Display Style:
Column Style
अस्करया गल्तीयात कयाः निम्हेसित कारवाहि
लहनान्यूज | चिल्लाथ्व चतुर्थी ११३७ (मार्च २ २०१७)
अस्कर अवार्ड घोषणाया झ्वलय् जूगु त्रुटियात कयाः एकेदमिं निम्ह कर्मचारीतयत दोषि क्वःछिनाः कारवाहि याःगु दु ।
एकेडमीया नायः शेरिल बून आइज्याक्सं ब्रायन कलिनन व मार्था रुजयात कारवाहि जूगु जानकारी ब्युसें आवंलि इमिगुपाखें सेवा मकायेगु धाःगु खः । लिसें नायः आइज्याक्सं अकाउन्टेन्सी फÞर्म प्राइस वाटर हाउसकूपर्स (पीडब्ल्यूसी) लिसे सम्बन्धया नं समीक्षा जुयाच्वंगु धाःगु दु ।
वंगु आइतबाः ८९औं अस्कर अवार्डस न्हापां ‘ला ला लैंड’ यात सर्वश्रेष्ठ फिल्म धाःगु खः । लिपा हाकनं न्हापाया घोषणाय् द्वंगु धासें ’मूनलाइट’ संकिपायात सर्वश्रेष्ठ घोषणा याःगु खः । थुगु त्रुटियात एकेडमी अवार्ड्सया ८९दँया इतिहासय् दक्कले तःधंगु त्रुटिकथं काःगु खः ।
कलिननं घोषणाया झ्वलय् निम्ह प्रस्तोतायात सर्वश्रेष्ठ फिल्मया नांया थासय् लीडिंग रोलय् सर्वश्रेष्ठ अभिनेत्रीया नांया भ्वं बियाब्यूगु खः । भोट ल्याः व अवार्ड त्याकामिया नांया भाला काःगु कम्पनी पीडब्ल्यूसीं थुगु त्रुटिया लागिं माफी फ्वंगु दु ।
कलिननं प्रस्तोतातयत मखूगु भ्वं बी छुं मिनट न्ह्यः हे सर्वश्रेष्ठ अभिनेत्री एमा स्टोनया किपा ट्वीट याःगु खः । बून आइज्याक्सयात थुगु त्रुटिपाखे ध्यान मब्यूगु द्वपं ब्यूगु दु ।
लसनाया बुसादँ थुगुसी बिस्कं कथं
लहनान्यूज | सिल्लागा चःर्हे ११३७ (फेब्रुअरी २५ २०१७)
लसना प्रिस्कूलया बुसादँ थुगुसी झःझः धायेक न्हापा न्हापा स्वयाः बिस्कं कथं हे हंगु दु ।
थुगुसीया लसनाया बुसादँया मूपााहां सुं ततःधंपिं नेता वा नांजाःपिं समाजया प्रतिष्ठित मनूत मखसें व हे स्कूलं एस एल सी ताःलाःपिं विद्यार्थीपिं जुल । छायधाःसा लसना प्रीस्कूलया स्थापनाकालय् भर्ना जूपिं विद्यार्थीपिन्सं थुगुसिइ एस एल सी जाँच बियाः ताःलाःगु खः ।
ज्याझ्वलय् लसनापाखें एसएलसी बियाः ताःलाःपिं विद्यार्थीपिन्त हनेगु ज्या नं जूगु खः ।
न्ह्याबलें थें थुगुसी नं स्कूलया विद्यार्थीपिनि दथुइ फेसन शो यानाः मिस लसना व मास्टर लसना ल्यःगु खः । मस्तय्सं बांबांलाःगु लं फिनावःगु खः । उलि जक मखु, शिक्षकपिनि दथुइ तकं चम्चा रेस कासा जूगु खः ।
यूकेजिया विद्यार्थीपिन्सं न्ह्यब्वःगु चीहाकःगु नाटक स्वयाः अभिभावकपिन्सं तसकं न्ह्यइपुकूगु खः ।
वंगु सेप्टेम्बर २६ २०१६ या दिनय् मदुम्ह लसना प्रिस्कूलया निर्देशक भाजु मैत्रीरत्न तुलाधरयात श्रद्धान्जलि नं प्वंकूगु खः । मदुम्ह तुलाधरयात लुमंकाः मौन धारण यायेगुया लिसें मदुम्ह तुलाधरया जहान प्रिन्सिपल दानशोभा तुलाधर व काय भौपिसं खादा वयकःया किपाय् क्वोखायेकाः श्रद्धान्जलि देछाःगु खः ।
कलाकार बाराहीया याकः चित्रकला ब्बज्या
नृपेन्द्रलाल श्रेष्ठ | सिल्लागा पंचमि ११३७ (फेब्रुअरी १६ २०१७)
अपांगयात स्वयेगु दृष्टीकोणय् ह्यूपाः हयेगु लिसें समाजय् फरक क्षमता व उद्यमीशीलताया नमुना न्ह्यब्बयेगु आज्जुं कलाकार रमेश बाराहीया याकः चित्रकला ब्बज्या न्ह्याःगु दु ।
