सर्वोच्च अदालतं गभर्नर महाप्रसाद अधिकारीयात ज्यायायेत रोके मयायेत अल्पकालीन अन्तरिम आदेश जारी याउगु दु।

न्यायाधीश हरि फुयालया एकल इजलासं प्रारम्भिक सुनुवाइ यासे गभर्नरयात अनुसन्धान यायेत जाँचबुझ समिति गठन यायेर्गु २४ चैतया मन्त्रिपरिषदया निर्णय व उगु निर्णयया आधारय् अर्थ मन्त्रालयं गभर्नरयात याउगु पत्राचार कार्यान्वयन मयायेत आदेश बिउगु दु।

‘नेपाल सरकारया मिति २०७८÷१२÷२४ या निर्णय नाप अर्थ मन्त्रालयया मिति २०७८÷१२÷२५ या निवेदकया नामय् जारी याउगु पत्राचार तत्काल कार्यान्वयन मयायेत व मयाकेत निवेदकपिनिगु थःगु पदीय जिम्मेवारी पूरा याकेबिइत धाउगु दु ‘ विपक्षीपिनिगु नामय् अल्पकालीन अन्तरिम आदेश जारी यानाबिउगु दु’ आदेशय् धाउगु दु।

सर्वोच्चं अन्तरिम आदेशया लागि निगु हे पक्षयात वैशाख १३ गते जुगु छलफलया लागि सःतूगु दु। जाँचबुझ समिति गठन याना थःत निलम्बन यायेगु सरकारया निर्णयविरुद्ध गभर्नर महाप्रसाद अधिकारीं सर्वोच्च अदालतय् रिट निवेदन दर्ता याउगु खः।

वंगु छु लगातार घटे जुयाच्वंगु शेयर बजाः थौं मङ्गलवाः हाकन थहावंगु दु।

शेयर बजार परिसूचक नेप्से थौं १३ दशमलव ३७ अङ्कं थहावना २ हजार ३ सय ५७ दशमलव २४ विन्दुइ थ्यःगु दु।

दक्को समूहया शेयर थहावंगु दु। २२९ कम्पनीया ३२ लाख १३ हजार कित्ता शेयर १ अर्ब ३२ करोड ६८ लाख रुपैयाँया कारोबार जुगु दु।

दकलय् अप्पो नबिल बैंकया ६ करोड ३० लाख रुपैयाँया शेयर किनबेच जुगु खः। नेष्डो समृद्ध लघुवित्त व ग्रीन भेन्चर्स कम्पनीया शेयर १० प्रतिशतं थहावंगु दु।

समग्र बजाः थहावंसा दिव्येश्वरी हाइड्रोया शेयर झन्डै ९ प्रतिशतं घटे जुगु दु।

प्रमुख विपक्षी दल नेकपा एमाले व लोकतान्त्रिक समाजवादी पार्टी (लोसपा) दथुइ वीरगञ्ज महानगरपालिकाय् तालमेल जुइगु सम्भावना बढे जुगु दु।

स्थानीय स्तरय् लगातार जुयाच्वंगु निगु दल दथुइया छलफलं तालमेल न्ह्यने यकेगु अनौपचारिक सहमति जुगु दु।

तर थुगु अनौपचारिक सहमतियात शीर्ष नेतापि दथुइ छलफलपाखे क्वछिइगु धका छम्ह नेता धाउगु दु।

प्रधानमन्त्री नाप पार्टी सभापति शेरबहादुर देउवायात बालुवाटारय् नापलाये धुका चिरिबाबु महर्जन पत्रकारपि नाप खँल्हासे यलय् थम्हेसिया हे टिकट वइगु दाबी याउगु दु।

टिकट कायेखनिला धइगु न्ह्यसलय् पत्रकारपि न्ह्यसःया लिसय् वयकलं धयादीगु दु, ‘टिकट जितः हे वइ, मेयरय् त्याइम्ह न जि हे जुइ।’ धका धयादीगु दु।

तर थःम्हेसिया देउवायात नापलाना मेयरया टिकट फ्वनागु मदु धका न स्पष्ट याउगु दु। वयकलं यलय् थ्व स्वया न्ह्यः त्याउगु छु न थासय् कांग्रेसं त्वत्येमखु धका न धयादीगु दु।

महर्जनं धाउगु दु, ‘मेयर उपमेयर व झीगु वडा त्याउगु थासय् गन त्वत्ये मखु।’

हेटौंडा उपमहानगरपालिकाय् गठबन्धन याये मज्यु धका कांग्रेसया छगु पुचः न पार्टीया हेटौंडा नगर समिति कार्यालयय् तालाबन्दी याउगु दु।

जिल्ला सदस्य सञ्चिता लुईंटेल व तरुण दलया नगर सभापति सुनिल गिरीनाप मेपि नेता व कार्यकर्ताया पुचः न हेटौंडा उपमहानगरपालिका समितिया बैठक न्ह्यानाच्वंगु इलय् तालाबन्दी यानाबिउगु खः।

उगु बैठकय् उपमहानगरपालिका समितिया सभापतिपि नाप १९ गु वडाया प्रतिनिधिपि दुगु खः।