमेरिकया भौगर्भिक सर्वेया कथं भुखाय्या केन्द्र उत्तरी क्यालिफोर्नियाया फर्नडेलय् वःगु खः।

बीबीसीया कथं भुखाय् ब्बःगूलि उत्तरी क्यालिफोर्निया व दक्षिणी ओरेगनया तटय् ४.७ मिलियन सुनामी वइगु चेतावनी बिइगु दु।स्थानीय अधिकारीतय्स भुखाय् ब्बःसा आःतक मानवीय क्षति जूगु मदु धका धाःगु दु।

म्हिगः बहनी राष्ट्रपति युनं सैनिक शासन लागू यायेवं हलियक च्वपि स्तब्ध जूगु खः । तर छुं घौया दुने वं सैनिक शासन लागु याःगु सैनिक शासन लित कायेमाल। राष्ट्रपतिं घोषणा याःगु निघौ मदुनिबलय् दक्षिण कोरियाया सांसदत राष्ट्रिय सभा (संसद)य् दुहां वनाः निर्णय अवरुद्ध यायेत मतदान याःगु खः।

थः पःखाः गयाः संसद भवनय् दुहां वनागु व आन्दोलनकारीतय्सं थःत ग्वाहालि याःगु खँ छम्ह सांसदं धाःगु बीबीसीं जानकारी ब्यूगु दु। संसदय् उपस्थित फुक्क १९० म्ह सांसदतय्सं मार्शल लाया विरुद्ध मतदान याये धुंकाः राष्ट्रपति युनं थःगु निर्णय उल्टे यायेगु घोषणा याःगु खः। अले थौं राष्ट्रपति युन विरुद्ध संसदया दुजःतय्सं महाभियोगया प्रक्रिया न्ह्याकूगु खः।

उत्तर कोरियाया कम्युनिष्ट शक्तिपाखें दक्षिण कोरियायात सुरक्षित यायेत व राज्य विरोधी तत्वयात पराजित यायेत सैनिक शासन माःगु धका राष्ट्रपति यूंया दाबी खः। आः वइगु शुक्रवाः वा शनिवाः राष्ट्रपति विरुद्धया महाअभियोग प्रस्तावयात कयाः सांसदपिन्सं मतदान याइगु सम्भावना दूगु बीबीसीं जानकारी ब्यूगु दु।

यदि संसदया निगु तिहाइ बहुमतं महाअभियोग पारित यात धाःसा राष्ट्रपति युनयात संवैधानिक अदालतय् मुद्दा फयेमालीगु जूगु द । यदि अदालतं नं महाअभियोग पारित यात धाःसा ६० न्हुया दुने न्हूगु निर्वाचन जुइ। मेखे दक्षिण कोरियाया रक्षामन्त्री किम योङ ह्युनं मार्शल ला लागू यायेगु पूर्ण जिम्मेवारी कयाः राजीनामा बियादीगु दु।

बीबीसीया कथं वय्कलं विज्ञप्ति जारी यानाः नागरिकपिन्त भ्रम व दुःख न्यंकूगु धासें माफी फ्वनादीगु खः।