Display Style:
Column Style
असनय् ‘इकोज इन द भ्याली’ क्वचाल
लहनान्यूज | चिल्लागा द्वादशी ११३७ (मार्च २५ २०१७)
येँया नुगःचु असनय् थौं ‘इकोज इन द भ्याली’ या नामं तःजिगु सांगितिक न्ह्यब्वयातलिसें सडक महोत्सव क्वचाःगु दु ।
महोत्सवय् डाफा बाजं, सारंगी, सितार आदि कथंया पूर्वीय बाजंया न्ह्यब्वया लिसें फ्यूजन सांगितिक न्ह्यब्वयात नं न्ह्यब्वःगु खः । असं, बालकुमारी, केलत्वाः व दगुबहालय् थीथी सांगितिक पुचलं सांगितिक न्ह्यब्वया न्ह्यब्वःगु खः ।
महोत्सवय् नेपाःमि लिसें विदेशी कलाकारपिन्सं तकं सांगितिक न्ह्यब्वया न्ह्यब्वःगु खः । सांगितिक ज्याझ्वःया झ्वलय् वाद्यवादनया लिसें कलाकारपिन्सं म्ये नं हालाः न्यंकूगु दुगु खः ।
भोताहितिया दगुबहालय् इताः निलेगुलिसें पुजा ज्वलंया तयारीया कार्यशाला नं जूगु खः । ब्वज्या चाःह्यूवःपिं नेपाःमिलिसें विदेशी पर्यटकपिन्सं तकं कार्यशालाय् ब्वति काःगु दुगु खः ।
महोत्सवय् थीथी हस्तकलाया ज्वलंया स्टलत नं दुगु खः । लिसें यःमरि, समयबजि, छ्याला, बुला लिसें थीथी नेवाः नसा ज्वलंया स्टल नं दुगु खः ।
महोत्सवय् द्वलंद्वः अवलोकनकर्तापिन्सं ब्वति काःगु खः । कान्तां डबडब नांया संस्थाया ग्वसाः व असंया हे थीथी संघसंस्थाया मंकाः ग्वसालय् महोत्सव जूगु खः ।
नेपाःया न्हापांम्ह नृत्यगुरु थापायात हन
लहनान्यूज | चिल्लागा दशमी ११३७ (मार्च २३ २०१७)
नेपाःया दक्कले न्हापांम्ह नृत्य निर्देशक भैरवबहादुर थापायात थौं येँय् तःजिक हंगु दु ।
नृत्य निर्देशक संघ नेपालं थौं येँया राष्ट्रिय नाचघरय् ‘नृत्य गुरुबा भैरवबहादुर थापा सम्मान साँझ २०७३ तथा सांस्कृतिक कार्यक्रम’या ग्वसाः ग्वयाः नृत्यगुरु थापायात हंगु खः । ज्याझ्वलय् संघया नायः भुवन श्रेष्ठं थापायात दोसल्लां न्ययेकादिल सा शताब्दि पुरुष डा. सत्यमोहन जोशीं हनापौ लःल्हानादिल ।
सांस्कृतिक संस्थान राष्ट्रिय नाचघरया महाप्रबन्धक राजेश थापां नगद सम्मान २५द्वः सछि व छतकाया चेक सम्मानित नृत्यगुरु थापायात लःल्हानादिल ।
हना लःल्हाना कायेधुंकाः सम्मानित थापां थःगु हे नामं ज्याझ्वः यानाः थुकथं हंगुलिइ थः तसकं लय्ताःगु धयादिल । लिसें कलाकार लिसें कला ख्यःया उत्थानया नितिं कलाकारत संगठित जुयाः माःथाय् सः तयेमाःगु धयादिल ।
संस्कृतिविद् सत्यमोहन जोशीं कलाकारया नामय् चालाच्वंगु सरकारी निकाय व संघसंस्थां कलाकारयात हे प्राथमिकता व थाय् बीमाःगु खँय् बः बियादिल । सांस्कृतिक संस्थानया महाप्रवन्धक राजेश थापां राष्ट्रिय नाचघरया दबू कलाकारया नितिं न्ह्याबलें चालाच्वंगु दुगु व दयाच्वनीगु प्रतिवद्धता प्वंकादिल ।
हनाया झ्वलय् नृत्यगुरु थापाया कला ख्यलय् संघर्ष व योगदान बिषयस जानकारीमूलक भिडियो प्रोफाइल नं क्यंगु खः । उगु हे ज्याझ्वलय् नृत्य निर्देशक संघपाखें पिथंगु बि.सं. २०७४या क्यालेन्डरया विमोचन नृत्यगुरु भैरवबहादुर थापा, संघया नायः भुवन श्रेष्ठ, न्हापांम्ह न्वकू संजय राजोपाध्यायं मंकाः रुपं यानादिल ।
व स्वयां न्ह्यः ज्याझ्वःया मू पाहां शताब्दि पुरुष संस्कृतिविद् डा. जोशीं त्वाःदेवाय् मत च्याकाः हना ज्याझ्वःया उलेज्या यानादिल । संघया न्हापांम्ह न्वकू व हना ज्याझ्वः कजि संजय राजोपाध्यायं लसकुस न्वचु ब्युसें राज्यं कलाकारयात देय्या तिसा मधासे राज्यया छगू अंगया रुपय् हे परिभाषित यायेमाःगु माग तयादिल ।
