प्रधानमन्त्री सुशीला कार्की न रोजगारीया झ्वलय् विदेश वनाच्वपिन्स तक मतदान याये फइगु सम्भावना दुगु बारेय् सहलह जुयाच्वंगु दु धका धयादीगु दु।

थौ बिहीवाः राष्ट्रया नामय् सम्बोधन यायेगु झ्वलय् अथे धयादीगु खः। ‘प्रतिनिधिसभाय् आः जुइगु त्यःगु निर्वाचनय् उत्साह कया ब्बति कायेगु व योग्य जनप्रतिनिधि ल्येगु निति निर्वाचनय् ब्बति कायेत इनाप याये,’ धका वयकलं धयादीगु खः।

राष्ट्रपति रामचन्द्र पौडेलयात राष्ट्रिय दलित आयोगं वंगु आर्थिक दँ २०८१÷०८२ या वार्षिक प्रतिवेदन पेस याःगु दु।

आयोगया नायः देवराज विश्वकर्मां थौं राष्ट्रपतिया ज्याकुथिइ ग्वसाः ग्वःगु ज्याझ्वलय् नेपाःया संविधानया धारा २९४ कथं उगु प्रतिवेदन पेस यानादीगु राष्ट्रपतिया ज्याकुथिं धाःगु खः।दलित आयोग नेपाःया संविधानया धारा २५५ य् व्यवस्थित संवैधानिक आयोग खः।

थुकिं दलित समुदायया हित अभिवृद्धि यायेत जातीय छुवाछुत, उत्पीडन नापं विभेद अन्त्य यायेगु कुतः यानावयाच्वंगु खः। दलितलिसे सम्बन्धित पाय्छिगु राष्ट्रिय नीति व ज्याझ्वः तर्जुमा यानाः कार्यान्वयनया निंतिं नेपाल सरकारयात प्रतिवेदन पेस यायेगु आयोगया मुख्य ज्या खः।

ऊर्जा, जलस्रोत नापं सिँचाइ, सहरी विकास मन्त्रालय व भौतिक पूर्वाधार नापं यातायात मन्त्रालयय् खनेदूगु ढिलासुस्ती, मोलमोलाहिजा व भ्रष्टाचारजन्य ज्याखँ मजुइकेत हटलाइन नम्बर सञ्चालनय् हःगु दु।

मन्त्रालयया विभाग, आयोजना नापं मातहतया ज्याकुथिइ सेवाग्राहीतय्त ज्या ब्वयेगु, घुस÷रिसवत मागे यायेगु, अनावश्यक दुःख बिइगु, बांमलाक व्यवहार यायेगुलिसेंया ज्याखँ जुलधाःसा सेवाग्राहीतय्सं तप्यंक गुनासो बिइफइगु व्यवस्था दयेकूगु खः।

ऊर्जा, जलस्रोत नापं सिँचाइ मन्त्रालयलिसे सम्बन्धित गुनासोया निंतिं टेलिफोन ल्याः ०१–४२११५११ व हटलाइन नम्बर ११५१ छ्यलेफइ। अथे हे सहरी विकास मन्त्रालय सम्बन्धी गुनासोया निंतिं टेलिफोन ल्याः ०१–४२०००१ छ्यले फइगु व्यवस्था जूगु धाःगु खः।

अथे हे भौतिक पूर्वाधार नापं यातायात मन्त्रालय सम्बन्धी गुनासोया निंतिं ०१–४२११७२ य् सम्पर्क यायेफइ। स्वंगुलिं मन्त्रालय gunaso.minister@gmalif\.com य् गुनासो छ्वयाहयेफइ।

नेपाल टेलिकमया पोस्टपेड व प्रिपेड फोनय् बिलिङ समस्या वःगु दु। थौ बिहीवाः सुुथय् पोस्टपेड व प्रिपेड फोनय् ‘आउट गोइङ कल’ ब्यारियर (वान वे) जुगु खः।

करिब ८ घण्टा स्वया अप्पो फोनय् समस्या वःगु खः।थौ चान्ह्यःनिसे टेलिकमया अनलाइन चार्जिङ सिस्टम (ओसीएस) य् समस्या वःगु खः

प्रधानमन्त्री सुशीला कार्कीं थौं राष्ट्रया नामय् सम्बोधन यानादीत्यंगु दु। प्रधानमन्त्री लिसें मन्त्रिपरिषद्या ज्याकुथिया कथं थौं न्हिनसिया ४ः०० ताः इलय् मन्त्रिपरिषद्या बैठक च्वनीगु व सनिलय् प्रधानमन्त्री कार्कीं राष्ट्रया नामय् सम्बोधन यानादीगु ज्या धलः क्वःछिनागु धाःगु दु।

‘जेनजी’ आन्दोलन लिपा नीस्वंगु अन्तरिम सरकारया नेतृत्व यानादीम्ह प्रधानमन्त्री कार्कीं न्हापांगुखुसिइ राष्ट्रया नामय् सम्बोधन यानादीत्यंगु खः। वंगु भदौ २७ गते पूर्वप्रधानन्यायाधीश सुशीला कार्की प्रधानमन्त्री पदय् नियुक्त जुयादीगु खः। भदौ २३ व २४ गते जूगु जेनजी आन्दोलनया जगय् अन्तरिम सरकार नीस्वंगु खः।

प्रधानमन्त्री कार्की नेतृत्वया अन्तरिम सरकारं प्रतिनिधिसभा विघटन यानाः आः वइगु फागुन २१ गते निर्वाचनया घोषणा याःगु खः। वय्कः नेतृत्वय् स्वक्वःगुखुसि मन्त्रिमण्डल विस्तार जुयाः मन्त्रिमण्डलयात वर्तमान सरकारया प्राथमिक कार्यभार खुलातक अथे धइगु फागुन २१ गते निर्वाचन सम्पन्न यायेगु दिंतक जूगु दु।