Display Style:
Column Style
‘पुरिएका पुस्तकहरु’ संकिपा दयेकीगु
लहनान्युज | गुंलागा अष्टमी ११३७ (अगष्ट १५ २०१७)
गोदावरी फिल्म्स एण्ड रिसर्च प्रा.लि.पाखें निर्माण यायेत्यंगु ‘पुरिएका पुस्तकहरु’या मुहूर्त छगु ज्याझ्वः दथुइ मूपाहाँ कथं झायादीम्ह नांजाःम्ह सिने पत्रकार विजयरत्न तुलाधर असंबरें मुहूर्तया नितिं क्ल्याप बियाः शुटिङ न्ह्याकूगु दु ।
थौं सिबें स्वीन्यादँ न्ह्यः नेपाः देय्या छगू गामय् शिक्षाया स्थितियात कयाः दयेकेत्यंगु खस नेपाली भाय्या संकिपा ‘पुरिएका पुस्तकहरु’या छगू ज्याझ्वःया दथुइ धापाखेलया धल्केश्वर महाद्यःया मुहूर्त जुःगु खः ।
उगु ज्याझ्वलय् ललितपुर जिल्ला प्याब्सनया पूर्वनायः नवराज महत, अभिभावक संघया केन्द्रीय मूछ्याञ्जे बद्री सञ्जेल, जनभावना क्याम्पसया प्राचार्य शिवराज सञ्जेल व चेतनाथ सञ्जेलया नापनापं उगु संकिपाया क्यामेराम्यान रवि साय्मि, च्वमि व संगीतकार ठाकुर प्रताप दुलाल, निर्माता विनोद घिमिरे व निर्देशक लक्ष्मीनाथ तिमिल्सिना मौदगल्यान पिनिगु न उपस्थिति दूगु खः ।
सरिताया ग्वाहालिया नितिं ‘होप’
लहनान्यूज | गुंलागा अष्टमि ११३७ (अगष्ट १५ २०१७)
थः अबुयात स्येँ दान यायेधुंकाः न्हियान्हिथंया वासः यायेगु लिसें छेँ न्ह्याकेगुलिइ आर्थिक समस्या फया वयाच्वंम्ह सरिता महर्जनया ग्वाहालिया नितिं नेपाः डान्स एकेडेमिया कलाकारत छप्पं जुयाः न्ह्यज्याइगु जूगु दु ।
महर्जनया ग्वाहालिया नितिं एकेडेमिं थ्व हे वइगु भदौ ३ गते दरवारमार्ग स्थित क्लब डेजाभुइ सांगितिक ज्याझ्वः ‘होप’या ग्वसाः ग्वयेत्यंगु दु ।
अबुया स्येँ प्रत्यारोपण धुंकाःया वासः, जँलास्येँ सम्बन्धि समस्याया वासः याकाच्वंम्ह मांया वासः लिसें थःगु हे नं वासः यायेत न्हियान्हिथं यक्व हे खर्च यानाच्वनेमाःबलय् येँया लगं त्वालय् च्वंम्ह सरिता महर्जन आः तःधंगु आर्थिक समस्याय् लानाच्वंगु दु ।
न्हापा बुटिक न्ह्याका वयाच्वनादीम्ह सरिता आः थःगु हे स्वास्थ्य सम्बन्धि समस्याया हे हुनिं थत्थें छुं ज्या यायेमफइगु अवस्थाय् वय्कःया छुं आयश्रोत नं मदु ।
‘खयतला सरिता जिमिगु हे एकेडेमिया पुलांम्ह विद्यार्थी नं खः । तर सरितायात समस्याया दथुइ मेगु समस्या जुयाच्वंगु थुज्वःगु इलय् मानवताया नातां वय्कःयात ग्वाहालि यायेगु झी सकसिगुं कर्तव्य खः’ एकेडेमिया नायः रोहिया महर्जनं धयादिल । उगु ज्याझ्वलं मुनीगु धेबा सरितायात लःल्हायेगु नायः महर्जनं जानकारी बियादिल ।
ज्याझ्वलय् नेपाःया नांजाःपिं कलाकार लिसें नेपाः डान्स एकेडमीया कलाकारपिनिगु पाखें थःगु कला न्ह्यब्वइगु ज्याझ्वः कजि रीना महर्जनं जानकारी बियादिल । ‘थुगु ज्याझ्वःपाखें छुं भचा ग्वाहालि बियाः सरिताया मांअबुया वासः यायेत लिसें भविष्यय् वय्कःयात छुं आयमूलक लजगाः न्ह्याकेत नं तिबः जुइमा धइगु जिमिगु आज्जु खः’ कजि महर्जनं ज्याझ्वःया आज्जु कनादिल ।
