इजरायलय् च्वनाच्वपि सेनातय्त उत्तरी बेसयात लक्षित यान ड्रोन आक्रमण याःगु दु। उगु आक्रमणय् प्यम्ह सैनिकया ज्यान वंगु दु सा ६० म्ह घाःपाः जूगु दु धका इजरायलया रक्षा बल (आईडीएफ) न धाःगु दु।

हाइफाया दक्षिणय् २० माइल अर्थात् ३३ किलोमिटर तापाक्क च्वंगु सहर बिन्यामिनाया सिथय् आक्रमणय् न्ह्यय्म्ह सैनिकपि तसकं घाःपाः जूगु दु। तेल अभिभ व हाइफाया दथुइ च्व्ंगु इजरायली रक्षा बल (आईडीएफ) गोलानी ब्रिगेडय् प्रशिक्षण शिविरयात लक्षित याःगु खः।

हिजबुल्लाहं उगु आक्रमणया जिम्मेवारी काःगु दु। घाःपा जूपि ३७ म्हेसित एम्बुलेन्स व हेलिकप्टरं अस्पतालय् यकूगु धका अन्तराष्ट्रिय सञ्चारमाध्यमं धागू दु।

अमेरिकाया निवर्तमान राष्ट्रपति व वइगु चुनावय् राष्ट्रपति पदया उम्मेदवार डोनाल्ड ट्रम्पया सभा लिक्क प्रहरीं बन्दुक व लोड पेस्तोललिसें छम्ह मनूयात ज्वंगु दु।

क्यालिफोर्नियाया कोचेलाय् ४९ दँया वेम मिलरं ट्रम्पया सभाय् गाडी चले यायेत स्वयाच्वंगु खः। सुरक्षा जाँचया झ्वलय् प्रहरीं वयाके निगः ल्वाभः बरामद याःगु दु धका बीबीसीं जानकारी ब्यूगु दु।

अमेरिकाया गोप्य सेवां ट्रम्पयात छुं कथंया खतरा मदुगु व घटनां सुरक्षा संचालनय् छुं लिच्वः मलाःगु धाःगु दु। लिसें सुरक्षा अधिकारीं थुगु घटनाय् हत्याया कुतः जूगु छुं नं संकेत मदुगु धाःगु दु।ट्रम्प मञ्चय् च्वनेगु छघौ न्ह्यः उगु घटना जूगु खः।

वयां लिपा ट्रम्प चुनावी मञ्चय् भाषण यायेत वःबलय् कडा सुरक्षा ब्यूगु समाचारय् न्ह्यथनातःगु दु। अमेरिकाय् धाःसा वइगु महिनाय् राष्ट्रपतिया चुनाव जुइत्यंगु दु।

बेल्जियमय् जूगु स्थानीय निकायया निर्वाचनय् निम्ह नेपालीमूलया उम्मेदवारतय्स त्याका न्हुगु इतिहास तःगु दु।

बेल्जियमया राजनीतिइ अन याःगु स्थानीय निकायया निर्वाचनय् ब्रुगे नगरपालिकाया सदस्यः नेपाःया निगु पुस्ताया प्रज्ञा तिमील्सिना व लुभेन नगरपालिका सदस्यय् न्हापागु पुस्ताया सूर्य ढकाल निर्वाचित जूगु खः।

उगु निर्वाचनय् मेमेगु नगरपालिका व मेमेगु थासय् ११ म्ह नेपाःमिपि उम्मेदवार जुगुलि तिमिल्सिना ७८८ व ढकालं १०७४ मत कया निर्वाचित जूगु खः।

श्रीलंकाया राष्ट्रपति अनुरा कुमारा दिशानायके न संसद विघटन याःगु दु। नापं तु वयकलं संसदीय निर्वाचनया तिथि न क्वछिउगु दु।

शनिवाः जुगु राष्ट्रपति निर्वाचनय् वामपन्थी नेता दिशानायके निर्वाचित जूगु दु। तर २२५ सदस्यीय संसदय् वयकःया दल नेशनल पिपुल्स पावर (एनपीपी)या स्वम्ह जक सांसद दु।

राष्ट्रपति दिशानायके न मंगलवाः थःगु दलया सांसद डा. हरिनी अमरासूर्ययात प्रधानमन्त्री व विपथा हेराथयात मन्त्री दयकूगु खः। वया लिपा हे मंगलवाः चान्ह्यनिसे लागू जुइगु कथं वयकलं संसद भंग यानादीगु खः। श्रीलंकाया संविधानं राष्ट्रपतियात उगु अधिकार बिउगु दु।

नाप १४ नोभेम्बर २०२४ य् संसदया निति निर्वाचन जुइगु दु। ४ अक्टोबरपाखे उम्मेदवारी दर्ता जुइ। निर्वाचनपाखे वइपि न्हुगु संसदया न्हापागु बैठक २१ नोभेम्बर २०२४ य् जुइगु क्वछिउगु दु।

नेशनल पिपुल्स पावर (एनपीपी) या सांसद डा. हरिनी अमरासूर्या श्रीलंकाय् न्हूम्ह प्रधानमन्त्रीइ नियुक्त जूगु दु। वय्कलं मंगलवाः राष्ट्रपति अनुराकुमार दिशानायकेलिसे पद व गोपनीयताया सपथ ग्रहण यानादीगु खः।

शनिवाः जूगु राष्ट्रपति निर्वाचनय् बामपन्थी दिशानायके त्याःगु खः। वय्कलं सोमवाः शपथ ग्रहण यायेधुंकाः प्रधानमन्त्री दिनेश गुणवर्दनें राजीनामा बियादीगु खः।२२५ सदस्यीय संसदय् डा. अमारा सूर्यलिसें विजिथा हेराथ व लक्ष्मण निपुन आरागची जक सांसद जूगु खः।

राष्ट्रपति दिशानायकें अमरसूर्ययात प्रधानमन्त्री व हेराथयात मन्त्री नियुक्त याःगु खः। अथेहे श्रीलंकाया संचारमाध्यमं वय्कलं थौं चान्ह्यः संसद विघटन याइगु बुखँ पिहावःगु दु। राष्ट्रपति दिशानायकें रक्षा व अर्थलिसेंया मन्त्रालय थःके हे तयातःगु दु।

प्रधानमन्त्री अमरा सूर्ययात शिक्षा, विज्ञान व प्रविधिया मन्त्रालय ब्यूगु दुसा परराष्ट्र लगायतया मन्त्रालय हेराथयात ब्यूगु दु।