वंगु २४ घण्टाया दुने देयन्यक थप ९६८ म्हेसित कोरोना भाइरस संक्रमण पुष्टि जूगु दु।

स्वास्थ्य तथा जनसंख्या मन्त्रालयया कथं पीसीआर व एन्टिजेन याना १४ हजार ९७१ म्हेसिगु परीक्षण याउगुलि ९६८ म्हेसित संक्रमण पुष्टि जूगु दु।

शुक्रबाः ५४० म्हेसित संक्रमण पुष्टि जुगु दु। अथेहे २४ घण्टाय् २६२ म्ह कोरोना संक्रमणमुक्त जुगु दु।

वंगु २४ घण्टाय् येँ २८४, यलय् ६२, मोरङय् २९, ख्वपय् २३, चितवनय् २०, दाङय् १५, कास्कीइ १३, धनुषाय् १०, सुनसरीइ ९, काभ्रे व कैलालीइ ८÷८ म्हेसित संक्रमण पुष्टि जुगु दु।

नेपालभाषा परिषदया अध्यक्ष नाप नांजाःम्ह साहित्यकार बौद्ध विद्धान प्रा. सुवर्ण शाक्य यलया स्टार हस्पिटलय् भर्ना जुयादीगु दु।

प्रा. शाक्य ब्रेन ह्यूमरेज जुया वासःया लागि स्टार अस्पताल यंकूगु निष्ठानन्द स्मृति गुथिया छयाञ्जे पवित्र बज्राचार्य धयादिगु दु।

आः वयकःयात आइसीयुलय् तया वासः जुयाच्वंगु दु।

नेपाल आदिवासी जनजाति पत्रकार महासंघ (फोनिज)या बागमती प्रदेश अध्यक्षय् युवराज श्रेष्ठ सर्वसम्मतं ल्यउगु दु।

बिहीबाः हेटौँडाय् जुगु प्रादेशिक महाधिवेशनं श्रेष्ठया नेतृत्वय् न्हुगु समिति सर्वसम्मत ल्यउगु दु। अथेहे उपाध्यक्षय् राजेश रुम्बा व डोल्मा शेर्पा, महासचिवय् श्याम राना मगर, संस्थागत सचिवय् राजु नापति व संगठन सचिबय् शिशिर दोङ, कोषाध्यक्षय् शंकर श्रेष्ठ निर्वाचित जुगु दु।

सदस्यय् पासाङ शेर्पा, मीना श्रेष्ठ, कमला तामाङ, पुर्णबहादुर मगर, उद्दवकुमार श्रेष्ठ, अर्बिन्द्रमान सिंह, सरोज लामा, पासाङ घिसिङ अथेहे, रवीन्द्र सिन्जाली मगर, दिक्की डोल्मा शेर्पा, फुर्वा तामाङ, सन्जय चौधरी व हिरालाल गुरुङपिन्त ल्यउगु दु। लेखा संयोजकय् राजेन्द्र मानन्धर, सदस्यपि दोलख गुरुङ व राकेश चौधरीयात ल्यउगु दु।

अनुशासन समिति संयोजकय् बाबुकाजी श्रेष्ठयात ल्यउगु दु सा  सदस्यय् रिदेन महर्जन व रसिया श्रेष्ठपिन्त सर्वसम्मतं ल्यउगु खः।

बालुवाटारस्थित ललिता निवास जग्गा घोटाला प्रकरणय् नेपाल प्रहरीया केन्द्रीय अनुसन्धान ब्युरों ३सःम्ह स्वयां अप्वः मनूतविरुद्ध जिल्ला अदालत येँय् नं जारी याःगु पक्राउ पूर्जी लःल्हानाकाःगु दु ।

सरकारी भ्वं किर्ते याःगु द्वपनय् उपिंविरुद्ध येँ जिल्ला अदालतं पक्राउ पुर्जी जारी याःगुलिइ उगु पूर्जी सीआइबीं लःल्हानाकाःगु खः ।

सरकारी जग्गा जफत लित कायेगु नामय् थीथी मनूततय्गु नामय् नामसारी यानाः १३७ रोपनी स्वयां अप्वः जग्गा हिनामिना याःगु सम्बन्धय् अख्तियार दुरुपयोग अनुसन्धान आयोगं १७५ विरुद्ध विशेष अदालतय् मुद्दा दायर यायेधुंकूगु दु ।

