नेवाः पत्रकार राष्ट्रिय दबूया झीस्वक्वःगु दँमुज्याय् खुम्ह पत्रकार तय्त थीथी पत्रकारिता सिरपा लःल्हागु दु।शनिवाः छगु ज्याझ्वः मध्यपुर थिमीइ उगु सिरपाः लःल्हागु खः।

वाङमय शताब्दी पुरुष सत्यमोहन जोशी स्मृति पत्रकारिता सिरपा मेट्रोएफएमया वरिष्ठ सञ्चारकर्मी जुजुमान महर्जनयात नगद राशि १० हजार तका नापं हनापौ लःल्हागु खः।

अथेहे नेपाःया न्हापाम्ह त्रिपिटकाचार्य नाप २००१ य् तत्कालीन प्रधानमन्त्री जुद्ध शम्शेरं देशं निकाला यानादीम्ह च्याम्ह भिक्षु मध्ये छम्ह भिक्षु कुमारकाश्यप महास्थविरया नामय् भिक्षु कौण्डन्य महास्थविरं स्थापना यानादीगु भिक्षु कुमारकाश्यप स्मृति सिरपा नेपाल मण्डल टेलिभिजनया सञ्चारकर्मी रामराजा बज्राचार्ययात हनापौ नाप नगद राशि २० हजार तका लःल्हागु खः।

यल जिल्लाय् न्हापाम्ह अपांगमैत्री भवन दयकेगु ज्या यानादीम्ह समाजसेवी मोतिशान्ति शाक्यं मा व अबुया नामय् नीस्वनादीगु ज्ञानदेवी– मणीरत्न स्थापित स्मृति पत्रकारिता सिरपा नेवाः एचडी टेलिभिजनया वरिष्ठ सञ्चारकर्मी नवीन जोशीयात नगद राशि २० हजार तका नाप हनापौ लःल्हानादीगु खः। देवशोभा कंसाकारं नीस्वनादीगु ज्ञानज्योति – लक्ष्मीप्रभा स्मृति पत्रकारिता सिरपा जनसञ्चार टेलिभिजनया सञ्चारकर्मी सुरेश सैंजुयात नगद २० हजार तका नाप हनापौ लःल्हनादीगु खः। अथेहे यलया व्यवसायी बाबुराजा ज्यापू फोटो पत्रकारिता सिरपा गोर्खापत्र अनलाईनया फोटोपत्रकार मनोजरत्न शाहीयात नगद १० हजार नापं हनापौ लःल्हानादीगु खः।

विजयराम कर्माचार्य न नीस्वनादीगु श्रीरामस्मृति न्हुजः पत्रकारिता सिरपा चितवनया पत्रकार निशा श्रेष्ठयात नगद १० हजार नाप हनापौ लःल्हानादीगु खः। पत्रकारिता क्रियाशील, नेपाल भाषा, संस्कृति, सम्पदा, सञ्चारमाध्यमं समावेशीकरण, आदिवासी जनजातिया मुद्दा पत्रकारितापाखे योगदान याःपि लैगिंक भौगोलिक व लगायत पक्षयात स्वया उगु सिरपा लःल्हागु खः धका पत्रकार दबूया बरिष्ठ न्वकु नाप सिरपाया कजि सुनिल महर्जनं धयादीगु खः

उगु ज्याझ्वलय् सिरपा त्याकादीपिन्त पत्रकार दबूया वरिष्ठ उपाध्यक्ष सुनील महर्जनं स्वामा, निवर्तमान अध्यक्ष सुरजवीर बज्राचार्यं खादा व केन्द्रीय अध्यक्ष नृपेन्द्रलाल श्रेष्ठं दोसल्ला व वाग्मती प्रदेश सरकारया श्रम, राजगार लिसे यातायातमन्त्री प्रेमभक्त महर्जनं हनापौ लःल्हानादीगु खःसा सिरपा दातापिन्स ध्यवा लःल्हानादीगु खः।

मन्त्री महर्जनं जातीय विविधतायात सम्बोधन, सामाजिक न्यायया निति पत्रकारपि संवेदनशील जुइमाःगुलि बःबियादीसे समावेशी पत्रकारिताया विकास व मातृभाषाया पत्रकारिता ख्यःया निति वाग्मती प्रदेश सरकारं ठोस ज्या यायेगु प्रतिबद्धता प्वकादीगु खः।

पत्रकार दबूया संस्थापक अध्यक्ष श्रीकृष्ण महर्जनं पत्रकारिता ख्यः समावेशी पत्रकार दबू नाप फोनिजं राज्ययात ध्यानाकर्षण याका वयाच्वनागु खँ धका धयादीसे समावेशीं राष्ट्रिय एकता, सामाजिक सद्भावया अझ बलाका यकिइ धका धयादीगु खः।

