Display Style:
Column Style
भुल्खु टोल सुधारपाखें यलया उम्मेदवारपिनिगु परिचयात्मक ज्याझ्वः
राजेश बज्राचार्य | ने. सं. ११३८ थिंलाथ्व पुन्ही (डिसेम्वर ३, २०१७) यल
यलय् चुनावी प्रचारप्रसारया तीव्रतानापं दलतयेगु ब्यागलं ब्यागलं जक आमसभा जुयाच्वंगु इलय् क्षेत्र नं २ (ख) या प्रदेशसभा व प्रतिनिधिसभाया उम्मेदवारपिनिगु न्हापांखुसी मंकाःकथं म्हसिका न्ह्यब्वयेगु ज्याः जूगु दु ।
यलया भुल्खु टोल सुधार समितिया ग्वसालय् आइताः वडा नं १६ ज्याकूथि दुगु यलया पुलाँगु धौगः बजाः दुने जूगु थुगु ज्इाझ्वःसं थुगुसीया निर्वाचनय् थीथी राजनैतिक दलपाखें प्रत्यक्ष उम्मेदवारी बियादिपिनिगु उपस्थिति दूगु खः ।
ज्याझ्वःसं क्षेत्र नं २या प्रत्यक्ष प्रतिनिधिसभा सदस्य उम्मेदवारपिं नेपाली काँग्रेसया चन्द्र महर्जन, नयाँ शक्ति पार्टी नेपालया रत्न महर्जन, विवेकशील साझा पार्टीया अमिर राज महर्जनं थःथःपिनिगु पार्टीया नीति व योजनाबारे नुगः खँ तयादीगु खः । अथेहे, क्षेत्र नं. २ (ख)पाखें प्रदेशसभा उम्मेदवारपिं बाम गठबन्धन प्रतिनिधि नेकपा एमालेया ज्ञानेन्द्र शाक्य, संघीय समाजवादी फोरमया नारायण डंगोल, नयाँ शक्ति पार्टीया लक्ष्मी श्रेष्ठ, विवेकशील साझा पार्टीया ज्ञान बहादुर शाक्य, चुरे भावर पार्टीया दुर्गामान ब्यञ्जनकार, एकीकृत राष्ट्रिय पार्टीया श्यामलाल श्रेष्ठपिंसं क्षेत्रया विकासयानितिं थःगु प्रतिवद्धता प्वंकादीगु खः ।
ग्वसाःखलःया नायः चन्द्र कृष्ण श्रेष्ठं देय्या थीथी राजनैतिक ह्यूःपा लिपा थुगुसीया निर्वाचनं आर्थिक सम्बृद्धिया ह्यूपाःपाखे उन्मुख जुइगु भलसा कासें सकल उपस्थित उम्मेदवारपिनित भिन्तुना देछानादिल । वयेकलं थुगु आशायात व्यवहारिक रुप बिइम्ह उम्मेदवारयात म्हसिकेगु व ह्यूपाःया एजेण्डाबारे मतदातायात स्पष्ट यायेगु ज्याझ्वःया तातुना खः धैदिल । ‘७०दँ दुने देयया राजनैतिक परिस्थिति हिल तर स्थानीय बजाःया केन्द्र जुइधूकुगु धौगः बजाःया स्वरुप हिलेमफुगु दसु ल्यंदनि’ वयेकलं धैदिल, ‘वैगु निर्वाचनया उम्मेदवारपिनिसं दलिय हैसियतसिबें जनअपेक्षा अनुरुप आर्थिक सम्बृद्धि जुइगु दीर्घकालीन नीति व व्यवस्था स्थापना यायेत ताःलायेमा, भिन्तुना ।’
ज्याझ्वःया अतिथिकथं ललितपुर उद्योग बाणिज्य संघया नायो कृष्णलाल महर्जनं सकता दलतयेगु साझा एजेण्डा आर्थिक बिकास व सम्बृद्धि जूगु न्ह्यथसें थुकियालागि नीजि क्षेत्र व उद्योग व्यवसायया लकस विकास अनिवार्य जुगुलिइ बः बियादिल । वयेकलं निर्वाचनपाखें हारजितया लिच्वःसिबें आर्थिक विकासया नितिं उम्मेदवारपिं सकलें निरन्तर न्ह्यज्यायेगु अपरिहार्य जुगु धैदिसें ललितपुर उद्योग बाणिज्य संघ सकलेंनापं सहकार्य यायेत तयार जुइ धैदिल ।
