इथियोपिया सरकारं कफी निर्यात याना खुल्लाया दुने ५ सय ७१ मिलियन डलर दुकागु दु। उगु ध्यवा धइगु नेपाःया ७६ अर्ब रुपैयाँ जुवनिइ।

वंगु जुलाई ८ तारिखनिसे शुरु जूगु चालु आर्थिक वर्ष २०२३÷२४ या निगुगु त्रैमासतक १ लाख १८ हजार टन कफी निर्यात याना इथियोपियाली कफी लिसे चिया प्राधिकरणं निर्यात याःगु धका चिनियाँ समाचार संस्था सिन्ह्वां धाःगु दु।

इथियोपियां मुख्ययाना साउदी अरेबिया, दक्षिण कोरिया, संयुक्त राज्य अमेरिका, जर्मनी, जापान व चीनय् कफी निर्यात याना वयाच्वंगु खः।

विश्व कफी बजारय् अनिश्चितता व कफी आयात याना वयाच्वंगु देशय् जुयाच्वंगु द्वन्द्वं याना चुनौती दु धका प्राधिकरणं धाःगु दु।

इथियोपियां वंगु आर्थिक वर्षय् निगु लाख ४० हजार टन कफी निकासीपाखे १ अर्ब ३ करोड डलर दुकाःगु खः। आः धासा निकासीइ म्हो जुगु खनेदु।

चालक दलया खुम्ह नाप ७४ म्ह च्वनावंगु छगः रुसी विमान युक्रेनया सीमानापं दुर्घटना जूगु दु। रुसी रक्षा मन्त्रालयया कथं इल्युशिन–७६ नांया सैन्य विमान युक्रेननापं बेलगोरोद प्रान्तया याबलोनोवो गामय् दुर्घटना जूगु खः।

दुर्घटना जूगु विमानय् च्वनावःपि दक्को ७४ म्हेसिगु ज्यान वंगु दु धका बीबीसीं धाःगु दु। रुसी अधिकारी तय्गु खँ कथं विमानय् ६५ युक्रेनी बन्दी, खुम्ह चालक दलनापं स्वम्ह एस्कर्ट (गार्ड) दुगु खः। उगु विमान युक्रेनं कुुतुकुगु धका द्धपः बिःगु दु।

खार्किभ सीमा क्षेत्रय् तैनाथ युक्रेनी सेनां विमानय् निगु क्षेप्यास्त्र प्रहार याःगु धका रुसी रक्षा मन्त्रालयं धाःगु दु। मन्त्रालयं उगु घटनायात ‘आतंकवादी ज्या’ धका धाःगु दु।

जापानया चन्द्रयान चन्द्रमाय् सफलतापूर्वक अवतरण जूगु दु। थुगु यान अमेरिका, रुस, चीन व भारतया लिपा जापान चन्द्रमाय् अवतरण यागू न्यागुगु देय् जूगु दु।

जापानया अन्तरिक्ष एजेन्सीं थःगु स्मार्ट ल्यान्डर फर इन्भेस्टिगेटिङ मुन (स्लिम) न चन्द्रमाया सतहय् सफ्ट ल्यान्डिङ याःगु दु धका धागू दु। जापान एरोस्पेस एक्सप्लोरेसन एजेन्सीं मुन स्निपर नामक प्रोबया लक्ष्य १०० मिटर (३२८ फिट) दुने अवतरण यायेगु कुतः याःगु खः।

जापानया अन्तरिक्ष एजेन्सी स्लिमं थःगु आज्जु पाय्छी जुगु मजुगु धइगु लच्छिया दुने सिइ दइ धका धाःगु दु।

बिबिसीया कथं जापानया अन्तरिक्ष एजेन्सीें ‘मून स्नाइपर’ धका म्हसूगु थःगु अन्तरिक्ष यान चन्द्रमाय् अवतरण याःगु दु धका धाःगु दु।

भारतया गुजरातय् वडोदरा हरनी तालय् डुङ्गा डुबे जूया १४ म्हेसिगु ज्यान वंगु दु। अथेहे खुम्ह बेपत्ता जूयाच्वंगु दु ।

म्हिगः जूगु दुर्घटनाय् १२ म्ह मचापि व निम्ह शिक्षकया ज्यान वंगु दु धका बीबीसीं धाःगु दु। डुङ्गाय् २७ म्ह च्वना वंगु खः। न्ह्यय्म्हेसित उद्धार याना अस्पतालय् भर्ना याःगु दु।

तःपिन्त मालेगु ज्या जुयाच्वंगु दु।

युक्रेन सेनां आजोभ सागरय् रुसी जासूस सैन्य विमान कूतुकाःगु दाबी याःगु दु। युक्रेनी सेना प्रमुखं वायुसेनां ताहाकःगु दूरीया राडार पत्ता लगे याइगु रुसया विमानयात नष्ट याःगु धका बीबीसी हिन्दीं धाःगु दु।

थुगु विमानं रुसया हवाई सुरक्षा प्रणाली पत्ता लगे याइगु जेट विमान सम्भावित निशाना न्हापा हे पत्ता लगे याइगु खः। थ्व स्वया न्हापा युक्रेन लगातार दक्षिणपूर्वी क्षेत्रय् रुसयात कब्जा यायेत ताः मलागु खः ।

तर युक्रेनं सैन्य विमान कूतुकुगुयात कया विज्ञतय्सं रुसया हवाई शक्तिया लागि तधःगु धक्का लाःगु धका धयावया च्वंगु दु। रुसी विशेषज्ञ तय्सं ए–५० नांया रुसी जासूस सैन्य विमानया विनाश तधःगु खँ जुगु धका धाउगु दु।