भारतया राजस्थानय् १८ क्वःगु अन्तर्राष्ट्रिय कलापर्वय् नेपाःया चित्रकार अजय देशार सम्मानित जुगु दु।

अन्तरंग कला नाप एजुकेशन वेलफेयर सोसाइटी व राजस्थान ललितकला एकेडेमीपाखे राजस्थानया टोंकय् जुगु उगु ज्याझ्वलय् कलापर्वया चित्रकार देशारयात अन्तराष्ट्रिय कलारत्न सम्मानपाखे सम्मान याःगु खः।

वंगु कार्तिक ३० निसे मंसिर २ गतेतक जुगु उगु ज्याझ्वलय् कलापर्वय् कला कार्यशाला, चित्रकला कासा, चित्रकला प्रदर्शनी, अन्तराष्ट्रिय व राष्ट्रिय चित्रकारपिन्त सम्मान याःगु खः। उगु ज्याझ्वलय् नेपाःपाखे गुम्ह नाप निसः स्वया अप्पो चित्रकार तय्स ब्बति काःगु खः। देशार नापं प्यम्ह अन्र्तराष्ट्रिय व २० म्ह राष्ट्रिय चित्रकार तय्त कलारत्नपाखे सम्मान याःगु खः।

नेपाःपाखे चित्रकारपि योङ पिकासोया निर्देशक अजय देशार, छ्वाली चित्रकार राजेश महर्जन नाप चित्रकारपि बालकिशोर चौधरी, प्रिन्स महर्जन, नरबहादुर वि.क, सुनैना ठाकुर, दोर्जे गुरुङ लामा, निदेश श्रेष्ठ व चित्रबहादुर बुढा मगरं ब्बति काःगु खः।

लक्ष्मीपूजा वंगु कात्तिक १५ गतेनिसे क्यने ज्याजुगु संकिपा ‘पूर्णबहादुरको सारङ्गी’ नेपालय् दकलय् अप्पो कमे याःगु संकिपा जूगु दु।

निर्माता विनोद पौडेलं संकिपा क्यःगु १४ दिं दुने २७ करोड सङ्कलन याये धुकुगु जानकारी ब्यूगु दु। वयकःया कथं मङ्गलवाः तक २५ करोड ३ लाख व बुधवाः २ करोडया बराबर व्यापार जूगु धका धाःगु दु।देयन्यक अझ न संकिपा स्वइपि दुधका धयादीगु दु।

देयन्यक चाःहिलइगु झ्वलय् निर्माता पौडेलनाप अभिनेता विजय बराल, अभिनेत्री अञ्जना बराइलीपि ना चाः संकिपा हलय् वना स्वयाच्वंगु दु।

थुगु संकिपा छन्हु हे ३ करोड ८९ लाखया व्यापार याना छन्हु हे नेपाःया संकिपा न ९८ चलचित्र भवनय् ४ सय ६५ स्वया अप्पो क्यंगु रेकर्ड तःगु दु। थ्व स्वया न्ह्यः ‘कबड्डी ४ः द फाइनल म्याच’ न २३ करोड ५० लाख तक व्यापार याःगु खः।

वरिष्ठ हास्यव्यङ्ग्य कलाकार हरिवंश आचार्यया ६८ दँया बुदिं थौ यलया मंगलबजारय् हंगु दु। यल महानगरपालिका– १६ वडा कार्यालयपाखे वडाध्यक्ष निर्मलरत्न शाक्यं आचार्ययात हनापौ लःल्हागु खः।

यल लाय्कूलि चाः ह्यूवःपिन्स तक आचार्ययात बुदिंया भिंतुना ब्यूगु खः। कलाकार आचार्यया भिं उसाँय्या कामनायासे नेवाः परम्परा कथं खेँ सगं ब्यूगु खः।

वरिष्ठ कलाकार मदनकृष्ण श्रेष्ठ, किरण केसी, नरेन्द्र कंसाकार व शिवहरि पौडेलपिनिगु न ब्बति दुगु खः।अथेहे उगु ज्याझ्वलय् रोटरी क्लब अफ यल, नेपाल अर्बुद रोग निवारण संस्था यल शाखा, मदनदेवी फाउण्डेशन, वडा १६ या मंकाः ग्वसालय् हिं दान ज्याझ्वः न जुगु खः।

