Display Style:
Column Style
नेवाः कलाकारतय् दथुइ मैत्रीपूर्ण फुटसल कासा
लहनान्यूज | बछलाथ्व चतुर्दशि ११३७ (मे ९ २०१७)
सुखावती मल्टि प्रोडक्सनया ग्वसालय् नेवाः कलाकारतय् दथुइ मैत्रीपूर्ण फुटसल कासा जुइगु जूगु दु ।
वइगु तछलाथ्व नवमि (ज्येष्ठ २०) शनिबाःया दिनस मैत्रीपूर्ण फुटसल कासा यायेत्यंगु खः । कासाय् नेवाः संकिपा ख्यः व संगीत ख्यःया कलाकारपिन्सं मैत्रीपूर्ण कासा म्हितेत्यंगु खः ।
फुटसल कासा ज्याझ्वलय् कासाया लिसें सांगितिक ज्याझ्वः नं न्ह्यब्वयेगु ज्याझ्वः कजि भोगेन्द्र मानन्धरं जानकारी बियादीगु दु ।
ज्याझ्वलय् सुखावती मल्टि प्रोडक्सनया ब्यानरय् दयेकेत्यंगु न्हूगु संकिपा ‘जेन्टलम्यान’या घोषणा व कलाकारया म्हसीका नं जुइगु जूगु दु ।
उगु हे ज्याझ्वलय् फुटसल कासाया त्याकामिपिन्त दसिपौ व मेडल लःल्हायेगु ग्वसाः खलकं धाःगु दु ।
नेपालभाषाया स्वंगू सफु छक्वलं पिदन
लहनान्यूज | बछलाथ्व षष्ठी ११३७ (मे १ २०१७)
बाखं दबुलिं थौं येँय् छगू ज्याझ्वः यासें नेपालभाषाया स्वंगू सफू छक्वलं पिथंगु दु ।
ज्याझ्वलय् ‘बाखं दबू’ झिंछगूगु ल्याःया लिसें डा.रीना तुलाधर बनियाया बाखं मुना सफू ‘बाःगु भु’ व दिव्या ताम्रकारं मुना दीगु ‘नेपालभाषाया बाखं च्वमिपिनिगु नां धलः’ सफूया पितब्वज्याः जूगु खः ।
स्वंगुलिं सफूया पितब्वज्याः वरिष्ठ साहित्यकारपिं मथुरा साय्मि, तिलकप्रकाश कायस्थ व राजा शाक्यं मंका कथं चिखिफ्यनाः यानादिल ।
ज्याझ्वलय् बाखं दबूया दुजः लोचनतारा तुलाधरं लसकुस यानादीगु खःसा साहित्यकारपिं राजा शाक्य, तिलकप्रकाश कायस्थ, डा.रीना तुलाधर व दिव्या ताम्राकारं थःथःगु नुगः खँ तयादीगु खः ।
अन्तर्राष्ट्रिय नृत्य दिवसय् नृत्यगुरुपिं सम्मानित
लहनान्यूज | बछलाथ्व तृतीया ११३७ (अप्रिल २९ २०१७)
अन्तर्राष्ट्रिय नृत्य दिवसया लसताय् थौं नृत्य निर्देशक संघ नेपालं येँय् ६म्ह नृत्य निर्देशकपिन्त हंगु दु ।
संघं थौं येँय् ग्वसाः ग्वःगु सम्मान व सांस्कृतिक ज्याझ्वलय् कथ्थक नृत्य विधापाखे मनोरन्जन जोशी, भरत नाट्यम विधाय् वीणा जोशी राजभण्डारी, लोक नृत्यय् स्याने बहादुर रानायात हंगु खः ।
अथे हे संकिपा नृत्यपाखे नृत्य निर्देशक राजु शाह व चर्या नृत्यय् यज्ञमान पति बज्राचार्ययात हन । व हे कथं, थीथी संकिपा, म्यूजिक भिडियोलय् नृत्य निर्देशन यायेगुया लिसें संकिपाया निर्देशन तकं यानादीधुंकूम्ह नृत्य निर्देशन ख्यलय् न्हापांम्ह पाइलट हिमग्याप लामा टासीयात नं विशेष सम्मान याःगु खः ।
सम्मानित व्यक्तित्वपिन्त संघया न्वकूया लिसें ज्याझ्वः कजि प्रदिपमान श्रेष्ठं स्वांमाः कोखायेकादिल सा संघया नायः भुवनदास श्रेष्ठं खादा न्ययेकादिल । नेपाःया न्हापांम्ह नृत्य निर्देशक नृत्य गुरुवा भैरवबहादुर थापां सम्मानित नृत्य निर्देशकपिन्त हनापौ लःल्हानादिल ।
उगु हे ज्याझ्वलय् नृत्य निर्देशकपिनिगु जीवनिलिसेंया संघया न्हापांगु स्मारिका नं विमोचन याःगु खः । वरिष्ठ नृत्य निर्देशक भैरव बहादुर थापा, शताब्दि पुरुष संस्कृतिविद डा.सत्यमोहन जोशी व वरिष्ठ गीतकार रत्नशमसेर थापां मंकाः रुपं स्मारिका विमोचन यानादिल ।
श्रावण २६ गतेया दिंयात राष्ट्रिय नृत्य दिवसया
ज्याझ्वलय् संघया नायः भुवनदास श्रेष्ठं नृत्य निर्देशक संघ नेपालया स्थापना दिवस श्रावण २६ गतेया दिंयात राष्ट्रिय नृत्य दिवसया रुपं हनेगु घोषणा यानादिल ।
