Display Style:
Column Style
नेवाः पत्रकारपिनिगु दोलखा कचाःया पुनर्गठन
लहनान्यूज | ने.सं. ११३८, पोहेलागा पञ्चमी (डिसेम्वर २३, २०१७)
२५गू जिल्लाय् बिस्तार जूगु नेवाः पत्रकार राष्टिय दबूया दोलखा कचाःया पुनर्गठन जूगु दु ।
पुनर्गठनलिपा दोलखा कचाः समय सान्दर्भिक मासिकया प्रधान सम्पादक त्रिलोचन प्रधानया नायःसूइ गुम्हसिया न्हूगु ज्यासना पुचः निस्वंगु दु । ज्यासना पुचलया न्वकू अजय प्रधान, छ्याञ्जे कृष्ण नारायण श्रेष्ठ, दाँभरी रीना चाकुबजि जुयादीगु दुसा दुजलय् कुलावति श्रेष्ठ, अनुप श्रेष्ठ, भजन जोशी, शान्ता श्रेष्ठ व अनिलचन्द्र श्रेष्ठ च्वनादीगु दु ।
न्हापाँगु मिडिया फेष्टिभल ११३८ तयारी नापं डायरी प्रकाशनबारे सहलह ब्याकेत केन्द्रिय न्वकू नृपेन्द्रलाल श्रेष्ठ व केन्द्रिय दुजः बिगेन तुलाधरया उपस्थितिइ च्वंगु बैठकसं दुग्यंक सहलहलिपा कचाःया पुनर्गठन जूगु खः ।
नेवाः पत्रकार राष्टिय दबूया ग्वसालय् समावेशी सञ्चारयानितिं न्हापांगु मिडिया फेष्टिभल ११३८ थ्वहे वइगु पोहेलागा पञ्चमी (२०७४ पुष २२ गते) यल लायकूया भण्डाःकेबःय् जुइत्यगु दु ।
नेपाः श्रीलंका दथुया दौत्य सम्बन्ध ६०दँ क्यन
राजेश बज्राचार्य | ने. सं. ११३८ पोहेलाथ्व पारु (डिसेम्वर २०, २०१७) यल
नेपाः व श्रीलंकाया औपचारिक मैत्रीय सम्बन्ध सहकार्य ६०दँ क्यंगु लसताय् मंगलवाः होटल हिमालय छगू ऐतिहासिक ज्याझ्वः जूगु दु ।
समारोहया वक्तापिन्सं निगू देय दथुया धार्मिक, सांस्कृतिक सम्बन्धया आधारय् आर्थिक विकासयालागि ज्याझ्वःत नं दयेकेफूगुलिइ बः बियादीगु दु ।
नेपाःया लागि श्रीलंकाया राजदूत डब्लु एस परेरां न्हापां नेपाःपाखें तब्यानावंगु बुद्ध धर्मपाखें श्रीलकाया सभ्यता, संस्कृति व जीवनशैली निर्माण यायेत तधंगु भूमिका म्हितुगु स्मरणयासें बौद्ध धर्मं प्रेरित जुवंगु सम्बन्ध आः आर्थिक विकासया नितिं पर्यटकीय प्रवद्र्धन, गरिबी निवारणपाखे नं सहकार्य याना वनेमाःगुलिइ बः बियादिल । वयेकलं निगू देय् दथुया जनताया आकांक्षा तकं समान जूुुगु हुनिं लुम्बिनी विश्व शान्तिया केन्द्र स्थापित याना पर्यटकीय विकासया नितिं सहकार्यया सम्भावना दूगुपाखे ध्यानाकर्षण यानादिल ।
