सञ्चार लिसे सूचना प्रविधिमन्त्री पृथ्वीसुब्बा गुरुङं मन्त्रालयं देयन्यक इन्टरनेट व टेलिफोन सेवा विस्तार यायेगु अभियानय् वनाच्वनागु दु धका धयादीगु दु।

थौ लमजुङया मालिङय् क्व्होलासोथार गाउँपालिकाया प्रशासकीय भवन व मालिङ प्राथमिक अस्पतालय् न्हुगु भवनया उलेज्या यानादीसे मन्त्री गुरुङं नेपाल सरकारं डिजिटल फ्रेमवर्कया उद्देश्य पूरा यायेगु सुरुआती थाय् कथं लमजुङयात कयागु थन या छेँ छेँय् इन्टरनेट व टेलिफोन सेवा थ्यकिइगु जुइ धका धयादीगु खः।

जिल्लाय् थुगु दँय् दुने हे सूचना प्रविधिमैत्री दयकेगु जुइ धका धयादीगु खः। इन्टरनेट व टेलिफोन सेवा विस्तारलिपा थन याःगु सरकारी कार्यालयय् सूचना प्रविधिपाखे सेवा प्रदान यायेगु आधुनिक प्रशासन प्रणालीइ बःबिइगु धका मन्त्री गुरुङं धयादीगु खः।

आः याःगु ई सूचना प्रविधि जुगुलि विद्यालय शिक्षा प्रविधियुक्त दयकेत लमजुङय् दक्को समुदायिक विद्यालयय् कम्युटर ल्याब उपलब्ध यायेगु धका धयादीगु खः।आः झीगु १० सामुदायिक विद्यालयय् झीगः झीगः कम्पुटर उपलब्ध याके धुकगु दु धका वयकलं जानकारी बियादीगु खः।

सेयर परिसूचक नेप्से थौ हाकन यक्को ल्याखं कुहावःगु दु। छु दिं निसे कुहावया च्वंगु सेयर बजाः वंगु मंगलवाः भचा थहावंगु खःसा थौ हाकन कुहावःगु दु।

बुधबार ५.६० ल्याखं कुहावःगु सेयर बजाः थौ बिहीवाः ३१.४३ ल्याखं कुहावया २५ सय ९६ दशमलव ८२ बिन्दुइ थ्यःगु दु।बिहीवाः कारोबार रकम बुधवाः स्वया अप्पो जुया ४ अर्ब ७६ करोड थ्यःगु दु।

बिहीवाः कारोबार जूगु दक्को परिसूचक कुहावःगु दु। दलकय् अप्पो ट्रेडिङ इन्डेक्स २ दशमलव ७३ प्रतिशतं घटे जूगु खः।

कारोबार जूगु कम्पनी मध्ये सपोर्ट माइक्रोफाइनान्सया सेयर भाः १० प्रतिशतं सकारात्मक सर्किट वना ३३२७ ल्याखय् थ्यःगु खः।

दकलय् अप्पो नारायणी विकास बैंकया सेयर भाः ९ प्रतिशतं घट जूया १३०१ थ्यःगु खः।दकलय् अप्पो थौ कारोबार जानकी फाइनान्स १७ करोड ६० लाख तकाया कारोवार जुगु खः।

तोखा नगरपालिका–६ धापासीस्थित भाइकाजी श्रेष्ठया छेँय् मिँन्वंगु दु। मिँ स्यायेगु निति न्ह्यय् गः दमकल नापं नेपाल प्रहरी, नेपाली सेना व सशस्त्र प्रहरीया पुचलं निघौ स्वया अप्पो ई कया मिँ स्यागू दु।

मिँ स्यायेगु निति ८९ म्ह नेपाल प्रहरी, ६४ म्ह नेपाली सेना व ४० म्ह सशस्त्र प्रहरीया टोली खटे जूगु दु।प्रहरीया कथं मिँ च्याया गुलि क्षति जुल उगु विवरण संकलन जुगु मदुनि धका धाःगु दु। मिँ च्याया स्वंगूत्या तल्ला पूरा हे ध्वस्त जूगु दु।

उद्योग, वाणिज्य नापं आपूर्तिमन्त्री दामोदर भण्डारी व दक्षिण कोरियाया समकक्षी इन्क्यो च्योङ दथुइ निगूपक्षीय बनेज्या नापं लगानी प्रवर्द्धन फ्रेमवर्क (टिआइपीएफ) सम्झौताय् ल्हाःचिं तयेगु ज्या जूगु दु।

गणतन्त्र दक्षिण कोरिया व नेपाःया निगू पक्षीय सम्बन्ध नीस्वंगु ५० दँ क्यंगु झ्वलय् थौं दक्षिण कोरियाया राजधानी सोलय् उगु सम्झौताय् ल्हाःचिं तयेगु ज्या जूगु खः। मन्त्री भण्डारीं टिआइपीएफ सम्झौतां निगू देय् दथुइया कूटनीतिक, सांस्कृतिक व आर्थिक सम्बन्ध न्हूगु च्वकाय् थ्यंकीगु भलसा कयादिल।

