Display Style:
Column Style
अर्बुद रोग निवारणयानितिं केन्द्रबिन्दु दयेकेगु सोच
राजेश बज्राचार्य | ने.सं. ११३८ पोहेलागा एकादशी (जनवरी १४, २०१७) यल
यल क्षेत्र नम्बर ३ या प्रतिनिधिसभा दुजः पम्फा भुसालं यल जिल्लायात अर्बुद रोग निवारणयानितिं केन्द्रबिन्दु दयेकेगु सोच विकास यायेत इनाप याःगु दु ।
वंगु शनिवाः नेपाल अर्वुद रोग निवारण संस्था (NCRS) यल शाखाया ३१क्वःगु पलिस्था दिवसया लसताय् जूगुु लसकुस व सम्मान ज्याझ्वःया विशेष पाहाँकथंं वयेकलं थथे धयादीगु खः ।
“नेपालय् किड्नी ल्वय्ःलिपा आर्थिक कथं नं भार जुइगु ल्वयेकथं थीथी क्यान्सरयात जिं थुइकाच्वना । यलय् ल्ऋच्क् या केन्द्र व जिल्ला कचाया भौतिक पूर्वाधारनापं प्रविधियुक्त क्यान्सर उपचार विशेष निगु अस्पाताल स्थापित जूगु आधारय् जिल्लायात थुगु ल्वय् निवारणयानितिं स्वास्थ्य केन्द्रबिन्दु दयेकेगु सोच दयेकेत इनाप यानाच्वना ।” वयेकलं धयादील ।
राज्यया नीति निर्माणया तहलय् थ्यंपिं प्रतिनिधिसभा व प्रदेशसभाया निर्वाचित दुजःपिनिगु हनेज्याः जूगु थुगु ज्याझ्वःसं उपस्थित सकसिगु प्रतिनिधित्वयासें वयेकलं राज्यया अनुदाननापं स्वास्थ्य सचेतना अभियान सुथाँ लाकेत थपिंसं ज्या यायेगु प्रतिवद्धता नं प्वंकादीगु खः ।
NCRS यल शाखाया जिल्ला सभापति शैलेन्द्र लाल प्रधानयाःगु नायःसूइ जूगु थुगु ज्याझ्वःसं क्यान्सर रोग विशेषज्ञ व सहयोगी डाक्टरपिनिगु प्रतिनिधित्वयासें डा. मदन कुमार पियां नुगः खँ तैदिगु खः । वयेकलं ३५दँ न्ह्यः उचित कानूनया अभावय् भारतपाखें अवैध रुपं थ्यनिगु छताजि वासःया भरय् उपचार याइगु स्मरण यासें उपचार व सचेतनायानितिं राज्यलिसे निरन्तर पैरवी व संघर्षलिपा बल्ल अबलेया परिकल्पना सकसिगु ग्वाहालिं व्यवहारिक जुयावःगु न्ह्यथनादिल ।
अथेहे, NCRS या केन्द्रिय महासचिव विमल कुमार होडां क्यान्सर अन्तिम चरणय् थ्यंका उपचार याइपिं यक्वः दुगु ल्याखं जिल्ला शाखाया नेतृत्वय् यलय् सुविधायुक्त हस्पिस सेवाकेन्द्र स्थापना यायेमाःगु सुझाव व्यक्त यानादील । अन्तिम अवस्थाय् थ्यंपिं विरामीपिनिगु आश्रयस्थलकथं हस्पिस सेवाकेन्द्रपाखें अस्पतालसिबें खर्च म्हो यायेफैगुनापं विरामी व परिवारपिनित नं उचित राहत जूइगुपाखे राज्यया ध्यान वनेमागु वयेकया धापू खः ।
ज्याझ्वःया मूपाहाँ ललितपुर महानगरपालिकाया प्रमुख चिरिबाबु महर्जनं महानगरयात ल्वयेक स्वास्थ्यसेवा केन्द्र निर्माण यायेमागु धैदिसें ल्ऋच्क् संस्थाया अक्षय कोषसिबें क्यान्सर ल्वय् निवारण सम्बन्धित दीर्घकालीन योजना प्रस्ताव यानादीइत इनाप यानादिल । संस्थाया आइक्वंः ३२क्वःगु पलिस्था दिवसया लसताय् जूइगु ज्याझ्वःपाखें सहकार्यया धिसिलाःगु परियोजना व ग्वाहाली घोषणा यायेगु वयेकलं प्रतिवद्धता प्वंकादिल ।