‘नेपाः व श्रीलंका दथुइ सम्बन्धया मू आधार धैगु बुद्धधर्म हे खः । श्रीलंकाया जनता नेपाःयात छगू बिस्कंया महत्व दूगु दय्कथं नालाकाई । थःगु जीवनय् छक्वः जक जुसां भगवान बुद्धया जन्म जूगु थाय् नेपालय् थ्यंके खनेवं श्रीलंकालीतयेसं गर्व तायेकीइ।’ राजदूत परेरां धैदिल । वयेकलं श्रीलंका सरकारपाखें न्हापांनिसें लुम्बिनीया विकास, संरक्षण व सम्बर्धनय अग्रसर जुइगुनिसें लुम्बिनीइ श्रीलंकाली विहार व धर्मशाला दयेकेखना तसंक लसताया विषय जूगु स्मरण यानादिल ।
समारोहसं परराष्ट सचिव शंकर बैरागीें श्रीलंकालिसेया औपचारिक सरकारी सम्बन्ध ६० दँ पुलाँगु खःसातवि जनस्तरदथुया सम्बन्ध अझ पुलाँगु धैदिसें सहकार्यपाखें समृद्धिया लँपुइ न्ह्यज्यायेत तत्पर दूगु खँ न्ह्यथनादिल । अथेहे, ललितपुर महानगरपालिकाया प्रमुख चिरिबाबु महर्जनं तःभूखाचंं क्षतविक्षत जूगु सम्पदामध्ये बुंगमति लगायतया बौद्ध महत्वया देगः निर्माणय् श्रीलंकाया ग्वाहालियात च्वछानादिल । राजा महेन्द्रपाखें सन् १९५७सं दौत्य सम्बन्ध कायम याःगु खःसां तवि बुद्ध धर्म संस्कृति धैगु मैत्री सम्बन्धया धिसिलाःगु आधार जूगु चर्चा बौद्ध विहार संघ यलया नायः पुष्परत्न शाक्यं यानादिल ।
समारोहसं नेपाल भिक्षु महासंघया नायः भिक्षु मैत्रीं श्रीलंकाली जनता भगवान बुद्ध थःगु जीवनकालय् ३क्वःतक श्रीलंकाय् भ्रमण याःगु खँय् विश्वास याइगु कनेदयेवं हे सुखद अनुभूति याइगु खँ न्ह्यथनादिल । वयेकलं श्रीलंकापाखें नेपाःया थेरवाद बुद्धधर्मयात पुनर्जागरण चरणय् हयेत भूमिका म्हितेखंगुलिइ नं आनन्दित जुइगु न्ह्यथनादिल । ‘नेपाःयात श्रीलंकाली जनतां थपिनिगु देय्पाखें २५सः दँ तक सुरक्षित यानातःगु भगवान बुद्धया अस्तिधातु उपहार बिया नेपाःप्रति मेगु तधंगु गुण याःगु दु ।’ वयेकलं धयादिल ।
सम्राट अशोकं काय् महिन्द्र व म्ह्याय् संघमित्रायात श्रीलंका छ्वया बुद्ध धर्म प्रचार प्रसार याकूगु खःसा थौकन्हेतकं बुद्धधर्म श्रीलंकाय् विकसित जुयाच्वंगु दु । सन् १९४०या दशकय् नेपाःया बौद्ध भिक्षुपिनित धर्म प्रचारया द्वपं बिया देशनिकाला यायेधुंका श्रीलंकाया भिक्षुपिनिगु नेतृत्वया प्रतिनिधिमण्डलपाखें तत्कालिन नेपाः सरकारयात नापलाना थुपिं भिक्षुपिन्त नेपाः लिहाँवयेगु वातावरण दयेका ब्यूगु इतिहास दु ।
