Display Style:
Column Style
यलय् कलाकारतलिसे होलिया ज्याझ्वः
लहनान्यूज | चिल्लाथ्व पुन्हि ११३७ (मार्च १२ २०१७)
कलाकार परिषदया ग्वसालय् लोकंव्हाःपिं कलाकारपिनिगु दथुइ थौं यलय् प्यक्वःगु होलीया मेला ज्याझ्वः क्वचाःगु दु ।
यलया मंगलबजारं न्ह्याःगु होलिया मेला सांस्कृतिक ज्याझ्वः यलध्वाखा, च्यासः, खपिन्छेँ, नुगः त्वालय् नं जूगु खः । त्वाःत्वालय् वनाः म्ये, हुलाप्याखं न्ह्यब्वसें होली म्हितेगु ज्याझ्वः थुगुसी परिषदं तःगु खः ।
न्हापा छथासं हे क्वचायेकेगु यानाच्वंगु ज्याझ्वः परिषदं थुगुसी धाःसा न्याथाय् याःगु खः । फागु चाःहिलेगु परम्परायात निरन्तरता बीगु नितिं ज्याझ्वःया ग्वसाः ग्वयागु कलाकार परिषदं न्ह्यथंगु दु ।
ज्याझ्वलय् म्येहालामिपिं सानुबाबु महर्जन, सुरजवीर बज्राचार्य, सुरज ब्यञ्जनकार, अमर चित्रकार, दबल शाक्य, किशोरकुमार शाही, पूर्ण अवाले, नेम खड्गी, राजेश महर्जन, निल शाक्य, राम महर्जनं म्ये न्ह्यब्वयादीगु खः । अथे हे आराध्यलक्ष्मी खड्गीं हुलाप्याखं न्ह्यब्वयादीगु खः ।
समाश्रीया चिनाखँ सफू अल्पविराम सार्वजनिक
लहनान्यूज | चिल्लाथ्व पुन्हि ११३७ (मार्च १२ २०१७)
इजरायलं छुं दिंया लागिं नेपा झाःम्ह कवि समा श्रीया न्हूगु चिनाखँ सफू ‘अल्पविराम’या विमोचन थौं येँय् जूगु दु ।
सफूया उलेज्या ज्याझ्वःया मूपाहां चेतन कार्की, पाहां नेपाल नाट्य प्रतिस्थानया कुलपति, साहित्यकार सरुभक्त, कवि निभा शाहं मंकाः रुपं यानादीगु खः ।
नुगः खँ तयेगु झ्वलय् मू पाहां वरिष्ठ साहित्यकार चेतन कार्कीं समाश्रीया कविता छ्न्द कविता थें हे सरस र ललित जूगु धयादिल । वयकःया कविताय् नारी अस्मिता ,रति राग, गरीबी, राष्ट्रप्रेम थुज्वःगु गम्भीर विषय खनेदुगु धयादिल ।
ज्याझ्वलय् समा श्रीं अल्पविराम सफूपाखें हे तराजु, प्रणय पुष्प, बाका कांधहरू, म मृत सागरमा माछा मार्दैछु, मुखुण्डो र मान्छे, किस्ने अर्थात् एक भोट चिनाखँत वाचन यानाद्यूगु खः ।
लिसें वयकलं थीथी थासय् बन्द लिसें होलिया हुनिं सुथयतक्क नं ज्याझ्वः लिछ्याये धइथें जुयाच्वंगुलिइ ज्याझ्वलय् बाँलाःगु उपस्थितिं साहित्य प्रतिया लगाव व चेतना म्ह्वः मजू धैगु खँ सावित जूगु धयादिल ।
ज्याझ्वलय् डा दीपक खड्कां समा श्रीया न्हापांगु कविता मुना वंशलोचन सफुतिं सीता उवाच व आज चुनाव छ कविता न्यंकादिल । अल्पविराम सफूया बारे कवि नीभा शाह र कवि अले पत्रकार फूलमान बलं समीक्षा यानादिल ।
संझ्याः साहित्य पाखें कवि अभय श्रेष्ठं समा श्रीयात मतिनाया चिं लःल्हानादीगु खः । समा श्रीया कविता नेवाः भाषं अनुवाद जुयाः लहना वाःपतिइ पिदनेगु याः । समाश्रीं मौलिक नेवाः चिनाखँ च्वयेगु कुतः यानाच्वनागु नं धयादिल ।
आः मनिषा संजय दत्तया मां
लहनान्यूज | चिल्लाथ्व सप्तमी ११३७ (मार्च ५ २०१७)
थीथी फिल्मय् संजय दत्तया हिरोइन जुयाः म्हितूम्ह मनिषा कोइराला आः संजय दत्तया मां जुयावइगु जूगु दु ।
संजय दत्तया जीवनियात कयाः दयेकेत्यंगु बायोपिक ‘दत्त’य् मनिषां संजय दत्तया मां नरगीसया भूमिका म्हितेत्यंगु खः । थुगु भूमिकायात कयाः थः तसकं उत्साहित दुगु मनिषां धाःगु दु ।
१९९१स पिहांवःगु सुभाष घइयागु संकिपा ‘सौदागर’पाखें हिन्दि संकिपाय् थःगु करीअर न्ह्याकूम्ह मनिषां ‘बाम्बे’, ‘खामोशी द म्यूजिकल’ व ‘कंपनी’ संकिपाय् यानाः स्वक्वः फिल्मफेयर क्रिटिक्स अवार्ड त्याकेधुंकूगु दु ।
