प्रधानमन्त्री केपी शर्मा ओलीं संकिपा ‘नमेटिने घाउ’ य् थःगु सः तयादीगु दु।

अनामनगरय् च्वंगु छगू स्टुडियोय् वना थःगु सिन दुगलि सः तयादीगु दु। एसिड आक्रमणय् लाम्ह ३३ दँया मिसायात दुथ्याका दयकूगु उगु संकिपाय् वयकःया न अभिनय दुथ्याःगु खः। ’एसिड आक्रमणया पीडितयात न्याय दइ, छिकपिनिगु समस्याया समाधान जि याये, न्याय बिइ।

छिकपिन्स एसिड आक्रमणविरुद्ध सञ्चालन याःगु अभियानयात निरन्तरता बियादीस ...,’ थथे दुगु संवादय् प्रधानमन्त्री ओलीं सः बियादीगु धका संकिपाया निर्देशक लिसे अभिनेता रमित ढुङ्गानां जानकारी बिःगु दु।उगु संकिपाय् प्रधानमन्त्री ओलीनाप पूर्वप्रधानमन्त्री माधवकुमार नेपाल व सांसद ज्ञानेन्द्र शाहीया न अभियन दुगु खः।

शिवम् अधिकारीं च्वयादीगु उगु संकिपाय् मुस्कान खातुन, प्राप्ति पौडेल, इभा गिरी, कमल देवकोटा, सन्दीपबाबु लोहनी, रचना गौतम, प्रभातपाल ठकुरी, आरती आचार्य, अखिल बजगाईं, उपेक्षा न्यौपाने, क्रान्ति शाह, वीरेन्द्र सिंह, सुरवीर पण्डित, सुनिल कटुवालपिनिगु अभिनय दुगु खः।

लोकह्वाःगु भारतीय टेलिभिजन च्यानल नेपाल् थःगु प्रसारण रोके याःगु दु।

निदँनिसे च्यानल प्रयोगवापतया भुक्तानी काये मखगु धका धासे भारतीय टेलिभिजन नेटवर्कं थःग च्यानलया प्रसारण बिहीवाःनिसे दिकागु दु धका सञ्चार लिसे सूचना प्रविधि मन्त्रालयं धाःगु दु। भारतया कलर्स, स्टार, जी व सोनी नेटवर्क अन्तर्गतया च्यानलय् प्रसारण दिकूगु दु।

सरकारं विदेशी मुद्राया सिफारिस मबिउगुलि उगु च्यानलया भुक्तानी मजूगु धका सेवाप्रदायकं धाःगु दु। सरकारं २०७९ सालया चैत १५ गतेनिसे विदेशी टेलिभिजन च्यानलया विदेशी मुद्रा सिफारिस याःगु मदुनि। कानुन कथं वंसा विदेशी मुद्रा सिफारिस बिइत छु न समस्या मदु धका मन्त्रालयया सहसचिव लिसे प्रवक्ता गजेन्द्रकुमार ठाकुरं धाःगु दु।

सरकारं २०८० सालया साउन १ गतेनिसे आलाकार्टा अर्थात् ग्राहकं स्वये चाहे जू जक च्यानलया ध्यवा पुलेगु प्रणाली लागू यायेवं भारतीय च्यानलं विरोध याना वयाच्वंगु खः। फुक्कं च्यानलं बिस्कं बिस्क ध्यवा पुलेगु खँ मिले मजू धका उमिस धयावया च्वंगु खः।

मन्त्रालयया कथं आः दक्को विदेशी च्यानल प्रदायकया झन्डै १ अर्ब विदेशी मुद्रा सिफारिस जुइ फुगु मदुनि।

संसारय् संगीत ख्यःया ख्वाःपाः न्हियान्हिथं हिलाः वनाच्वंगु दु। नेवाः संगीत ख्यःया संरक्षण व सम्बर्द्धनय् पलाः न्ह्याकेगु आज्जु ज्वना यलया खोनाय् संसार संगीतालय पलिस्था याःगु दु।