लुम्बिनी बौद्ध विश्वविद्यालयया उपकुलपति प्रा डा नरेशमान वज्राचार्यं श्रीलंकाय् यक्वः न्हापांनिसें बुद्धधर्मया प्राज्ञिक अध्ययन अध्यापन यायेगु परम्परा दुगुलिं नेपाः लगायतया देयया द्वलंद्व श्रामणेरपिं बुद्धधर्म व दर्शनया अध्ययन यायेत थन वनीगु धयादिल । लुम्बिनी बौद्ध विश्वविद्यालय न्ह्याकूगु थीथी शैक्षिक कार्यक्रमबारे धैदिसें वयेकलं विचाः मिलेजूपिंनापं नेपाःया बौद्ध विश्वविद्यालयस्तरय् विशेष सम्बन्ध दयेका ब्वनामिंपिनिगु आदान प्रदान लगायतया सहकार्यया सम्भावनापाखे ध्यानाकर्षण याकादिल ।
नेपालय्च्वंगु श्रीलंकाया राजदूतावासपाखें बौद्ध विहार संघ यललिसे सहकार्य याना मंगलबाः थुगु समारोहया ग्वःसा ग्वःगु खः । नेपाःया सम्माननीय उपराष्ट्रपति नन्द बहादुर पुनया मू पाहाँसूइ जूगु थुगु समारोहसं नेपाःया चर्यानृत्य व श्रीलंकाली कलाकारपिंपाखें हुलाप्याखं नं न्ह्यब्वःगु खः ।
नेपाःया न्हापाँगु मिडिया फेष्टिभल जुइगु
लहनान्यूज | ने। सं। ११३८ थिंलागा द्वादसि (डिसेम्वर १४, २०१७) येँ
नेपाःया न्हापाँगु मिडिया फेष्टिभल थ्वहे वइगु पोहेंलागा पञ्चमी (पुष २२ गते) शनिवाः नेवाः पत्रकार राष्ट्रिय दबूया ग्वसालय् जुइगु जूगु दु ।
बिहिवाः नेपाल पर्यटन बोर्डया सभाकक्षय् दबूया नायः श्रीकृष्ण महर्जनया सभानायःसूइ जूगु तयारी भेलापाखें समावेशी संचारया नारा ज्वनाः यलया लायकुया (मंगलबजारय्) भण्डाः क्यबय् फेष्टिभल जुइगु जानकारी ब्यूगु दु ।
नेवाः पत्रकार राष्ट्रिय दबूया केन्द्रीय सल्लाहकारपिं राष्ट्रिय समाचार समितिया प्रधान सम्पादक राजु शाक्य व बरिष्ठ सिने पत्रकार विजयरत्न असंबरेपिनिगु उपस्थितिइ जूगु भेलापाखें दबूया केन्द्रीय मूछ्याञ्जे सुनिल महर्जनं मिडिया महोत्सवय् समावेशी पत्रकारिताया बारे चर्चा जुइगु न्ह्यथनादिल ।
“संचारमाध्यम व पत्रकारिता सम्बन्धि थीथी पक्षयात कःघाना अन्तक्र्रिया याकेगु ज्याझ्वःपाखें थुगु ख्यःयात तब्याकेगु नितिं फेष्टिभलया ग्वःसा ग्वयाःगु खः ।” फेष्टिभल ग्वसाः खलःया मू कजि सुरेन्द्रभक्त श्रेष्ठं धयादिल । फेष्टिभलपाखें संचारगृह व पत्रकारिताया थीथी आयामयात स्वयेगु, थुइकेगु व अध्ययन याये फैगु वयेकया धापू खः ।
थुगु फेष्टिभलपाखें नेपाःया समावेशी पत्रकारिता ख्यलय् शताब्दी पुरुष संस्कृतिविद् डा. सत्यमोहन जोशीया योगदानयात नं अभिनन्दित याइगु जूगु दु । तयारी भेलाया क्वछिनाकथं फेष्टिभल समारोह समितिया सचिवालय दयेका जिम्मेवारी बाँडफाँड याःगु दु ।
