कन्हय्निसें सञ्चार व मिडियासम्बन्धी सम्मेलन २०२४ न्ह्यायेत्यंगु दु। त्रिभुवन विश्वविद्यालय पत्रकारिता नापं आमसञ्चार केन्द्रीय विभाग व सेन्टर फर मिडिया रिसर्च नेपाःया ग्वसालय् निन्हुयंक सम्मेलन जुइत्यंगु खः। सम्मेलन विभागया क्यामेरा भवन बल्खुइ जुइ।

सम्मेलनय् पत्रकारिता, मिडिया व सञ्चारलिसे स्वापू दूगु छगू दर्जन स्वयां अप्वः अनुसन्धान क्यनेगु विभागं धाःगु दु। विभागया प्रमुख डा कुन्दन अर्यालं पत्रकारिता व सञ्चार ख्यलय् अध्ययन व अनुसन्धानयात हःपा बिइत, सञ्चार व पत्रकारिता ख्यःया थी थी विषयकय् खँल्हाबल्हाया संस्कृतिया विकास, न्हून्हूगु प्रविधिं हःगु ह्वःतातय्गु सदुपयोग व हाथ्यायात बुकेत ग्वाहालि जुइगु तातुनां सम्मेलन न्ह्याकेत्यंगु धयादिल।

सम्मेलनय् भारत, बङ्गलादेश व श्रीलङ्काया विज्ञतय्सं प्रस्तुति न्ह्यब्वइ। प्राध्यापक पी खरेलया ‘बहुच्यालन र दर्शकको खण्डीकरण’ विषयकय् विशेष प्रस्तुति न्ह्यब्वयेत्यंगु दु।

थुगु सम्मेलनय् कृत्रिम बौद्धिकता युगय् मिथ्या सूचं विरुद्धया ल्वापु, मिडिया व भ्रष्टाचार, पत्रकारिताया भविष्य, मिडिया व राज्यया सम्बन्ध, पत्रकारिताया दिगोपनाबारे सम्बन्धित ख्यःया विज्ञ, पत्रकार व अनुसन्धानकर्ता दथुइ ब्यागलं ब्यागलं खँल्हाबल्हा यायेगु ज्याझ्वः दु। (रासस)

राष्ट्रियसभाया नायः नारायणप्रसाद दाहालं मातृभूमिया गौरव यानादिसें देय् विकासया अभियानय् जुइत युवा पुस्तातय्त इनाप यानादीगु दु।

रैथाने एग्री प्रोडक्स नेपालपाखें थौं दरबारमार्गय् न्ह्याकूगु रैथाने उत्पादन हाटबजार मेलाया अवलोकन यानादिसें वय्कलं नेपालय् स्रोतसाधन व जनशक्ति माक्व दूगुलिं उकियात फयांफक्व छ्यले माःगु धयादिल। नायः दाहालं थथे धयादिल, “मानव चोलाया दकसिबे महत्वपूर्ण पक्ष धइगु श्रम खः, नेपालय् माक्व स्रोतसाधन व जनशक्ति दु, थजाःगु मूवंगु जनशक्तित श्रम यायेत विदेश वनाच्वंगु अवस्था दु, इमित गथे यानाः देय् दुने हे छ्यलेगु धइगु आःया हाथ्या खः।

थुकिइ बिचाः यायेमाः।” रैथाने एग्री प्रोडक्ट नेपाःया नायः तिलक ढकालं नेपाःया खाद्यान्नया विविधता बचे यायेत नापं दैनिक उपभोग्य ज्वलंपाखे आत्मनिर्भर जुइगु प्रेरणा बिइत दरबारमार्गय् शनिबाः हाटबजार न्ह्याकाः वयाच्वनागु धयादिल। हाटबजारय् वइगु खाद्यन्नलिसेंया उपभोग्य ज्वलं विषादीमुक्त, स्वच्छ लकसय् उत्पादन जूगुलिं मनूतय्त स्वस्थ्यकर जूगु वय्कःया धापू दु।

उगु संस्थां विसं २०८० साउन १ गतेनिसें हरेक शनिबाः सुथसिया ७ निसें १२ ता ईतक हाटबजाः न्ह्याका वयाच्वंगु खः। हाटबजारय् मार्सी वाया जाकि, कःनि, चिनो, कागुनो, मुस्या, कोदो, तछ्व, सतिवा, लट्टे, फापर, किबी, लौका, न्हाकं, फसि, च्या, कस्ति, दुरुया ज्वलं नापं तपुलि व गलबन्दीथेंजाःगु ५० गू स्वयां अप्वः जिल्लाया रैथाने उत्पादन मिइत हयातःगु दु।

हाटबजारय् न्हियान्हिथं थ्यंमथ्यं न्हय्सः उपभोक्तातय्सं अवलोकन यानाः माःगु ज्वलंत न्यानाः यंकीगु नापं उपभोक्ता व उत्पादनकर्तादथुइ अनुभव कालबिल यायेगु ज्यातकं जुयावयाच्वंगु नायः ढकालं कनादिल । 

विद्युतीय राहदानी (ई–पासपोर्ट) दयेकेत माल्टाय् खुसः स्वयां अप्वः नेपाःमितय्गु राहदानी आवेदन सङ्कलन जूगु दु।