ज्याझ्वःसं नेवाः परम्पराकथं महानगरया प्रमुख लगायत प्रतिनिधिसभा व प्रदेशसभाया निर्वाचित जनप्रतिनिधिपिन्त सगँ ब्यूगु खः । अथेहे, संस्थायात अक्षय कोष व भवन निर्मार्णाथ ग्वाहाली याःपिं दातापिं नापं स्वास्थ्य शिविरय् ग्वाहाली याःपिं डाक्टर व संघसंस्थापिन्त सम्मान पत्र, प्रशंसा पत्र व कदर पत्र लः ल्हायेगु नं जूगु खः ।
उपसभापति एवं ज्याझ्वःया कजि किरणमान प्रधानपाखें सुभाय न्वचुलिपा क्वःचागु ज्याझ्वःसं क्षेत्र नं २ या प्रतिनिधिसभा दुजः कृष्णलाल महर्जन, क्षेत्र नं १ या प्रदेशसभा दुजः चेतनाथ संजेल व क्षेत्र नं ३ या राजकाजी महर्जन, प्रमुख जिल्ला अधिकारी महादेव पन्थ, संस्थापक सभापति धु्रव बहादुर राउत, निवर्तमान सभापति केशर गोविन्द जोशी लगायत यलया वरिष्ठ व्यक्तित्व व संघसंस्थाया प्रतिनिधिपिनिगु उपस्थिति दूगु खः ।
यलय् ४०म्हसिया मिखादान यात
लहनान्यूज | ११३८ पोहेंलाथ्व द्वादशी (डिसेम्बर ३०, २०१७)
यलया सिन्चाहिटीइ जूगु मिखाया शिविरय् १७दँ निसें ८०दँ तकया ४०म्हेसिया मिखादान याःगु दु ।
मरणोप्रान्त थःगु मिखाया नानीचापाखें मेपिनिगु दृष्टि प्राप्त जुइगु ज्याय् थुकथं स्वेच्छिक मिखादान यागु खः ।
नेपाल आँखादान समाज तीलगंगानापं सिन्चाहिटी महिला बिद्यालय, सिन्चाहिटी टोल सुधार व इनर व्हील क्लब अफ पाटनया मंकाः ग्वसालय् जूगु मिखा शिविर समाजसेवी मोतिशान्ति शाक्यया कजिसूइ जूगु खः । १७ दँनिसें ८५दँ तकया सहभागी दुगु थुगु शिविरय् निसः व ५२ म्ह स्थानीयपिंनिगु मिखाया जाँच जूगु खःसा मोतिविन्दुया ल्वय् दुपिं १५म्हेसिया निशुल्क शल्यक्रिया जुइगु कजि शाक्यं जानकारी बियादिगु दु । समाजसेवी शाक्यया कजिसूइ थीथी थासय् जूगु थ्व ३९ क्वगु मिखा शिविर खः ।
सिन्चाहिटीया प्रौढ कक्षा शुरु यासें महिला बिद्यालय स्थापना जूगु टोल सुधारया भवनसं थुगु मिखा शिविर संचालन यायेदुगुलिइ प्रधानाध्यापिका नुतन शाक्य नं लयतायादिल । समाजया महिला विकासया नितिं शिक्षा नापं स्वास्थ्य सुधारय् सक्रिय जुइखंगुलिइ टोल सुधार व इनरव्हील क्लबया बिजयालक्ष्मी श्रेष्ठया ग्वाहाली दुगु वयेकलं लुमंकादिल ।
संगीतकःमि अमरराज शर्मा राजोपाध्याय समाजया न्हूम्ह नायः
लहनान्यूज | ११३८ पोहेंलाथ्व द्वादशी (३० डिसेम्वर, २०१७)
राजोपाध्याय समाजया निक्वःगु अधिवेशनं अमरराज शर्मा राजोपाध्याययात न्हूम्ह नायः कथं ल्यःगु दु ।