सुथसिया ११ बजेनिसें ५ ताःई तक जुइगु फेष्टिभलया थाय् व्यवस्थापन, सचिवालय व जिम्मेवारीया प्रस्तुतियासें मेलाय् थी थी संचार गृहया प्रदर्शनी स्टल, प्रकाशन गृहया पत्रपत्रिका, सांस्कृतिक प्रस्तुती नापं तुच्चा व्यवस्था जुइगु ल्यू कजि राजेश बज्राचार्यं धयादिल । मेलायात पाठकवर्गया दृष्टिकोणं आकर्षक व विशेष याकेत पत्रकारिता सम्बन्धिया अध्ययन÷अध्यापन सामग्रीनिसें संचारगृहलिसे आवद्ध संचारकःमीपिं व बौद्धिक चिन्तकपिंनापं अन्तक्र्रिया वं साँस्कृतिक ज्याझ्वःया तयारी जुइधुंकुगु वयेकलं धयादिल ।
फेष्टिभल तयारीया झ्वःलय् ईमेज च्यानलया सञ्चारकःमी विराजकाजी राजोपाध्यायात संचार स्टल व्यवस्थापन, केके मानन्धरयात प्रचारप्रसार, बुलेटिनयानितिं श्रीकृष्ण महर्जन, डायरी प्रकाशन लहना वाःपौ प्रकाशक नृपेन्द्रलाल श्रेष्ठ, सांस्कृतिक पक्ष सुरजवीर बज्राचार्य व डबली अन्तरसम्वादयानितिं समाचारपत्रया सुनील महर्जनं थःथगु प्रस्तुति यानादीगु खः ।
नेपालय् न्हापाँखुसी जुइत्यंगु थुगु मेलापाखें नेपाली संचार क्षेत्र अध्ययन याइपिन्त महत्वपूर्ण सावित जुइगु ग्वसाःखलःया दावी दु । प्रथम मातृभाषा पत्रकार धर्मा्दित्य धर्माचार्य व पत्रकारपिनिगु संस्थागत विकासया न्ह्यलुवाः सत्यनारायण बहादुृर श्रेष्ठया योगदान स्मरण याकेगु नापं नेपालभाषालगायत थी थी मातृभाषाया ऐतिहासिक पत्रपत्रिका प्रदर्शन जुइगु धाःगु दु । थीथी सन्चारमाध्यमपिनिगु स्टलपाखें पाठक अन्तरक्रिया नापं संघीय शासन व्यबस्थाय् समावेशी सन्चारमाध्यम विषयक डबली संवाद दथुइ पत्रकार कलाकारपिनिगु प्रस्तुति नं जुइगु ग्वसाः खलं धाःगु दु ।
नेवाः संचारकःमीपिनिगु पेशागत हकहित, श्रमजीवी पत्रकार ऐन कार्यान्वयन निसें समावेशी संचार क्षेत्रया सवालय् सः तयाच्वंंगु संस्था नेवाः पत्रकार राष्ट्रिय दबूपाखें २५गू जिल्लाय् शाखा बिस्तार यायेधुंकूगु दु । राजधानी व जिल्लाया सक्रिय संचारकःमींपिनिगु ब्वति दैगु थुगु ज्याझ्वःसं आम नागरिकसमेतया सहभागिता उप्वेयेकेगु विषयसं न छलफल याःगु खः ।
'किपाः के.के.मानन्धर
चिनियाँ सिछ्वान टोलीपाखें स्वास्थ्य शिविर
राजेश बज्राचार्य | ने. सं. ११३८ थिंलागा नवमि (डिसेम्वर ११, २०१७) येँ
सिछ्वान प्रान्तपाखें थ्यंगु २०म्हेसिया मेडिकल टोलीया प्रतिनिधि डा. चेन चे नापं नेपाःया १४ डाक्टर, नर्स व स्वास्थ्य स्वयंसेवीया टोलीपाखें यल व काभ्रे जिल्लाया थीथी गाँमय् सोमवाःनिसें ६न्हूयंक निशुल्क स्वास्थ्य शिविर जुइगु जूगु दु ।