वय्कलं नेपालय् वैदेशिक लगानीया निंतिं माःगु लकस निर्माण यायेत सरकार प्रतिबद्ध जू धयादीगु मन्त्री भण्डारीया स्वकीय सचिव आनन्द भट्टं कनादिल। वय्कःया समकक्षी मन्त्री च्योङं दक्षिण कोरियाली कम्पनीतय्सं नेपालय् जलविद्युत्, अटोमोबाइल एसेम्बललिसेंया ख्यलय् लगानी यानाच्वंगु धयादिल। वय्कलं टिआइपीएफ सम्झौतां निगू देय्दथुइया सम्बन्ध व आर्थिक मंकाःज्यायात न्हूगु च्वकाय् थ्यंकीगु धयादिल।

नापं न्हापांनिसेंया सौहार्दपूर्ण सम्बन्ध लुमंकाः निगुलिं देय् थ वं थः सहयात्री जुइमाःगुलिइ नं बः बियादिल। नेपाल व कोरियाया निजी ख्यःया उद्योगी नापं बन्जाःतय्सं ब्वति काःगु उगु ज्याझ्वलय् लगानी बोर्डया प्रमुख कार्यकारी अधिकृत सुशील ज्ञवालीं नेपालय् लगानी यायेगु लकस व ह्वःतात बारे न्ह्यब्वयादिल।

अथे हे उद्योग, वाणिज्य व आपूर्ति मन्त्रालय द्विपक्षीय व्यापार महाशाखा प्रमुख नापं प्रवक्ता बाबुराम अधिकारीें नेपालय् बनेज्या सम्बन्धी दयाच्वंगु नीति व उगु सम्बन्धय् आः जुयाच्वंगु भिंकेज्याया विषय नं न्ह्यब्वयादिल। कोरिया नेपाल विजनेश फोरमया उगु ज्याझ्वलय् नेपाःया सरकारी पक्षपाखे मन्त्रालय, लगानी बोर्ड, सोलया नेपाली राजदूतावास व नेपाःया निजी ख्यःया उद्योगी व व्यवसायीतपाखें नेपाल उद्योग वाणिज्य महासङ्घया नायः चन्द्र ढकाललिसें थ्यंमथ्यं ३० म्ह उद्योगी बन्जातय्सं ब्वति काःगु मन्त्री भण्डारीया स्वकीय सचिव भट्टं कनादिल। (रासस)

चन्द्रागिरि नगर अस्पतालय् ‘भेन्टिलेटर’ सेवा न्ह्यायेत्यंगु दु। स्वास्थ्य नापं जनसङ्ख्या मन्त्रालयं उगु अस्पतालयात जीवन रक्षा यायेत मजिमगाःगु उपकरण ब्यूगु खः।

बागमती प्रदेशया मुख्यमन्त्री बहादुरसिंह लामा (तामाङं) थौं थन जूगु ज्याझ्वलय् चन्द्रागिरि नगरपालिकाया प्रमुख घनश्याम गिरीयात उगु उपकरण लःल्हानादिगु खः। चन्द्रागिरि– ४ या वडानायः नापं प्रवक्ता कृष्णप्रसाद खड्गीया कथं विसं २०७६ वैशाख २८ गतेनिसें चन्द्रागिरि–४ थक्वातय् न्ह्याकूगु १५ गू खाताया उगु अस्पतालं प्रयोगशाला, २४ घौया  आकस्मिक सेवालिसें मचा बुइकेगु सेवा बिया वयाच्वंगु खः।

नापं अस्पतालं लिपांगु इलय् नुगःया ल्वय् जाँच, परिवार नियोजन सेवा, ज्येष्ठ नागरिक, विपन्न नापं अपाङ्गता जूपिंत सित्तिकं सेवा व जलास्येँया ल्वगितय्त डायलाइसिस सेवा बिइगु तयारी यानाच्वंगु दु। मेखे चन्द्रागिरि नगरपालिकां नगरलागाय् सामुदायिक नर्स ज्याझ्वः न्ह्याकाच्वंगु दु।

थुगु ज्याझ्वःपाखें स्क्रिनिङ (मानसिक स्वास्थ्य, दुरुपाया क्यान्सर, मचाछेँया म्हुतुया क्यान्सर, न्यादं क्वय्यापिं मस्तय्गु पोषणलिसें), परामर्श, प्वाथय् दुपिं, मचाबूपिं स्वःवनेगु, स्वास्थ्य शिक्षा नापं जनचेतना सेवा यानावयाच्वंगु दु।

चन्द्रागिरि–४ थक्वातय् हे जर्मन सरकारया आर्थिक नापं प्राविधिक ग्वाहालिं छगू अर्ब तुक प्रसूति विशेषज्ञ अस्पताल तकं निर्माण जुइत्यंगु दु। थुकिया निंतिं जर्मन विकास बैंकं बजेट छ्वया हयेधुंकूगु खँ धाःगु दु। (रासस)