नेपालभाषाया कला ख्यलय् सक्रिय जुयाः थीथी ज्याझ्वःत यानावःगु संस्था संसार क्रिएसन्सया स्वन्ति व न्हूदँया भिंतुना कालबिल ज्याझ्वः क्वचाःगु दु । बुधबाः संसारं यलया ख्वनाय् स्वन्ति नखः व न्हूदँ नेपाल सम्वत ११४५ या भिंतुना कालबिल ज्याझ्वः याःगु खः ।

ज्याझ्वलय् यल महानगरपालिका वडा २१ या वडाध्यक्ष रविन्द्र महर्जन, वरिष्ठ संगीतकार रत्न बेहोशी बज्राचार्य, वरिष्ठ निर्देशक लिसें रचनाकार पवन जोशी, वरिष्ठ सिने पत्रकार विजयरत्न असंबरे, वरिष्ठ संगीतकार राजु सिंह लिसेंनं थःथःगु बिचाः तयादीगु खः ।

लिसें गायिका, संसार संगीतालयया संरक्षक सरिता महर्जन, प्रकृती प्रेमी समूहया संरक्षक लक्ष्मीनारायण सिं सुवाल व वरिष्ठ साहित्यकार विक्रम भक्त जोशीं स्वन्ति व न्हूदँ नेपाल सम्वत ११४५ या भिंतुनालिसें थःथःगु नुगःखँ तयादीगु खः ।

उगु हे ज्याझ्वलय् संसार स्टार म्यूजिक भिडियो अवार्डया स्वंगूगु संस्करणया नितिं म्ये दर्ता खुल्ला जूगु घोषणा नं याःगु खः ।

हलिंया दकले तःधंगु व ईया ल्याखं ताःहाकः न्ह्याइगु दाबी यानातःगु स्टार नेपालभाषा म्यूजिक भिडियो अवार्डया स्वंगूगु संस्करणया लागिं म्ये दर्ता यायेत संसार क्रिएसन्सया क्रिएटिभ डाइरेक्टर स्वतन्त्र महर्जनं इनाप यानादिल ।

क्रिएटिभ डाइरेक्टर महर्जनं स्वंगूगु संस्करणतक थ्यंबलय् अवार्डयात व्यापकता बियाः थुकियात राष्ट्रिय स्तरय् यंकेगु कुतः यानागु धयादिल ।

‘अवार्डयात हलिमय् तःधंगु व अप्वः ईतक जुइगु ताःहाकःगु अवार्डया रुपं गिनिज बुकय् दर्ता यायेत स्वयाच्वनागु दु । स्वंगूगु संस्करण थ्यंबलय् राष्ट्रिय स्तरय् यंकेगु ताःतुनां थुकिया नां संसार राष्ट्रिय स्टार म्यूजिक भिडियो अवार्ड्स दयेकागु दु’ महर्जनं धयादिल ।

अवार्डया लागिं दर्ता ई मंसीर मसान्ततक क्वःछिनातःगु दु ।

संसार क्रिएसन्सया संस्थापक प्रेमा संसार महर्जनं संस्थाया म्हसीका बीगुलिसें संस्थां यानावःगु ज्याझ्वः, ज्याखँया बारे जानकारी बियादिल ।

व हे ज्याझ्वलय् संसार अनलाइन टिभी युट्युब च्यानलय् अपलोड जूगु म्येया सर्जकयात भ्यूजया लिधंसाय् रोयल्टी नं लःल्हाःगु खः । अथेहे, युट्युब च्यानलया टप ५ भ्यूज म्येयात लसहना पौलिसें हंगु नं खः ।

ज्याझ्वलय् एज्लिना राईं हुलाप्याखं व सरीता महर्जन, स्वतन्त्र महर्जन, सरस्वती मानन्धर, राजेन्द्र श्रेष्ठ, सविना मानन्धर, राजेन्द्र शाक्य, एलन शाही, समा डंगोल, राजु नकर्मी, बीणा महर्जन, चेकराम अवाले व प्यारी सुवाललिसेंया म्येहालामिपिन्सं म्ये न्ह्यब्वयादीगु खः ।

रेडियो नेपालया कार्यकारी निर्देशक अमरध्वज लामां नेपाःया सङ्गीत ख्यः रेडियो नेपाल न्ह्यावलय् न न्ह्यने जुइ धका धयादीगु दु।

