मदन भण्डारी लोकमार्ग अन्तर्गत मकवानपुरया बागमती गाउँपालिका–४ हरामी चोकया सतकय् थौं सुथय् इभी माइक्रो दुर्घटना जुयाः झिंखुम्ह घाःपाः जूगु दु।

सिन्धुलीं हेटौँडापाखे वयाच्वंगु मप्र ०२–००१ ज ००७२ ल्याःया उगु गाडी दुनेया लँपाखें हाइवे पिहां वयाच्वंगु ना ५ प ५५५८ ल्याःया मोटरसाइकलयात ठक्कर बियाः अनियन्त्रित जुयाः सतकं थ्यंमथ्यं १५ मिटर क्वय् कुतुंवनाः दुर्घटना जुयाः गाडी च्वनावःपिं व मोटरसाइकल चालकनापं यानाः झिंखुम्ह घाःपाः जूगु खः।

घाःपाः जूपिंत वासः याकेगु निंतिं स्थानीय साम्भी पोलिक्लिन लिसें सहकारी अस्पतालय् छ्वयाःगु धकाः जिल्ला प्रहरी ज्याकुथि मकवानपुरया प्रहरी निरीक्षक ठाकुर सापकोटां धयादीगु दु।

कतिं पुन्हिया दिं निसें लच्छियंकं न्ह्याइगु आदिनाथ मेला थनिनिसें न्ह्याःगु दु। येँया दक्षिणी भेग चोबहाःया गुँइ च्वंगु आदिनाथ देगलय् उगु मेला न्ह्याःगु खः।

देगलय् महाद्यः व पावर्तीया मंकाःचिं कथंया छधि जुयाच्वंगु मूर्ति तयातःगु दु। गुकियात अर्धनारेश्वर ‘आदिनाथ’ धायेगु याः। देगलय् हिन्दू व बौद्ध धर्मया अनुयायीतय्सं मंकाः कथं थःथःगु आस्था प्वंकेगु याइ। कात्तिक शुक्ल पुन्हि तक न्ह्याइगु मेलाय् स्वनिगः व जःखःया लागां भक्तजनत वयेगु याइ।

मेलाय् ब्वति काःसा भय, ल्वय् व विघ्नपाखें मुक्त जुयाः छेँय् सुख व समृद्धि दइ धइगु तायेका तःगु दु। मेला जःछि द्यःया दर्शन याःसा ल्वचं मकइगु व छ्यंगू सम्बन्धि ल्वय् मजुइगु धापू दु। बौद्धमार्गीतय्सं लोकेश्वरया कथं पुज्याइगु देगलय् ताःआयु दइगु, अकालं मसीगु, धनसम्पत्ति दइगु बौद्ध धर्वालम्बितय् विश्वास दु। लिच्छवीकालीन राजा अंशुवर्मां पलिस्था यानातःगु थुगु देगः ऐतिहासिक व पुरातात्त्विक महत्वं जाःगु दु। हिन्दूतय्सं शिवशक्तिया कथं व बौद्ध धर्मावलम्बीतय्सं आनन्दायी लोकेश्वरया कथं आदिनाथयात पुजा यायेगु याइ।

बौद्ध धर्मावलम्बीतय्सं करुणामय्या चिंया कथं व हिन्दू धर्मावलम्बीतय्सं आदिनाथया कथं द्यःयात मानेयानाः पुजा यायेगु याइ। मेला जःछि न्हिया न्हिथं बाजं थानाः द्यःया थाय् वयाः भजन लिसें पुजा यायेगु याइ। येँ नं थ्यंमथ्यं गुंगू किलोमिटर दक्षिणपाखे लाःगु उगु देगः सत्तिक चोबहाः च्वकां स्वनिगःया ल्वःवनेपूगु लू खंके फइ। उगु देगः सत्तिकलाःगु मञ्जुश्री पार्क, जलविनायक (क्वँय्नाः गणेद्यः), टौदह नं धार्मिक महत्वया थाय् खः।

खुसिबाः व चलखं यानाः देय ्न्यंकंया झिंच्यागू राजमार्गय् यातायात सेवा पूवंकं अवरुद्ध जूगु दु।प्रहरी प्रधान ज्याकुथिया कथं सङ्खुवासभाया भोटखोला गाउँपालिका–४या कोशी राजमार्ग, मकालु नगरपालिका–१४ दलदलेय् च्वंगु सिद्धिचरण राजमार्ग पूवंकं अवरुद्ध जूगु केन्द्रीय प्रहरी प्रवक्ता प्रहरी नायब महानिरीक्षक विनोद घिमिरें धयादिल।

