नागरिक लगानी कोषं नकतिनि नियुक्त जूपिं कर्मचारीतय्सं आर्थिक दँय् हे मगाःगु बिमा ‘प्रिमियम’बापतया ध्यबा थःपिं ज्या यानाच्वंगु ज्याकुथिपाखें कोषय् एकमुष्ट जम्मा यानाः मेगु आर्थिक दंनिसें बिमा सुनिश्चित यायेफइगु धाःगु दु।

मखुसा बिमा प्रिमियम ध्यबा मगाःतले बिमा मजुइगु कोषं स्पष्ट याःगु खः। नागरिक लगानी कोषं बिमा कोष सञ्चालन कार्यविधि, २०७५ कथं राष्ट्रिय बिमा संस्थानय् बिमा ध्यबा छ्वयाः राष्ट्रसेवक कर्मचारीतय् सावधिक जीवन बिमा कोष सञ्चालन यानावयाच्वंगु खः।

निर्वाचन आयोगं वइगु फागुन २१ गतेया निंतिं क्वःछ्यूगु प्रतिनिधिसभाया निर्वाचनसम्बन्धी सहलह यायेत थ्व हे असोज ३० गते राजनीतिक दलतय्त सःतूगु दु।

आयोगं विघटित प्रतिनिधिसभाय् प्रतिनिधित्व याइपिं लिसें वंगु निर्वाचनय् म्ह्वतिं नं छम्ह वडा दुजःतक त्याःपिं राजनीतिक दलतय्त लिक्क वयाच्वंगु निर्वाचनया तयारीबारे सहलहय् वयेत पौ छ्वःगु आयोगया आयुक्त डा जानकीकुमारी तुलाधरं जानकारी बियादिल।

आयोगं नेपाली कांग्रेस, नेपाल कम्युनिष्ट पार्टी (एमाले), नेपाल कम्युनिष्ट पार्टी (माओवादी केन्द्र), राष्ट्रिय स्वतन्त्र पार्टी (रास्वपा), राष्ट्रिय प्रजातन्त्र पार्टीलिसेंया दलतय्त नं पौ छ्वया धाःगु खः।

आयोगं थ्व हे असोज २० गते निर्वाचन ज्याधलः पितब्वःसां नं उगु आयोगया आन्तरिक ज्याया योजनाया निंतिं जूगुलिं निर्वाचन ज्याझ्वःलिसें विषयय् राजनीतिक दललिसे सहलहलिपा निर्णय यायेगु आयुक्त डा तुलाधरं कनादिल।

जापानीज इन्सेफ्लाइटिसया हुनिं सीपिनि ल्याः खुम्ह थ्यंगु दु। साउन निसें आःतकया ल्याः उलि थ्यंगु खः।

जनस्वास्थ्य ज्याकुथिया कथं सीपिं मध्यय् निम्ह भरतपुर महानगरपालिका, छम्ह खैरहनी नगरपालिका, निम्ह राप्ती नगरपालिका व छम्ह कालिका नगरपालिकाया खः। लिपांगु पटक खैरहनी वडा नम्बर ४ या मिसाया थ्व ल्वय्या हुनिं सीगु धकाः ज्याकुथिया किट नियन्त्रक राम केसीं धयादिल जिल्लाय् आःतक १७ म्हेसित थ्व ल्वय्या सङ्क्रमण खने दये धुंकूगु दु। उकिमध्ये १० म्ह मिसा अले न्हेम्ह मिजंपिंत खनेदूगु खः।

उपिंमध्ये स्वम्ह १५ दँ क्वय्यापिं, न्याम्ह १५ दँ निसें  ६० दँयापिं व  गूम्ह ६० दँ च्वय्यापिं खः। सङ्क्रमितपिंमध्ये १५ म्हेसिंयां खोप मकाःगु व निम्हेसिनं खोप कया तयेधुंकूगु अवस्था स्पष्ट मजूगु केसीं धयादिल।

सिद्धार्थ बैंकं सेयरधनीया नितिं लाभांश घोषणा याःगु दु।कम्पनीया सञ्चालक समितिया बैठकं वंगु आर्थिक दँपाखे सञ्चित नाफा जुगु ५ प्रतिशत बोनस सेयर व करनापं ५.५३ प्रतिशत नगद लाभांश घोषणा याःगु दु।

कुल १ अर्ब ४८ करोड रुपैयाँ बराबरया लाभांश लःल्हाइगु जुगु दु धका बैंकं धाःगु दु। आःतक बैंकया चुक्ता पूँजी १४ अर्ब ८ करोड रुपैयाँ दु। घोषित लाभांश राष्ट्र बैंकं स्वीकृति बिउगु व वइगु साधारणसभां पारित जुइ धुका लःल्हाइगु जुगु दु।

अन्तरराष्ट्रिय बजारय् लुँया भाः थहां वनाः उकिया लिच्वः स्थानीय बजारय् नापं लाःगु दु। सोमबाःया ल्याखय् थौं लुँया भाः तोलां निद्वः व स्वसः तकां थहां वंगु दु।

नेपाल सुनचाँदी व्यवसायी महासङ्घया कथं सोमबाः निगू लख स्वी स्वद्वः व सच्छिया भावं कारोबार जूगु छगू तोला लुँया भाः थौं निद्वः व स्वसलं थहां वनाः निगू लख स्विन्याद्वः व प्यसः तकाया भाः थ्यंगु दु।

वहःया भाः धाःसा स्थिर जुगु दु। सोमबाः छगू तोला वहःया भाः निद्वः गुसः व खुइतकां न्यायेमिइ जूगु खः। वंगु आइतबाः छगू तोला लुँया भाः निगू लख स्विद्वः व खुसलं न्यायेमिइ जूगु खःसा छगू तोला वहःया भाः निद्वः गुसः व स्वितकां न्यायेमिइ जूगु खः।

अन्तरराष्ट्रिय बजारय् थौं छगू औँस लुँ स्वद्वः व ९६५ अमेरिकी डलरं कारोबार जुयाच्वंगु अन्तरराष्ट्रिय सञ्चारमाध्यमपिंसं धाःगु दु।