नुगःखँ तयेगु झ्वलय् वरिष्ठ नृत्य निर्देशक भैरवबहादुर थापा, संस्कृतिविद् डा.सत्यमोहन जोशी, वरिष्ठ गीतकार रत्नशमसेर थापा, सांस्कृतिक संस्थानया महाप्रवन्धक राजेश थापां राज्यं नृत्य ख्यःयात माःकथंया संरक्षण बीमाःगु खँय् बः बियादिल ।
ज्याझ्वलय् नृत्य सम्वद्ध थीथी संघसंस्थापाखें थीथी लोक, आधुनिक, चर्या, शास्त्रीय लिसें हिपहप, बि बोइङ नृत्य तकं न्ह्यब्वःगु खः ।
सोनु निगमया कारणं सोनु सुदयात कपाः स्यात
लहनान्यूज | चौलाथ्व सप्तमी ११३७ (अप्रिल १९ २०१७)
सोनु निगमं धार्मिक विषयस याःगु छगू ट्वीटया कारणं सोनु सुदयात कपाः स्याःगु दु ।
सुथ न्हापां न्हापां ततःसलं मस्जिदय् अजान हायेकाहइगु खँय् कुंख्युंसे सोनु निगमं थःगु ट्वीटरय् ट्वीट याःगु खः ।
सोनुं निगमं थःगु ट्वीटरय् ‘जि मुस्लिम मखुसां जितः जवर्जस्ती न्ह्याब्लें छाय् लाउडस्पीकरय् ततःसलं अजान न्यंकाः थनी ? थज्याःगु जवर्जस्ती गबलें दी ?’ धइगु कथंया ट्वीट याःगु खः । लिसें निगमं ट्वीटरय् ‘मोहमदं मुस्लिमतयत दयेकूबलय् विद्यूत मदु । आः एडिसन धुंकाः जिं छाय् थजाःगु सः न्यनाच्वनेमाल ?’ धकाः नं च्वःगु खः ।
सोनु निगमया थज्याःगु ट्वीट धुकां वयागु विरोधय् यक्व हे सः थ्वल । उकिया झ्वलय् सोनु निगमया विरोधय् मनूतयसं #Sonunigam या लिसें #Backoffsonu नं च्वयाः ट्रेन्ड यायेगु शुरु यात ।
तर थ्व ट्रेन्ड दुने धाःसा सोनु सुद तकं लाःवन । सोनु निगमयात विरोध क्यनेगु झ्वलय् सोनु सुदयात नं मनूतयसं टायग यायेगु यात ।
थुकिं यानाः सोनु सुदयात धाःसा मनूतयसं छाय् व छु खँय् थःगु विरोध यानाच्वन धकाः मथुयाः तसकं हे कपाः स्यात ।
उकिया लिसः कथं सोनु सुदं थःगु ट्वीटरय् ‘जिं आःतक्क सुनां सुइत छु धाल छुं हे मथुया च्वन’ धकाः ट्वीट यात । उकिया लिसलय् कोरीयोग्राफर फराह खानं ‘छ गनं व गुकथं थुगु मुद्दाय् लाःवन ले’ धकाः नं सोनु सुदयात न्यनाहल ।
सोनुं थुगु हे विषयस ख्यालि पहलं थथे धकाः तक नं ट्वीट यात ‘नासा थुगु खँय् रिसचं यानाच्वंगु दु कि जि थुगु दक्वं खँय् गथे व छाय् दुथ्यात ? छिकपिन्त जिं गबले, गन व गथे यानाः कने अले छु कथे व सुयागु बारे कने ।’
चःमति नेवाः सनिलय् जुजुकाजीयात हन
लहनान्यूज् | चौलाथ्व द्वादशी ११३७ (अप्रिल ८ २०१७)
पूर्णकाजी ज्यापुया याकः च्वसा व जुगल डंगोलया याकः लसय् नेवाः सांगितिक ज्याझ्वः ‘चःमति नेवाः सनिल’ ज्याझ्वः येँय् क्वचाःगु दु ।
उगु हे ज्याझ्वलय् नांजाःम्ह म्येहालामि जुजुकाजी रंजितयात ‘चःमति नेवाः संगीत सम्मान’पाखें हंगु खः । २२ सालय् रेडियो नेपालय् जीवन दबू ज्याझ्वः लिकाःगु विरोधय् ग्वसाः ग्वःगु थीथी ज्याझ्वलं सांगीतिक यात्रा न्ह्याकाः आःतक नेवाः संगीत ख्यःयात बियाच्वनादीगु योगदानयात च्वछासें रंजीतयात हंगु खः ।
सांगितिक न्ह्यब्वयाया झ्वलय् म्येहालामिपिं जुजुकाजी रंजित, संगीता शाक्य थापा, सरस्वती मानन्धर, सतिष महर्जन, सानुबाबु महर्जन, नीशा देसार, माणिक शाही, रत्नशोभा महर्जन, दीपा महर्जन, उत्तम महर्जन, रोजी डंगोल श्रेष्ठ, बिरज महर्जन, सरीता महर्जनं म्ये हालादीगु खः ।
म्येहालामिपिन्त गणेश परियार, मोहनकृष्ण कार्की, मनोहर सुनाम, मनराजा नकर्मी, अनुप दास, किशोर कार्की, भूपेन्द्र बज्राचार्य, रविन कार्की, सुन्दरकुमार महर्जन, राजिव श्रेष्ठ, नगेन्द्र विक्रम राई, प्रज्वल लामा, रोजमान महर्जन, लक्ष्मी प्रसाद डंगोलं वाद्यवादनय् साथ ब्यूगु खः ।
ज्याझ्वलय् म्ये च्वमि पूर्णकाजी ज्यापुया अबुजु कान्छाभाई ज्यापुया नेपाल भाषाया म्ये मुना ‘ला छकू वयकः समयबजि’या नं विमोचन जूगु खः ।