ज्याझ्वःसं धपगाः बजार व्यवस्थापन समितिया नायः महेश श्रेष्ठं स्थानीय परिवेशय् धौगः बजाःया इतिहास न्ह्यथसें पुनसंरचना व बिकासया नामय् पुलाँपिं उद्योग व्यवसायीपिनित बिस्थापित मखुसें आर्थिक सम्बृद्धियालागि सहकार्य याना न्ह्यायेगु आवश्यकता दु धयादिल ।
ज्याझ्वःया वक्तापिं दथुइ सकल नेपाःमिपिनिसं आः राजनैतिक ह्यूपाया नामय् अस्थिरता मखु आर्थिक विकासया लः पियाच्वंगु खँय् सहमत जूगु खनेदुगु खः । वक्तापिंमध्ये नेपाली काँग्रेस व बाम गठबन्धनया प्रतिनिधिपिन्सं नीति निर्माणनापं राजनैतिक स्थिरतायालागि स्पष्ट बहुमत माःगुलिइ बः बियादीगु खःसा नयाँ शक्ति लगायत मेगु दलया उम्मेदवारपिन्स देय्या बिकासयानितिं न्हूगु बैकल्पिक शक्तिया माग जुयाच्वंगु धाःसें थःपिन्त त्याकेत इनाप यानादिगु खः ।
अरनिको समाजपाखें चीन स्छुवानय् प्रशिक्षणयानितिं परिचयात्मक ज्याझ्वः
राजेश बज्राचार्य | ने. सं. ११३८ कछलागा अमाई (नोभेम्वर १८, २०१७) येँ
चीनया चीन स्छुवानय् १०न्हूया लागि प्रशिक्षणय् वनिपिनिगुलागि शनिवाः अरनिको समाजपाखें छगु परिचयात्मक ज्याझ्वः न्ह्याकूगु दु ।
‘थुगुसीइ १०न्हूयंक जूइगु प्रशिक्षण ज्याझ्वः कृषि व मेडिसिन सम्बन्धित जुइ । थुगु शैक्षिक प्रशिक्षणया विषय सम्बन्धित जुया चीनया संस्कृति, रहनसहन व भ्रमणबारे सहभागीपिं दथुया परिचयात्मक ज्याझ्वः जूगु खः ।’ समाजया न्हापाम्हं न्वकू डा. मनोज मान श्रेष्ठजुं जानकारी बियादिल ।
परिचयात्मक ज्याझ्वःसं सहभागीपिनिगु परिचयनापं समाजया नायो डा. सर्वोत्तम श्रेष्ठजुं १०न्हूयंक जुइगु प्रशिक्षणया अवसर, प्रक्रिया व औचित्यबारे ध्वाथुइकादीगु खः । समाजया न्वकू डा. उर्मिला शाक्यजुं सञ्चालन यानादीगु थुगु ज्याझ्वःसं थीथी थासयच्वपिं मेडिकल क्षेत्रलिसें सम्बन्धित ३५म्ह व कृषि क्षेत्रलिसे सम्बन्धित २४म्हेसिनं ब्वति काःगु खः । ज्याझ्वःसं सहभागीपिनिगु थीथी न्ह्यसःया लिसः बिइगुनापं थःपिं दथुइ मित्रता क्वाःतुकेगु माहौल दयेकेगु ज्या नं जूगु खः ।
सन् १९८१निसें सक्रिय अरनिको समाज वि.सं. २०४८ सालय् दर्ता जूगु सामाजिक संस्था खः । चीन व नेपाःया मैत्रीपूर्ण सम्बन्ध क्वातुकेगु तातुनां चीनया भाषा, सँस्कृति नेपालय् परिचित याकेगुनिसें शिक्षा, विज्ञान, प्रविधि व आवश्यक प्राविधिक ज्ञान कालबिल यायेगु ग्यसुलाःगु ताँ कथं समाजं ज्या यानावैच्वंगु दु । समाजं इलय्ब्यलय् चीनया थीथी थासय् अध्ययन, प्र्रशिक्षण व अवलोकन भ्रमणया ग्वसाः ग्वयेगु यानावैच्वंगु दु ।
नेवाः समुदाय राजनैतिक अभ्यासय् न्ह्यज्यायेमाल
राजेश बज्राचार्य | ने. सं.११३८ कछलागा अमाई (नोभेम्वर १८, २०१७) यल
