मदिक्कं वयाच्वंगु वा लिपा चलखय् लानाः जिल्लाया थीथी पालिकाय् स्वीप्यम्ह सीगु दु। थौं न्हिनसिया १ ताः ईतक वःगु विवरण कथं प्यम्ह बेपत्ता जूगु दु।

चलखय् लानाः सीपिं झिंछम्हेसिया सीम्ह परीक्षण जुइ धुंकूगु इलामया प्रमुख जिल्ला अधिकारी सुनिता नेपालं धयादिल। क्षतिया पूवंकं विवरण वये बाकि दनीगु जिल्ला प्रशासन ज्याकुथिं धाःगु दु।

चलखय् लानाः सूर्योदय नगरपालिका–१ मानेभञ्ज्याङय् न्याम्ह, इलाम नगरपालिका–६ घोसय् खुम्ह, सन्दकपुर गाउँपालिकाय् न्हय्म्ह व फाकफोकथुम गाउँपालिकाय् छम्ह यानाः स्वप्यम्ह सीगु प्रमुख जिल्ला अधिकारी नेपालं धयादीगु दु।

विपदय् लानाः सन्दकपुर गाउँपालिकाय् निम्ह व इलाम नगरपालिका व माइजोगमाइ गाउँपालिकाय् छम्ह÷छम्ह बेपत्ता जूगु दु।

मदिक्क वा वयाच्वंगुलिं सप्तकोशी खुसिइ तच्वकं खुसिबाः वयाः कोशी ब्यारेजया न्ययगू ध्वाखा चायेकूगु दु।

जिल्ला प्रहरी ज्याकुथिया प्रहरी प्रवक्ता योगराज खतिवडां कोशी ब्यारेजय् लःया वहाव प्रतिसेकेण्ड ३ लख ३५ द्वः क्यूसेक थ्यने धुंकाः ब्यारेजया न्यय् खुगू मध्येय् न्ययगू ध्वाखा चायेकाःगु धयादिल।

वय्कःया कथं थौं सुथसिया ८ः१५ ताः इलय् उगु खुसिया जलवहाव मापन याःगु खः। थौं सुथसिया ७ ताः इलय् उगु खुसिया जलवहाव मापन याःबले निगू लख ७१ द्वः ३१० क्यूसेक थ्यन ेधुंकाः ३९गू ध्वाखा चायेकूगु खः।शनिबाः बहनी ८ ताः इलय् लःया प्रवाह छगू लख ९३ द्वः ६० क्यूसेक प्रतिसेकेण्ड जुयाः झिंन्यागू ध्वाखा चायेकूगु खः।

वंगु भदौ १७ गते तच्वकं लः बाःवयाः कोशी ब्यारेजया न्ययखुगू मध्यय् स्विच्यागू ध्वाखा चायेकूगु खः। उकिया लिपा लःया वहाव म्हो जूगु खः। शुक्रबाः व शनिबाः मदिक्क वा वयाः थौं सुथय्निसें सप्तकोशीइ लःया वहाव अप्वयावःगु प्रवक्ता खतिवडां धयादिल।

कोशी ब्यारेजय् लःया प्रवाह छगू लख न्ययद्वः क्युसेक पुलेधुंकाः सङ्केत कथं ह्याउँगु मत च्याकेगु याइ। वहे कथं आः कोशी ब्यारेजय् स्वंगु ह्याउँगु मत च्याकूगु कन्ट्रोल रुमं धाःगु दु।

पृथ्वीराजमार्ग अन्तर्गत तनहुँया आँबुखैरेनी गाउँपालिका–४ साँखरय् सतक दुनावंगु दु। शनिबाः सुथंनिसें मदिक्कं वयाच्वंगु वाया हुनिं उगु सतक दुनावनाः आँबुखैरेनी–मुग्लिन सतक छखें जक सञ्चालन जुयाच्वंगु दु।

इलाका प्रहरी ज्याकुथि आँबुखैरेनीया प्रहरी निरीक्षक टेकप्रसाद सुवेदीं सनिलया ४ ताः इलय् सतक दुनावंगु धयादिल। निखेरं प्रहरी तयाः सुरक्षित कथं छखें जक सवारी न्ह्यायेगु व्यवस्था याःगु वय्कलं धयादिल।

अथे खः सां बहनीया इलय् उगु थासय् ग्याः चिकु दूगुलिं यात्रा मयायेत नापं वय्कलं इनाप यानादीगु दु।विसं २०७९ जेठ २७ गते वहे थासय् सतक दुनावनाः अंगः पालाः मस्र्याङ्दी खुसिपाखें पःखाः थनातःगु खः।

वहे थासय् हाकनं सतक दुनावःगु प्रहरीं धाःगु दु।

राष्ट्रपति रामचन्द्र पौडेलं देय्न्यंकं मदिक्कं  वयाच्वंगु वा व उकिं यानाः खुसिबाः चल व डुबानया खतरापाखें सजग जुयाः च्वनेत इनाप यानादीगु दु।

म्हिगः छगू विज्ञप्ति बियादिसें वय्कलं विपदया इलय् धैर्य जुयाः न्ह्यने वःगु हाथ्याःया सामना यायेत सकसितं इनाप यानादीगु दु।राष्ट्रपति पौडेलं थ्व विपत्तिया इलय् याकनं उद्धार व राहतया ज्याय् न्ह्यचिलेत राज्यया सकल निकाययात अपिल नापं यानादीगु दु 

रसुवाया गोसाईंकुण्ड गाउँपालिका–४ य् बेरिङ खोल्साय् चुइका प्यम्ह मनू तंगु दु। लाङटाङ चाः हिइवःपि ख्वपया झींखुम्ह मध्ये प्यम्ह खोल्सां चुइका तःगु दु धका प्रहरीं धाःगु दु।

प्रहरीया कथं, वडा नम्बर ५ ब्याम्बोस्थित होटलय् बाय् च्वना लाङटाङपाखे वनिइगु झ्वलय् खुसिइ चुइकूगु खः।मध्यपुर थिमी नगरपालिकाया संस्कृति श्रेष्ठ, किशन श्रेष्ठ, संगिता श्रेष्ठ व रवि श्रेष्ठ उगु खुसिइ चुइका तना च्वंगु दु।