Display Style:
Column Style
छन्हु हे ११४म्ह कोरोना संक्रमण
लहनान्युज | तछलाथ्व पंचमी ११४०,जेठ १४ बुधवाः
थौ बुधवाः छन्हु हे ११४ म्ह कोरोना भाइरस (कोभिड–१९) या संक्रमण पुष्टि जुगु दु ।
स्वास्थ्य तथा जनसंख्या मन्त्रालयया कथं येँं, धरान, विराटनगर, पोखरा, हेटौंडा, दाङ व पोखराय् याःगु परीक्षणय् छन्हु हे थुलि अप्वोपि संक्रमित खने दुगु खः । थ्व नाप संक्रमित जुपि ८८६म्ह थ्यःगु दु ।
मन्त्रालयया प्रवक्ता डा. विकास देवकोटाया कथं थौं बुधवाः धरानकाया बीपी कोइराला स्वास्थ्य विज्ञान प्रतिष्ठानय् परीक्षणय् ११ म्हेसित पोजेटिभ खने दुगु खः । अन पोजेटिभ खनेदुपि दक्को सप्तरीयापि खः ।
अथेहे कोसी अस्पतालय् याःगु परीक्षणय् झापाय् च्वपि १७ म्हेसित कोरोना पोजेटिभ अने दुगु खः । हेटौडाय् याःगु परीक्षणय् रौतहटया ७ म्ह नाप च्याम्हेसित कोरोना पोजेटिभ खने दुगु खः ।
पोखराय् याःगु परीक्षणय् बागलुङया ४ म्हेसित पोजेटिभ खने दुगु खः । दाङय् याःगु परीक्षणय् रुकुम पूर्वया स्वम्ह, दाङय् १५ म्ह याना १८म्हेसित पोजेटिभ खनेदुगु खः ।
भेरी अस्पतालय् याःगु परीक्षणय् १६ म्हेसित पोजेटिभ खनेदुगु धका प्रवक्ता डा. देवकोटां धाःगु खः । राष्ट्रिय जनस्वास्थ्य प्रयोगशालाय् याःगु परीक्षणय् ३८ म्हेसित पोजेटिभ रिपोर्ट वःगु दु ।
आतक संक्रमण खनेदुपि मध्ये मिजंपि ७९६ व मिसापि ९०म्हेसित खने दुगु खः ।
एम्बुलेन्स सेवा याइम्हेसित कोरोना संक्रमण
लहनान्युज | तछलाथ्व तृतीया ११४०,जेठ १२ सोमवाः
येँया बूढानीलकण्ठ नगरपालिकाय् कोरोना भाइरस (कोभिड–१९) संक्रमण खनेदुम्ह मनू ‘निजी एम्बुलेन्स’ सञ्चालक जुम्ह धका सिइ दुगु दु ।
स्वास्थ्य तथा जनसंख्या मन्त्रालयया कथं थौं सोमवाः थपे जुपि ७२ म्ह कोरोना संक्रमितपि मध्ये बुढानीलकण्ठ नगरपालिका वडा नम्बर ३ याम्ह ३७ दँया छम्ह मिजंम्हेसित न कोरोना पुष्टि
जुग खः ।
उम्ह मनू निजी गाडीयात एम्बुलेन्सया रुपं छ्यला मनू तयेत अस्पताल यंकिम्ह खः । बूढानीलकण्ठ नगरपालिकां न्यागः निजी एम्बुलेन्सयात अनुमति बिःगु खः । उम्ह मनू न डायलासिस याकेत, प्वाथय् दुपिन्त थःगु निजी गाडीपाखे अस्पताल यंकिगु व हयेगु ग्वाहालि याना वयाच्वम्ह खः ।
बुढानीलकण्ठ नगरपालिकां जेठ ८ व ९ गते २७६ म्हेसित आरडीटी विधिपाखे परीक्षण याःगु खः । यगु परीक्षणय् उम्ह मनूयाःगु रिपोर्ट नेगेटिभ वःगु खः । लिपा हाकनं ५१ म्हेसिगु स्वाब संकलन याना राष्ट्रिय जनस्वास्थ्य प्रयोगशाला टेकुइ परीक्षण यायेत छुवःगु खः ।
उगु परिक्षणय् ५१ म्ह मध्ये वयागु जक रिपोर्ट पोजेटिभ वःगु खः । उम्ह मनूयात आः टेकु अस्पतालयो आइसोलेसनय् तया तःगु दु ।
आ उम्ह मनू नाप स्वापू दुपि मनूत मालेगु सुरु याना च्वंगु दु ।
टोखा व बुढानिलकण्ठ नाप देय् यकं ७२ म्हेसित कोराना संक्रमण
लहनान्युज | तछलाथ्व तृतीया ११४०,जेठ १२ सोमवाः