नेवाः जाति अपेक्षित कथं राजनीतिपाखे सक्रिय जुइमफूगु हुनिं ल्यूनेलाःगु वाःचायेका राजनैतिक अभ्यासय् जातिय समाज नं न्ह्यज्यायेमाःगु खँय् यलया ताम्रकार समाजया १६क्वगु दँ मुँज्या व २२क्वःगु मंकाः मुँज्याया वक्तापिन्स बः बियादीगु दु ।
भिं जंकु सिधपिं १३म्ह जेष्ठ नागरिकपिनिगु सम्मान नापं थुगुसी एस.ई.ई.तह निसें स्नातकोत्तरतह उतीर्ण ८०म्ह ब्वनामिपिंत सम्मानयासें सम्पन्न जूगु यलया ताम्रकार समाजया ज्याझ्वःसं झायादीपिं वक्तापिन्स थथे धयादीगु खः ।
ज्याझ्वःया मू पाहाँ रक्षा मन्त्री भिमसेनदास प्रधान इलय् मझासेंलि विशेष पाहाँ नेवाः देय् दबूया नायः नरेश ताम्रकारजुं ज्याझ्वःया उलेज्या यासें धयादिल, ‘वइगु चुनाव जक मखु लिपाथ्यंक नेवाः समुदाय स्थानीय व राष्ट्रिय राजनीतिइ सक्रिय जुयेमाल । राजनीति ख्यलय् प्रत्यक्ष न्ह्यज्यायेमफुसां देयया राजनैतिक अवस्थाप्रति सुसूचित जुयाच्वनेगु सचेत यायेगु ज्यापाखे सक्रिय जुइमा ।’ निर्वाचनया माहौल दुने सकलें नेवाः छथासं च्वना थःगु मुद्दाय् सः तयेगुया विकल्प मदुगु धासें वयेकलं नेवाः मुद्दा न्ह्यब्वयेमफैगु अवस्थां झीगु संस्कृति अझं तनावनिगुनापं विस्थापित जुइफुगुप्रति सचेत यानादिल ।
ज्याझ्वःया सभापति यानादीम्ह समाजया नायो रविन्द्रराज ताम्रकारं स्थानीय तहया विकास निर्माण, नीति व बजेट दयेकेगु ज्याय् स्थानीय जातिय समाजपिं थःहे न्ह्यज्यायेमागुलिइ बः बियादिल । स्थानीय नेवाःतयेगु पुर्खापाखें निर्मित विश्व सम्पदापाखें स्थानीय हे लाभान्वित मजूगु खँ न्ह्यथंसें नेवाः दुनेया जातिय समाज थुगु ज्याय् एकीकृत जुया न्ह्यायेमागुलिइ बः बियादिल । नेपाःया मौलिक राष्ट्रिय सम्वत, नेपाल सम्वतलयात सरकारी ज्याखँय् छ्यलेगुनापं संस्कृति प्रवद्र्धनय् सकलें न्ह्यज्यायेत सः तयादिल ।
नेपाल भाषा मंकाः खलःया नायः ऋषिप्रसाद श्रेष्ठ, न्हू दं समारोह समिति ११३८ या कजि सुवर्णमान अमात्य, वाराही समाजया नायः पुष्परत्न वाराही, समाजया न्वकू विनोद ताम्रकार लगायत थीथी समाजया प्रतिनिधिपिन्स भिन्तुनानापं थःथगु नुगः खँ तयादीगु खः ।
ज्याझ्वःसं थीथी सिरपाया दातापिन्त सम्मान यायेगु नापं अन्तराष्ट्रिय ब्याडमिन्टन खेलाडी साजनकृष्ण ताम्रकारयात झिद्व तकाः नगद राशी सहितया उग्रचण्डी प्रतिभा सम्मान नं लःल्हाःगु खःसा समाजया स्मारिका व विशेषांक नं बितरण जूगु खः ।
शनिवाः हे जूगु बन्दसत्रय् महासचिव शम्भुगोविन्द ताम्रकारं दच्छिया कार्यप्रगति प्रतिवेदन व दाँभरी दिपेश ताम्रकारं न्ह्यब्वयादीगु संस्थाया आयव्यय विवरण नं पारित जूगु आयोजकं जानकारी बियादीगु दु ।
किपा स्वयादिसँ ः
ज्वेल्स सहकारीया ८क्वःगु दँ मुज्याय् जेष्ठ नागरिक सम्मानित
राजेश बज्राचार्य | ने. सं. ११३८ कछलागा अमाई (नोभेम्वर १८, २०१७) यल