अथे हे, धनकुटाया पाख्रिबास नगरपालिका–५ ढिकुरेया मध्यपहाडी लोकमार्ग, धनकुटाया हे साँगुरीगढी गाउँपालिका–१या कोशी लोकमार्ग, इलामया इलाम नगरपालिका–९ राजदुवालीलिसें मेची राजमार्गया थीथी थासय् अवरुद्ध जूगु दु। अथे हे, रसुवाया गोसाइँकुण्ड गाउँपालिका–२ या नेपाल चीन मितेरी ताँ, वहे गाउँपालिका–५ स्याप्रुबेँसीलिसेंया प्यथाय् पूवंकं लँ अवरुद्ध जूगु प्रहरीं धाःगु दु।

सिन्धुपाल्चोकया भोटेकोशी गाउँपालिका–४ चारकिलोय् अरनिको राजमार्ग, काभ्रेपलाञ्चोकया रोशी गाउँपालिका–११ माम्तीखोलाया बिपी राजमार्ग पूवंकं अवरुद्ध जूगु दु। वा वयाः खुसिबाः व चलखं यानाः मकवानपुरया बकैया गाउँपालिका–११ घट्टेघोलाय् कान्ति लोकपथ, मकवानपुरया हे भीमफेदी गाउँपालिका–८या कान्ति लोकपथ, मकवानपुरया हे इन्द्रसरोवर गाउँपालिका–३या कुलेखानी दक्षिणकाली सतक पूवंकं अवरुद्ध जूगु प्रहरी प्रवक्ता घिमिरें धयादिल।

अथे हे, सिन्धुलीया फिक्कल गाउँपालिका–६ नागस्थानया मध्यपहाडी लोकमार्ग व सिन्धुलीया हे सुनकोशी गाउँपालिका–१ नेपालथोकया बिपी राजमार्ग नापं अवरुद्ध जूगु प्रहरीं धाःगु दु।

इलामया चलखय् लानाः घाःपाः जुम्ह छम्ह मिसामचा लिसें प्यम्हेसित थप उपचारया निंतिं नेपाली सेनाया हेलिकप्टरपाखें झापा यंकूगु दु।

लिपांगु छुं दिं तक मदिक्क तच्वकं वा वयाः इलामया सन्दकपुर नगरपालिका–४ माबु इलाकाय् चलखय् लानाः घाःपाः जूपिंत स्थानीय स्वास्थ्य चौकीइ प्राथमिक उपचार लिपा हेलिकप्टरपाखें झापाया अस्पताल यंकूगु दु।सैनिक जनसम्पर्क लिसें सुचं निर्देशनालयया कथं, घाःपाः जूपिंखय् छम्ह मिसा मचालिसें स्वम्ह मिसा व छम्ह मिजं दु।

झापा मिलनबस्ती इलाकाय् सेनालिसेंया सुरक्षा फौजया ग्वाहालिइ म्हिगः बहनी मोटर बोटपाखें ४८, नाचापाखें ३१ व न्यासी वनाः १२म्ह यानाः मुक्कं ९१ म्हेसिया उद्धार यानाः सुरक्षित थासय् यंकूगु दु। 

मुग्लिन सतक व पृथ्वी राजमार्गय् थौं सुथसिया ६ ताः इलंनिसें यातायात सेवा न्हापाथें हे सञ्चालनय् वःगु दु।

वंगु शुक्रबाः व शनिबाः तच्वकं वा वयाः उगु सतकय् चलःया ग्याचिकु जुइफइगु धासें आइतबाः बहनी ९ ताः ई लिपा जक सार्वजनिक लिसें निजी यातायातया साधनत वये वनेगु दिकातःगु खः।

जिल्ला प्रहरी ज्याकुथि चितवनया प्रमुख प्रहरी उपरीक्षक गोविन्द पुरीया कथं यातायात सञ्चालनय् वयेवं दिकातःगु सवारी साधन थःथःगु गन्तव्यपाखे न्ह्याये धुंकूगु दु।

जिल्लाया १४ गू विश्राम कक्ष (होल्डिङ् सेन्टर)य् दिकातःगु सवारीसाधनत थःथःगु गन्तव्यपाखे वनाच्वंगु दु।