‘बाराही’ चित्रकला ब्बज्याया उलेज्या ज्याझ्वःया मू पाहां बरिष्ठ कलाकार बत्सगोपाल बैद्यं त्वाः देवाय् मत च्याकाः यानादिल । बिस्कं कथया प्रतिभा भाजु बाराहिया थुगु चित्रकला यलया नेवाः छेँ आर्ट ग्यालरीइ न्ह्याःगु खः ।
ज्याझ्वलय कलाकार बाराहीया गुरुपिं बाबुराजा द्यःला, प्रमिला बज्राचार्य, समाजसेवी मोतीशान्ती शाक्य, याकः ईन्टरपेनर ट्रेनर्स व कलाका तीन पाईलाया संस्थापक राजेश बज्राचार्य, नेवाः स्यनाकुथिया नायः रुविन शाक्य व मूपांहा बैद्यं चित्रकला ख्यलय् निरन्तर न्ह्याना च्वनेफयेमा धकाः भिंतुना बियादिल ।
करिब स्वीगू चित्रकलाय् मध्ये छब्ब बाराही समाजया साँस्कृतिक कालिगढ बुंगद्यःया रथ निर्माण सम्बन्धि दु । नेवाः स्यनाकुथिया ग्वाहालिं जूगु चित्रकला ब्बज्या फागुन ९ गते तक न्ह्याइ ।
भ्यालेन्टाइन डेया लसताय् शिवराजया म्ये
लहनान्यूज | सिल्लागा चतुर्थी ११३७ (फेब्रुअरी १४ २०१७)
सकसिया थःथःगु कथं भ्यालेन्टाइन डे हनाच्वंगु इलय् म्येहालामि शिवराज जोशीं धाःसा कलाकारीताया हे लँपुं थुगु दिवस हंगु दु ।
म्येहालामि जोशीं थौं भ्यालेन्टाइन डेया लसताय् थःगु म्ये ‘लिक्क च्वनाः’या म्यूजिक भिडियो रिलिज यानादीगु दु । जोशीं थौं यूट्यूबपाखें थुगु म्ये रिलिज यानादीगु खःसा लिपा इमेज च्यानल व नेपालमण्डलपाखें नं थुगु म्ये प्रसारण जुइगु लहनान्यूजयात जानकारी बियादीगु दु ।
रत्नशोभा महर्जनलिसे हालातःगु थुगु ज्वःम्ये हालेगुया लिसें जोशी थम्हं हे च्वयेगुया नापं लय् नं तयादीगु दु । लिसें थुगु म्येया म्यूजिक भिडियोलय् वयकःपिं निम्हेसिनं अभिनय नं यानादीगु दु ।
लिसें भिडियोस स्वजन रघुवंशी, मेनुका श्रेष्ठ, रोजा अवाले, निकि बज्राचार्य, विनिता महर्जनं अभिनय यानादीगु दु । म्यूजिक भिडियोया निर्देशन धाःसा सुनिता राजभण्डारी जुनुं यानादीगु दु ।
न्हूगु संकिपा हिसिमतिया शुभमुर्हत जुल
लहनान्यूज | सिल्लागा पारु २०१७ (फेब्रुअरी ११ २०१७)
चःमति संकिपा प्रोडक्सनया ब्यानरय् पूर्णकाजी ज्यापुया न्ह्यब्बया कथं दयेकेत्यंगु नेपालभाषाया न्हूगु संकिपा हिसिमतिया शुभमुर्हत थौं येँय् याःगु दु ।
नेपाल ओलम्पिक कमितिया नायः जिवनराम श्रेष्ठ मूपाहां कथं झायादीगु उगु ज्याझ्वलय् कलाकार निकि महर्जन व योगेन महर्जनंं सकिपाया डाइलग ल्हानाः संकिपाया शुभ मूहुर्त याःगु खः।
न्हूगु दयेकेत्यंगु संकिपाय् निर्देशन पूणकाजि ज्यापु व अनूज महर्जनं यानादीत्यंगु दुसा निर्माता कान्छाभाई ज्यापु व सानूछोरी ज्यापु खः ।
संकिपाय् संगीतया ज्या जुगल डंगोल व पूर्णकाजि ज्यापुं यानादीत्यंगु दुसा क्यामरा व सम्पादन सोहन मानन्धर, डिजाइन बिनेस कुमार महर्जनं यानादीगु जूगु दु । अथे हे बाखं, संबाद व म्यें पूर्णकाजी ज्यापुं हे च्वयादीगु दु ।
फागुन २३ गते निसें संकिपाया सूटिङ न्ह्यायेत्यंगु दु । थुगु संकिपाया सुटिङ्ग येँय् लिसें चित्लाङ्ग, हेलम्बु, व नुवाकोटय् तकं जुइगु जानकारी निर्देशक अनूज महर्जनंं बियादिल ।
