सहकारीया बचत ध्यबाः अपचलनया द्वपंनय् ज्वनाः जिल्ला प्रहरी ज्याकुथि, कास्कीया हिरासतय् लानाच्वंम्ह राष्ट्रिय स्वतन्त्र पार्टीया सभापति रवि लामिछाने विरुद्ध कास्की जिल्ला अदालतय् थौं अभियोगपत्र पेस जूगु दु।

जिल्ला अदालतया सूचना अधिकारी सुरज अधिकारीं सभापति लामिछानेनापं सहकारी ठगीया द्वपंनय् मेपिं मनुतय्विरुद्ध नं अभियोगपत्र पेस जूगु खँ कनादिगु दु। “आः अभियोगपत्र रुजुया ज्याः जुयाच्वंगु दु, लामिछाने लगायत मेपिविरुद्ध न थौं हे मुद्दा दर्ता जुइ, अदालतपाखें माःगु प्रक्रिया न्ह्याकाच्वंगु दु”, वय्कलं धयादिल।

पोखराया सूयदर्शन बचत व ऋण सहकारी संस्था लिमिटेडया बचत रकम अपचलन यागु द्वपंनय् लामिछानेयात वंगु कात्तिक २ कुन्हू येँय् ज्वंगु खः। कास्कीनापं मेगु जिल्लाय्नापं सहकारी ठगीया द्वपंनय् वय्कःयाके माःगु न्यनेकने ज्या जुयाच्वंगु दु। (रासस)

नेपालय् नं थीथी धार्मिक, आध्यात्मिक, सांस्कृतिक लिसें सामाजिक संघ संस्थां विश्व ध्यान दिवस न्यायेकूगु दु।

हिमालय पर्वत मालाया देय् नेपालं योग, ध्यान न्ह्याःगु शास्त्रीय मान्यता दु। योग, ध्यानया आदिगुरु कथं महाद्यःयात कायेगु याः। डिसेम्बर ६, २०२४ य् संयुक्त राष्ट्रसंघया महासभां २१ डिसेम्बरयात विश्व ध्यान दिवस कथं हनेगु घोषणा याःगु खः। विश्व ध्यान दिवसया लसताय् हलिंन्यंकं ३२ घौतक मदिक्क ध्यान ज्याझ्वः न्ह्याकूगु दु।

नेपाल महर्षि वैदिक फाउन्डेसनं नेपालय् थुगु ज्याझ्वः ग्वसाः ग्वःगु खः। नेपाल महर्षि वैदिक फाउन्डेसन लिसें स्वापू दूगु ध्यान केन्द्र, ग्लोबल मदर डिभिजन व देय्न्यंकं न्ह्याना च्वंगु ९० गू गुरुकुलय् शनिबाः मंकाः ध्यानया ज्याझ्वः तयागु फाउन्डेसनया नायः दीपकप्रकाश बाँस्कोटां धयादिल।

अथे हे, जीवन विज्ञान, पतञ्जलि संस्था, ब्रह्मकुमारी राजयोग सेवा केन्द्र, ओशोया नामं न्ह्याःनाच्वंगु थीथी संघ संस्थां थीथी ज्याझ्वःत याना विश्व ध्यान दिवस न्यायेकूगु खः। (रासस)

चेपाङ समुदायपाखें गोरखा जिल्लां स्नातकोत्तरया उपाधि कायेत ताःलाम्ह गण्डकी गाउँपालिका–१ मकैसिङया रमिला चेपाङयात हंगु दु। शनिबाः इच्छाकामना न्यूज डटकमया न्हय्क्वःगू बुसादँया लसताय् इच्छाकामना–३ चुम्लिङतारय् वय्कःयात हंगु खः।

बागमती प्रदेशया वन व वातावरणमन्त्री कृष्णप्रसाद सिलवालं चेपाङयात हनापौ लःल्हानादीगु खः। मन्त्री सिलवालं सीमान्तकृत समुदायतय् मिसापिनिगु निंतिं प्रमिला छम्ह प्रेरणाया स्रोत जूवंगु दु धयादिल। विसं २०४८ कार्तिक ७ गते बेनिघाट–रोराङ गाउँपालिका–६ धादिङय् जन्मे जुयादीम्हः रमिला इहिपाः याना २०६६ सालय् गोरखाया गण्डकी गाउँपालिका–१ झायादीगु खः।