पत्रकार दबूया निर्वतमान अध्यक्ष सुरजवीर बज्राचार्यं मातृभाषा पत्रकारिताया माध्यमं भाषाया संरक्षण यायेगु परम्परा, संस्कृति, सम्पदाया प्रवद्र्धन याये फइगु धका बःबियादीसे मातृभाषा पत्रकारिताया विकास यायेगु निति राज्यं विशेष प्याकेजया घोषणा यायेमाःगु माग यानादीगु खः। पत्रकार दबूया केन्द्रीय अध्यक्ष नृपेन्द्रलाल श्रेष्ठं प्रेस स्वतन्त्रताया तधःगु कुत यायेगु निति सञ्चारमाध्यम समावेशी जुया थीथी जातजाति व भाषाभाषीया सःयात थाय् बिइमाःगु व मातृभाषा पत्रकारिता विकासया निति राज्यं ध्यान बिइमाः धका धयादीगु खः।

नेवाः पत्रकार राष्ट्रिय दबूपाखें थुगुसी खुम्ह पत्रकारपिन्त थीथी पत्रकारिता सिरपाः लःल्हाइगु जूगु दु ।

पत्रकार राष्ट्रिय दबूया कन्हय् शनिबाः मध्यपुर थिमिइ जूगु १३ क्वःगु दँमुँज्याया ज्याझ्वलय् उगु सिरपा लःल्हायेत्यंगु खः । पत्रकार राष्ट्रिय दबू सिरपाः समितिया कजि सुनिल महर्जनया  कथं वाङमय शताब्दी पुरुष सत्यमोहन जोशी स्मृति पत्रकारिता पुरस्कार मेट्रोएफएमया वरिष्ठ पत्रकार जुजुमान महर्जनयात लःल्हाइगु जूगु दु । थुगु सिरपाः  १० द्वः तका दांलिसेंया सिरपाः खः ।

थुकथं हे नेपाःया  न्हापांम्ह त्रिपिटकाचार्य लिसें वि.सं. २००१ सालय् तत्कालीन श्री ३ महाराज जुद्ध शम्शेरं देश निकाला याःपिं च्याम्ह भिक्षु मध्ये छम्ह भिक्षु कुमारकाश्यप महास्थविरया नामय् भिक्षु कौण्डन्यं स्वनादीगु भिक्षु कुमारकाश्यप स्मृति पत्रकारिता सिरपाः नेपाल मण्डल टेलिभिजनया क्रियाशील पत्रकार रामराजा बज्राचार्ययात लःल्हाइगु जूगु दु । थुगु सिरपाःया नगद राशि २० द्वः तका दु ।

यल जिल्लाय् न्हापांगु अपांगमैत्री भवन दयेकेगु ज्याया न्ह्यलुवा समाजसेवी मोतिशान्ति शाक्यं थः मां व अबुया नामं स्आवनादीगु ज्ञानदेवी– मणीरत्न स्मृति पत्रकारिता सिरपाः नेवाःएचडी टेलिभिजनया वरिष्ठ पत्रकार नवीन जोशीलयात लःल्हाइगु जूगु दु । थुगु सिरपाःया नगद राशि २० द्वः तका दु ।

थुकथंहे देवशोभा कंसाकारं थः मां व अबुया नामं स्वनादीगु २० द्वः तकालिसेंया ज्ञानज्योति – लक्ष्मीप्रभा स्मृति पत्रकारिता सिरपा ख्वपया जनसञ्चार टेलिभिजनया पत्रकार सुरेश सैंजुयात लःल्हाइगु जूगु दु ।

थथे हे यलया समाजसेवी लिसें व्यवसायी बाबुराजा ज्यापुं थः हे नामं स्वनादीगु १० द्वः तकालिसेंया बाबुराजा ज्यापु फोटो पत्रकारिता सिरपाः येँया फोटोपत्रकार मनोजरत्न शाही व नेवाः पत्रकार राष्ट्रिय दबूया दुजः विजयराम कर्माचार्यं थः अबुया नामं स्वनादीगु १० द्वः तकालिसेंया श्रीरामस्मृति पत्रकारिता सिरपाः चितवनया पत्रकार निशा श्रेष्ठयात लःल्हाइगु जूगु दु ।

