भारत, अमेरिका व बेलायतया लागिं प्रस्तावित राजदूततय् नां संसदीय सुनुवाइ समितिं अनुमोदन याःगु दु ।

संसदीय सुनुवाइ समितिइ सांसदतय् न्ह्यसःया लिसः बीधुंकाः भारतया लागिं प्रस्तावित राजदूत डाक्टर शंकर शर्मा, अमेरिकाया लागिं प्रस्तावित राजदूत श्रीधर खत्री व बेलायतया लागिं प्रस्तावित राजदूत ज्ञानचन्द्र आचार्यया नां सर्वसम्मतं अनुमोदन याःगु खः ।

थ्वयां न्ह्यः सुनुवाइया झ्वलय् सांसदतय्सं बेलायतया लागिं प्रस्तावित राजदूत ज्ञानचन्द्र आचार्ययात गोर्खा सैनिकतय् अधिकारया पक्षय् ज्या यायेत इनाप यानादिल । सांसदत सुरेन्द्र पाण्डे व देव गुरुङलिसें नं बेलायती सेनाय् ज्या यानाच्वंपिं व सेवा निवृत्त नेपाली नागरिकया ज्वलिंज्वः पेन्सनलिसेंया समस्या ज्यंकेत इनाप यात ।

अथे हे, सांसद भीमसेनदास प्रधानं बेलायती प्रधानमन्त्रीयात नेपाल भ्रमण याकेगु विषययात प्राथमिकताय् तयेत इनाप यानादिल । सांसद जितेन्द्रनारायण देवं थीथी देशय् दुपिं नेपाली दूतावास व नियोगतय् ज्या अनुगमन यायेत संसदीय संयन्त्र माःगु धयादिल ।

संसदीय सुनुवाइया झ्वलय् अमेरिकाया लागिं प्रस्तावित नेपाली राजदूत श्रीधर खत्रीं मिलेनियम च्यालेन्ज कर्पोरेसन (एमसीसी) यात इन्डो प्यासिफिकलिसे स्वायेगु गलत जूगु धायदिल । थुकी नेपाल व अमेरिका निखें हे भ्रम न्यंकातःगु वय्कःया धापू खः ।

खत्रीं एमसीसी विकासया लागिं वःगु अनुदान खःगु व संसदं पास यायेमाः धकाः नेपालया हे कानुन मन्त्रालयं धाःगु धयादिल । अमेरिकी सहायकमन्त्रीं नं एमसीसी इन्डो प्यासिफिक रणनीति अन्तर्गत लाः धाःगुलिं भ्रम न्यंगु वय्कःया जिकिर खः ।

भारतया लागिं प्रस्तावित राजदूत डाक्टर शंकर शर्मां भारतलिसे सहकार्य यासें थवंथवय् हितया लागिं न्ह्याःवनेत न्हापां विश्वासया लकस, निगूगु रणनीतिक व स्वंगूगु अल्प, मध्य अले दीर्घकालीन योजना दयेकाः न्ह्याःवनेगु जानकारी बियादिल ।

बैङ्किङ् कारोवारया लागि येँ महानगरपालिकां एनआइसी एशिया बैङ्कनाप सम्झौता याउगु दु।

वडानाप राजस्व संकलन जुइगु केन्द्र व समग्र ज्यायाइगु बैङ्किङ् ज्याया लागि महानगरं प्रतिस्पर्धाया माध्यमपाखे छनौट याना एनआइसी नाप सम्झौता याउगु दु।

महानगरया मेयर विद्यासुन्दर शाक्यया रोहवरय् प्रमुख प्रशासकीय अधिकृत राजेश्वर ज्ञवाली व वैङ्कया प्रमुख कार्यकारी अधिकृत रोशनकुमार न्यौपाने न सम्झौता पत्रय् हस्ताक्षर यानादीगु खः।

प्रतिस्पर्धापाखे छनौटमा जुगु बैङ्क नााप सम्झौता यायेगु विषय मंसिर ७ गते च्वंगु ७१ क्वःगु कार्यपालिका बैठकं निर्णय याउगु खः। सम्झौतालिपा प्रमुख प्रशासकीय अधिकृत ज्ञवालीं महानगरया आर्थिक कारोवार पूर्ण रुपं बैङ्कपाखे जुइ धुका वित्तिय सुशासन कायम जुगु दु धका धयादीगु खः।