राहदानी विभाग येँ व स्पेनय् च्वंगु नेपाःया दूतावासया मंकाः टोलीं माल्टाय् न्ह्याकूगु घुम्ती शिविरपाखें विद्युतीय राहदानीया निंतिं जैविक विवरणलिसेंया आवेदन सङ्कलन याःगु खः।शिविरं राहदानीया म्याद फूइ धुंकूपिं, राहदानीया म्याद दच्छि स्वयां म्ह्वः जक दुपिं, क्षति जूपिं, तंपिं व माल्टाय् हे बूपिं नेपाःमितय् मस्तय्गु न्हूगु राहदानीनापं मुक्कं खुसः व ५० म्हसिगु जैविक विवरणलिसेंया आवेदन सङ्कलन जूगु स्पेनया निंतिं कार्यवाहक राजदूत यज्ञराज पौड्यालं राससयात कनादिल। न्यान्हुतक न्ह्याःगु घुम्ती सेवापाखें थ्यंमथ्यं न्हय्सः नेपाःमितय्सं सेवा कायेखंगु कार्यवाहक राजदूत पौड्यालं धयादिल।

शिविरपाखें थ्यंमथ्यं ७८ द्वः युरो अथे धइगु छगू क्वति १० लख राजस्व सङ्कलन जूगु पौड्यालं धयादिल। “राहदानी नवीकरण लिसेंया भ्वँ प्रमाणीकरण सम्बन्धी समस्याय् लाःपिं नेपाःमितय्त सेवा बिइत विशेष प्राथमिकता बियाः माल्टाय् घुम्ती शिविर न्ह्याकूगु खः”, पौड्यालं धयादिल, “शिविरया ई दुने जिमिसं फक्वः सेवा बिइगु कुतः याना, माल्टापाखें हे सेवा काये खनाः अःपूगु धासें सेवाग्राहीतय्सं लसता प्वंकादीगु खः।” शिविरपाखें राहदानी नवीकरण, राहदानी वितरण व भ्वँ प्रमाणीकरण लिसेंया कन्सुलर सेवा न्ह्याकूगु दूतावासं न्ह्यः थंगु दु।

घुम्ती सेवाय् दूतावासया सहचारी विपिन चन्द, राहदानी विभागया नायब सुब्बा विदुर खतिवडा व दूतावासया स्थानीय कर्मचारीत जुयादीगु खः। टोलीं डिसेम्बर १४ तारिखनिसें गैरआवासीय नेपाली सङ्घ माल्टाया ज्याकुथिं कन्सुलर सेवा बियाच्वंगु खः। घुम्ती सेवायात गैरआवासीय नेपाली सङ्घ माल्टालिसें अन ज्या यानाच्वंगु नेपाली सङ्घसंस्था तय्सं समन्वय व ग्वाहालि याःगु खः।

माल्टाय् नेपाली दूतावास मदूगुलिं राहदानी विभाग व स्पेनया नेपाली दूतावासया मंकाः टोलीं अन घुम्ती शिविर न्ह्याकूगु खः। थ्व स्वयां न्ह्यः दूतावासं वंगु लाय् स्पेनया बार्सिलोनाय् घुम्ती सेवा न्ह्याकूगु खः। (रासस) 

बाजुरा जिल्लाया पूर्वी–उत्तरी भेगया जगन्नाथ गाउँपालिकाय् गोत्री केन्द्रविन्दु जूया ५.२ म्याग्निच्युडया भुखाय् ब्बःगु दु।

भूकम्प मापन केन्द्र सुर्खेतया कथं थौ सुथय् ४ बजे जुया १४ मिनेटय् भुखाय् ब्बःगु दु धका धाःगु दु।

थौं भैरहवाय् च्वंगु युनिभर्सल कलेज अफ मेडिकल साइन्सेजय् लुइकूगु प्रेसर कुकर बमयात नेपाली सेनापाखें निष्क्रिय याःगु दु।

मेडिकल कलेजया मालीं सिमा चानाच्वंगु अवस्थाय् सुथसिया थ्यंमथ्यं १०ः३० ताः इलय् पुलांगु प्रेसरकुकर बम लुइकूगु जिल्ला प्रहरी कार्यालय रुपन्देहीया प्रवक्ता प्रहरी नायब उपरीक्षक सुरज कार्कीं धयादिल।

“बम पुलांगु खतंनःगु अवस्थाय् दयाच्वंगु खः, नेपाली सेनां निष्क्रिय याःगु दु”, कार्कीें धयादिल, “सुनाः व गुबले तल थ्व बिषय छुं खुले मजुनि, अनुसन्धान यानाः हे च्वनाःगु दु।”प्रेसर कुकरया ह्याण्डलयात खिपतं चिनाः उकिइ घडी ब्याट्री लगायतया उपकरण जडान यानातःगु खः।

ब्यागय् तयातःगु अवस्थाय् कुकर बम लुइके धुंका मेडिकल कलेजं जिल्ला प्रशासन कार्यालययात खबर याःगु खः। बमयात भैरहवाय् च्वंगु कालीभक्त गणया नेपाली सेनां न्हिनसिया १ ताः इलय् निष्क्रिय याःगु खः। (रासस)