हना ज्याझ्वः धुंकाः थीथी कला सम्वद्ध संघसंस्थापाखें थीथी नेपाली लोक, चर्या प्याखंया नापं हिपहप, साल्सा लिसेंया हुलाप्याखं न्ह्यब्वःगु खः ।
रोक एन्ड रोल स्टार बेरी मन्त
लहनान्यूज | चिल्लागा सप्तमी ११३७ (मार्च १९ २०१७)
हलिमय् हे नांजाःम्ह म्येहालामि चक बेरी मन्त ।
विशेष यानाः संगीत ख्यलय् रक एन्ड रोल विधाय् नांजःम्ह विश्व प्रशिद्ध अमेरिकी कलाकार बेरी ९०दँया वैंशय् मदुगु खः ।
अमेरिकाया मिसौरी राज्यस्थित थःगु हे छेँय् बेरी मदुगु खः ।
संगीत ख्यलय् न्हयगू दशकतक्क लोकंव्हाःगु ‘रक एण्ड रोल’म्येत बियादीम्ह बेरीया रोल ओभर विथोवन, जोनी बी गुड थुज्वःगु म्ये तसकं लोकंव्हाः ।
ज्याःजंक्वया लसताय् मथुरा सायमियात हन
लहनान्यूज | चिल्लाथ्व पंचमी ११३७ (मार्च १७ २०१७)
ईलोंह प्रकाशन, कुतः पिकाकः व नेवाः स्वायत्त राज्य नेपाल मण्डलया मंकाः ग्वसालय बरिष्ठ उपन्यासकार व बाखं च्वमि मथुरा सायमिया ज्याःजंक्वया लसताय् हना ज्याझ्वः जुगु दु ।
ज्याझ्वलय् मूपाहां जनकबि दुर्गालाल श्रेष्ठं सायमियात दोसल्लां न्ययेकेगु लिसें हना पौ लःल्हानाः साय्मियात हनादिल । ज्याझ्वलय् थीथी खलः पुचःपाखें नं साहित्यकार सायमियात हंगु खः ।
ज्याझ्वलय् मिजला, सिन्हः व नःलि ज्याःजंक्व बिशेष ल्याः नं विमोचन जूगु खः । जनकबि श्रेष्ठलिसें ई ल्वहं प्रकाशनया प्रबन्ध निर्देशक नरेशवीर शाक्य, भवानी तुलाधर, शीला सायमि व सर्मिस्था श्रेष्ठं मंकाः कथं सफूया उलेज्या यानादीगु खः ।
ज्याझ्वलय् जनकवि श्रेष्ठ, ई ल्वहं प्रकाशनया प्रबन्ध निर्देशक शाक्यलिसें नं साहित्यकार मथुरा सायमियात ज्याःजंक्वया लसताय् भिन्तुना देछानादीगु खः । लिसें नेवाः साहित्य ख्यलय् सायमिया योगदानया चर्चा यानादीगु खः ।
कलाकारयात राज्यया न्यागूगु अंग दयेकेत माग
लहनान्यूज | चिल्लागा द्वितीया ११३७ (मार्च १४ २०१७)
नृत्य निर्देशक संघ नेपालं थ्व हे चैत १० गते नृत्यगुरु भैरवबहादुर थापायात तःजिक हनीगु जूगु दु ।
थौं यलय् पत्रकार सम्मेलनया ग्वसाः ग्वसें राज्यपाखें कलाकारयात संरक्षणया सः थ्वयेकाः हे थुगु हना ज्याझ्वः यायेत्यनागु संघं धाःगु दु । लिसें कलाकारयात राज्यया न्यागूगु अंगया रुपय् परिभाषित यायेमाःगु माग नं संघं याःगु दु ।
पत्रकार सम्मेलनय् न्वःवासें संघया न्हापांम्ह न्वकूलिसें हना ज्याझ्वः कजि संजय शर्मां राज्यं कलाकारयात तिसा धायेगु याःगु खँय् आपत्ती प्वंकादिल । कलाकार धयापिं ब्वयेगु तिसा मखसें राज्यया छगू अंग हे जूगु शर्माया धापू खः ।
अथे हे संघया नायः भुवनदास श्रेष्ठं नृत्यगुरु थापाया म्हसिका न्ह्यब्वसें कला व कलाकारयात राज्यं ब्वयेगु नितिं जक छ्यलेमज्यूगु धयादिल । लिसें नायः श्रेष्ठं राज्यं कलाकारयात सम्मानया लिसें संरक्षण तकं बीमाःगु सः तसें स्थानीय, राष्ट्रिय, अन्तर्राष्ट्रिय संघसंस्थापाखें सम्मानित जुयादीधुंकूम्ह नृत्यगुरु थापाया हना ज्याझ्वः यायेत्यनागु धयादिल ।
पत्रकार सम्मेलनय् वइगु चैत १० गते कुन्हु राष्ट्रिय नाचघरय् २०१० सालनिसें नृत्य ख्यलय् मदिक्क न्ह्यज्यानाच्वनादीम्ह नृत्यगुरु थापाया योगदानयात च्वछासें दोसल्लां न्ययेकाः हनापौ व तका सिरपाःलिसें हनेगु जानकारी बिल ।
हना ज्याझ्वः धुंकाः सांस्कृतिक न्ह्यब्वया कथं नेपाली चर्या व लोक हुलाप्याखं लिसें भारतया कथक, भरतनाट्यम अले पाश्चात्य हिपहप, बिबोइङ, कन्टेमपररी, साल्सा हुलाप्याखं न्ह्यब्वइगु धाःगु दु ।