थौं यलय् क्वचाःगु समाजया निक्वःगु अधिवेशनलिसें प्यक्वःगु साधारण सभां नांजाःम्ह संगीतकःमि तकं जुयादिम्ह अमरराजया नेतृत्वय् १३म्ह दुजःया न्हूगु ज्यासना पुचः सर्वसम्मतिं ल्यःगु खः ।
न्हूगु ज्यासना पुचलय् कलाकार संजय शर्मा राजोपाध्याययात न्वकू ल्यःगु दुसा संचारकःमि बिराजकाजी राजोपाध्याययात मू छ्यान्जे ल्यःगु दु । छ्यान्जेय् रचना शर्मा राजोपाध्याय च्वनादीगु ज्यासना पुचलय् जयन्ती शर्मा राजोपाध्याय दांभरिं व उद्धव आचार्य राजोपाध्याय ल्यू दांभरिं च्वनादीगु दु । दुजलय् नगेन्द्र राजोपाध्याय, विनोद ज्वालानन्द राजोपाध्याय, चेतना शर्मा राजोपाध्याय, वन्दना राजोपाध्याय, विजय शर्मा राजोपाध्याय, पिपुल सुवेदी राजोपाध्याय व विरु सुवेदी राजोपाध्याययात ल्यःगु दु ।
न्हूम्ह नायः कथं ल्ययेधुंकाः थःगु नुगःखँ तसें अमरराज राजोपाध्यायं थीथी कथंया अफवाह व भ्रम न्यंकाः पंगः थनेत स्वःसां समाज आःतक्क क्रियाशिल दुगु व आः अझ सशक्त रुपं न्ह्याःवनेगु धयादिल । समाजयात सक्षम, सबल दयेका वनेगु लँय् सकसिगु सल्लाह सुझाव कथं न्ह्याःवनेगु राजोपाध्यायया धापू खः ।
ज्याझ्वःया उद्घाटन सत्रय् राजोपाध्याय समाज दुनेया दक्कले ज्याथःम्ह ९८दँया चुन्द्रचरण राजोपाध्याय (पान बाज्या) लिसें संस्कार व संस्कृति विज्ञ पण्डित रत्नराज राजोपाध्याययात विशेषकथं सम्मानित यागु खः । वयेकपिनित यल क्षेत्र नम्बर २ पाखें प्रतिनिधि सभाया सभासद कृष्णलाल महर्जनं हनापौ लःल्हानादिगु खःसा समाजया नायः वदन ज्वालानन्द राजोपाध्यायं दोसल्लां न्ययेकादीगु खः ।
समाज दुनेया थुगुसी एसइइ परीक्षाय् ताःलाःपिं विद्यार्थीपिन्त हनेगुनापं दक्कले आपाः ल्याः हःम्ह छात्र सिवेश शर्मा राजोपाध्याय व छात्रा सुभिया राजोपाध्याययात नगद राशीसहितया सिरपाःपाखें हःपा बिइगु ज्याः जूगु खः ।
नुुगः खँ तसें प्रतिनिधि सभा सभासद महर्जनं स्थानीय भाषा, संस्कृतिया उत्थानया लागिं थम्हं फक्व ग्वाहालि यायेगु प्रतिवद्धता प्वंकादिल । सांस्कृतिक पहिचानया ल्यंकातसें राजनैतिक अधिकार प्राप्तिया लँय् नं न्ह्याःवनेमाःगु महर्जनया धापू खः । ज्याझ्वलय् ताम्रकार समाजया नायः रविन्द्रराज ताम्रकार, वैदिक प्रतिष्ठानया नायः उपेन्द्रभक्त सुवेदी, पर्व समय सुधार राष्ट्रिय समाज नेपालया नायः महेश्वर जुजु राजोपाध्यायं राजोपाध्याय समुदाययात सांस्कृतिक, सांस्कारीक ख्यःया लिसें मेमेगु ख्यलय् नं बल्लाका यंकेत समाजं भूमिका म्हितेमाःगु धाःगु खः ।
नेवाः पत्रकारिता ख्यः विकासयानितिं विशिष्ट सम्झौता
लहनान्यूज | ने.सं. ११३८ पोहेलाथ्व षष्ठी (डिसेम्वर २४, २०१७) यल
नेवाः पत्रकारिता ख्यः विकासयानितिं गोल्डेन डायमण्ड एण्ड ज्वेलरी व नेवाः पत्रकार राष्ट्रिय दबू दथुइ विशिष्ट सम्झौता जूगु दु ।