संकिपा व संगीत ख्यलय् दिपाः मदिक्क पलाः न्ह्याकाः वयाच्वनादीम्ह कलाकार स्वतन्त्र संसार महर्जनया कुतलय् पलिस्था जूगु थुगु संगीतालयया बिहिवाः विधिवत रुपं उलेज्या जुगु दु। यल महानगरपालिका वडा २१ या वडाध्यक्ष रविन्द्र महर्जन मूपाहाँ कथं झायादीगु उगु ज्याझ्वलय् म्येहालामि संगीतसेवी व समाजसेवी सरिता महर्जनपाखें थीथी बाजं व संगीत सम्बन्धी हलंज्वलं संसार संगीतालययात लःल्हानाः उलेज्या यानादीगु खःसा सन्सार्स गु्रपया संरक्षक स्वतन्त्र संसार महर्जनं लसकुस यानादीगु खः।

संसार्स ग्रुपया संस्थापक प्रेमा संसार महर्जनपाखे खादा क्वखायेकाः पाहाँपिन्त लसकुस याःगु उगु ज्याझ्वलय् नांजाःम्ह संगीतगुरु रत्न बेहोशी, बरिष्ठ संगीतकःमि जुजुकाजि रन्जित, नांजाःम्ह म्येहालामि प्रवेशमान शाक्य, संगीतकःमि अनिल तुलाधर, साहित्यकार विक्रमभक्त जोशी व नेपालभाषाया न्हापांम्ह बरिष्ठ सिनेपत्रकार विजयरत्न असंबरे पाहाँ कथं झायादीगु खः।

ज्याझ्वलय् उगु संस्थाया संरक्षक स्वतन्त्र संसार महर्जन व म्येहालामि सरिता महर्जनया नापनापं वरिष्ठ म्येहालामि जुजुकाजि रन्जित, लोकंह्वाःम्ह म्येहालामि प्रवेशमान शाक्य व किशोर शाही लगायतं म्ये हालाः थःगु सांगितिक कला न्ह्यब्वयादीगु खः ।नेपालभाषाया सांगितिक ख्यःयात तब्या यानाः यंकेत तिबः जुइकथं थीथी ज्याझ्वः यानाः यंकेगु आज्जु थ्व संगीतालयया खः।

थ्वहे झ्वलय् छुं ई लिपा संगीत प्रशिक्षणया ज्याझ्वः नं न्ह्याकेगु ग्वसाः दूगु खँ महर्जनं कनादिगु खः।

गायक दीप श्रेष्ठया सलय् ‘एक्लो भएछु’ म्येया म्युजिक भिडियो सार्वजनिक जूगु दु। सार्वजनिक जूगु उगु म्ये डा. बिनुबाबा अर्यालं च्वयादीगु खःसा योगेन्द्र उपाध्यायं लय् तयादीगु खः।

उगु म्युजिक भिडियोय् नायक शिव श्रेष्ठ, अनु शाह व मचा कलाकार देवासिस निरौलापिन्स अभिनय यानादीगुलि सुरज तामाङं निर्देशन यानादीगु खः। गायक श्रेष्ठं म्येया शब्द व संगीतं थःत मनय् थिइगुलि थःम्हेसिया म्ये हालेत तयार जूयागु धका धयादीगु खः।

थःम्हेसिया हालागु थुगु म्ये मेगु स्वया बिस्क व विशेष जूगु दु धका वयकलं धयादीगु दु। नायक शिव श्रेष्ठं न्हापा दीप श्रेष्ठया म्ये जुगुलि थः अभिनय यायेत तयार जुयागु म्ये न्यने धुका अझ मन थिउगु दु धका धयादीगु खः। अभिनय यायेगु झ्वलय् गुलि थासय् थः भावुक जुयागु धका धयादीगु खः।

गागां पेरिस ओलम्पिक २०२४ या उलेज्या ज्याझ्वलय् सांस्कृतिक ज्याझ्वः न्ह्यब्बयेगु निति फ्रान्स वम्ह हलिउड स्टार लेडी गागां फ्रान्सेली प्रधानमन्त्री ग्रेबियल एटलयात थःगु फियोन्से माइकल पोलान्सया म्हसिका बिउगु दु।

गागां आइतवाः प्यदँ न्ह्यःनिसे मतिना यानाच्वम्ह पोलान्स्कीयात प्रधानमन्त्रीयात म्हसिका बिउगु खः। उगु भिडियो ग्रेबिएलया टिकटक भाइरल जूगु खः।

गागा व प्रविधि उद्यमीतक जुयादीम्ह पोलान्स्की सन् २०२० य् सुपर बाउल सप्ताहन्तय् नापलागु खः। गागां इलय् ब्यलय् पोलान्स्कीसनाप च्वंगु किपा सार्वजनिक याना वयाच्वंगु खः।