अरनिको समाजं आइतवाः छगु समारोह यासें थुगु टोलीयात लसकुस नापं शिविर ज्याझ्वःया जानकारी ब्यूगु खः । समाजया ग्वसालय् धुलिखेलया बडालगाँमय् मंसीर २५ व २६ गते, यलया बाडेगाँ लाछीइ २७ गते, लूभुइ २८ गते, प्यूटार गाँमय् २९ गते व पुष १ गते खोकनाय् थुगु शिविर जुइगु जूगु दु ।
ज्याझ्वःसं सिछ्वान प्रान्तिय सरकारया अन्तर्राष्ट्रिय शाखा उप प्रमुख ह ग्वान शियानं नेपाःलिसेया मैत्रीय सम्बन्धयात स्वास्थ्य सेवापाखें निरन्तरता बिइखंगुलिइ हर्षित जुयादिल । ं
मू पाहाँकथं झायादिम्ह धुलिखेल नगरपालिकाया प्रमुख अशोक ब्याँजुं अरनिको समाजमार्फत तःभूखाय्बलय् दकले न्हापां थुगु प्रान्तपाखे स्वास्थ्य सहयोग प्राप्त जूगु लुमंकादिल । ‘वहे अनुभवी स्वास्थ्यकर्मी टोली हाकनं वया स्वास्थ्य सेवाया निरन्तरता जुइगु तसकं लसताया विषय खः’ वयेकलं धयादिल, ‘थुजोगु ज्याझ्वःया निरन्तरताया लागि सिछ्वान प्रान्तया छगु नगर वा अस्पताललिसे धुलिखेल नगरपालिकाया भगिनी सम्बन्ध स्थापना यायेत नगरपालिका तयार दु ।’
ज्याझ्वःसं चिनियाँ राजदूतावासया प्रतिनिधिकथं झायादिम्ह आर्थिक कन्सुलर याँङ्ग सि छुं नेपाली समाजया स्वास्थ्य क्षेत्रय् नं चिनियाँ ग्वाहाली निरन्तरता बिइखंगु खँय् लसता प्वंकादिसें धयादिल, ‘चीनया न्हापांगु स्वास्थ्य शिविरय् जूगु म्हो उपस्थितिया तुलनाय् लिपाँगु इलय् तिब्बतया सिझांगया टोलीसहित मुस्तांगय् जूगु १०न्हूया शिविरय् दैनिक च्याःसम्ह लाभान्वित जूगु खबर वःगु दु । थ्वः सेवाभाव व विश्वासया न्ह्योने भाषा समस्या मजूगुया दसू खः ।’ वयेकलं नेपाःया प्रतिनिधिसभा व प्रदेशसभाया चुनावलिपा देय् सम्बृद्धि व विकासया लँपुइ न्ह्यज्यायेगु नापं मैत्रीय सम्बन्ध थुजोगु सेवामूलक ज्याझ्वःपाखें अझ प्रगाढ जुइमा धैगु कामना यानादिल ।
समाजपाखें डा. शुशील प्रजापति व डा. उर्मिला शाक्यजुं लसकुस यानादिगु थुगु ज्याझ्वःसं सिछ्वान अस्पतालया लि जुँ ह्वा, नेपाल सरकार जिल्ला जनस्वास्थ्य शाखा अधिकृत झलक शर्मा पौडेल लगायतया उपस्थिति दुगु खः ।
२०७२ सालया तःभूखाय् अवस्थाय् नेपालय् वःगु थीथी सहयोग मध्ये अरनिको समाजया पहलं दकले न्हापां सिछ्वान व छोन्चिङ्ग प्रान्तपाखें स्वास्थ्य टोली थ्यंकवःगु खः । सन् १९८१निसें सक्रिय अरनिको समाजं चीनया भाषा, सँस्कृति नेपालय् परिचित याकेगुनिसें शिक्षा, विज्ञान, प्रविधि व आवश्यक प्राविधिक ज्ञान कालबिल यायेगु ग्यसुलाःगु ताँ कथं ज्या यानावैच्वंगु दु । समाजं इलय्ब्यलय् चीनया थीथी थासय् अध्ययन, प्र्र्शिक्षण व अवलोकन भ्रमणया ग्वसाः ग्वयेगु यानावैच्वंगु दु ।
