असनय् तुलाधरपिन्सं मोहनीया झ्वलय् कौलाथ्व एकादशीया कुन्हु असं पायो पिकायेगु प्रचलन दु। असनय् दकलय् क्वकालिम्ह मचायात थाकुली याना असं चालं न्यायकेगु प्रचलन दु।

थुगुसि असंया चालं कुन्हु यानिश वीर सिंह तुलाधरयात मचा थाकुली याना पायो पिकागु खः। असं पायो पिकायेगु झ्वलय् असंभलु अजिमा, असंया कुमारी, गणेद्यः, नारां द्यः, न्यालोहं चाहिकेगु याइ।

असंया आगं छेँय् थ्यने धुंकाः दकले न्हापां नायः जूम्ह मचा थाकुलीया ल्हातं असुरया प्रतिक भुइफसि पाय्केगु ज्या याःगु खःसा अनं लिपा मेमेपिं पायाःवःपिं मस्त व तःधिकपिन्सं नं भुइफसि पाला असं पायाः जात्रा क्वचायकेगु याःंगु दु।

राष्ट्रिय विपद् जोखिम न्यूनीकरण लिसें व्यवस्थापन प्राधिकरणं स्वनिगःया खुसि सिथय् लाःगु सतक (करिडर सतक)य् सनिलया ६ः०० निसें सुथसिया ६ः०० ताःईतक सवारी आवागमन मयाकेत इनाप याःगु दु।

प्राधिकरणं थौं छगू सुचं पिकयाः स्वनिगःलिसें देय्या थी थी थासय् तसकं हे वा वयाच्वंगु धासें करिडोर सतकय् आवागमन मयाकेत स्वनिगःया स्वंगुलिं जिल्ला प्रशासन ज्याकुथियात इनाप याःगु खः।

थौं बहनी झन तसकं वा वयाः लःया तगिं अझ अप्वइगु नापं खुसि सिथय् च्वंगु सतक डुबान जुयाः जोखिम अप्वइगु सम्भावना दूगु न्ह्यथनादिसें प्राधिकरणं सतर्क जुयाच्वनेत धाःगु खः।

“सम्भावित जोखिम पाः यायेत स्वनिगःया खुसि सिथय् च्वंगु सतक (करिडर सतक)य् थौं सनिलया ६ः०० ताःइलंनिसें कन्हय् सुथसिया ६ः०० ताःईतक सवारी आवागमनय् आवश्यकताकथं रोके यायेत निर्णय जूकथं इनाप यानाच्वना”, प्राधिकरणपाखें छगु सुचं पिकया अथे धाःगु खः।

सरकारं थ्व हे असोज १९ व २० गते सार्वजनिक बिदा बिइगु निर्णय याःगु दु। विपद् व्यवस्थापन व अत्यावश्यक सेवालिसे सम्बन्धित ज्याकुथि बाहेक नेपाल राज्यन्यंक सार्वजनिक बिदा बिइगु निर्णय याःगु खः।

गृह मन्त्रालयं थौं सुचं पितबिसें वाः वःगुलिं ब्वलनेफूगु खुसिबाः, डुबान, भू–क्षयलिसें जोखिमया लिसें सतक नापं हवाई यातायात प्रभावित जुइगु व मानवीय क्षति नं जुइफूगु सम्भावनायात स्वयाः कन्हय् आइतबाः व कंस सोमबाः देशन्यंक सार्वजनिक बिदा बिइगु निर्णय जूगु धाःगु खः।

मन्त्रालयं जल नापं मौसम विज्ञान विभाग लिसें राष्ट्रिय विपद् जोखिम न्यूनीकरण व व्यवस्थापन प्राधिकरणं वःगु सुचं कथं असोज १८ निसें २० गतेतक देय्या थी थी थासय तसकं वाः वइगु सम्भावना दूगु धासें आः देय्या थी थी थासय् वा वयाच्वंगुलिं नं विशेष सतर्कता नालेत इनाप नं याःगु खः।

न्हूम्ह कुमारी आर्यतारायात हनुमानाध्वाखाय् च्वंगु तलेजु भवानीया दर्शन याकूगु दु।

तलेजुया दर्शनं कुमारीयात शक्ति दइगु विश्वास यानातःगु दु।लाय्कूलिइ च्वंगु कुमारीछेँपाखें भैरव, गणेशलिसेंया यात्रा यानाः कुमारीयात तलेजु यंकूगु कुमारीछेँ व्यवस्थापन समितिया कजि गौतम शाक्यं धयादिल।

तान्त्रिक कथं दीक्षित पुजारीं कुमारीयात तलेजु भवानीया दर्शन याकाः बिज्यागु खः।

मोहनीया झिंछन्हुया दिं थौं पापाङकुश एकादशीकुन्हु मध्यपुरथिमिइ मल्लकालीन युद्धया लू क्यनीगु खाः पिहाँवइगु जात्रा क्वचाःगु दु।

उबलय्या राजदरबार कथं दूगु लाय्कुलिइ च्वंगु तलेजु भवानीया द्यःछें खड्ग, तरबार, ढाल, युद्धकवजलिसें मल्लकालीन युद्धय् छ्यलीगु साधन ज्वनाः युद्धकला प्रदर्शन यानाः उगु जात्रा क्वचायेकूगु खः।

दरबारलिसे सम्बन्धित बिस्कं समुदायतय्त ब्वति कायेकीगु खाः पिहाँवइगु जात्राय् गुठीयारतय्सं जामा फिनाः खड्ग, ढाल व तरबार ज्वनाः नगरया थी थी त्वालय् युद्ध यायेथें यानाः उबलय्या युद्धकला प्रदर्शन याःगु खः। लायकु दरबारं पिकाइगु थ्व जात्रायात थहनेया त्वाःया कथं इनाएत्वाः, निगू पुखू जुयाः दिगु भैरवतक व कोहनेया त्वाः कथं दथुत्वाः जुयाः बालकुमारीतक प्रदर्शन याःगु खः।

जात्राय् मोहनीया नवमी कुन्हु तलेजु भवानीयात ब्यूगु बलि व कोतदुने दूगु द्यः नापं दरबारया राजदण्डलिसें ज्वनाः नगर परिक्रमा याकूगु खः .। विशेष यानाः थ्व जात्राय् नायः पःमाः (उबलय्या दरबारया प्रशासक, श्रेष्ठ थरया), कर्माचार्य, जोशी, कुटु, प्याथः (प्रजापति), खड्गी समुदायतय् तप्यंक स्वापू दइ।

जात्राय् महानवमीया चान्हय् तलेजुइ बलि ब्यूगु खःम्यय्या छ्यं नं नगर परिक्रमा यानाः प्रदर्शन याइ । जात्राया झ्वलय् बालकुमारीइ भुयूफसि पालाः बलि बिइ। बलि ब्यूगु फसि प्रसादकथं नलधाःसा ल्वचं बचे जुइफइगु जनविश्वास दूगुलिं फसि काइपिनिगु भीड जुइ।जात्राया अन्तय् भुयूफसि पालीगु जूगुलिं थुकियात भुयूफसि पालेगु जात्रा नं धायेगु याःगु स्थानीय अर्जुन श्रेष्ठं जानकारी बियादिल।

जात्रा स्वयेत स्थानीयतलिसें थी थी थासं वःपिं म्वःम्वः दूगु खः।