नेपाः डान्स एकेडेमिं नेपाः म्यूजिक व क्लब डेजाभुलिसेया सहकार्यय् थुगु ज्याझ्वःया ग्वसाः ग्वयेत्यंगु खः । ‘छगू पवित्र संकल्प लिसेंया सामाजिक आज्जुं थुगु ज्याझ्वःया ग्वसाः ग्वयेत्यनागु दु । जिमिगु थ्व सामाजिक आज्जुइ, सकसिगु ग्वाहालि दइ धइगु आशा कयागु दु’ ज्याझ्वःया व्यबस्थापक गम्भिर मान सिंहं धयादिल ।
सक्वय् वमन प्याखँ व नरसिंह जात्रा न्ह्यात
लहनान्युज | गुंलागा षष्ठी ९अगष्ट १३ २०१७)
नेपालयु सक्व देय् बाहेक मेथाय् मदइगु वमन प्याखँ न्ह्यागु दु । थुगु प्याखँ कृष्णाष्टमीया छन्हु न्ह्यतकः जुइ ।
थुगु प्याखँ छम्ह वा निम्ह मनूखं वमन (वनमान्छे)या रुपय् सिंगारपटार याइ नाप इमिसं खिपतं चिना मेपिन्सं
“वमनं कःनि स्यःचा खाला !” धकाः हायेका सक्व देय् चाःहिकिइ । थुगु इलय् वमन जुइम्ह मनूखं हायेकिपिन्त लिउवनेगु याइ ।
अथेतुं साँखुमा सक्वय् निगु किसिमयागु लाखे प्याखँ दु । छगु लाखे प्याखँयात धौवजी लाखे नं धाइ । थुगु लाखे प्याखँनय् लाखेयात मेपिन्सं हायेकेगु याइ नाप लाखेयात लियवनेगु याइ ।
मेगु लाखे कपाली समुदाय नं पिकाइगु लाखे खः ।
थुगु लाखे प्याखँ खय् त्वाः त्वालय वनालाखे प्याखँ ह्विलेगु याइ नाप मनू तयेसं दानदक्षिणा नं बिगु याइ । थुगु लाखे प्याखँ खय् छु दँ न्ह्य जकः झ्यालिंचा तयेगु चलन यागु खः ।
थथेहे नाप राजोपाध्यायपिं च्वनिगु थाय् ब्रम्हपुरं नरसिंह जात्रा पिकाइ । उगु जात्राय् बाजासहित नगर परिक्रमा यायेगु परम्परा नं करिब बागु दशक न्ह्य न्ह्यागु खः ।
थ्व नरसिंह जात्रा पिकायेगु परम्परा भीष्म ज्वालानन्द राजोपाध्यायं सक्वय् न्ह्याकुगु इतिहास दु ।
“लिबाय् धुंकाः” शुभ मुहुर्त व म्यूजिक म्याजिक ज्याझ्वःया सुभाय् देछाः
गुंलागा पंचमी ११३७ (अगष्ट १२ २०१७) |
राजेशमान सिँहया निर्देशनय् निर्माण जुइगु संकिपा “लिबाय् धुंकाः”या शुभमूहुर्त जूगु दु । वय्कलं थुगु संकिपातय् दुथ्याःगु म्ये व संकिपा नं च्वयादीगु खः ।
ख्यालः, संकिपा ख्यलय् लोकंह्वाःम्ह च्वमि व निर्देशक सिँहया थुगु संकिपातय् क्यामेरा शंकर महर्जन, संगीतकार सुमन कपाली, विरेनकुमार शाक्य, द्वन्द सुरज श्रेष्ठ, नृत्य निर्देशन आराध्या लक्ष्मी खड्गी, निर्माण नियन्त्रक सुरज श्रेष्ठ “बकंफुस्लु” खःसा संकिपातय् कलाकारपिं आशाकाजी थकू, मञ्जु श्रेष्ठ, नारायणदेवी प्रधान, कुमार कार्की, भिमसेन रिजाल, देवकुमारी खड्गी, आराध्या लक्ष्मी खड्गी, आर.एल. महर्जन, सुरज श्रेष्ठ “बकंफुस्लु”, बलभद्र महर्जन, मोहद्दिन खान, प्रवेश गोविन्द शिल्पकार, रामराजा भाम दुथ्याः ।
शुभमूहुर्तया नितिं विशेष पाहाँकथं झायादीम्ह प्रेमगीत २ या लेखक व निर्देशक रामशरण पाठकं क्लाय्प बियादिलसा विशेष पाहाँ कथं झायादीमह निर्माता व कलाकार
