नीगू दशकनिसें संगीत ख्यलय् क्रियाशील राजु कर्माचार्यया नेपालभाषाया म्येचाः ‘न्हापांगु पलाः’ पिदन । थुगु म्येचाकलय् भाजु कर्माचार्यं च्वयादीगु, लसय् चिनादीगु अले हालादीगु ७ पु म्ये दुथ्याः ।

येँया ग्रिन लिभ्स् रेष्टुरेन्टय् जूगु ज्याझ्वःया मूपाहां वरिष्ठ म्येहालामि प्रेमध्वज प्रधान, विशेष पाहां वरिष्ठ संगीतकार राजु सिँह, पाहांपिं वरिष्ठ म्येहालामि जुजुकाजी रंजित, संगीतकार जूगल डंगोल, भाजु कर्माचार्यया अबु चक्रवीर कर्माचार्यं विमोचन यानादीगु खः ।

थुगु म्येचाकलय् रविन दर्शनधारीं संगीत संयोजक यानादीगु ‘त्वःताः वन छं’, रोमन भैलं संगीत संयोजन यानादीगु ‘भ्यालेन्टाइन’, फिरोज बज्राचार्यं संगीत संयोजन यानादीगु  ‘हिसिदुगु ख्वाः’ व जूगल डंगोलं संगीत संयोजन यानादीगु ख्वपया म्ये ‘धेपमैं’, ‘खुसिया किनारा’, ‘स्वयम्भुइ द्येके’ व सरस्वती मानन्धरनापया ज्वःम्ये ‘नु रे नु’ दुथ्याः ।

ज्याझ्वलय् भाजु कर्माचार्यं ‘त्वःता वन छं’, ‘खुसिया किनारा’ व म्येहालामि मयजु सरस्वती मानन्धरनाप ‘नु रे नु’ न्यंकादिलसा राजन शाहीं निर्देशन यानादीगु, मोहन मानन्धरं सम्पादन व छायाँकन यानादीगु ‘धेपमैं’या म्यूजिक भिडिया नं प्रेमियर जूगु खः । थुगु म्यूजिक भिडियोय् अर्णेश्वरी शिल्पकार, श्यामसुन्दर शिल्पकार, विश्व भैल, राजु मानन्धर, शर्मिला कर्माचार्य, यूनिक कर्माचार्य, आशाकुमारी कवां, हेलबहादुर मानन्धर, लक्ष्मी लामां म्हितादीगु खः ।

७ पु म्येया हे ट्रयाक नं दुथ्याकातःगु थुगु म्येचाकलय् दुथ्याःगु म्येया मिक्सिङ व मास्टरिङ आर्टोम्यूज रेकर्डिङ स्टुडियोय् जूगु खःसा मेगु ३ पु म्ये ‘नु रे नु’ 'त्वःतावन छं' व ‘हिसिदुगु ख्वाः’या म्यूजिक भिडयाे नं तयार जानकारी जुइधुंकूगु दु ।  

ज्याझ्वः संचारकर्मी सुरजवीर बज्राचार्यं यानादीगु खः ।

थुगु म्येचाः पिथनेधुंकाः नेपालभाषा व खस नेपाली भाषाया म्ये सृजनाय् निरन्तर न्ह्यायेगु कुतः यानाच्वने धयादीम्ह म्येहालामि कर्माचार्य पाटन अस्पतालया वरिष्ठ ल्याब टेक्निसियन खः ।
 

सास्कृतिक संस्थानं प्रत्येक महिनाया लिपांगु विहिवाः ग्वसाः ग्वयावःगु सूरसाधनाया १२ गूगु श्रृंखलाय् म्येहालामि रोजी डंगोल श्रेष्ठं झिंछपु म्ये न्यंकादिल । निगू दशकया सांगीतिक जीवनयय् हालादीगु म्ये दथुइ लोकंह्वाःगु म्ये न्यंकादीगु थुगु ज्याझ्वः स्वकुमिपिन्सं अतिकं बांला ताःगु प्रतिकृया ब्यूगु खः ।