रेडियो नेपालं स्वन्ति, नेपाल संवत् व छठया लसताय् जूगु सिंहदरबारय् विशेष धुन न्ह्यब्बःगु उगु ज्याझ्वलय् कार्यकारी निर्देशक लामां वइगु दिं नेपालय् न्ह्यानाच्वंगु दक्को नखःया म्ये दयका दक्को समुदायया अपनत्व व अर्थपूर्ण सहभागिता सुनिश्चित यायेगु जुइ धका धयादीगु खः।

लामां प्रसारण पहुँच अभिवृद्धि याना आम श्रोतातयेत यःगु म्ये व संगीतया आधारय् रेडियो नेपालं पुलागु म्ये डिजिटल प्लेटफर्मय् तयेग जुइ धका धयादीसे लोकतान्त्रिक गणतन्त्रात्मक व्यवस्थायठ समावेशी चरित्र स्थापित यासे दक्को जातजाति, भाषा–भाषी व समुदायया प्रतिनिधित्व सुनिश्चित जुइगु कथं रेडियो नेपालं थीथी २५ गु भाषामा समाचार प्रसारण याना च्वंगु जानकारी न बियादीगु खः। मौलिक धुनया सर्जक तय्त सम्मान यानादीसे कार्यकारी निर्देशक लामां नखःया विशेष सङ्गीत धुन न्ह्यब्बःगुलि सुभाय् देछानादील।

उगु सङ्गीत धुनय् मङ्गल धुन, देउसी धुन, नेपाल संवत् धुन, छठ धुन व भैलो धुन न्ह्यब्बःगु खः। मनराजा नकर्मी, बद्रिविशाल तण्डुकार, डा. निरञ्जन भण्डारी, न्हुछे महर्जन, सुनिल बर्देवा, नवराज गुरुङ, दिपक सुनाम, हरिशंकर चौधरी, खड्ग गर्बुजा, खड्ग गन्धर्व व रुबिन गन्धर्वं उगु संगीत न्ह्यब्बःगु खः।

अथे हे, पुचलय् निर्मला घिसिङ, सुखकला राई, हरिशंकर चौधरी, प्रज्वल खड्का व सितु मानन्धरपि न दुथ्याःगु खः। मङ्गल धुनय् बाँसुरी–निरञ्जन भण्डारी, किबोर्ड–न्हुछे महर्जन, खीं÷मादलय् सुनिल बर्देवा, गीतारय् नवराज गुरुङ, बेस गीतार–दिपक सुनाम, हार्मोनियमय्,  हरिशंकर चौधरी व इफेक्टस् खड्ग गर्बुजां न्ह्यब्बःगु खः। देउसी धुनय् सारङ्गीइ रुबिन गन्धर्व, वाद्यवादनय् भण्डारी, महर्जन, बर्देवा, गुरुङ, सुनाम व हरिशंकर चौधरीं न्ह्यब्बःगु खः।

नेपाल संवतया धुनय् हार्मोनियमय् मनराजा नकर्मी, पुचलय् निर्मला घिसिङ, सुखकला राई, हरिशंकर चौधरी, प्रज्वल खड्का, सितु मानन्धर, व धिमेलय् बद्री विशाल तण्डुकार, सारङ्गीइ खड्ग गन्धर्व सहितनाप न्ह्यब्बःगु खः।छठ धुनय् हरिशंकर चौधरी हार्मोनियमय्, किबोर्ड–न्हुछे महर्जन, तबला सुनिल बर्देवा, गीतारय् नवराज गुरुङ, बेस गीतार –दिपक सुनाम, हार्मोनियमय् हरिशंकर चौधरी व इफेक्टस् खड्ग गर्बुजां न्ह्यःब्वःगु खःसा भैलो धुनय् सारङ्गी खड्ग गन्धर्व, बाँसुरीइ निरञ्जन भण्डारी, किबोर्ड–न्हुछे महर्जन, मादलय् सुनिल बर्देवा, गीतारय् नवराज गुरुङ, बेस गीतार –दिपक सुनाम, हार्मोनियमय् हरिशंकर चौधरी व इफेक्टस् खड्ग गर्बुजापिन्स न्ह्यब्बःगु खः।