उत्तम खत्रीं क्यामेरा स्वीच अन यानादिल । ज्याझ्वलय् सुरज श्रेष्ठ बकंफुस्लुं नैक्या तछ्यानादिलसा मूपाहाँ विजयरत्न असंबरे ‘एक्सन’ धकाः थुगु ज्याय् हःपा बियादिल ।
ज्याझवलय् विशेष पाहाँपिं उत्तम खत्री, रामशरण पाठक व मूपाहाँ विजयरत्न असंबरे तुलाधरं भिंतुना न्वचु बियादीगु खःसा तुलाधरं नेपालभाषाया ज्याझ्वः म्यूजिक म्याजिकका समालोचना नं यानादीगु खः ।
अडियो भिडियो स्टेशन प्रा.लि.या निर्माणय् काष्ठमण्डप टेलिभिजनपाखें क्यनाच्वंगु ५० गू ब्व व डिसहोम इन्टरटेन्टमेन्ट टेलिभिजनपाखें क्यनाच्वंगु ३५ ब्व थ्यंगु लसता हनेगु ज्या नं उगु ज्याझ्वलय् जूगु खः ।
ज्याझ्वय् म्यूजिक म्याजिक ज्याझ्वः न्ह्याकामि आराध्या लक्ष्मी खड्गीं लसकुस यानादीगु खःसा क्यामेरापर्सन अमर चित्रकारं ज्याझ्वः निर्माणया झ्वलय् यानादीगु अनुभव कनादीगु खः ।
विज्ञापनदाता, ग्वाहालिमि, म्यूजिक म्याजिक निर्माण पुचःया दुजःपिन्त सुभाय् दछासें हनेज्या नं जूगु उगु ज्याझवः परिकल्पना÷निर्देशन यानादीम्ह अडियो भिडियो स्टेशन प्रा.लि.या प्रवन्ध निर्देशन राजेशमान सिँहया सभापतित्वय् न्ह्याःगु खःसा ज्याझ्वलय् काष्ठमण्डप टेलिभिजनपाखें विशेष पाहाँ नविन महर्जनं थःगु नुगःखँ तयादीगु खः । ज्याझ्वः सुरजवीर बज्राचार्यं न्ह्याकादीगु खः ।
महाकाली प्याखँ थौं क्वचाइ गु
नृपेन्द्रलाल श्रेष्ठ | गुंलागा पंचमी ११३७ (अगष्ट १२ २०१७)
करिब ३०० दँ न्ह्यःनिसें न्ह्याना वयाच्वंग मध्यपुर थिमिया नगदेशय् न्ह्यानावया च्वंगु महाकाली प्याखँ हाकनं न्ह्यागु दु । सापारुया कन्ह्येनिसे न्ह्याःगु थुगु जात्रा थौं क्वःचाइगु खः । थुगु जात्रा बहनिया ७ बजे निसे ४ घण्टा लगातार प्यन्हु तक लगातार जुइ खः।
आर्थिक अभावया कारण २०६६ सालं बन्द जुगु थुगु तना वनेत्यगु जात्रा स्थानीयया ल्याम्हतय्गु कुतलं हाकन न्हापागु दँ निसे न्ह्यागु खः ।
मल्लकाल यागु थुगु महाकाली प्याखँ यात खर्च हे करिब च्यागु लाख निसे झीगु लाख तक खर्च मा । थुगसि थुगु प्याखँयात माःगु खर्च स्थानीय मनू तय्सं चन्दा म्होया नाप मध्यपुर थिमि नगरपालिकाया ग्वाहलि न्ह्यागु खः ।
तान्त्रिक बिधि न्ह्याइगु थुगु प्याखँ २१ गु तालय् फरक फरक पुचः यागु तालय् प्याखं ल्हुइगु याइ । थुगु प्याखनय् महाकाली छम्ह, महालक्ष्मी छम्ह, कौमरी छम्ह, सिंह छम्ह, बेता प्यम्ह, भूत भैरब निम्ह, कवं निम्ह, ख्याः निम्ह, माकः निम्ह, म्ह्यखा छम्ह, व मैसासुर दैत्य छम्ह याना जम्मा झीच्याम्ह देवगण पिनिगु सहभागी दइ ।
थुगु महाकाली प्याखँ लिपा भूतm प्रेत, पिशाच, लः, मिँ, फयेँ भुखाचं, मलः, व खुँ तयेगु भय मदइ धइगु जनबिश्वास दयगु याना च्वंगु दु । थुग् प्याखंनय् न्ह्याकिगु व समापन यायेत बिशेष पुजा नं यायेमा । पुजा यायेत च्याम्ह खाँ, निम्ह दुगु महाकाली प्याखंनय बलि पुजा याये माःगु परम्परा दु ।