असारया थ्व इलय् बुँज्या, थुकिया नितिं जुइगु संघर्ष, विकृति व आधुनिकतानाप स्वाःगु बीनन्द वैद्यं च्वयादीगु अले अनिल तुलाधरं लसय् हनादीगु “न्हिच्छि न्हिच्छि चच्छि, चच्छि” म्ये न्ह्यब्वःसें न्ह्याःगु थुगु ज्याझ्वलय् सुरजवीर बज्राचार्यं च्वयादीगु व जूगल डंगोलं लसय् हनादीगु “लँ पंवारे दाइचा जितः...”, हरिशरण साय्मिया संगीतय् प्रकाश अर्यालं च्वयादीगु “आजको समय भोली आउँदैन”, सुमन वैरागीं च्वयादीगु, ज्योति प्रकाशं  संगीत तयादीगु “म जन्मेको शहर भन्दा गाउँ राम्रो छ रे”, आनन्द अधिकारीं च्वयादीगु आनन्द राईया संगीत दुगु “अग्नी परीक्षा”, रमेश दाहालं च्वयादीगु शक्ति वल्लभं संगीत तयादीगु “जे सुकै होस् मनको कुरा सुन्दिन म त” न्यंकादिल ज्याझ्वलय् पूर्णकाजी ज्यापुं च्वयादीगु अले जूगल डंगोलं हे संगीत तयादीगु नेपालभाषाया म्ये “मतिना फसं”, “यच्चुगु सर्गः”, “मोहनी तया ला”, “मस्यू जितः छुजू छुजू” व “चुलि जायावइगु वसन्त लसय्” न्यंकादिल । थुगु म्ये न्ह्यब्वयादीबलय् स्वकुमिपिं नं न्ह्याइपुक प्याखं हुलादीगु खः । ज्याझ्वलय् न्ह्यब्वःगु झिंछपु म्येय् ज्वःम्येय् धाःसा सानुबाबु महर्जन, दीपेन्द्र बज्राचार्य, सुमित खड्कां साथ बियादीगु खःसा “मोहनी तया ला” म्येया मू म्येहालामि ख्यालि जुजु मदनकृष्ण श्रेष्ठनाप म्येहालामि रोजीं थुगु म्ये हाकनं न्ह्यब्वयादीगु खः ।

कोरस गायनय् गंगा राई बुढाथोकी, प्रिति तामाङ, अमृता रेग्मीं साथ बियादीगु उगु ज्याझ्वलय् वाद्यवादनय् कृष्ण गुरुङ, खर्कबहादुर बुढा, लोकराज राई, दुर्गा प्रसाद खतिवडा, तीर्थराज पोखरेल, दिपेन्द्र बज्राचार्य, सितामैंया राजचल, नरेश प्रजापति, भगिरथ सुस्लिङ, रविन कार्कीढली, आकाश गोर्खाली, राहुल भुजेलं साथ बियादीगु खः ।

ज्याझवलय् कलाकार मनोज गजुरेल, सांसद कृष्ण राई, वरिष्ठ म्येहालामि प्रेमध्वज प्रधान, वरिष्ठ कलाकार मदनकृष्ण श्रेष्ठं रोजीया सांगीतिक सक्रियताया बारे थःगु नुगःखँ तयादीगु खःसा म्येहालामि रोजीया जहान वालचन्द्र श्रेष्ठं रोजीया सांगीतिक जीवनय् थःम्ह फुगु सदां ग्वाहालि यानागु व यानातुं च्वनेगु जुइ धयादिसें थौं रोजीया नामं थःत म्हस्यूगुलिइ थः अतिकं लयतायागु खँ नं कनादिल ।

सांस्कृतिक संस्थानया महाप्रवन्धक राजेश थापाया अध्यक्षताय् जूगु ज्याझ्वलय्  मूपाहां जनकवि दुर्गालाल श्रेष्ठ, विशिष्ट पाहां वरिष्ठ म्येहालामि प्रेमध्वज प्रधान, राष्ट्रिय सभा सदस्य खेम नेपाली, सांसदपिं कृष्ण राई, मैनाकुमारी भण्डारी, वसन्त मानन्धर, प्राज्ञपिं कविता आले, पवित्रा घर्तीमगरं आशन ग्रहण यानादीगु खः ।  

सांस्कृतिक संस्थानया कार्यक्रम तथा योजना महाशाखा प्रमुख प्रभाकर शर्मां लसकुस यानादीगु थुगु ज्याझ्वः रेडियोकर्मी सुरजवीर बज्राचार्यं न्ह्याकादीगु खः ।