कुपण्डोलय् अलग क्षमताया चित्रकला प्रदर्शनी
राजेश बज्राचार्य | ने. सं. ११३८ थिंलागा पारु (डिसेम्वर ५, २०१७) यल
दयँदसं डिसेम्वर ३ तारिखया दिनसं हनिगु विश्व अपांग दिवसया लसताय् ३न्हूयंक छगु चित्रकला ब्वज्या नं जूगु दु ।
अन्तर्राष्ट्रिय रेडक्रसया आंशिक ग्वाहालिइ राष्ट्रिय शारिरीक अपांगता संघया ग्वसालय् श्रृजनशील हातहरु शीर्षकय् थुगु चित्रकला ब्वज्याः जूगु खः । संघयालागि कलाकार संजय बान्तवाया कजिसूइ जूगु चित्रकलास ब्वज्याय् २५दँ निसें ४५दँ या थी थी शारिरीक अपांगता बावजूद कला क्षेत्रय् न्ह्यज्यानाच्वंपि ७म्ह कलाकारपिनिगु ४०गू चित्रकला प्रदर्शनी जूगु खः ।
ज्याझ्वःपाखें सबिता सेन (चेत कुमारी), केश बहादुर गुरुंग, लक्ष्मी भासिम नापं कलाया स्वपलाःया संस्थापक कलाकारपिं सुन्दर श्रेष्ठ, मनिष महर्जन, रमेश बाराही लगायत ४५दँया कुमार तामांगया व्यवसायिक चित्रकला प्रवद्र्धनय् ग्वाहाली जुइगु ग्वसाःखलःया धापू दु ।
कलाया स्वपलाःपाखें कलाकार मनिष, सुन्दर व रमेशया सामूहिक धापूकथं अपांगता समस्यापाखे मिखा ब्वयेगु सिबें कलाकारिताया मूल्यांकन यायेफःसा समाजय् ह्यूपा वइ । अथेहे, भक्तपुर ईंग्लिस स्कूल व माउन्ट स्नाइ स्कूलया चित्रकला प्रशिक्षक लक्ष्मी भाषिम कलाया निरन्तरता रोजगारीपाखें दैगुलिइ बिश्वस्त जुयादी । मेम्ह कलाकार केश बहादुर गुरुंग २०७२ सालया तःभूखाया इलय् ओक्सफामया स्वंयसेवक कथं गोरखाय् ग्वाहाली यानाच्वंबलये थः स्वयं घाइते जुया ब्हीलचेयरया सहायता कायेमाःगु जुवंगु खः । मेपिनिगु सहायतां जक म्वायेगु सिबें वयेकलं चित्रकला सयेका थुगु पेशापाखें हे स्वावलम्वी जुया म्वायेगु मनतुनांच्वनादीगु दु ।
२६दँ न्ह्यःनिसें देय्दँसं विश्व अपांग दिवस हनेगु ज्यापाखें अपांगताप्रति सामाजिक व्यवस्था हलिन्यंक सुधार जुयाच्वंगु दु । नीतिगत व्यवस्था अनुसार सामाजिक व्यवहार विशेषतः नेपालय् अझ नं विभेदपूर्ण जूगुलिं अपांगता समस्या बावजूदया थुमिके दुगु विशेष क्षमताया पहिचान जुइमफूगु थुगु क्षेत्रया अभियन्तापिनिगु धापू दु । थुजोगु मू हुनिंयात न्हंकेत थुगुसीइ सकसियानितिं दीगो व समतामूलक समाजया रुपान्तरण धैगु नारासहित हलिन्यंक अपांगता दिवस हनेगु ज्या जुयाच्वंगु दु ।