थ्व स्वया न्ह्यः वडातह तक वने मफुगु खः। आः दक्को वडाया बैङ्कय् शाखा दइ धका धयादीगु खः।

हल्चोकय् आकाश भैरवया मुर्ति थौं चान्ह्य खुया यकूगु दु।

हल्चोक आकाश भैरव गुथिया अध्यक्ष सागर पुतुवारं जानकारी बिउगु कथं थौं चान्ह्य १२ बजेनिसे साढे १२ बजे दुने उगु मुर्ति खुया यकूगु खः।

द्यःया लिउने पखः गया वया प्यगः न्यागः मोटरसाइकल वःगु खः। अन द्यनिइम्ह पुजारीयात ज्यानया धम्कि बिया उगु मुर्ति खुया यकूगु खः।

आः उगु मुर्ति खुया यकूपिनिगु मालिइगु ज्या पुलिसं यानाच्वंगु दु।

छु दिं निसे लगातार घटे जुयावया च्वंगु शेयर बजा थौं सोमवाः भचा थहावंगु दु।

शेयर बजाःया परिसूचक नेप्से थौं ३२ दशमलव २२ अङ्कं थहावना २ हजार ५ सय ४६ दशमलव शून्य ८ विन्दुइ थहावंगु दु।

थौं दक्को समूहया शेयर कुहावंगु खः। विकास बैंक, उत्पादन, फाइनान्स व बीमा समूहया शेयर धासा थहावंगु दु। नेप्सेनाप कारोबार रकम न सुधार जुगु दु। २२७ कम्पनीया ९४ लाख ७१ हजार कित्ता शेयर ४ अर्ब ५४ करोड रुपैयाँया कारोबार जुगु दु।

दकलय् अप्वो नबिल बैंकया १७ करोड १५ लाख रुपैयाँया शेयर किनबेच जुगु दु। थौं मेरो माइक्रोफाइनान्स वित्तीय संस्थाया शेयर १० प्रतिशतं व एक्सेल विकास बैंकया साढे ९ प्रतिशत थहावंगु दु।

समग्र बजार थहावंसा जनउत्थान लघुवित्तया शेयर झन्डै ७ प्रतिशतं घटे जुगु दु।

नेपालय् न कोरोना भाइरसया न्हुगु भेरियन्ट ओमिक्रोन संक्रमण पुष्टि जुगु दु।

सोमबार स्वास्थ्य मन्त्रालयं ग्वसाः ग्वंगु पत्रकार सम्मेलनय् सहप्रवक्ता समीरकुमार अधिकारीं नेपालय् न ओमिक्रोन संक्रमण पुष्टि जुगु जानकारी बिउगु दु।

छम्ह ६६ दँ दुम्ह विदेशी नागरिक व वनाप सम्पर्क दुम्ह ७१ दँ दुम्ह मेम्ह नेपाली नागरिकयात मंसिर १९ गते ओमिक्रोन संक्रमण पुष्टि जुगु दु। मन्त्रालयया कथं उमित मंसिर ७ गते परीक्षण याउगु खः।

निम्हेसिया हे कोरोना भाइरस विरूद्धया खोप कयातःपि खः। वंगु मंसिर ३ गते न्हुगु भेरियन्ट पुष्टि जुम्ह ६६ दँ दुम्ह विदेशी नागरिक त्रिभुवन अन्तरराष्ट्रिय विमानस्थल जुया नेपालय् प्रवेश याउगु खः।

तर कोभिड–१९ नाप मिले जुगु लक्षण उपिके खनेदुगु खः। वयालिपा राष्ट्रिय जनस्वास्थ्य प्रयोगशाला टेकुइ जिन सिक्वेन्सिङ विधिपाखे परीक्षण याउलि मंसिर १९ गते ओमिक्रोन नेपालय् न्हापागु पटक पुष्टि जुगु धका मन्त्रालयया सहप्रवक्ता समीरकुमार अधिकारीं धाउगु दु।