ज्वेल्स बचत तथा श्रृmण सहकारी संस्थाया ८क्वःगु दँ मुँज्यापाखें संस्थाया ६म्ह जेष्ठ नागरिक दुजःपिं सम्मानित जूगु दु ।
शनिवाः जूगु दँ मुँज्या उलेज्या यानादीसें यल महानगरपालिकाया प्रमुख चिरीबाबु महर्जनजुं वयेकपिन्त दोसल्ला न्ययेका सम्मानित यानादीगु खः।
ज्याझ्वःसं सहकारीया नायो किरणभाई बज्राचार्यजुं दच्छिया प्रगति न्ह्यब्वसें थुगुसीइ शेयर पुँजीया बृद्धि नापं दुजःया संख्या उप्वयेकेगु लक्ष्य प्रमुख जूगु धयादील । वयेकलं सहकारी ऐन २०७४ सहकारीकःमिपिनित उपलब्धी जूगु खःसातविं थुकीइ अझ नं स्थानीय सहकारीयात जनमैत्री व व्यवहारिक जुइकेत नीतिनियमय् परिमार्जन आवश्यक जूगु धयादील ।
‘ऐनय् झीसँ अव्यवहारिक धयागु दफा त अझ नं कायम हे जुवनाच्वंगु खनेदु,’ वयेकलं धयादील, ‘थुकीं देयया अर्थतन्त्रया ३गूगु खम्बाया अंग सहकारीयात स्वयेगु दृष्टिकोण नकारात्मक खनेदु । सहकारी क्षेत्रयात संकुचित व सिमित घेराय् तयेगु कुतः जूगु खनेदु ।’ ऐनय् उल्लेख जुकथं जनप्रतिनिधि वयेधुंकाया अवस्थाय् सहकारी क्षेत्र स्वइगु सर्वोच्च निकाय महानगरपालिका जुइगु व्यवस्था अनुरुप अर्थतन्त्र विकासय् सहकारी संस्थाया सम्भावना व पिडायात थुइका ज्या जुइगु अपेक्षा यानादील ।
ज्याझ्वःया मू पाहाँ ललितपुर महानगरपालिकाया प्रमुख चिरीबाबु महर्जनजुं ज्वेल्स सहकारीयात ललितपुर जिल्लादुनेया उत्कृष्ट सहकारी जुइमा धैगु भिन्तुना बियादील । सहकारी अवधारणाया विकासप्रति ज्याः यायेगु प्रतिवद्धता प्वंकादीसें वयेकलं धयादिल, ‘सहकारी ऐनया विस्तृत अध्ययन याना याकनं हे महानगरस्तरिय सहकारी संस्थापिनिगु भेलापाखें आवश्यक सुझावसहित ऐन परिमार्जन यायेत जिं पलाः न्ह्याकेगु जुइ ।’
संस्थाया दुजःपिं - नेपाल सरकारया उच्च अदालतया न्यायाधिस पदय् नियुक्त जुयादिम्ह अधिवक्ता राज्यलक्ष्मी बज्राचार्य, नेपाल सुनचाँदी व्यवसायी महासंघय् निर्वाचित जुयादिपिं ज्ञानुराज शाक्य, सुविन शाक्य, किरणभाई बज्राचार्य व ललितपुर उद्योग बाणिज्य संघया उपाध्यक्षय् निर्वाचित रुप कुमार शाक्य नं दँ मुँज्यासं सम्मानित याःगु खः । ज्याझ्वःसं जिल्ला सहकारी संस्थाया उच्च पदाधिकारी, पूर्वमन्त्री बुद्धिराज बज्राचार्य लगायतया विशिष्ट व्यक्ति, थीथी सहकारी संस्थाया प्रतिनिधिपिनिगु उपस्थितिइ दुगु खः।
‘राजसंस्थासहितया प्रत्यक्ष निर्वाचित प्रधानमन्त्री’ उम्मेदवार तिमिल्सिना
लहनान्यूज | ने.सं. ११३८, थिंलाथ्व द्वितीया (नोभेम्वर २०, २०१७) यल
दक्षिण ललितपुरस्थित गोटीखेलया श्यामप्रसाद तिमिल्सिना थुगुसी ललितपुर क्षेत्र नं ३पाखें प्रतिनिधिसभाया उम्मेदवारी ज्वना चुनावी मैदानय् दँ वःगु दु ।