विशेष अदालतय् उगु मुद्दा न्ह्यानाच्वंगु इलय् सीआइबीं नं व हे प्रकरणलिसे सम्बन्धित ३सः स्वयां अप्वः मनूतय्त अनुसन्धान यानाच्वंगु दु । सीआईबीं पक्राउ पुर्जी काःपिं मनुखय् ७ उच्च पदस्थ व स्वम्ह व्यापारिक घरानाया मनूत नं दु ।

पक्राउ पूर्जीया धलखय् लाःपिंलय् काँग्रेसया नेता अले पूर्व उपप्रधानमन्त्री विजयकुमार गच्छदार, पूर्व मन्त्रीत चन्द्रदेव जोशी, डम्बर श्रेष्ठ व छविराज पन्त नं दु ।

अथे हे, अख्तियारया पूर्व प्रमुख आयुक्त दीप बस्न्यात, पूर्व सचिवत दिनेशहरि अधिकारी, युवराज भुसाल, छविराज पन्त व नारायण मलेगो नं दु ।

अथे हे, ब्यापारीत श्रवणकुमार गोयल, कैलाश चन्द्र, गोयल, मीनबहादुरलिसेंयाविरुद्ध नं पक्राउ पुर्जी जारी जूगु दु । सीआईबीं अनुसन्धानया झ्वलय् लुयावःगु तथ्य व दसिया लिधंसाय् भू–माफियानिसें सरकारी कर्मचारी, गुठी संस्थानया कर्मचारी व प्रतिनिधि, म्हय् दयेकूपिं मनूत, नक्कली म्हय्त, राणा परिवार, जग्गा न्यायेमीगुलिइ ल्हाः दुपिं मनूत, आःया जग्गाधनीत दक्वसित विपक्षी दयेकाः मुद्दा दर्ता यायेगु तयारी दु ।

थ्व प्रकरणया मूख्य अभियुक्त शोभाकान्त ढकाल व विचौलियामध्येया रामकुमार सुवेदी व वय्कःया जहान माधवी सुवेदी जक थुनाय् दु ।

सरकारं ६०दं च्वय्या ज्याथः नागरिक व दीर्घल्वगितय्त बीगु धाःगु ‘बुस्टर’ डोज खोप अभियान स्थगित याःगु दु ।

स्वास्थ्य तथा जनसंख्या मन्त्रालयं विज्ञप्ति जारी यानाः छुं लक्षित वर्गया लागिं कोभिड–१९ खोपया थप मात्रा बीगु ज्याझ्वः स्थगित जूगु जानकारी ब्यूगु खः ।

दक्वं नागरिकयात कोभिड–१९ विरुद्धया पूवंगु मात्रा खोप याकनं बीगु सरकारया प्राथमिकताय् दुगुलिं बूस्टर डोज खोप स्थगित जूगु धाःगु दु । थप खोपया खँय् प्राविधिक विषयस सहलह अले तयारी यानाः मेगु लानिसें थुगु विषयस जानकारी याकेगु मन्त्रालयं न्ह्यथंगु दु ।

सरकारं भेरोसेल खोप काःपिं ६०दं च्वय्या ज्याथः नागरिक व दीर्घल्वगितय्त मंगलबाःनिसें थप छगू मात्रा खोप बीगु धकाः सोमबार सुचं जारी याःगु खः । तर व हे सुचंया लिधंसाय् खोप केन्द्र थ्यंपिं लक्षित वर्गयात खोप मब्यूगु खः ।

थुखे फाइजर खोप बीत माःगु ६ लख ६४ः स्वयां अप्वः सिरिन्ज नेपाल थ्यंकःवःगु दु । फाइजर कम्पनीया हे ६ लख ६४ः व ६सःत्या सिरिन्ज नेपाल थ्यंकःवःगु खः । फाइजर खोप कायेत व हे कम्पनीया ० दशमल ३३ एमएमया सिरिन्ज माः ।

पुस १३ गतेनिसें स्वनिगःलिसें ८ जिल्लाय् १२दँनिसें १७दँया बैंश पुचलय् फाइजर खोप बीगु तयारी याःगुलिइ सिरिञ्ज अभावाय हुनिं खोप अभियान स्थगित जूगु खः । खोपया लागिं माःगु घोलक धाःसा थ्वयां न्ह्यः हे थ्यनेधुंकूगु दु ।

सरकारं सिरिञ्ज वयाकथं स्वनिगःलिसें ८ जिल्लाय् फाइजर खोप बीगु धाःगु दु ।