छंगु ल्यूल्यू वयाः फुइन बच्छि जोवन
छंथाय् वयला कि मवयला जुल मन दोमन..

लोकंह्वाःम्ह म्येहालामि अमर चित्रकार व सरीता महर्जनया सलय् “छंगु ल्यूल्यू” म्ये–भिडियो कन्हे शनिवाः सार्वजनिक याइगु जूगु दु ।

ख्यालि जुजु मदनकृष्ण श्रेष्ठया मूपाहांसुइ, लोकगायक रत्न बेहोशी बज्राचार्यया विशेष पाहांसुइ व ललितपुर महानगरपालिका १६ अध्यक्ष निर्मलरत्न शाक्यया पाहांसुइ सिडिसी सिनेमा, सिटिसी मल, सुन्धाराय् सुथय् १०ः३० बजे म्ये–भिडियो पिथना ज्याझ्वःया ग्वसाः ग्वयागु म्येहालामि चित्रकारं कनादीगु दु ।

भूपेन्द्र बज्राचार्यं संगीत तयादीगु थुगु ज्वःम्येया रेकर्डिङ फिरोज बज्राचार्यं यानादीगु खःसा थुगु रेकर्डिङ ज्योति म्यूजिकय् जूगु खः ।

रवि सायमिं निर्देशन व कृष्णभक्त महर्जनं कोरियोग्राफी, अमर चित्रकारं छायाँकन, सम्पादन व रंग संयोजन नं यानादीगु थुगु म्येया भिडियोय् मनोज महर्जन, नेरिसा महर्जन, कृष्णभक्त महर्जन, निश्चल भुजेल, सुब्रिना चित्रकार लगायत कलाकारपिन्सं अभिनय यानादीगु दु ।

म्ये–भिडियोय् समा सनमकुमार श्रेष्ठ व विमला सापकोटां यानादीगु खःसा थुकिया पोष्ट प्रोडक्सनया भाला सुभाष काफ्लें पूवंकादीगु खः ।



 

नेपालभाषाया कार्यकर्ता राजेन्द्र महर्जनं थः मदुम्ह अबुया लुमंतिइ च्वयादीगु म्येँया म्यूजिक भिडियो ‘ईया घःचाः’ छगु ज्याझ्वः दथुइ वंगु शनिवाः विश्वज्योति हलय् सार्वजनिक जुगु दु ।

उगु ज्याझ्वलय् मूपाहां वरिष्ठ गायक जुजुकाजी रंजितं थम्हं मांया नामय् न्हापा म्ये हाला तयेधुनागु व अबुया नामय् नं हाले मं दुगु खःसां थःत उगु सौभाग्य चू मलाःगु व थुगु म्येँ न्यने धुंकाः थःत ७० प्रतिशत थः अबु लुमना वःगु खँ कनादीगु खः।

संगीतकार शिव शाहीं लय् चिनादीगु व गायक सतिस महर्जनं सः बियातःगु थुगु म्येँया म्यूजिक भिडियोय् कलाकार कृष्णभक्त महर्जन, मैंया मुनिकार, धिरज थापा मगर, शान्ति महर्जनपिनि मू भूमिका दुसा बाल कलाकारय् अमिरवराज महर्जन, हृदिक्षा महर्जन, प्रणव महर्जन व शिरसा महर्जनपिंसं अभिनय यानातःगु दु ।

अथे हे विशेष पाहां नेपालभाषा टाइम्सया कजि नापं साहित्यकार रमेशकाजी स्थापितं थुगु म्येँ व म्यूजिक भिडियोयात कयाः समीक्षा यानादिगु खः। पाहां कथं झाःम्ह रेडक्रस सोसाइटी काठमाडौं जिल्लाया पुलांम्ह मन्त्री नापं कलाकार संघरत्न शाक्य, म्यूजिक भिडियो निर्देशक रवि साय्मि, कलाकार कृष्णभक्त महर्जनपिंसं म्यूजिक भिडियो व म्येँयात कयाः चर्चा यानादीगु खः।

म्यूजिक भिडियोया प्रड्युसर दशनारायण महर्जनयात विशेष सुभाय् पौ लःल्हानादीगु खः।

ऐतिहासिक कथं लोकंह्वाना म्ये पुस्तान्तरण जुया वःगु व थ्यंमथ्यं ११५ दँ न्ह्यः भारतया कोलकत्ताय् सेतुरामया सलय् रेकर्ड याःगु ‘राजमती’या खस् नेपाली भाषाय् पुनर्लेखन, संगीत व एरेन्ज याना तयार याःगु खः।

ख्यालिजुजु नांजाम्ह कलाकार मदनकृष्ण श्रेष्ठं ‘राजमती’ या नेपाली भर्सन बुधबार जूगु म्येया भिडियो पितब्वज्या यानादीगु खः। ज्याझ्वलय् आदी गायक सेतुराम प्रधानयाबारे डकुमेण्ट्री नं पितब्वज्या याःगु खःसा सेतुरामया परिवारयात सम्मान याःगु खः।

उगु हे ज्याझ्वलय् सिनेमाख्यःया न्ह्यलुवा पत्रकार बिजयरत्न तुलाधरयात राष्ट्रिय पत्रकारिता पुरस्कार व व्यवसायी फुपु तेञ्जिङ्ग शेर्पायात राष्ट्रिय युवा उद्यमी सम्मानपाखें सम्मानित याःगु खः।आदी गायकया कथं इतिहासं दयेकुम्ह गायक सेतुराम प्रधानं बि.सं. १९६५ पाखे भारतया कोलकत्ताय् खस् नेपाली व नेपाल भाषाया ‘राजमती’सहित १४ पु म्ये ग्रामोफोन डिस्कय् रेकर्ड यागु खः।