थ्वयां न्ह्यः मनिषा कोइरालां संजय दत्तया हिरोइन जुयाः महबुबा, बागी, खौफ, कारतुस, अचानक, सनम, यलगार संकिपाय् म्हितेधुंकूगु दु ।
संजय दत्तया मां नरगिस क्यान्सर ल्वचं यानाः मदुगु खः । मनीषा थः हे नं क्यान्सर ल्वचं कयेधुंकूम्ह खः ।
२०१२स नेपालया उद्योगी सम्राट दाहाललिसे मनिषाया इहिपा जुयाः पारपाचुके नं धुंकूगु दु । वयां छुं ई लिपा हे मनीषायात क्यान्सर जूगु सीदुगु खः ।
मनिषाया क्यान्सरया वासः न्यूयार्कया व हे अस्पतालय् याःगु खः गन न्हापा नरगिस दत्तयात वासः याःगु खः ।
नेपालमण्डल दाफा महोत्सव क्वचाल
लहनान्यूज | चिल्लाथ्व षष्ठी ११३७ (मार्च ४ २०१७)
नेपालमण्डल टेलिभिजन व ललितपुर मलया ग्वसालय् जूगु नेपालमण्डल दाफा महोत्सव शनिवाः क्वचाःगु दु ।
थ्व हे झ्वलय् थौं हे ललितपुर मलया नायः नेपाल डंगोलं महोत्सवया बारे कनादिसें वइगु चैत्र २७ गते औपचारिक ज्याझ्वः यानाः क्वचायेकेगु जानकारी बियादिल । अथेहे नेपालमण्डल दाफा महोत्सव निर्देशन समितिया नायः सताब्दी पुरुष संस्कृतिविद् सत्यमोहन जोशीं आःतक गबलें नं मजूनिगु कथं दाफा महोत्सव जूगु धयादिल ।
नेपालमण्डल दाफा महोत्सव निर्देशन समितिया छ्याञ्जे श्रीकृष्ण महर्जनं नेपालमण्डल दाफा महोत्सवं यक्व हे कीर्तिमान कायम याःगु धयादिल । वयकलं थ्यंमथ्यं १५३ घौतक टेलिभिजनपाखें प्रत्यक्ष प्रशारण जूगु, मिसापिन्सं दाफा थाःगु, २०दं क्वययापिन्सं नं दाफा थाःगु, झिंस्वदँ दुम्हनिसें गुइस्वदँ दुम्हेस्यां तक नं दाफा थाःगु, मिसाम्हेस्यां हे नौबाजा थाःगु धइगु छगूकथं कीर्तिमान हे जूगु कनादिल ।
महर्जनं समापन समारोहस प्यद्वःम्ह स्वयांं अप्वः कलाकारपिन्त दसिपौ बीगु नं जानकारी बियादिल ।
लगभग न्याला धैथें न्ह्याःगु महोत्सवय् थ्यंमथ्यं प्यद्वःम्ह स्वयांं अप्वः कलाकारपिनिगु ब्वति दुगु खः । स्वनिगः लिसें स्वनिगलं पिने दोल्खा, चित्लाङ, भोजपुर, रामेछाप, काभ्रेया नेवाःतयसं तकं थःथःपिनिगु दाफा न्ह्यब्वःगु खः ।
द्यःप्याखंनिसें धिमे प्याखंतकं न्ह्यब्वःगु महोत्सवय् थःथःपिनिगु मौलिक कथंया वसः पुनाः दाफा न्ह्यब्वयेगु ज्या जूगु खः । गुकी झिंस्वदँ दुम्ह मचांनिसें गुइस्वदँ दुम्ह ज्याथःम्हं तकं ब्वति काःगु दुगु खःसा मिसापिन्सं तक दाफा थानादीगु खः ।
वंगु कार्तिक १२ क्वःपुजानिसें प्रत्येक वाःया शुक्रवाः व शनिवाः जुयाच्वंगु नेपालमण्डल दाफा महोत्सवय् मुक्कं याना १५१गू दाफा खलःपाखें ब्वति काःगु खः ।
प्रजापतियात नागरीक अभिनन्दन याइगु
लहनान्यूज | चिल्लाथ्व चतुर्थी ११३७ (मार्च २ २०१७)
ख्वपया तजिलजि संरक्षणय् विशेष योगदान बिया वयाच्वनादीम्ह श्रीगोपाल प्रजापतियात नागरिक अभिनन्दन याइगु जूगु दु ।
ख्वपया सछिगू स्वयां आपाः सामाजिक संघसंस्थाया पहलय् वइगु शनिबाः मध्यपुर थिमिइ नागरिक अभिनन्दन यायेत्यंगु खः । नागरिक अभिनन्दन समितिं थौं पत्रकार सम्मेलन यानाः प्रजापतियात अभिनन्दन यायेगु जानकारी ब्यूगु खः ।
वयकलं न्हयगू दशक न्ह्यःनिसें मदिक्क वाद्य वादन, थीथी सांस्कृतिक हुलाप्याखं व कला ख्यलय् विशेष योगदान बिया वयाच्वनादीगु दु ।
उपराष्ट्रपति नन्दबहादुर पुनपाखें जुइगु अभिनन्दन ज्याझ्वलय् श्रीगोपाल प्रजापतिया किपा कियातःगु पाँयम्वः, स्मारिकानिसें “अनवरत सांस्कृतिक पाइला” नांया सफू विमोचन याइगु धाःगु दु ।