ललितपुर महानगरपालिका वडा नं १२ हःखाय् च्वंगु ज्वेलरीं नेवाः पत्रकार राष्ट्रिय दबूनापं सहकार्य याना देय्न्यंकंया थी थी जिल्लाय् पत्रकारिता तालिम न्ह्याकीगु जूगु दु । व्यवसायिक सामाजिक उत्तरदायित्वया अवधारणाकथं नेवाः पत्रकारिता ख्यलय् दक्ष पत्रकार ब्वलंकेत दच्छिया दुने म्होतिइ ५गू तालिम वा थी थी ज्याझ्वः न्ह्याकेत आर्थिक ग्वाहाली याइगु सम्झौताय् उल्लेख दु ।
आईतवाः नेवाः पत्रकार राष्ट्रिय दबूया ग्वसालय् जुइत्यंगु न्हापाँगु मिडिया फेष्टिभलया सम्पर्क सचिवालयसं जूगु समारोहसं नेपाल सुनचाँदी व्यवसायी महासंघया केन्द्रीय न्वकू जुयादीम्ह ज्वलेरीया प्रमुख ज्ञानुराज शाक्य म्हःमफूगु हुनिं ज्वेलरीपाखें वयेकया तिरीमय्जु सुनिता शाक्य व काय् समिस शाक्यं व पत्रकार दबूयापाखें केन्द्रीय नायः श्रीकृष्ण महर्जनं ल्हाःचिं तया थुगु सम्झौता कालबिल याःगु खः ।
ज्याझ्वःसं पत्रकार दबूया केन्द्रीय सल्लाहकार नापं राष्ट्रिय समाचार समितिया प्रधान सम्पादक राजु शाक्यं व्यावसायिक संस्थापाखें पत्रकारिता ख्यः विकासयानितिं ग्वाहाली यायेगु थुगु सम्झौता व्यावसायिक सामाजिक उत्तरदायित्व अवधारणा अनुुरुप नेपाःया सम्भवतः न्हापाँगु व न्हूगु अभ्यास खः धैदिल । थुगु अभ्यासपाखें समावेशी सञ्चारया विकासयानितिं विशेषत दक्ष नेवाः पत्रकार उत्पादनय् ताःईतकं सकारात्मक लिच्वः वइगुलिइ विश्वस्त जुइफैगु वयेकया धापू खः ।
पत्रकार दबूया केन्द्रीय अध्यक्ष श्रीकृष्ण महर्जनं व्यावसायिक संस्थापाखें पत्रकारिताया विकासयानितिं जूगु थुगु ग्वाहालीं व्यावसायिक संस्थाया लागि मेमेगु सिबें नं बाँलागु दसू जुया स्थापित जुइफूगु विश्वास प्वंकादिल । समावेशी सञ्चारयानितिं न्हापाँगु मिडिया फेष्टिभल जुइत्यंगु इलय् ह्वताः चूःलागु थुगु ग्वाहालीया विशेष महत्व दुगु न्ह्यथसेंं वयेकलं थुकिंइ पत्रकार दबूया संस्थागत विकासय् धिसिलाक्क न्ह्यब्वायेत लिधंसा जुवंगु न्ह्यथनादिल ।
ज्याझ्वःसं दबूया केन्द्रिय मू छ्याञ्जे सुनील महर्जन, दाँभरी एवं मिडिया फेष्टिभलया मू कजि सुरेन्द्र भक्त श्रेष्ठं सम्झौताया अन्तरवस्तु नापं मिडिया फेष्टिभलबारे नुगः खँ तयादीगु खः । पत्रकार दबूया केन्द्रिय छ्याञ्जे के.के. मानन्धरं न्ह्याकादीगु थुगु ज्याझ्वःसं वइगु पुष २२ गते जुइत्यंगु न्हापाँगु मिडिया फेष्टिभलया ल्यू कजिः राजेश बज्राचार्यं लसकुस यानादीगु खः ।
किपाः सुगतरत्न सिन्दुराकार
नेवाः पत्रकार राष्ट्रिय दबू चितवन कचा:या परिचयत्मक ज्याझ्व:
लहनान्युज | ने.स.११३८ पोहेलाथ्व पंचमी (डिसेम्बर २३, २०१७)