थौं येँया टोखा नगरपालिका व बुढानिलकण्ठ नगरपालिका न कोरोनाया संक्रमण खनेदुगु दु ।
स्वास्थ्य तथा जनसंख्या मन्त्रालयया सह प्रवक्ता समिरकुमार अधिकारीं बिःगु जानकारी कथं टोखा व बुढानिलकण्ठ नाप देय् यकं याना ७२ म्हेसित कोराना संक्रमण खनेदुगु धका धाःगु दु ।
थौं खनेदुपि टोखा नगरपालिका ३ व ६ नापं बुढानिलकण्ठ नगरपालिका ३ य् च्वपि २७, ४१ व ३७दँया मिजपिन्त संक्रमणया पुष्टि जुगु दु ।
धनुषा नगराइन नगरपालिका ३ य् च्वपि स्वम्ह मिजंपि, कपिलवस्तु शिवराज नगरपालिका ४, ५ व ६या ३म्ह मिजंपि, बारा कलैया नगरपालिका कोटवाली–१य् च्वपि निम्ह मिजंपि, रौतहट राजपुर फरहदवा २, ६, ८ व इशनाथ–२य् च्वपि २६म्ह मिजंतयेत संक्रमण जूगु दु ।
अथेहे सप्तरी डोक्नेधरी नगरपालिकाया २म्ह मिजंत, बर्दिया बासगढी–९या १म्ह मिजं, बाँके, दुधवा गाँउपालिका–२ व राप्ती सोनारी गाँउपालिका–७या ४म्ह मिजंत, बारा गडीमाई नगरपालिकाय् २१म्ह मिजंपिन्त खनेदुगु खः ।
अथेहे, दैलेख नारायण नगरपालिका ४म्ह मिजंत व ढुंगेघर गाँउपालिकाया १म्ह मिसा नापं दैलेख गुराँस गाँउपालिकाय् २म्ह मिजंतय्त कोरोना भाइरसया संक्रमण जूगु दु ।
थ्व नापं नेपालय् संक्रमित जूपिनि ल्याः ६७५म्ह थ्यंगु दु ।
येँ मनपा २२ वडाया प्युखा त्वालय् मिं नल
लहनान्युज | बछलाथ्व दशमी ११४०,जेष्ठ ४ आइतवाः
थौं जेष्ठ ४ गते येँ महानगरपालिका २२ वडाया प्युखा त्वालय् एन सेल अफिस न्ह्यने राजेन्द्र महर्जनया छेँ न्ह्यःनेया लठ्ठाय् मिं नगु दु ।
उगु लठ्ठाय् करेन्टया तार सट जुया मिं नःगुलि स्पोर्ट्सया सामान व रेडिमेडया सामान क्षति जुग दु । अन मिं नःगु कारण लखं लख मल्याक सामान मिं नया नस्ट जुगु दु ।
उगु थासया वडाया अध्यक्ष चिनिकाजी महर्जन, सदस्य अनिल हाडा, महानगरीय प्रहरी बृतया डिएसपी सुनिल जंग शाह, रणभैरब गण, येँ महानगरपालिकाया दमकलं उगु मिं नियन्त्रन काःगु दु धका येँ महानगरपालिका २४ वडा सदस्य बिनोद तुलाधर लहनान्युजयात जानकारी बियादिगु खः ।
स्वास्थ्य मन्त्रालयय् पत्रकारपिन्त प्रवेश निषेध
लहनान्युज | बछलागा षष्ठी ११४०, बैसाख ३१ बुधवाः
स्वास्थ्य तथा जनसंख्या मन्त्रालयं थौं बुधवाः पत्रकारपिन्त मन्त्रालयय् प्रवेशय् तसक कडा याःगु दु ।
थ्व स्वया न्ह्य न्हि न्हि बुखँ संकलनया लागि म्हसिका पौ क्यःसा गाःगु खःसा थौं पत्रकारपिन्त सुरक्षाकःमिपिन्त गेटय् हे मछ्वः । पत्रकारपिन्त ‘च्वय् न फोन वःसा जक दुहा वने दइ धका धाःगु खः’ ।
आ पत्रकारपि स्वास्थ्य मन्त्रालयय् दुहा वनिगु लागि मन्त्रालयया विज्ञ सल्लाहकार डा. खेम कार्की व प्रवक्ता डा. विकास देवकोटायात स्वापू तयेमाःगु याःगु दु । इमित नाप मलायेक
पत्रकारपि दुहा वने दइ मखु ।
मन्त्रालयय् मेपि मनूत दुहा पिहा वनेगुलि रोके मयासा पत्रकारपिन्त दुहा वनेगुलि रोके याःगु दु ।
मन्त्रालयय् न बिगु जानकारी कथं कोरोना संक्रमण अप्वोया वःगुलि कडा याये माःगु धका धाःगु खः ।