ग्रामोफोन डिस्कय् रेकर्ड जूगु नेपाःया थ्वहे न्हापांगु म्ये खः। थ्वहे म्येया नेपाली भर्सनया निंतिं गीतकार कृष्णदेव रिमालं भाषा सम्पादन यानादीगु खःसा गायक कृष्ण काफ्लें हालादीगु थ्व म्येया नितिं सन्तोष श्रेष्ठं संगीत संयोजन यानादीगु खः।निसत्या दँ न्ह्यः राणा प्रधानमन्त्री जंगबहादुर बेलायत भ्रमणय् वंगु इलय् राजमति म्येयात नेपाःया राष्ट्र गानया रुपय् न्ह्यब्वसां निसें आःतक उतिकं हे लोकंह्वाना वया च्वंगु थ्व म्येया नेपाली भर्सन पिहाँ वःगुलिं ख्यालिजुजु मदनकृष्ण श्रेष्ठं लसता प्वंकादिसे मेमेगु भासं नं थ्व म्ये पिकायेदःसा जिउ धका धयादिल।

निर्माता कम्पनी ड्रिम वर्ल्ड अफ फिल्म मेकर्सया कजि शबनम मुखियाया सभाध्यक्षताय् जूगु उगु ज्याझ्वलय् सेतुरामया परिवारपाखें मदन प्रधान, सम्मानितपाखें विजयरत्न असंबरे, राजमति संकिपाया नकिं हिसिला महर्जनपिन्सं नुगःखँ तयादीगु खः।थुगु म्येया संकिपाय् सागर खनाल, सोनी लगुन, प्रभातकुमार खेँ, पवन केसि, प्रतीक्षा शाह, संगीत अधिकारीनाप यक्को कलाकारतय्स अभिनय यानादीगु दु।

दिपक बज्राचार्यं खिंचेयानादीगु थ्व भिडियोया परिकल्पना व निर्देशन सबनम मुखिया व निर्माण रश्मी प्याकुरेलं यानादीगु खः।

श्रद्धा कपुर व राजकुमार रावं अभिनय याःगु बलिउड हरर–कमेडी फिल्म ‘स्ट्री २’ भारत लगायत हलिन्यंकं बांलाक आम्दानी जुयाच्वंगु दु।

थुगु संकिपां भारतय् ऐतिहासिक नाफा कमे यायेत तालागु दु।बलिउडया संकिपा व्यापार विश्लेषक तरण आदर्शया कथं थ्व संकिपां १८ न्हु तक भारतीय बक्स अफिसय् ५०२.३५ करोड तका शुल्क संकलन याःगु दु।

स्वंगूगु वाःया दुने ‘बाहुबली २’ (हिन्दी संस्करण)या कीर्तिमान तःगु दु।थुगु संकिपां न्हापांगु वालय् ३०७.८० करोड, निगूगु वालय् १४५.८० करोड व स्वंगूगु वालय् ४८.७५ करोड आम्दानी याःगु खः।न्हिइपुगु खँ छु धाःसा शाहरुख खानया ‘जवान’ ५०० करोडया कमे यायेत १८ दिं लगे जुगु खः।

थुकिया बराबर जुइत श्रद्धा कपुरया ‘स्ट्री २’ नं उलि हे दिं काःगु दु। आम्दानीया ल्याखं ‘स्त्री २’ व ‘जवान’ बराबर जूगु दु। ५०० करोडया क्लब, जवन, गदर २, पाठान, बाहुबली २ (हिन्दी) व एनिमल क्लबय् दुहां वनेधुंकूगु दु। आदर्शं धाःगु दु, “स्वंगूगु सप्ताहन्तया आम्दानीया प्रवृत्ति स्वयेबलय् थुकिया गति दिइगु छुं संकेत मदु, आः सकसिगुं ध्यान ६०० करोडया क्लबपाखे वःगु दु।”

‘स्ट्री २’ थुगु आम्दानीया गति कायम यात धाःसा ‘जवन’या दकलय् अप्पो पार यानाः दकलय् अप्वः आम्दानी याःगु संकिपाया कीर्तिमान तयेफइगु विश्लेषण आदर्श दु।

चलचित्र विकास बोर्डया अध्यक्षय् दिनेश डिसी नियुक्त जुगु दु। बिहीवाः च्वंगु मन्त्रिपरिषद् बैठकं डिसीयात अध्यक्षय् नियुक्त यायेगु निर्णय याःगु खः।

चलचित्र विकास बोर्डया अध्यक्ष नियुक्ति यायेगु निति स्वम्हेसिगु नां मन्त्रिपरिषद् बैठकं सिफारिस याउगु खः। सञ्चार लिसे सूचना प्रविधि मन्त्रालयया कथं डिसीनाप, दीपा पाण्डे व राजेश थापाया नां न सिफारिस जूगु खः।

बोर्डया अध्यक्ष जुइगु निति अभिनेत्री करिश्मा मानन्धर न आवेदन बिउगु खः।स्वम्हेसिगु सर्टलिस्टय् दुमथ्याःगु खः।

आवेदन बिउपि मध्ये सिफारिस जूपि स्वम्ह मानन्धर, प्रकाश भट्टराई व अर्जुनकुमार डंगोलनाप खुम्हसिगु आवेदन स्वीकृत जूगु खः।