पत्रकार राष्ट्रिय दबूका वरिष्ठ न्वकु तकं जुयादीम्ह सिरपाः समितिया कजि सुनील महर्जनं पत्रकारिता ख्यलय् क्रियाशील, नेपालभाषाया माध्यमं पत्रकारिता,  पत्रकारिताय् संस्कृति, सम्पदा, समावेशीकरण, आदिवासी जनजातिया सवालय्  पत्रकारिता ख्यलं ब्यूगु योगदान, लैङ्गिक समावेशी, भौगोलिकलिसेंया पक्षया लिधंसा कयाः सिरपाःया निंतिं नां सिफारिस जूगु कनादीगु दु ।

प्रधानमन्त्री केपी शर्मा ओलीनाप नेपाः भ्रमणय् झायाच्वनादीम्ह माल्दोभाया उपप्रधानमन्त्री नापं परराष्ट्रमन्त्री मिहेल पोप्सोइनं नापलानादीगु दु।

प्रधानमन्त्री निवास, बालुवाटारय् वय्कःपिनि दथुइ निगू पक्षया स्वापू व हितया विषय सहलह जूगु दु। वय्कःपिनि दथुइ जलवायु ह्यूपा, शिक्षा, संस्कृति व व्यापारिक सम्बन्धया विस्तारया क्षेत्रय् मंकाःज्या यायेगु विषय सहलह जूगु खः।

प्रधानमन्त्री ओलीं हिमालनिसें समुद्र तक सुरक्षायात केन्द्रय् तयाः जलवायु ह्यूपाया मुद्दाय् नेपालं आः वइगु जेठ २ निसें ४ गते तक येँय् जुइगु सगरमाथा संवाद ज्याझ्वलय् ब्वति कयादीत वय्कःयात इनाप यानादिल।वय्कःपिं नापलानादीगु झ्वलय् प्रधानमन्त्रीया मू सल्लाहकार विष्णुप्रसाद रिमाल, परराष्ट्र मन्त्रालयया सहसचिव गणेशप्रसाद ढकाललिसें ब्वति कयादीगु खः।

माध्यमिक शिक्षा परीक्षा (एसइई) थनिनिसें न्ह्याःगु दु। राष्ट्रिय परीक्षा बोर्ड, परीक्षा नियन्त्रण ज्याकुथिया कथं देय्न्यकंया निद्वः व ७९ परीक्षा केन्द्रपाखें थौं सुथसिया ८ ताःई निसें एसइई न्ह्याःगु दु।

परीक्षा धलः कथं न्हापांगू न्हि अनिवार्य अङ्गेजी नापं संस्कृत वेदविद्याश्रमपाखे अनिवार्य संस्कृत रचना व मदरसापाखे अनिवार्य अरेबिक भाषा विषयया परीक्षा न्ह्याःगु दु।थुगुसिया माध्यमिक शिक्षा परीक्षाय् न्यागू लख १४ द्वः व ७१ विद्यार्थीतय्सं ब्वति कयाच्वंगु नं बोर्डं धाःगु दु।

थगुनेया एसइई परीक्षाय् प्यंगू लख ६४ द्वः व ७८५ म्ह विद्यार्थींतय्सं ब्वति काःगु धाःगु दु। थूगु दँया परीक्षाय् विद्यार्थीतय्या ल्याः ४९ द्वः २८६ म्ह अप्वःगु दु। परीक्षाय् १५० म्ह परीक्षाथीत दूगु केन्द्रय् छम्ह सहायक केन्द्राध्यक्ष व २० म्ह विद्यार्थी बराबर छम्ह निरीक्षक छ्यलेगु ब्ववस्था यानातःगु दु।

परीक्षाय् ७५ म्हसिबें म्ह्वः परीक्षार्थीत दूगु केन्द्रय् धाःसा सहायक केन्द्राध्यक्ष मतःगु ज्याकुथिं धाःगु दु। थौनिसें न्ह्याःगु परीक्षा चैत १९ गते क्वचाइगु दु। परीक्षा सुथसिया ८ ताःई निसें ११ ताःई तक न्ह्याइ।

राष्ट्रपति रामचन्द्र पौडेल न्ह्यःने प्रजातान्त्रिक समाजवादी गणतन्त्र श्रीलङ्काया निंतिं नेपाःया नवनियुक्त आवासीय राजदूत पूर्णबहादुर नेपालीं राष्ट्रपतिया ज्याकुथिइ थौं ग्वसाः ग्वःगु विशेष समारोहय् पद व गोपनीयताया शपथ कयादीगु दु।

उगु झ्वलय् नेपाल सरकारया उच्च पदस्थ अधिकारीतय्गु नं ब्वति दूगु राष्ट्रपति ज्याकुथिं पिकाःगु विज्ञप्तिइ धयातःगु दु।