‘संविधान संशोधन याना धर्म सापेक्ष राजासहितया प्रजातन्त्र व प्रत्यक्ष निर्वाचित प्रधानमन्त्रीया व्यवस्था यायेत देय्न्यंक जिमिगु उम्मेदवारी बियागु खः ।’ चुनावी प्रचारय् झायादिम्ह तिमिल्सिनां धयादिल ।
प्रतिनिधिसभाया उम्मेदवार वयेक ललितपुरया क्षेत्र नं ३ ‘क’ र ‘ख’ उम्मेदवार विक्रम बस्नेत र दिपा विष्टसहित थौकन्हे घरदैलो अभियानय् सक्रिय जुयाच्वंंगु दु ।
२०५९ सालपाखे तत्कालीन जिल्ला विकास समिति ललितपुरया उपसभापति जुयादिम्ह तिमिल्सिना थुग क्षेत्रय् केशरबहादुर विष्टलिपा राजवादी नेताकथं परिचित जुयादी । २०६४ सालया न्हापाँगु संविधानसभाया निर्वाचनय् तिमिल्सिना पशुपतिशम्शेरया राप्रपापाखें ललितपुर क्षेत्र नं १ या उम्मेदवारी बियादीगु खः । राप्रपा नेपालय् प्रवेश जुयादीम्ह वयेक डा प्रकाशचन्द्र लोहनीनापं पार्टी त्वताः थौकन्हे एकिकृत राष्ट्रिय प्रजातन्त्र पार्टी (राष्ट्रवादी) पाखें थुगुसी चुनावी मैदानय् सक्रिय जुयादीगु दु ।
‘थौकन्हे संविधानपाखें प्रवाह जुयाच्वंगु विचाः सिबें पृथक व धिसिलाःगु जनमत दुगु एजेण्डाय् जिगु उम्मेदवारी केन्द्रित दु ।’ उम्मेदवार तिमिल्सिनां धयादिल, ‘जिमिगु मुख्य प्रतिबद्धता बौद्ध, मुसलमान, किँरात लगायत सकतां धर्मया सम्मान यायेगु , नेपाःया पहिचान सनातन हिन्दु राष्ट्र कायम यायेगु, राष्ट्रप्रमुख राजा व प्रत्यक्ष निर्वाचित प्रधानमन्त्रीया व्यवस्थापाखें आः ब्याप्त भ्रष्टाचार न्हंकेगु जिमिगु लक्ष्य खः।’
उम्मेदवार तिमिल्सिनां जनताया चाहनासिबें लहडया भरय् नेपाःयात धर्र्मिनरपेक्ष देयेकेगु ज्याः जूगु धासें देय् हिन्दू राष्ट्र कायम जुःसा हलिन्यंकं नेपाःया पहिचान स्थापित जुइगु व मुलुकय् धार्मिक पर्यटन विकासपाखें आर्थिक सम्बृद्धि सम्भव जुइगु विश्वास व्यक्त यानादिल ।
चुनाव प्रचारया झ्वःलय् मतदातापिनत वयेकलं गणतन्त्रया नामय् देय्न्यंक भ्रष्टाचार हावी जूगु धयादिगु दु । वयेकलं राजा व प्रत्यक्ष निर्वाचित प्रधानमन्त्रीया व्यवस्थां जक राष्ट्रवाद धिसिलाइगु खँय् बः बियादिल । हिमाल, पहाड व तराई मधेशया सकलें नेपाःमिंया स्वाभिमान व आत्मसम्मानया रक्षा नापं भ्रष्टाचार मुक्त समाज दयेकेत पार्टीेया देय्न्यंक उम्मेदवारी दूगु नं वयेकलं जानकारी बियादिल ।
‘दच्छितक नं टिकेमजूइगु सरकार परिवर्तनया चलनपाखें मुलुकय् अस्थिरता जुयाच्वंगुलिं संविधान संशोधनपाखें निर्वाचित कार्यकारी प्रधानमन्त्री व राष्ट्रप्रमुखय् राजसंस्था स्थापित यायेत जनतां थःगु पार्टीयात संसदय् प्रतिनिधित्व याकेत ल्यइ ।’ वयेकलं धयादिल ।
ललितपुर क्षेत्र नं ३या निर्वाचन क्षेत्रय् काँठ क्षेत्रया साविकया हरिसिद्धि, ठैब, बाडेगाउँ, सुनागुठी, ठेचो, बुंङ्गमती, खोकना व ललितपुर महानगरपालिका १, २, ३, ४, ५, १०, १३, १४, १५, २० वडा सम्मिलित जू ।