स्नातकोत्तर तगिं (एमएड) क्वचायेकादीम्ह वय्कः चेपाङ समुदायपाखें जिल्लाय् हे न्हापांम्हः जुयादीगु दु। रमिला २०७६ सालनिसें शिक्षण पेशाय् आबद्ध जुया च्वनादीगु दु। (रासस)

सङ्घीय गणतन्त्र जर्मनीया निंतिं नेपाःया आवासीय राजदूत डा शैल रूपाखेतीं जर्मनीया राष्ट्रपति फ्र्याङ्क वाल्टर स्टेनमायरयात थःगु ओहोदाया दसिपौ पेस यानादीगु दु।

राष्ट्रपति भवनय् वंगु बुधबाः जूगु ज्याझ्वलय् वय्कलं थःगु ओहोदाया दसिपौ पेस यानादीगु जर्मनीया बर्लिनय् च्वंगु नेपाःया राजदूतावासं धाःगु दु।दसिपौ पेस याये धुंकाः राष्ट्रपतिलिसे नाप लानाः जूगु बःचा हाकःगु खँल्हाबल्हाया झ्वलय् राजदूत डा रूपाखेतीं नेपाःया थौंकन्हय्या राजनीतिक घटनाक्रम, भूराजनीति व नेपाःया आःया प्राथमिकता तय्गु बारे ध्वाथुइकादीगु खः।

उगु झ्वलय् जर्मनीया राष्ट्रपति स्टेनमायरं नेपालया राष्ट्रपति रामचन्द्र पौडेलयात जर्मनीइ थ्व हे दँय् नाप लाःगु सन्दर्भ व निगुलिं देय्दथुइया आः दयाच्वंगु सम्बन्धबारे खँ ल्हानादीगु खः।उगु ज्याझ्वलय् जर्मनीया उच्च पदस्थ अधिकारीतलिसें नेपाःया राजदूतावास बर्लिनया अधिकारी नं च्वनादीगु खः ।(रासस) 

प्रधानमन्त्री केपी शर्मा ओली युद्ध व अशान्तिपाखें दिक्क जुयाच्वंगु हलिंयात शान्तिमय दयेकेत योग व ध्यानयात जीवन पद्धतिकथं नालेमाःगु धयादीगु दु।

हलिं ध्यान दिवस, २०८१ या झ्वलय् प्रधानमन्त्री व मन्त्रिपरिषदया ज्याकुथिपाखें थौं सैनिक मञ्च–टुँडिखेलय् जूगु ज्याझ्वःयात संबोधन यानादिसें प्रधानमन्त्री ओलीं ल्वाभःयात ल्वाभः हे छ्यलाः हलिमय् शान्ति मजुइगुलिं सकारात्मक बिचाः ज्वनाः ध्यान व योगयात नालेत इनाप यानादीगु खः।

प्रधानमन्त्री ओलीं सभ्य संस्कृति व सकारात्मक चिन्तनया नापं शारीरिक व मानसिक ध्यानयात मद्दिक न्ह्याकेमाःगु व थुगु कथंया ज्ञांयात विद्यालय व न्हूगु पुस्तायात लःल्हाये माःगु धयादिल। ध्यान प्राकृतिक ढङ्गं सचेत मानव जातिं छ्यःगु व सभ्यताया मुहान जूगु धयादिसें प्रधानमन्त्री ओलीं नेपाः देय्यात स्वस्थ दयेकेगु सरकारया सङ्कल्प पूवंकेत नं ध्यान व योगयात मद्दिक न्ह्याकेमाःगु जूगु धयादिल।

“मद्दिक पाय् िछगु नँसा त्वँसा नयाः झीसं आरोग्य जीवन हनेमाः। फयांफक्व बिरामी जुयाः वासः यायेत अस्पताल वने म्वालेमा धइगु बिचाः तयेमाः।

स्वस्थ्य व शान्तिमय हलिं दयेकेत झीपिं सकलें जुइमाः”, प्रधानमन्त्री ओलीं धयादिल, “सरकारपाखें ध्यान व योगया निंतिं यायेमाःगु ज्याय् जिगु ध्यान वंगु दु। स्वार्थीपन त्वताः एकाग्रताय् ध्यान यायेगु दक्व समस्यायात ज्यंकेगु उपाय नं खः।”

उगु झ्वलय् स्वामी आनन्द अरुण, सन्तोष केडिया व एलपी भानु शर्मां ध्यानया थी थी अभ्यास याकादीगु खः।